Khalaatiya 2
2
Buulus sabbatooh fi khidimtah
1Wa battaan baʼad 14 sana, ana macheet Madiinat al-Khudus marra taaniye. Wa Barnaaba kula macha maʼaayi wa chilna maʼaana akhuuna Tiitus. 2Macheet be sabab ruʼya min Allah. Wa macheet le kubaaraat al-muʼminiin al-maʼruufiin wa lammeet maʼaahum fi malamma wiheedna. Wa gaddamt leehum al-bichaara al-ballakhtaha fi ust al-naas al-ma Yahuud. Dawwart niʼakkid kadar al-khidme al-awwal sawweetha wa l-hassaʼ gaaʼid nisawwiiha ma tabga baatle. 3Wa Tiitus al-gaaʼid maʼaayi hu Yuunaani, ma Yahuudi wa laakin ma jabaroona le nitahhuruuh. 4Hatta kan akhwaan waahidiin ma muʼminiin be l-sahiih, andasso ambeenaatna wa dawwaro yitahhuruuh. Humman jo be talbiid yijaasusu fi l-hurriiye al-indina be l-Masiih Isa achaan dawwaro yarbutu foogna aadaat al-Yahuud lahaddi nabgo misil abiid. 5Laakin aniina ma khassadna wa ma simiʼna kalaamhum achaan dawwarna nahfado leeku al-kalaam al-sahiih al-Allah antaana fi bichaarat al-Masiih.
6Wa hajjeena maʼa l-naas al-akhwaanna jaʼaloohum kubaaraat. Wa min zamaan kan humman kubaaraat walla ma kubaaraat kula, da ma lammaani. Giddaam Allah kulla l-naas sawa sawa. Wa humman ma zaado cheyy waahid le kalaami. 7Be l-aks, bigi leehum waadih kadar Allah kallafaani be ballikhiin bichaarat al-Masiih le l-naas al-ma Yahuud misil hu kallaf Butrus be ballikhiin bichaarat al-Masiih le l-Yahuud. 8Wa misil Allah azal Butrus wa sawwaah rasuul le l-Yahuud, hu azalaani ana kula wa sawwaani rasuul le l-ma Yahuud.
9Wa l-kubaaraat al-maʼruufiin misil amad al-muʼminiin, humman Yaakhuub wa Butrus wa Yuuhanna, bigi leehum waadih kadar Allah antaani al-niʼma di. Wa khalaas, karaboona be l-iid al-zeene ana wa Barnaaba achaan yiwassufu kadar kullina muchtarikiin fi l-khidme. Wa astafago kadar aniina nakhdumu fi ust al-naas al-ma Yahuud wa humman yakhdumu fi ust al-Yahuud. 10Talabo minnina cheyy waahid bas. Dawwaro aniina nifakkuru fi l-masaakiin al-maʼaahum. Wa da bas al-cheyy al-min awwal niriid nisawwiih.
Buulus kachcha le Butrus
11Laakin wakit Butrus ja fi Antaakiya, ana gammeet diddah wa waajahtah achaan hu khaltaan. 12Gubbaal naas waahidiin ma yaju min bakaan Yaakhuub, Butrus gaaʼid yaakul maʼa l-akhwaan al-ma Yahuud. Laakin min al-naas dool jo khalaas, hu bada yikiss min al-naas al-ma Yahuud wa anfarag minhum achaan hu khaayif min naas Hizib al-Tahuura.#2:12 Hizib al-Tahuura Humman min al-Yahuud al-aamano be l-Masiih. Wa laakin yuguulu kadar Allah ma yakhbal al-naas al-ma Yahuud illa kan yitaabuʼu kulla aadaat al-Yahuud wa yittahharo. 13Wa akhwaan aakhariin min al-Yahuud taabaʼooh fi nifaakhah da lahaddi waddo maʼaahum Barnaaba zaatah fi nifaakhhum.
14Laakin wakit ana chift kadar humman ma maachiin adiil wa ma yitaabuʼu al-kalaam al-sahiih al-Allah antaana fi bichaarat al-Masiih, gammeet hajjeet le Butrus giddaamhum kulluhum. Wa gult : «Inta Yahuudi wa bigiit misil naadum ma Yahuudi wa khalleet minnak aadaat al-Yahuud. Wa misil da, maala tidoor tajbur al-naas al-ma Yahuud le yabgo misil al-Yahuud ?»
Nabgo saalihiin be l-iimaan
15Aniina zaatna mawluudiin Yahuud wa ma min al-muznibiin al-ma Yahuud dool. 16Wa be da kula, naʼarfu kadar Allah ma yajʼal ayyi naadum saalih achaan hu yitaabiʼ churuut al-Tawraat. Laakin hu yajʼal al-naadum saalih kan hu muʼmin be l-Masiih. Wa be misil da, aniina aamanna be Isa al-Masiih achaan Allah yajʼalna saalihiin be sabab iimaanna be l-Masiih wa ma achaan nitaabuʼu churuut al-Tawraat. Achaan ma fi insaan waahid yabga saalih giddaam Allah be tabbigiin churuut al-Tawraat.
17Chilna derib al-Masiih le nabgo saalihiin wa be da kula, irifna nufuusna muznibiin. Hal nuguulu al-Masiih hu sabab zunuubna walla ? La, abadan. 18Laakin kan ana nigabbil wa nitaabiʼ battaan al-aadaat al-awwal khalleethum minni, misil da bas nabga khaati be l-sahiih.
19Al-Tawraat sawwa foogi amalah wa khalaas, fi l-cheyy al-bukhuss churuut al-Tawraat, ana mayyit. Wa ana mutt le churuutah achaan nugumm niʼiich le Allah. Ana mutt maʼa l-Masiih fi saliibah. 20Wa hassaʼ da, al-naadum al-hayy ma ana laakin al-Masiih hu hayy fiyi. Wa kulla cheyy al-nisawwiih fi l-dunya, nisawwiih fi l-iimaan be Ibn Allah al-habbaani lahaddi anta nafsah dahiiye fi chaani. 21Abadan ana ma nankur niʼmat Allah. Kan al-naas yabgo saalihiin be tabbigiin churuut al-Tawraat, misil da al-Masiih maat bala sabab.
Currently Selected:
Khalaatiya 2: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.