Prov 3
3
Re' ruq'orariik chi naa runimjiik i holohik laj na'ojb'al
1Hat wak'uun noq wilkaat, ma' nsahchik panak'ux i ti nutijej wii'.
Chamol la' panawánima taqe i nuk'uhb'aal.
2Chi je' re' k'ih laj q'iij, k'ih laj haab'
nee ti k'acharik, eh suq nee ti wihik.
3Maacanaa' rub'aan i ketelinik wachiis.
Je' wo' hoq i rub'aan i korik, wilik-oq la' awuuk' chi juneliik,
je'-oq aakarena chawalaq, cha tz'ihb'aaj panawánima.
4Chi je' re' holohik neetib'anik.
Neemponik chuwach i Dios, nee wo' imponik chikiwach taqe i tinamit.
5Ruuk' i QaJaaw Dios chayeew ak'ux,
maayeew ak'ux chinaah aana'ojb'al i hat cha wib'il awiib'.
6Chapahqaaj i rotob'il i QaJaaw Dios ruuk' chu'nchel naa a'nam,
re' reh neetiruk'am chupaam i holohik laj b'eeh.
7Maacapaaj chi wilik ana'ojb'al cha wib'il awiib'.
Chayohleej la' i QaJaaw Dios, cha kanaa' rub'aan i yiib' wach na'ojb'al,
8ruum re' re' naa ruye'wiik rukowiil chu'nchel aati'jolal,
je' wo' taqe ab'aqil.
9Chak'ax i QaJaaw Dios ruuk' taqe i chib'ih aweh,
je' wo' ruuk' chu'nchel i peet wach atik.
10Chi je' re' korehtaal imb'ulinik ye'aab' reh i wach atik.
Eh korehtaal imb'ulinik ye'aab' reh i riis i wach aa-uuva.
11Hat wak'uun noq wilkaat maawixowaaj aak'uhb'aaljiik i rub'an i QaJaaw Dios,
eh maayoj ak'ux wila' kow xat ruq'il,
12ruum re' QaJaaw Dios kow i ruq'il awach i q'e' ruk'ax.
Je' rukab' i rub'an ajaab'ees, kow i ruq'il i awach i q'e' raaj wach paruk'ux i reh.
13Atoob' reh awach i rureq i holohik laj na'ojb'al.
Eh i rureq chi riij i chu'nchel.
14Ruum re' taqe re' xiik' naah k'ihaal tz'aaq chuwach i plata.
Eh re' ruk'am chaloq taqe re' ma' xata je' k'ihaal tz'aaq i xti manlik oro.
15Re' i holohik laj na'ojb'al xiik' naah k'ihaal tz'aaq chuwach taqe i holohaq ab'aj.
Ma' xata je' holwochiil taqe i xa chib'ih jariik i q'e' ink'axarik wach.
16Eh ruuk' rureqariik i na'ojb'al inchalik inajt rooq k'acharik,
i b'ehomal, je' wo' hoq i loq'il.
17Eh xiik' naah chihojal,
pansuqkiil k'uxliis, eh pan holohik laj k'acharik ink'amwik.
18Re' holohik laj na'ojb'al k'acharik i ruk'am choo chi keh i kinimanik reh.
Atoob' keh awach taqe inki a'n ruk'amariik naah.
19Re' QaJaaw Dios, ruuk' runa'ojb'al,
eh ruuk' i ruholohik laj kapeew xuyejaa' i taxaaj, i wach ak'al.
20Eh ruuk' i runa'ojb'al xuyeew pareh taqe i palaw,
xuyeew pan taxaaj i suutz' reh chi ruyeew chaloq i jab'.
21Hat wak'uun noq wilkaat maakanaa' rub'aan i holohik chi b'anarik,
maakanaa' chik rib'iirjiik i k'uhb'aal, i aq'ilariik,
22ruum re' re' naa ruye'wiik ak'achariik.
Eh je' naa naa kaat ruxoyem ruuk' jino'q i karena.
23Chi je' re' ch'iklik ak'ux noq nee ti wihik panak'achariik,
eh ma' xta neetiq'ehb'ik wii'.
24Eh noq nee ti okik chi hi'lik ma' xta neetiyo'jik wii'.
Eh noq nee tiyohkik suq laj wirik neena a'n.
25Ma' nee ta tiyo'jik ruum taqe i yohb'aal neenk'u'loq.
Eh ni xa taa neetiyo'jik noq neensacharik kiwach i yiib' wach kina'ojb'al,
26ruum re' i QaJaaw Dios naa ruye'wiik rukowiil ak'ux.
Eh ma' naa ta ruye'em q'ab' chi naa aq'ehb'iik pan k'axik.
27Re' hat wila' xkipahqaaj otob'il aweh
maaq'or chi ma' nee ta na a'n wila' nee wo' na a'n rub'aan.
28Aha' wilik otob'il
nee ruyeew riib' chi neena a'n yu'naak
maakanaa' reh eqal
29Maa kapaaj rujot'ariik aawas achaaq'
ruum awuuk'-oq tii hat ch'iklik ruk'ux chi naa atoob'eem
30Maasik' i peleto ruuk' i xa awach
wila' ma' awach i k'ahchi' rujot'wiik aweh.
31Maawixowaaj wach i yiib' wach i runa'ojb'al.
Eh maa a'n aweh i ma' holohik taj i rub'an,
32ruum re' i QaJaaw Dios ma' imponik ta chuwach i yiib' wach na'ojb'al.
Eh re' i korik wach kik'ux, ra'j imponik chuwach re'.
33Re' QaJaaw Dios ma' rutoob'eej ta parupaat i yiib' wach runa'ojb'al.
Eh re' korik wach ruk'ux, ra'j i rutoob'eej parupaat re'.
34Re' QaJaaw Dios naa ruse'laam taqe i kikaqse'lanik reh i korik.
Eh naa taqe rutoob'eem i xama' nimaq ta kiwach.
35Re' i wilik kina'ojb'al naa ruye'ariik kiloq'il.
Eh re' taqe i yiib' wach kina'ojb'al naa rehtesjiik i runimaal kiwach.
Currently Selected:
Prov 3: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.