Ec 2
2
1Max in nabalnej wal el wak'on in nabal, cax max in beyc'ulnen elok, baytal yin ay tzalojc'ulal, palta max wilon xin, tol a masanil juntzan ti', c'am wal jabok yelapnok. 2Xan a chi wut wilon xin, tatol asan chi co say tzetbil chi yun yoc tze', ti tol c'am co nabal yin axca tu', c'al yin jak'on co nabal, nabac'al toni.
3Max wak'lej wal wak'on tzalojbok in c'ul yetok vino, max wuten in ba yin c'am nabalil; palta naanc'al wuj tol a in jelanil chin ikbani. Max wochej wal max wojtaknej elok, tzet yetal tol miman yelapnok chi junej, yak'ban iquis on jayebok c'ual ti'.
4Caw wal xiwilxa tzet yetal tol mimek yayji oc max in watx'nej. Max in watx'nej aj watut, xiwilxa wawoj uva. 5Max in watx'nej juntzanxa wawoj, c'al juntzan in parque. A bay tu' max waw masanil makanil te te' chi yak' sat. 6Max in watx'nej c'apax bay chi wajay a' aej yet chi waoc yal juntzan wawoj te' tu'. 7Max in man eb nak in chekbej, c'al eb ix in chekbej, toltax ay eb in chekbej max alji bay watut; yetok c'apaxok, xiwilxa max yun in wacax, c'al in calnel yintak juntzanxa eb maxax ec'lej bay Jerusalén yet yalantok. 8Manxa orook, c'al plataok max in wajbaj ec' bulanok, tol titnak yin is beyomal juntzanxa rey bay juntzanxa nacionlak. Ay c'apax eb winak, c'al eb ix ix max bitni ayin, a ton masanil juntzan tu' chi yochej eb jet animail. Xiwil c'apax max yun eb xal ix wuj, txololixac'al jay eb.
9Caw wal mimek winak max wunej. Yelxac'al xiwilxa tzet yetal ay ayin yintak masanil eb max ec'lej yet yalantok bay Jerusalén ti'. Caxc'al ay masanil juntzan ti' ayin, palta maj c'ayil in jelanilal. 10C'am tzet yetal tol max yochej in c'ul tol maj wi'. C'am c'apax junok tzet yetal tol maj wunej. Max wak' tzalojbok in c'ul yetok masanil in mulnajil, a ton jun tzalojc'ulal tu' max oc paktzebalok ayin.
11Lajwi tu', max wilon oc masanil in mulnajil max in watx'nej ti', a ton juntzan mulnajil tol yatakil max yun watx'ji wuj, caytu' max yun nachaj el wuj tol a masanil juntzan tu', c'am wal jabok yelapnok. Lajanxac'al axca jak'on jip co mitx'on cak'ek', c'am junok tzet yetal tol watx' chi ji' bay yulyibank'inal ti'.
12Lajwi tu' max wilon paxok tzetbil wal yayji oc jelanilal, c'am nabalil, c'al yob nabalil. ¿Tzetto wal yetal ok yun junokxa ok yak' yajawilal wintak ayin ti'. Tok ayto tzet c'amto chi uj yettaxc'al payxa? 13Catatu xin, max nachaj el wuj, tol a jelanilal yelxac'al watx' yintak yob nabalil. Axca wal sakk'inal, yelxac'al watx' yintak k'ekk'inal.
14A mactxel aj nabal, caw wal watx' yilon bay chi eq'ui. A pax mac tol c'am is nabal xin, axca tol xol k'ekk'inal bay chi ec'jabi. Palta axa yet max nachaj el wuj xin, lajanc'al chi yun yelcan apnok ca makanil. 15Cax max walon yul wet: A tzet yetal chi echbanen junok c'am nabal, a chin echbanen c'apax ayin ti', yuj tu xin, c'am wal jabok tzet ok oc in jelanil ti', toltax masanil juntzan tu' c'am wal jabok yelapnok. 16Yujtol c'am junok mac ok nalaytek, tamwal eb jelan, tamwal eb c'am is nabal. A yet chi beyc'altok tiempo, masanil chi tojcan c'ayc'ulal. A eb jelan, c'al eb c'am nabal, ok camc'al eb, quin chi.
17Axa wal chi yun ajok, c'amxa yopiso wiquisal wuj. Yujtol a masanil tzet chi wun bay yulyibank'inal ti', toc'al chin caktzaj aj yuj. Wal yel, c'am wal jabok yelapnok masanil, lajanxac'al axca tol chi jak' jip co mitx'on cak'ek'. 18Chi lajwi tu', axcaxac'al tol majxa wochej masanil juntzan in mulnajil max in watx'nej bay yulyibank'inal ti', yujtol a masanil juntzan tu' ac'al mi bay junokxa ok occan yin wopiso ti', a tu' ok canok. 19Yujtol c'am mactxel yojtak ma tol jelan, ma tol c'am is nabal jun mac ok ion can in mulnajil ti', tol yin yatakilal, c'al yin ajnabalil max yun wion bay yulyibank'inal ti'. Nabac'al mi in mulnajil chi yal tu'.
20A wal yet chi wilon masanil tzet yetal max in watx'nej bay yulyibank'inal ti', toxac'al chi na ba in c'ul yuj xiwilxa max wetnej in c'ul yin mulnajil. 21Ay mactxel chi yaoc is jelanil, is yajnabalil, c'al tzet yojtak yin is mulnajil, asan chi can bay junokxa tol maj yab yail mulnajil jabok; axa chi ion can masanil juntzan tu', xan nabac'al is mulnajil, cax man mojok axca tu'.
22Yuj tu xin, ¿tzet wal chi yi' junok anima yuj xiwil chi mulnaji c'al xiwilxa chi yak' bilc'ulal bay yulyibank'inal ti'? 23Masanil tiempo bilc'ulalc'al yayji, al chi yab axca wal junok ikatz. Tamwal yet ak'balil chi xew janic'ok is nabal, xan a jun ti' nabac'al c'apaxok.
24A wal jun tzet yetal tol watx' chi yun eb anima, asan tol chi low eb c'al yuq'uena' eb, c'al yak'on tzalojbok eb c'ul yin is mulnajil tu'. Max nachaj wal el wuj, tol a yin axca tu' a bay Dios chi tita. 25Yujtol, ¿mac wal junok chi je' tzalojbi c'ul lowi, ta man yujok Cham? 26Wal yel asan Dios chi ak'on jelanilal, ojtakbilal, c'al tzalojc'ulalil bay mac chi tzalojbi c'ul Cham yilon ocok. A pax bay mactxel yobtakwom xin, a wal chi ak'lay mulnajil bayc'al wajban ec' bulan tzetak yetal, yet chi ak'lay bay junok tol watx' satak Dios. A juntzan axca ti' c'apaxok nabac'al, lajanxac'al axca tol chi jak' jip co mitx'on cak'ek'.
Currently Selected:
Ec 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989