Kâloŋ-ŋa Veerɛi 25
25
Zerusâlɛŋ wólo mɛni
(Kɔlɔnikɔ Veerɛi 36:13-21; Zɛlemaya 52:3b-11)
1Zuda kaloŋ Zɛdikia ŋɔkâloŋ-laa koraŋ ǹɔ́ɔlu mɛi náaŋ su, ŋáloŋ buui ŋɔfólo puu ɣele, Babelɔŋ kaloŋ Nɛbukinaza è ŋɔkɔ́-kɔ-ƃelai kélee sìɣe é lí a dia a gɛɛ dí kɔ́ pɛ́lɛ Zerusâlɛŋ ma. Gɔ́-kɔ-ƃelai dí díƃûui pù dí dínaŋ daai ma dí doo galai. 2Zerusâlɛŋ è lɛ̀ɛ a dóɔɔ galai Nɛbukinaza mì da ŋɔnûai é lɛ́ɛ la zu Zɛdikia ŋɔkâloŋ-laa koraŋ buu káo tɔnɔɔi é seri. 3È kɛ̀ tí, ŋáloŋ ǹáaŋ su ŋɔfólo lɔ́ɔlu mɛi náaŋ ɣele, burui è nâa tòo kpɔ́ a zu kɛ́tɛ nyii gɛ̀ mii-sɛŋ tɔnɔ kpîŋ fé ŋɔ́nɔ kɛ́ ní naa a gɛɛ ǹûai dí mii. 4Babelɔnia-ŋai dí kɔ́-kɔ-ƃelai dí Zerusâlɛŋ taa-leei ŋɔgalai wôlo a ma ɣelei tí. Ma kpînii tí, Gâloŋ Zɛdikia da ŋɔkɔ́-kɔ-ƃelai dí kɔ̀ dí pú dí tɛ́ɛ galai lá ƃɛ́i-pere nyii kɛ̀ gâloŋ ŋɔsûai su-perei. É máŋ kɛ́ tí, dí kɛ̀ a gɔ́lɔŋɔɔ a gɛɛ Babelɔŋ kɔ-kɔ-ƃelai dí kɛ̀ a dí tínaŋɔɔ daa-leei ma ǹyée tooɔɔ gîei. Tãi dí kùla lai, dí zòŋ a Zɔdiŋ Ya-leei ma tiŋ-tiŋ su-pere. 5Kɛ́lɛ Babelɔŋ kɔ-kɔ-ƃelai dí dí kpɛ̀ é lɛ́ɛ la zu dí dísoŋ Zɛleko taa-leei kɔlɛ ma. Dí gâloŋ Zɛdikia sòŋ, kɛ́lɛ ŋɔkɔ́-kɔ-ƃelai dí pù dí táa-tâa. 6Dí lì a Zɛdikia Babelɔŋ kaloŋ Nɛbukinaza pɔ́naa Lila taa-leei su, ƃɛ́i è ŋɔmɛni sâai ƃò naa é ŋá tée, ǹyaŋ ŋɔmɛnii è kɛ̀ a nyɔ́mɔɔ. 7Dí pà a Zɛdikia ǹônii dí dípaa a ŋ̀ɛi. Dí ŋɛ́i-gao kùla, dí doo kpɔnɔ ŋá, dí lɛ́ɛ ŋ̀âlai díkɛ lì la Babelɔŋ.
Ŋâla-pɛrɛ kɛ́tɛi kara mɛni
(Zɛlemaya 52:12-33)
8Babelɔŋ kaloŋ Nɛbukinaza ŋɔkâloŋ-laa koraŋ buu káo lɔ́ɔlu mɛi náaŋ su, ŋɔɣáloŋ ǹɔ́ɔlui, ŋɔfólo lɔ́ɔlu mɛi feerɛi ŋ̀ele, gâloŋ lia-woo ƃó-nuu kɛ́tɛi, Nebuzaradaŋ nyii kɛ̀ máŋ a gâloŋ kpono-ma kɔ-kuluƃa-ŋai mɛi-nuui, è tɛ̀ Zerusâlɛŋ taa-leei su. 9Nebuzaradaŋ è Yâwɛɛ ŋɔɣâla-pɛrɛ kɛ́tɛi kèreŋ, gâloŋ-pɛrɛ kɛ́tɛi, bɛ́rɛ kpaya-kpaya maa mɛni kpanaŋɔɔi kɛ̀ daa-leei sui da bɛ́rɛ-ŋai kélee kɛ̀ naai. 10Nyíti pôlu ma, Nebuzaradaŋ è mò Babelɔŋ-ŋai díkɔ-kɔ-ƃelai dîa a gɛɛ dí gala-ŋai wólo nyii kɛ̀ a dínaŋɔɔ Zerusâlɛŋ taa-leei mai, dí dóo ǹɔii ma. 11Ǹûai lɛ̀ɛ kɛ̀ daa-leei sui, è dí sòŋ, é pɛ́lɛ diai dîa kɛ̀ a Nɛbukinaza yée-mu-ƃelai, é lí a dia Babelɔŋ lɔii su. 12Gôlo-ƃela ŋá ŋánaai nɔ́ ƃé vé li ní a dia. È dí lɛ̀ɛ naa a gɛɛ dí kɛ́ tíi kɛ̀ gbɔmɔ-ƃa kpalaŋ-ŋai ŋá, da zí-sãa kpalaŋ-ŋai.
13Babelɔŋ-ƃelai dí kɔ́-kɔ-ƃelai dí m̀ára-nɔɔ feerɛi kùla nyii-ŋai kɛ̀ tɔɔ̂ni ŋâla-pɛrɛ kɛ́tɛi ŋɛ́i-tuɛi. Dí ǹyá seêi kɛ́ sɛŋ-folo kɛ́tɛ kɔ́ɔ puui kélee fùloŋ dí dí kúla mu da ǹyá seêi kɛ́ sɛŋ-folo kɛ́tɛi kɛ̀ seê-ni ŋá, nyii da kâa dòli a Yuoi. Dí díwòlo-wolo dí dísu tée-tee a gbua-gbua a gɛɛ pɔri-maa é kɛ́ dîɛ dí lí a m̀árai Babelɔŋ. 14Dí lì a m̀ára sãai ǹûai da kâa tíi kɛ̀ a dia Ɣâla fɛli mɛni ma ŋâla-pɛrɛ kɛ́tɛi mui, é pɛ́lɛ bâne-ŋai dîa kɛ̀ nuu-fãai pú mɛni ma, sɔ̂ƃele-ŋai, lâŋpo ma tii-kɛ-sãai da zɛŋ-folo-ŋai kɛ̀ géreŋ-sɛŋ kúŋ nɛ̃ɛi pú mɛni mai, 15É pɛ́lɛ ŋɔŋ pú pâne-ŋai dîa da gawúlu-ŋai kɛ̀ ŋãa kpɛ́mɛŋ mɛni mai. Nebuzaradaŋ è mò ŋɔkɔ́-kɔ-ƃelai dîa a gɛɛ dí zãai kélee síɣe kɛ̀ a gbɛtɛ́ɛ a ƃara da gôoi. 16Zãai kélee Gâloŋ Saloma è dí kpɛ̀tɛ a ƃara ŋâla-pɛrɛ kɛ́tɛi mɛni mai, ǹyá-seei kɛ́-sɛŋ kɔ́ɔ-ŋai da gawúlu kɛ́tɛi da kâa dòli a Yuoi, dí kɛ̀ a dísu kɛ́tɛ dí kɔɔ̂ŋ mɛni ma a gɛɛ núu é díwiɛ kɔ́lɔŋ. 17M̀ara-nɔɔ feerɛi Gâloŋ Saloma è wɔ́lɔ dí kpɛ̀tɛi, dɔnɔ ŋɔmɛi kôya è kɛ̀ a kɔ́ɔ pîlanii buu feerɛ káo lɔ́ɔlu mɛi-feerɛ. M̀ara ƃɔrɔ feerɛi è dí kpɛ̀tɛ é dí sée nɔɔ-ŋai dɔnɔ ŋái, ŋɔmɛi kôya è kɛ̀ a kɔ́ɔ loai náaŋ da gbûra. Dí mɔrɔ-ŋai tí maa pɔ̃yɛ a yɛrɛ-pere-ŋa a ƃara. Dani pɔ̃yɛ kɛ́-pere è kɛ̀ yɛ̂ɛ yɔlɛ kpiyɛ̂ŋ-kpiyɛŋɔɔ gîe mɛi, gbéli-ŋai pɔ̃yɛ-pere kɛ́ ƃò yɛ̂ɛ sâra-kao kpiyɛ̂ŋ-kpiyɛŋɔɔ gîe téniŋ ma ŋɛli ma a bɔ̃yɛ ŋɛ́i lɛ́lɛɛ.
Dí lì a Zuda-ƃelai luɛ-laa su Babelɔŋ
(Zɛlemaya 52:24-27)
18Nyíti pôlu ma, gɔ́-kɔ-ƃelai mɛi-nuu kɛ́tɛi, Nubuzaradaŋ è zâla-laa soŋ-nuu kɛ́tɛi Siraia sòŋ da gɔlɛ ma-nuui Zɛfenâiya a tɔ̂ŋ kara-ƃela é pɛ́lɛ ŋâla-pɛrɛ kɛ́tɛi mu tii-kɛ-ƃela kpaya-kpayai zaaƃa dîa. 19È kɛ̀ tí, è Eezuɛ-ŋai dí kɔ́-kɔ-ƃelai láa-tuɛ-ƃela kɛ́tɛi dɔnɔ sòŋ da gâloŋ ŋɔlia-woo ƃó-ƃelai ǹɔ́ɔlu é pɛ́lɛ ǹúu kɛ́tɛi ma nyii a kâa gɔ́kɔ-ƃelai ŋá tɛ̀ díkîe ma kɔ́-kɔ mɛni mai. È Eezuɛ kɔ-kɔ-ƃelai buu lɔ́ɔlu mɛi da kàa máŋ nyii-ŋai kɛ̀ nîi Zerusâlɛŋ taa-leei sui. 20Nebuzaradaŋ è lì a díkelee Leɣa Taa-leei su Babelɔŋ kaloŋ Nɛbukinaza pɔ́ naa, 21Ama lɔii kpiniŋ kɔlɛ ma, ƃɛ́i è gɛ̀ dí dílokwa naa, dí dípaa. È kɛ̀ tí, dí lì a Zuda-ƃelai luɛ-laa su. Dífe ŋɔ́nɔ kɛ́ ní díkpɔɔi lɔii su.
Dí Gidalia kɛ̀ a kâloŋ Zuda
(Zɛlemaya 40:7-9; 41:1-3)
22Gâloŋ Nɛbukinaza è Akaŋ ǹóŋ Gidalia kɛ̀ a kâloŋ ǹúu-kpulu-loŋ mɛi lɛ̀ɛ kɛ̀ Zudai. 23Tãi Zuda kɔ-kɔ-ƃelai túɛ-ƃelai da díkɔ́-kɔ-ƃelai dí mɛ̀ni la a gɛɛ Babelɔŋ kaloŋ a nâa Gidalia kɛ́ a kâloŋ ǹɔii mɛi, dí lì bɔ́ naa da dîa-ni dí koyâŋ Mipa. Gbakolo-ŋai ŋí ƃé kɛ̀ a: Natania ǹóŋ Isimiɛ, Karia ǹóŋ Zoanaŋ, Nɛtoa-nuui Taŋumɛ ǹóŋ Siraia da Maakata-nuui Zazania. 24Gidalia è mò dîa ǹyɛɛi, “Mɛnii kélee a pâi kɛ̂i a ǹɛ́lɛɛ. È góno tèe díyêei a gɛɛ maa fé nɛ̃ɛ ní kú yao Babelɔŋ-ŋai dí mɛi-ƃelai dîa, à kɛ̀ nɔ́ kwa kɛ̀ ƃɛ́ lii-see su kú mɛnii kélee kɛ́ Gâloŋ Nɛbukinaza a pâi môi kûai.”
25Kɛ́lɛ Gidalia ŋɔkâloŋ-laa ɣaloŋ ǹɔ́ɔlu mɛi feerɛi su, Ilisama ǹóŋ Natania ŋɔɔ-loŋ Isimiɛ nyii kɛ̀ a kâloŋ-loŋ, è kpakolo puu sîɣe da dîa-ni dí lí Mipa. Dí pɛ̀lɛ Gidalia ma dí baa da ŋɔgɔmɛnɛ-ƃela kpaya-kpayai, é pɛ́lɛ diai dîa kùla Zuda da diai kùla máŋ Babelɔŋ lɔii sui. 26Mɛnii tí kɛ́ɛ pôlu ma, gɔ́-kɔ-ƃelai túɛ-ƃelai da ǹûai kélee kɛ̀ Mipâi, é máŋ kɛ̀ a ǹúui dɔɔ̂i è kɛ̀ mai, kpaa máŋ ǹúu doo-mui, díkelee díkɛ̀ yaôi mɛnii ma Babelɔŋ-ƃelai díkɛ̀ pâi gɛ̂i. È kɛ̀ tí, dí kùla Zuda dí pú dí lí Ize lɔii su.
Dí Zɛoasiŋ kùla tɔ̂ŋ mu
(Zɛlemaya 52:31-34)
27Babelɔŋ kaloŋ Ivɛ-Miro ŋɔkaloŋ-laa koraŋ maa-ŋuŋ, ŋɔfólo buu feerɛ káo lɔ́ɔlu mɛi feerɛ ɣele, è Zuda kaloŋ Zɛoasiŋ kùla kpini-pɛrɛ mu. Zɛoasiŋ è kɛ̀ kpini-pɛrɛ mu Babelɔŋ a kóraŋ buu saaƃa káo lɔ́ɔlu mɛi feerɛ, ɣáloŋ puu káo feerɛ, fólo buu feerɛ káo lɔ́ɔlu mɛi feerɛ dí lɛ́ɛ pâi ŋuŋ ma ƃôi. 28Ƃaa-kɛ-maa támaa è kɛ̀ Gâloŋ Ivɛ-Miroda yêei Zɛoasiŋ mɛni ma. È M̀alôŋ kàa é tɛ́ɛ gâloŋ kpéli-ŋai dîa nyii-ŋai kɛ̀ tɔ̂ŋ mu naai. 29Ŋuŋ-ma-ƃo è nâa kɛ̀ Zɛoasiŋ yêei a gɛɛ é ŋɔseɣei maa-faleŋ a tãi kélee. A kâa ǹáa mìi gâloŋ ŋɔteƃelei ma a ɣele kélee. 30Tãi nɔ́ Zɛoasiŋ è kɛ̀ la a vúlui, díkɛ̀ véla-fei a ɣele kélee a gɛɛ sɛŋ kâo é kɛ́ ǹyêei, pɔri maa é mì sɛŋ nɔ́ a ŋ̀wɛlii, é ǹyá.
Currently Selected:
Kâloŋ-ŋa Veerɛi 25: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia