Jl 3
3
1Chi yalon Jehová axca ti': A wal yet jun c'ual tu' ok wi aj can Judá c'al Jerusalén yin watx'il junelxa.
2Ok in wajbaj oc masanil nacionlak, cax ok wiontok bay jobeal yet Josafat.*fn* A bay tu' ok wak' yailal yiban eb yuj tzet yetal max yun eb yetok in conob Israel, yujtol max saklemtok eb israel yuj eb bay masanil yulyibank'inal. Max coc' pojnentok eb in tx'otx'.
3Max yak'on eb suerte yin eb; max txonon el eb eb winak unin, c'al eb ix unin, axa c'ayon el eb ch'en tumin tu' yin is vino, c'al yin is yajmulal.
A yailal ok yak' Jehová yiban masanil nación
4¿Tzet che yochej win ayex ti', ex aj Tiro, c'al ex aj Sidón, c'al ex aj Filistea? ¿Tom che yochej che pak e ba win? Ta che yochej che pak e ba, yin aymanil ok wak' paktzebal ayex, axca wal is mojalil. 5Ayex ti', max e yelk'anej plata, c'al oro ayin, cax max e yiontok in beyomal bay e templo. 6Najattac'al max e yicantok eb anima ayic' bay Judá, yetok c'apax eb cajyom bay Jerusalén; max e txontok eb bay eb griego. 7Palta ayin ok wieltek eb bay max e txontok eb tu', cax ayexxa ok e yab yail wuj, axca wal max yun yaben yail eb tu'. 8Ayin wal caw Jehová in chi wala', tol ok waoc eb e c'ajol c'al eb e cutz'in yul k'ab eb aj Judá. Axa eb tu' ok txonon el eb bay eb sabeo, tol cajantac'al bay najat, ẍi Cham.
9Alek juntzan ti' bay masanil nacionlak: Watx'nejek e ba yin owal. Awtejek eb tec'an waayi, jayokab eb, cax chi toj eb yin owal.
10Watx'nejokab oc eb ch'en asarón yin yespadaok; axa is jobal trigo eb, watx'nejokab c'apax oc eb yin is lanzaok; axa mactxel choytak, yalokabi tol caw wal ay yip tinani'.
11Masanil nacionlak ay yinlak, titokab yin aymanil, cax wajbajokab oc ba yin yak'on owal. Mamin Jehová, itek eb a soldado tec'an.
12Watx'nejokab ba masanil nacionlak, cax chi jay eb bay jobeal Josafat, yujtol a bay tu' ok beyc'ulnej Jehová masanil nacionlak ay bay yinlak conob ti'.
13Axca chi yun jolay ixim trigo mayal k'anbi, caytu' che yut eb, yujtol mayal jayoc c'ual beyc'ulnelay eb. Teq'uek ay eb, axca tec'lay uva watx'xa yayji yet chi watx'nelay vino, yujtol caw wal yobtakwom eb.
14Manxa animaok bay jobeal bay ok oc beyc'ulal, toxa ok tx'ox ba c'ual yet yowal c'ul Jehová bay tu'.
15A c'u, c'al xajaw manxa ok yak' is sakk'inalil, yetok c'apax waycan, c'amxa is jopopial.
16Axca wal bil c'u, caywal tu' ok yun jakon Jehová yul is nuk', tac'al bay jolom witz Sión bay Jerusalén. Axa satcan c'al tx'otx' tx'otx' ok bilajok. Axa Cham ok colon is conob, a ton conob Israel.
Is tzalojc'ulalil Judá yet yajtok tu'
17Max yalon Jehová: Axa ok yun xin, tol ok e yojtaknej elok, tol ayin Jehová e Diosal in, ayin ec' bay tzalan Sión bay chi oc ayilal ayin. A Jerusalén ti', in conobxac'al ok yuncanok. C'amxa yechel ok ayc'ay yuj eb tx'ok conobal junelxa.
18A wal yet tu', caw wal ok nojxac'al el jolomlak witz yuj an uva, c'al masanil tzalanlak ok nojxac'al el yuj no wacax. A wal a nuk' aejlak bay Judá, caw wal ok aj can a'. Axa bay in templo ok ajol secnaj jun nuk' aej, cax ok pultok a' bay jobeal Sitim.
19Axa Egipto xin, ok etaxcantok; axa Edom, takin tx'otx' ok yuncantok, yujtol max yak' eb owal yin Judá. A bay Judá tu' max pulcantok is chiq'uil eb c'am is mul yuj eb.
20-21Ayin ok in paktzej is camichal. Manxac'al ok wak' mimanc'ulal yin eb ay is mul tu'. Axa Judá, c'al Jerusalén xin, watx'xac'al ok yun cajay ec'ok. Axa ayin Jehová in ti', ok in cajayc'al ec' bay jolom witz Sión, ẍi Cham.
Currently Selected:
Jl 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989