Izikiɛ 2
2
1Nya ƃe è mò ḿâ ǹyɛɛi, “Núu-kpune ǹóŋ, í mu siye í tɔ́ɔ, ŋa pâi lônoi ípɔ naa.” 2Tãi è lòno la ḿbɔi, m̀ɔ̃lêŋ è nâa pà ŋ́gbonôi é ŋ́gɛ ŋá mu siye ŋá tɔ́ɔ. Ŋá nâa ŋ̀óo mɛ̀ni. 3È mò ḿâ ǹyɛɛi, “Núu-kpune ǹóŋ, ŋa ítɛɛ̂i Eezuɛ-ŋai pɔ́ naa. Ǹûai ŋí díkaa a tɔɔ mâ-ƃela nyii-ŋai da tɔɔ ḿâi, nyii-ŋai dínâŋ ni da ŋátɔ̂ŋ kara ǹyaŋ dia máŋ díkaa nɔ́ nîi ŋátɔ̂ŋ-ŋai karâi tãi-ŋai ŋí yée mui. 4Ǹûai ŋí ni líi-su-kpanaŋɔɔi, díwôli kpɔ̂lɔɔ. Ŋa ítɛɛ̂i dípɔ naa í mó dîa yɛ̂ɛi, ‘Yâwɛɛ Ɣâla ǹyɛɛi.’ 5A nɛ̃ɛ ma dí díwoli tɔ́ɔ kpaa máŋ dífe díwoli tɔɔ ní, kpɛ́ni fêi díkaa a woli kpɔ̂lɔ-ƃela, da pâi gɔ́lɔnîi a gɛɛ Ɣâla ŋɔlóno kɛ́-nuu a pá dísama. 6M̀ɛni ma, núu-kpune ǹóŋ, ífe yào dîa, kpaa máŋ í yao díwoo ma, berei máŋ díwoo a sôli la yɛ̂ɛ ŋalêŋ da kɔli-kalaŋ ŋá séniɛɛi, kpaa máŋ berei máŋ yâ pâi seêi la díwoo ŋá yɛ̂ɛ zɛŋkpɛ ƃòŋ, ífe yao díwoo ma, kpaa máŋ ílii é tóo pôlu a berei da pâi í kâai lai. Kpɛ́ni fêi díkaa a tɔɔ mâ-ƃela. 7M̀ɛni ma, ŋá worɛ̂-wooi ƃó dîa a nɛ̃ɛ ma dí díwoli tɔ́ɔ kpaa máŋ dífe díwoli tɔɔ ni yâ, kpɛ́ni fêi díkaa a tɔɔ mâ ƃela.
8“Kɛ́lɛ núu-kpune ǹóŋ, íwoli tɔ́ɔ m̀ɛnii ŋa pâi m̀ôi yâi í mɛni. Ífe kɛ̀ yɛ̂ɛ dɔɔ mâ kɛ́-ƃelai tí. Íla táa, í zɛŋ míi ŋá dɛɛ̂i ípɔi.” 9Ǹyaŋ tãi ŋá nàa kàa lai, ŋá núu yée kàa zã́a ḿbɔ naa pere, kɔlɔ-pɔyɛ̃ɛ kɛ́ ƃò zu. 10Gɛ́ɛ tíi è ǹá ƃò ŋ́ɛi túɛ kɔlɔ-pɔ̃yɛɛ kɛ́ ƃò mɛi-pere da bôlu-pere. Ǹyaŋ ŋ̀óoi kɛ́ mai è kɛ̀ a lia-woo kpanaŋ, maloŋ tôo maa da kpalo.
Currently Selected:
Izikiɛ 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia