Jl 2
2
Xiwilxa chapulín
1Xulayokab trompeta bay tzalan Sión. Xuek junok tx'oxbanilej bay tzalan yet ayilal bay Jehová. Bilokab aj masanil eb cajyom bay Judá, yujtol cawilxa chi jayoc c'ual yowal c'ul Cham,
2jun c'ual k'ekk'inal, jun c'ual caw wal ay asun, xan ay ewan. A wal no chapulín, lajanxac'al yetok ejército. Lajan wal toj c'ananok axca toj c'ananok k'ekk'inal, masantac'al chi makaytok jolomlak witz yuj. C'amc'al bay max uj axca ti' yet yalantok, tamwal okto yun junelokxa.
3Lajan wal no' axca k'ak'ej, masanil chi yak' lajwok elok. A wal yet c'amto chi jayoc no', manxa watx'ilok yili tx'otx' tx'otx', axcaxac'al yili Edén. Axa yet ok lajwok yec'can no' xin, lajanxa ok yuncan axca takin tx'otx'. C'amxa jabok tzet ok colchajcanok.
4A is sat no', lajan wal yili axca sat no chej. Chi toj lemnaj no' axca chi yun toj no chej yin owal.
5Axca wal bil junok carruaje yet owal, ma axca wal bil takin xaklak te' chi tz'atok yuj k'ak'ej, caywal tu' bil tit no' bay jolomlak witz. Axca wal junok bulan soldado xiwil yip, tol txololi toj yin owal, caywal tu' no'.
6A yet ok yilon eb anima, caw wal ok bilaj eb yuj xiwilal. Sakxac'al ok yun yili sat eb yuj.
7Axca wal winak tol watx' yin owal, tojolc'al yec'aj lemnaj yibanlak muralla, cax tojol chi yun toj yin eb ajc'ul, c'am chi ec' coxcon yul is be, caywal tu' no'.
8C'am chi tenlej ba no'. Junjunc'al, jichanc'al chi yuttok ba yul is be. Watx'c'al chi yun yec'tok txololok xol yespada eb yajc'ul.
9A yet chi apni oc lemnaj no' yin conob, tojolc'al yec'tok lemnaj yibanlak muralla, tojolc'al yoc yulak na. Axca wal elk'om chi ec' oc yulak wentena.
10Chi bilaj tx'otx' tx'otx' ti' is satak, cax chi oc ewan satcan yuj. Chi tan yakan c'u, c'al yakan xajaw yuj, cax c'amxa waycan chi joplabi.
11A Jehová ayoc satak is soldado, cax chi tx'oxon aj yul is nuk', axca wal bil c'u. Xiwilxa bisil is soldado tu', c'amxa chi bischaj eb chi iken is chekbanil. Ayxa is may jun c'ual yet yowal c'ul Jehová tu'. C'am mactxel ok je' tec'ban ba satak.
Is yabenc'ulal Jehová
12Palta a tinani' xin, a wal caw Jehová chi alon axca ti': Meltzojanektek ayin yin masanil e c'ul. Ocanek yin c'ajbanc'ulal, elokab e yaw, ok'anek, ẍi Jehová.
13Cusokab e c'ul yuj e mul. Man k'okbilok yin e tzilontok e pichil. Meltzojanek bay Jehová co Diosal, yujtol watx' c'ul Cham. Ay is yabenc'ulal, ay is mimanc'ulal, c'al is camc'ulal. Bekan c'ul yion el jun yailal ti' jiban.
14Meltzojanek bay Cham, talaj c'uxan c'am chi yac'al oc yailal jiban; axa chi yunej chi bekon yaxilal jiban, cax chi yak'on co trigo, c'al co vino. Yuj tu' ayxa tzet chi je' jak'on yin ofrendail bay.
15Xulayokab trompeta bay tzalan Sión, yet chi oc masanil conob yin c'ajbanc'ulal.
16Wajbajokab oc ba masanil is conob Dios, cax sakbanejokab ba. Wajbajokab c'apax oc ba eb icham winak, yetokc'al eb unin, yetok c'apax eb lananto txutxwi. A eb ato wal nupayi, elokabtek eb yulak yatut.
17Ok'okab eb sacerdote, eb chi ak'on serbil Jehová. A bay nan xol templo yetok altar, yalokab eb axca ti': Ak' mimanc'ulal jiban ayon a conob on ti', Mamin Jehová. C'amokab mactxel chon buchoni. C'amokab chon ayc'ay yul k'ab eb tx'ok conobal, cax c'amokab chi yal eb axca ti': ¿Baytal ay e Diosal tu'? manokab ẍiok eb, ẍiokab eb sacerdote.
18Lajwi tu xin, ok tx'ox Jehová is camc'ulal, c'al is yabenc'ulal ayon is conob on ti', 19cax ok yalon Cham axca ti':
Ok wak' e trigo, e vino, c'al e yaceite, masantac'al ok yal noj e c'ul. Manxa ok yal in c'ul ok buchwaj eb tx'ok conobal e yin.
20A eb ajc'ul ok tit bay norte, najat ok wiel eb e c'atan, cax ok waoncantok eb bay tz'inan tx'otx'. Axa wak'on tojcan eb babel bay yul a' Mar Muerto; axa eb tzunan xin, ok tokcan bay a' Mar Mediterráneo, axa k'atok eb tu', cax ok aj jabil, yujtol yelxac'al yob tzet max yun eb e xol, ẍi Jehová.
21Tzalojokab tx'otx' tx'otx'. Manokab xiw eb cajyom bay, yujtol ay wal mimek tzet yetal ok yun Jehová.
22Tzalojokab no no' ay bay xolak te', c'amokab chi xiw no', yujtol a an ac'un ok yaxbok aj an, axa te te' ok yak' is sat, cax xiwil ok yun sat te higo, c'al an uva.
23Masanil ex cajyom ex bay Sión, tzalojanek. Tzalojanek yin Jehová co Diosal, yujtol ok yak' nabil k'inal ayon yin is c'ual; babel nab c'al lajub nab, axca chi yunc'alta'a.
24Caw wal watx' ok yun trigo, cax xiwilxa vino, c'al aceite ok yak'a'.
25Max yalon Jehová: Ok in q'uexlonej masanil sat e yawoj max lajwi el yuj no chapulín yet juntzan abil max eq'uelok, yet ayic' no axca soldado, tol ayin max watok e xol.
26Axa tinani' xin, ok ex lowok masantac'al ok yal noj e c'ul, cax ok e yalon e watx' k'anej ayin Jehová e Diosal in, yujtol ay wal tzet c'ayubtakxac'al max wun e xol. C'amxa yechel ok ex can yin q'uixawc'ulalil.
27Cax ok nachaj el e yuj ayex israel ex ti', tol ayin ton Jehová Dios in, ayin ec' e xol. Asannej in e Diosal in, c'am junokxa. C'amxa yechel ok ex can yin q'uixawc'ulal.
Ok jayoc Yespíritu Dios
28A yet ok lajwok yec'cantok juntzan tzetak yetal ti', cax ok waon oc Wespíritu yin masanil anima. Ok yalil eb e c'ajol c'al eb e cutz'in in k'anej. Eb icham winak, ok in k'anjab bay eb yin wayichejal, c'al eb ach'ej, ay tzet ok tx'oxlay yil eb.
29A yet juntzan c'ual tu', ok wa c'apax oc Wespíritu yin eb nak in chekbej, c'al yin eb ix in chekbej,
30cax ok in tx'oxon tzet yetal mimek c'ayubtakxac'al yoc bay satcan, c'al bay sat tx'otx' ti' a ton chic', k'ak'ej, c'al miman mub axca asun.
31A c'u ok k'ekbok; axa xajaw, axcaxac'al chic' ok yuncan elok, ẍi Jehová. A juntzan ti' ok yun yet c'amto chi jay jun c'ual yet yowal c'ul Cham. A jun c'ual tu' caw wal miman yelapnok, cax yelxac'al ay is may.
32Axa masanil mac chi yal ba bay Jehová xin, ok colchaj el eb. Axca wal max yun yalon Cham, a bay tzalan Sión bay Jerusalén ay mac ok colchajok, mawal eb okto canok, tol sic'bil el yuj Cham.
Currently Selected:
Jl 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989