Ec 3
3
Masanil tzet yetal ay is c'ual
1Masanil tzetak yetal ay is c'ual, masanil tzet yetal ay bay yulyibank'inal ti', ay is yorail:
2Ay is c'ual yet chi oc aljil, ay is c'ual yet chi oc camich. Ay is c'ual yet chi awlay awoj, ay c'apax c'ual yet chi oclay aj awoj awbil.
3Ay is c'ual yet chi mak'lay cam anima, ay c'apax is c'ual yet chi antelay anima. Ay is c'ual yet chi uchlay ay junok tzet yetal, ay c'apax is c'ual yet chi watx'nelay ajok.
4Ay is c'ual yet chi oc ok'il, ay c'apax is c'ual yet chi oc tze'. Ay is c'ual cusc'ulal, ay c'apax is c'ual yet chi oc k'in.
5Ay is c'ual yet chi uchlay saklem juntzanok ch'en ch'en, ay pax is c'ual yet chi wajlay oc ch'en. Ay wal is c'ual yet chi oc lak'lejbail, ay pax is c'ual yet c'am chi oc lak'lejbail.
6Ay is c'ual yet chi saylay tzet yetal, ay c'apax is c'ual yet chi beklay c'aytok. Ay is c'ual yet chi c'ubelay aj tzet yetal, ay pax is c'ual yet chi k oklay elok.
7Ay is c'ual yet chi nic'laytok junok k'apej, ay c'apax is c'ual yet chi tz'islaytok. Ay is c'ual yet tz'inc'al con chi, ay pax is c'ual yet chon k'anjabi.
8Ay is c'ual camc'ulal, ay c'apax is c'ual ajc'ulal. Ay is c'ual yet chi oc owal, ay c'apax is c'ual yet chi oc junc'ulal.
9¿Tzet wal chi yi' anima yin yuj xiwil chi mulnaj eb? 10Chi wil wali, jantakxa mulnajil max yak' Dios yun eb anima. 11Caw wal watx' max yun watx'nen Dios masanil tzet yetal ta chi uj yin is c'ual. Max yak' jochwan yin jojtaknej el tzetak yetal, yet yajtok tu', palta c'am chi yak' nachaj el juj wal yin sic'libil tzet chi yun Cham.
12Max wojtaknej elok tol c'am junokxa tzet yetal yelxac'al watx' chi je' juneni, asan tol chon tzaloji, cax watx'c'al tzet chi junej yak'ban iquis on. 13Tol junjun on chon lowi, c'al juq'uena', cax chi jak'on tzalojbok co c'ul yin masanil tzet yetal chi yak' co mulnajil, yujtol a Dios chi ak'on ayon. 14Yetok c'apaxok, max wojtaknej elok tol a masanil tzetak yetal max watx'nej Dios, ayc'al ec' yin tojbalk'inal. C'am tzet chi je' yalay oc tz'akil, tamwal ay tzet chi je' yilay elok. Max yut Dios axca tu', yet watx' chon oc yin ayilal bay. 15A masanil tzet yetal ay tinani', ayxac'alta'a. A pax tzet yetal ok jayok, toc'alta' ay yet payxa, toc'al chi meltzojtakbi yuj Cham.
A tzet yetal man tojolok chi beybalnelayi
16Cax max wilon c'apaxok, tol a bay yulyibank'inal ti', a yet chi beyc'ulnelay eb anima, bay is moj wal tol ay watx'il, c'al tojolal, palta asan tzet yetal man watx'ok chi uji. 17Yuj wal tu' xan chin na' tol a Dios ok on beyc'ulnen el ayon anima on ti', caxc'al watx' on ma yob on, yujtol a masanil tzetak yetal c'al masanil tzet chi uji, ok ajapnok is c'ual yin beyc'ulnelayi.
18Cax chi walon c'apax yuj co beybal ayon anima on ti', tol a Dios chon ak'on porobal, yet chi nachaj el juj tol lajan on axca no no'. 19Wal yel ayon anima on ti', c'al no no', jun lajanc'al chi yun co lajwi ayok, chi cam no' cax chon cam c'apaxok, cax jun lajanc'al chi yun jion co cak'ek' yetok no', man ec'banok chi yun jion jet yintak no no', yujtol masanil tzet yetal c'am yelapnok. 20Junnej lugar bay chon apnican oc co masanil yetok no no', yujtol a yin pokok max con tita. Ac'ala' bay pokok tu' ok on meltzojpax cantok. 21¿Mactxel chi je' tec'ban ba yaloni, tatol a janimail tol chi toj bay satcan, axa is yiquisal no no' chi tojcan bay najatil yich tx'otx' tx'otx'? 22Max nachaj wal el wuj tol c'am junokxa tzet yetal watx' chi junej, asan tol chi jak' tzalojbok co c'ul yin tzet yetal chi ji' yin co mulnajil, yujtol caytu' yayji oc jiban. ¿Mac ok ak'on jojtaknej elok tzet ok uj yet mayal on cami?
Currently Selected:
Ec 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989