Prov 4
4
Re' k'uhb'alinik chi naa ruk'amariik i holohik laj b'eeh
1Hat taq ak'uunb'ees, ixq'uunb'ees cha nimaj taq aak'uhb'aaljiik i rub'an aawajaaw.
Xti chab'iraj taq, reh chi holohik taq neetib'anik.
2Re' hin holohik taq aatijiik xnub'an,
maayeew taq chi re' chi ma' re' i xatnutijej taq wii'.
3Re' hin, hin wo' chaloq rak'uun i wajaaw,
eh re' nutuut q'e' xiruk'ax, ruum xa hin wo' jinaj chuwach.
4Re' wajaaw je' wili i xuq'or weh:
Chamol taqe panawánima i tinuk'uhb'alej wii',
cha a'n taqe i nuq'or aweh, reh chi nee ti k'acharik.
5Chak'am naah i holohik laj na'ojb'al, holohik tib'anoq.
Mansahchik panak'ux taqe i nuq'or aweh ruuk' nuchii'.
6Chak'ax i holohik laj na'ojb'al maaq'eb' chi riij ak'ux,
ruum re' re' naa ruko'liniik aweh.
7Eh chuwach chu'nchel i naa a'nam,
peet i holohik laj na'ojb'al naa ak'amam naah, ruum i ruk'ul chi naa ruwihiik ana'ojb'al.
8Chak'ax, reh chi nee ruyeew runimaal awach
maakanaa' chik rub'aan reh chi nee ruyeew aloq'il.
9Eh naa ruye'em chaaweh i rotob'il chi jinaj loq'laj kooch,
jinaj holohik laj corona cha weh, inki weh.
10Hat wak'uun noq wilkaat chab'iraj aak'uhb'aaljiik i nub'an,
chamol panawánima, reh chi k'ih laj haab' nee ti k'acharik.
11Re' hin neetinuk'am chupaam i holohik laj na'ojb'al,
eh nee tinuk'am chupaam i holohik laj b'eeh.
12Re' i ma' xta naa ruq'ilwiik aweh chupaam,
atoob' ta kow nee tiooj, ma' xta neenq'atwik panab'eeh.
13Xti chayeew panak'ux aak'uhb'aaljiik, maakanaa' rub'aan.
Cha a'n la' i ruq'or, ruum re' re' inye'wik ak'achariik.
14Mat'ooj inche chikiij taqe i yiib' wach kina'ojb'al,
maatijej aweh i yiib' wach inki a'n
15Maatahqeej taqe chub'anariik i yiib' wach na'ojb'al.
Re' la' i holohik cha a'n i hat,
16ruum re' keh ma' nsuuqb'ik ta kik'ux wila' ma' nkian i yiib' wach.
Eh inkikuy kiwiriik chub'anariik ti' k'axik ree kas kichaaq'.
17Ruuk' i yiib' wach inki a'n
ruuk' i leq' inki a'n inkireq tz'aaq kiwa' kihaa'.
18Eh re' i kik'achariik i korik wach kik'ux,
xa je' chik rukab' noq ink'u'loq i rusaqumaal i q'iij, korehtaal insaquumb'ik chi korik.
19Raaj i kik'achariik i yiib' wach kina'ojb'al keh,
xa je' chik rukab' i q'equm, ni xata naq inkikoj rehtaal chib'ih kiq'ehb'ik wii'.
20Hat wak'uun noq wilkaat, chak'am naah taqe aak'uhb'aaljiik i nub'an ruuk' nuchii'.
Chayeew axikin reh taqe i nuq'or aweh.
21Manooj sahchoq chawach,
chamol la' taqe panawánima chi manlik,
22ruum awach i molwik reh inye'arik ruk'achariik,
eh re' re' inye'wik rukowiil chu'nchel i kiti'jolal.
23Re' peet naa a'nam re' chi naa acha'jeem awiib',
manokik i ma' holohik taj panawánima, ruum re' re' inye'wik k'acharik.
24Maaq'or aha' wilik i ma' korik taj,
eh mat chukwik q'orik.
25Re' holohik chawil reje,
hiy chawach korehtaal i na a'n rusuqkiil i k'ahchi' asik'im.
26Eh xti chakoj rehtaal aha' k'ahchi' awojiik,
korik-oq aweh i k'ahchi' kaat reh chi ma' xta neetikalojik wii'.
27Maacanaa' i holohik laj b'eeh,
eh mat'ooj chub'anariik taqe i yiib' wach na'ojb'al.
Currently Selected:
Prov 4: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.