Izikiɛ 3
3
1Ǹaa kɛ́ɛ tíi, Yâwɛɛ è mò ḿâ ǹyɛɛi, “Núu-kpune ǹóŋ, zɛŋ ŋí ŋa dɛɛ̂i ípɔi mii. Ye gɔlɔi ŋí míi íli ílono Eezuɛ-ŋai pɔ.” 2Nya ƃe ŋá ńa tàa é gɔlɔi lɔ́ ńa ŋá mii. 3È ŋɔ́nɔ mò ḿâ ǹyɛɛi, “Núu-kpune ǹóŋ, gɔlɔi ŋí ŋá dɛ̀ɛ ípɔi mii ípela.” Nya ƃe ŋá mìii. È kɛ̀ kpɔ́ a nɛ̃ɛ yɛ̂ɛ kɔ̃́iŋ wûlɔ. 4Naa pôlu ma, è mò ḿâ ǹyɛɛi, “Núu-kpune ǹóŋ, ye lí Eezuɛ-ŋai pɔ́ naa í ŋa-worɛ wooi ƃó dîa. 5Ḿve ítɛɛ̂i ǹûai pɔ́ nyii-ŋai díkaa a sîi da kpɛ́ni díla sîi-woo kɛ́ ƃò a da kpɛ́ni-ŋa. Kɛ́lɛ ŋ́gaa ítɛɛ̂i Eezuɛ-ŋai pɔ́ naa. 6Ḿve ítɛɛ̂i núu-suu támaa sáma nyii-ŋai díla sii-woo káa a da kpɛ́ni-ŋa, gbanaŋɔɔ nyii ífa pɔ̂ri mɛnii, kpaa máŋ ífa pɔ̂ri târei zui. Ǹyaŋ eê kɛ̀ ŋá ítɛɛ sîi da kpɛ́ni-ŋa pɔ naa, dîi pɔri díwoli tɔɔ̂i yâ. 7Kɛ́lɛ, Eezuɛ-ŋai dífe pâi díwoli tɔɔ̂i yâ. Kpɛ́ni fêi dífe ŋ̀wɛ̂li dí díwoli tɔ́ɔ ḿâ. Eezuɛ-ŋai wôlii kpɔ̂lɔɔi dílii-su kpanaŋɔɔ. 8M̀ɛni ma ńyaŋ ŋâa íŋuŋ-su kpanaŋ, ŋa íwôlii kpɔ́lɔ a tɛɛ díwɔ-ŋai dîa. 9Ŋa pâi íŋuŋ-su kpananîi é tɛ́ɛ kɔni-ƃela ma. Ífe yào dîa, kpaa máŋ ílii é tóo pôlu a díkwaa káa ŋɛi-gaoi. Kpɛ́ni fêi díkaa a tɔɔ mâ-ƃela.” 10Ǹaa kɛ́ɛ tíi, è ŋɔ́nɔ mò ḿâ ǹyɛɛi, “Núu-kpune ǹóŋ, ŋ̀óo-ŋai kélee ŋa pâi môi yâi, íwoli tɔ́ɔ mà a ǹɛ́lɛɛ é lɛ́ɛ íkili-ŋa. 11Ye lí ínûai nyii-ŋai díkaa gɔ̀-pu-perei sui í mó dîa, a nɛ̃ɛ ma dí díwoli tɔ́ɔ kpaa máŋ dífe díwoli tɔ̀ɔ yâ, yɛɛ dîa, Yâwɛɛ Ɣâla ƃé mò tí.”
12Nya ƃe mɔ̂leŋ è ńziɣê é ńdɛ ŋ̀elei su. Yâwɛɛ ŋɔfólo-laai è nâa siɣe dɔɔ̂i. Ŋá tíŋ kɛ́tɛ da mɛ̀ni yɛɛ ǹɔii a kɛ̀ pûi zu. 13Ǹyaŋ zɛŋ tíŋ kɛ́tɛi è kɛ̀ a ŋ̀âla-taa kôoŋ-sãai koôŋ tìŋ a tãi díkɛ̀ koôŋ ni la díkoôŋ-ŋai díkɛ pîlaŋ díkîe ni dîai, gáraŋ-ŋai díkɛ ƃò dípɛ̂rɛ mai. Zãâi ŋí ƃé dítiŋ è kɛ̀ yɛ̂ɛ ǹɔii a kɛ̀ pûi zu. 14Mɔ̂leŋ è ńdɛ̀ ɣêlei é lí a ńyãa. Ńii è kɛ̀ kpɔ́ a ŋ̀wanaa. Kɛ́lɛ Yâwɛɛ yée è kɛ̀ kpɔ́ ḿâ a gbanaŋɔɔ. 15Nya ƃe ŋá sèri gɔ̀-pu kɛ́-ƃelai dîa nyii-ŋai kɛ̀ Tɛɛ-a-bii nyii kɛ̀ Siƃa Ya-leei kɔlɛi. Ŋá gɛ̀ naa a fólo lɔ́ɔlu mɛi feerɛ ńdɛ̂i-pere.
Yâwɛɛ è Izikiɛ kɛ̀ a sɛŋ mɛi káa-nuu
(Izikiɛ 33:1-9)
16Ɣele lɔ́ɔlu mɛi feerɛi kɛ́ɛ a kpɛɛi, Yâwɛɛ è lòno ḿbɔ. 17È mò ḿâ ǹyɛɛi, “Núu-kpune ǹóŋ, ŋa ísiɣe a gɛɛ íkɛ a sɛŋ mɛi káa-nuu Eezuɛ-ŋai mɛi. Tãi kélee yâ ńa-woo mɛ̀ni lai a gɛɛ í m̀aa lia-woo ƃó ḿî dîa a gbanaŋɔɔ. 18À kɛ̀ ŋa kɛ̀ ŋwana lɔ̂ɔ-nuu mà, ‘Ya pâi saa tí-ti ƃôi,’ ǹyaŋ à kɛ̀ ífe ǹia-wôoi ŋí ƃó ní m̀a a gbanaŋɔɔ, kpaa máŋ ífe mó ní mà a gɛɛ é kpéra ŋɔŋwana-lɔ̂ɔi ma, a gɛɛ é ŋɔfúlu-laai maa kɔ̃ɔ, m̀aa ŋwana-lɔɔ-nuui tí a pâi saâi ŋɔsɔnyɔ̂ŋ su. Kɛ́lɛ m̀aa mɛ̂ni a pâi lɛɛ̂i íŋûa. 19Kɛ́lɛ, à kɛ̀ ya ŋ̀wana lɔ̂ɔ-nuui lia-wôo ƃò ŋɔŋwana lɔ̂ɔ tuai mɛ̂ni ma ǹyaŋ vé ŋ̀wóli tɔɔ ní yâ é tée ŋɔŋwana lɔ̂ɔi pôlu, a pâi saâi ŋɔŋwana lɔ̂ɔ tuai su. Kɛ́lɛ, ya pâi kɛ̂i a íŋuŋ mâ ƃóɔɔ m̀aa mɛ̂ni ma.
20“Ǹaa pôlu ma, a kɛ̀ teniŋ ƃô nùu a bôlu tɔ̀ɔ ŋɔteniŋ ƃô tuai mâ é sɔnyɔ̂ŋ kɛ́, ŋá pâi baâi. Kpɛ́ni fêi ífe ǹia-woo ƃó ní. A pâi saâi ŋɔsɔnyɔ̂ŋ su. Denîŋ-ƃo tuai nyii è gɛ̀ a bɔlɔɔi a pâi liî kpɛ́ni-kpɛni. Ǹyaŋǹyaŋ ŋa pâi ísonii m̀ɛni ma. 21Ǹyaŋ à kɛ̀ ya deniŋ ƃô nuui lia-woo ƃò é kpéra ŋɔsɔnyɔ̂ŋ mâ, a ŋ̀óli tɔ̀ɔ yâ vé sɔnyɔ̂ŋ kɛ́ ní, a pâi lɛɛ̂i ɣele ma. Kpɛ́ni fêi è ŋ̀óli tɔ̀ɔ ília-wooi ma. À kɛ̀ tí yá máŋ ya pâi lɛɛ̂i ɣele ma.”
Izikiɛ a pâi kɛ̂i a mu-gbɛ-nuu
22Yâwɛɛ ŋɔwála-wala-laai è kɛ̀ ḿɛi é mò ḿâ ǹyɛɛi, “Ímu-siɣe íli dìŋ-tiŋ-su. Ŋa pâi mɛni da ƃôi yâ naa.”
23Nya ƃe ŋá ḿu sìɣe ŋá lí dìŋ-tiŋ su. Naa kɛ́ɛ tíi, ŋá Yâwɛɛ ŋɔfólo-laai kàa tɔɔ̂-ni naa gɛɛ nɔ́ yɛ̂ɛ nyii ŋá gàa tɔ̂ɔ-ni Siƃa Ya-leei kɔlɛi. Ŋá tôo ǹɔii mâ ŋá ŋuŋ mâ pîlaŋ. 24Kɛ́lɛ mɔ̂leŋ è pà é lɔ́ ŋ́gbonôi ŋá mu siɣe ŋá tɔ́ɔ. Nya ƃe è lòno ḿbɔ ǹyɛɛi, “Ímu siɣe íli í íloo ípɛrɛi mu. 25Ǹyaŋ à kɛ̀ tí óo núu-kpune ǹóŋ, ŋa pâi íɣirîi a gɛɛ ífa lâ kula lá ípɛrɛi mu íli dísama. 26À kɛ̀ tí, ŋa pâi íla kánanii yâ ŋá íkɛ a mu-gbɛ-nuu ífa lâ lóno là a gɛɛ í dísɔnyɔ̂ŋ maa mɛ̂ni ƃó dîa. Kpɛ́ni fêi díkaa a tɔ̀ɔ mâ kɛ́-ƃela. 27Kɛ́lɛ tãi ŋa pâi lônoi la ípɔi, íla a pâi fúloni. À kɛ̀ tí, yâ pâi lônoi dípɔ yɛ̂ɛ dîai, ‘Bere ƃé Ǹuu-namui Ɣâla è mò la. Ǹúui nyii mɛni mɛ̂ni wôli káa ŋuŋ-mai, tɔɔ é m̀ɛnii ŋí mɛ́ni. Ǹúui nyii va mɛni mɛ̂nii, vé ŋ̀óli tɔ̀ɔ ḿâ. Kpɛ́ni fêi díkaa a tɔ̀ɔ mâ kɛ́-ƃela.’ ”
Currently Selected:
Izikiɛ 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia