1 S 29
29
Majxa yaoc eb filisteo David yipok is c'ul
1Max wajbaj oc eb filisteo masanil is soldado bay Afec, yak'ban a eb israel ayic' eb bay a' nuk' aej yet Jezreel. 2A yet max awji listail masanil eb soldado filisteo yuj eb is yajawil eb, max bislay eb yin cientoal c'al yin milal, axa pax David yetok eb is soldado, tzakan toj eb yintak cham Aquis. 3A eb yajawil eb soldado filisteo tu' max k'anlej eb bay cham Aquis:
—¿Tzet yetal chi yun juntzan hebreo ti' cayti'? ẍi eb.
Max tak'wi cham Aquis bay eb:
—A ton jun David ti' is chekbej Saúl, is reyal eb israel. Ayxa yabilal ayic' wetok cayti'. Ataxc'al yet max jayoc wetok, c'amc'al junok is faltail chi wila', ẍi cham.
4Palta a eb yajawil eb soldado filisteo tu' max tit yowal eb yin cham rey Aquis, max yalon eb:
—Al bay eb tol chi meltzojcan eb bay is conob max ak' tu', c'am chi toj eb jetok yin owal, axa talaj chi yunej, chi oc eb ajc'ulal jin bay xol owal tu'. Ta chi yochej David chi cancan yin watx' bay Saúl is yajawil junelxa, asan chi mak' cam jaywanok co soldado ti'. 5A ton yin jun David ti' max bitnelay yuj eb ix ix yet chi canalwi eb, max yalon eb axca ti': Yinxa milal winak max mak' cam Saúl, axa David xin, yin xiwilxa milal max mak' camok, ẍi eb.
6Catatu' max awtelay David yuj Aquis, max yalon bay:
—Chi yil Jehová, tutun wal yel watx' a nabal, caw wal max cha' in c'ul a beybal yet ayach ec' bay campamento. C'am wal janic'ok yobtakilal max ilchaj el en wuj yettax max ach jayoc ayin ti', masantac'al tinani'. Palta a eb wet yajawil, maj cha c'ul eb chach toj yetok. 7Yuj tu xin, meltzojan yin tzalojc'ulal, yet watx' man yobok chi yab eb oj, ẍi cham Aquis.
8Max yalon David axca ti':
—¿Tzet yetal max wunej? ¿Tzet yetal max ilchaj el win oj mamin rey, yin masanil tiempoal ayin ec' etok ti', yuj tu' xan c'am chi je' in toj wak'on owal yin mac tol ajc'ul oc en? ẍi David.
9Max tak'wi pax cham Aquis, max yaloni:
—Ayin ti' chi waoc yin in c'ul tol caw wal watx' ach, lajan ach wal axca junok ángel yet Dios, palta a eb wet yajawil ti', mayal yal eb tol c'am chi je' oc co xol yin owal. 10Yuj tu' xan a yet yecal yet k'inibalil chach meltzoj yetok eb a soldado ajun etok, a ton eb chekbej a yajawil. A yet chi k'inibi cax chex toji, ẍi cham.
11Caytu' max yun meltzoj David yetok eb is soldado yet k'inibalil yet junxa c'ual bay tx'otx'al eb filisteo, axa eb filisteo max tojcan eb bay Jezreel.
Currently Selected:
1 S 29: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989