1 S 30
30
Max yak' ayc'ay David eb amalecita
1Axa yet cabjial tu xin, max apni oc David yetok eb is soldado bay Siclag; axa eb amalecita mayal ec' eb yelk'anejtok masanil tzet yetal yul yet Néguev c'al bay Siclag, max yiontok eb masanil tzet yetal, c'al yak'oncan tz'a eb conob Siclag tu'. 2Mayal ilaytok eb ix ix, eb unin, c'al eb icham anima ayic' bay tu' yin preso yuj eb, caxc'al c'am mactxel max mak' cam eb.
3A yet max apni oc David yetok eb is soldado, max yiloni tol mayal tz'a'ay conob tu', mayal ilaytok yistzil eb, c'al yuninal eb yin preso. 4Caywal tu' max yun yaj yaw eb yok'i, masantac'al max yal pax yip eb yuj ok'il. 5Max yi' c'apaxtok eb amalecita eb xal yistzil David preso cawanil, a ton xal Ahinoam aj Jezreel, c'al xal Abigail is yistzilben Nabal, aj Carmel. 6Caw wal ayoc David yin bilc'ulal yujtol ijanxac'al chi k'oklay cam yuj eb is soldado tu'. Masanil eb cabtakxac'al c'ul eb yuj masanil tzet max utlay is yuninal eb tu', palta xin max yawal oc David is nabal yin Jehová is Diosal.
7Max lajwi tu xin, max yalon David bay cham sacerdote Abiatar, is c'ajol Ahimelec:
—Elokab yin a c'ul, chetek an chaleco ayin, ẍi bay.
Axa yiontek Abiatar tu' an bay David tu'. 8Axa k'anlen David tu' bay Jehová axca ti':
—¿Chi mi wal in tzakloj yintak jun bulan elk'om ti'? ¿Ok mi wal michchaj eb wuj? ẍi David.
Max tak'wi Jehová bay:
—Tzaklojan, ok michchaj eb oj cax ok eoncan ec' masanil eb chi ilaytok preso tu', ẍi Cham.
9A wal yet jun bek tu', max toj David yintak eb yetok eb 600 soldado ibil oc yuj tu'; max apni oc eb bay a' elom aej chi yik Besor. 10A bay tu' max c'unbican aj 200 eb soldado, majxa je' k'axponen eb a'; axa 400 eb xin, max tojc'al eb yetok David. 11Max lajwi tu', max yilon eb jun aj Egipto yul be, axa yiontok eb bay David, max yak'on eb aej yuq'uej. 12Max yak'on c'apax eb jun bijan takin higo watx'nebil axca patej, yetok c'apax cab jenan uva taknak. A yet max lajwi low jun aj Egipto tu', max oc wal yip max yabej, yujtol oxebxa c'u c'al oxebxa ak'bal, c'am jabok max lowi, tamwal yuq'uena'. 13Lajwi tu xin, max k'anlen David bay:
—¿Mactxel a patrón? ¿Baytal cajan ach? ẍi.
Axa tak'wi jun aj Egipto tu' bay axca ti':
—Ayin ti' aj Egipto in, is chekbej in jun amalecita, palta max in yabican ayok, xan cabjitax max in beklaycan yuj in yajawil tu'. 14Yujtol max bet juch lajwok bay Néguev bay is tx'otx'al eb cereteo, yetok bay yet eb Judá, c'al bay yet Caleb. Yetok c'apaxok, max jacan oc k'ak'al conob Siclag, ẍi jun chekbej tu'.
15—¿Chi mi je' chin etok bay jun bulan elk'om tu'? ẍi David bay.
Max tak'wi jun aj Egipto tu' bay, max yaloni:
—Chi je' ach wiontok ta chak' a ti' satak Dios tol c'am chin a mak' camok, tamwal quin aon oc yul k'ab in patrón tu', ẍi bay.
16Caytu' max yun yilaytok David tu' yuj bay ayic' eb elk'om tu'. Sakleminakxac'al yayji eb bay tu', lanan low eb c'al yuq'uena' eb, ayoc eb yin k'in yuj tzet max bet yelk'anej eb bay yul yet eb filisteo c'al bay yul makbej Judá. 17Caywal tu' max yun yoc David yak'on owal yin eb yet jun yayc'ualil masantac'al yet junxa yayc'ualil. Masanil max yak' lajwok, asanxanej 400 eb ach'ej winak max oc yiban camello, max toj elajok.
18Max yican ec' David masanil tzet yetal max yelk'anej eb amalecita tu', caytu' max yun yioncan ec' eb xal yistzil cawanil. 19C'am junok anima max yitok eb amalecita tu' tol maj yican ec' David, eb winak, eb ix ix, c'al eb unin. Yetok c'apaxok, tamwal junok tzetak yetal max yitok eb tol maj yican ec'ok. 20Yetok c'apaxok max yican cham David tu' is calnel eb c'al is wacax eb; yuj tu' xan a eb oynej oc no no' tu' max yal eb: Ila wal tzet max yican ec' David, ẍi eb.
21A yet max jayoc cham David bay aycan eb 200 soldado max c'unbican ajok, majxa je' toj eb yetok, palta tol max can eb bay ti a' Besor, max eltek eb ul chaon cham David yetokc'al eb max betic' yetok. Axa yet max jayoc David bay eb xin, max yak'on cawil c'ul eb. 22Palta ay eb is soldado ibil oc yuj tu', caw wal yob is nabal, xan max yal eb, tol a eb maj betic' yetok eb yin owal, man mojok chi ak'lay bay eb tzet yetal max bet ilaycan ec'ok, asan yistzil eb, c'al yuninal eb chi yi', cax chi toj eb, ẍi eb max betic' tu'.
23Axa pax David xin, max yal bay eb axca ti':
—Manchak e yut axca tu', yujtol a Jehová max ak'on ayon. A Cham max on tayneni. A' c'apax max aon oc juntzan elk'om max on etnen tu' yul co k'ab. 24¿Tok ay mac ok cha yab jun e nabal tu'? Yujtol axca wal yet eb max betic' yin owal ok yi', cay c'apax tu' yet eb max cancan yilon masanil co tzetak yetal, ok yi', lajanc'al, ẍi cham.
25(Ataxc'al yet tu', max occan jun ti' yin leyal xol eb israel masantac'al tinani'.)
26A yet max apni oc David bay conob Siclag, max chektok chekbej bay eb yicham winakil Judá, a ton eb is watx'il anima, yuj yaontok janic'ok tzet yetal max bet yican ec' tu', xan max yal eb chekbej tu' tzet max yal David bay eb axca ti': Tix janic' tzet yetal max bet wican ec' bay eb ajc'ul oc yin Jehová chi watok ayex ti', ẍitek David, ẍi eb.
27Max yatok juntzan sabalej tu' bay eb cajan bay Betel, bay Ramot, yul yet Néguev, bay Jatir, 28bay Aroer, bay Sifmot, bay Estemoa, 29c'al bay Racal, yetok c'apax bay eb yinatil Jerameel, bay eb quenita, 30c'al bay Horma, bay Corasán, bay Atac, 31bay Hebrón, yetokc'al bay masanil lugar bay max ec'lej cajan David yetok eb is soldado.
Currently Selected:
1 S 30: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989