1 R 3
3
Nupayil Salomón yetok is cutz'in cham reyal Egipto
1Max nupay Salomón yetok is cutz'in cham reyal Egipto, yuj watx'jican trato xol cab nación tu'. A tu' max ilaytok ix yuj bay conob David yak'ban chi lajxac'al watx'jican yatut c'al templo Jehová c'al muralla ayoc yinlak Jerusalén. 2A yet jun tiempoal tu', a tu' chi yak' eb anima is xajanbal bay jolomlak witz caxc'al man mojok, yujtol c'amto chi watx'ji is templo Jehová.
K'annak Salomón is jelanil bay Dios
(2 Cr 1.1-13)
3Caw wal pitz'an c'ul Salomón yin Jehová, cax chi yikenc'al is ley albilcan yuj David is mam, palta a wal caw max yak' is xajanbal c'al incienso bay Jehová bay jolomlak witz, 4cax chi bet c'apax bay Gabaón yak'on xajanbal. Mil wal no xajanbal max yak' tz'a bay tu' yujtol mimanbil jun lugar tu'.
5A yet jun ak'bal yet ayic' bay Gabaón tu', max tx'oxon ba Jehová bay yin wayichejal. Max yalon bay: Tzanc'al tzet chi yochej a c'ul, k'an ayin, ẍi Jehová.
6Max tak'wi Salomón: Ach ti' Mamin, caw wal ay a camc'ulal yin a chekbej David camom in mam, yujtol yikemc'al max yut ba ayach, cax tojolc'al max yut ba. Yuj tu' xan max el yin a c'ul tol a ayin is c'ajol in ti', chin ay chotan bay is trono axca ton wal chi uj tinani'. 7Mamin Jehová in Diosal, max el wal yin a c'ul max in aon oc yin reyal is q'uexelok in mam, c'amto wal in jelanil walon tzet chi yun eb conob, ilab tol ach'ej into. 8Palta ayinxa oc yilomalok a conob max a sic'can el ti'. A wal jun a conob ti' caw wal miman conob, c'amxa chi bischaj eb anima. 9Yuj tu' xan chin k'an ayach tol chak' in jelanil yet chi je' wikbani c'al nachaj el wuj tzetbil yayji oc watx'il c'al yobtakil. ¿Tzet wal ok yun wak'on cuenta jun a miman conob ti', ta man ok ak' in jelanil? ẍi Salomón.
10Max cha' wal c'ul Jehová tzet max k'an Salomón. 11Max yalon Jehová: Yujtol a a jelanil yuj ekban in conob max a k'ana', manak a k'inal, manak beyomal, tamwal is camichal eb ajc'ul oc en max a k'ana'. 12Yuj tu' ok wak' tzet cha k'an tu'. Ti wal chi wak' nabalej c'al jelanil tu' ayach, c'am toc'al junok lajan is nabal axca ach ti' maxax ec'lej. Tamwal junokxa ok aj wan yet mayal eq'uel a tiempoal. 13Mannejc'alnak ti', palta ok wak' c'apax a beyomal, c'al a mimanbilal, caxc'al maj a k'ana' palta ok wak' ayach. Chi yal elapnok c'am junokxa rey axca ach ti' yak'ban iquis ach. 14Ta ok ekejc'al tzet chi yochej in c'ul, cax ok ekenc'al in chekbanil axca wal max yun yikenc'al a mam, ok wak' najatilbok a k'inal, ẍi Dios.
15Axa yet max el is wayan cham rey Salomón, max naon ba c'ul tol wayich chi yunej. Axa yet max jayoc bay Jerusalén xin, max toj bay c'atan caẍail is trato Jehová, cax max chek yak'lay tz'a xajanbal chi tz'a'i, c'al xajanbal yet junc'ulalil yetok Dios. Max lajwi tu', cax max yawten masanil eb ayoc yin opiso low yetok.
Is jelanil cham rey Salomón
16A yet jun tiempoal tu' max apni oc cawan eb ix ajmul ix watx'nen jun is k'anej satak cham rey Salomón. 17Max yalon jun ix bay:
—Mamin rey, ayin ti' yetok jun ix ti' junnej nail jayji on. A yet max ajapnok c'ual, max jay jun wune'. 18Cabjial wal tu', cax max jay pax yet ix ti'. Asan on co cawanil yul te na tu', c'am junokxa. 19Axa yet jun ak'bal max chemen cam ix ti' yune' yet c'aynak el c'ul ix wayi. 20Axa mi yet chuman ak'bal xin, max aj wan ix, yet wal c'aynak in el in wayi, max yion aj ix yune' camnakxa tu' max ul telbancan ay ix in c'atan, axa wet iquis, max yitok ix c'atan, q'uexelok yet tu'. 21Axa yet max sakbi xin, cax max wak'on yim wune' waloni, camnakxa. Axa yet max sakbixac'al el xin, cax max wiloni tol man wetok jun unin tu', ẍi ix.
22Max yalon junxa ix:
—C'amak, a jun unin iquisto ti' wet, axa jun camnakxa tu' et, ẍi junxa ix tu'.
Max yalon pax ix babel tu':
—C'amak, a jun camnakxa tu' et, axa jun iquisto ti' wet, ẍi ix.
Axcac'al tu' max yun teyelenc'al ba eb satak cham rey, 23xan max yal cham rey: A jun ix ti' chi yal ix: Wet jun unin iquisto ti', a jun camnakxa tu' et, ẍi ix. Ac'ala' junxa ix tu' ac'ala' chi yut yalon pax ix bay ix babel max alon tu', ẍi cham rey. 24Yuj tu' xan max yala':
—Iektek junok ch'en espada ayin, ẍi cham.
A yet max apni oc ch'en espada, 25max yaloni:
—C'upek ay nan jun yaliẍ unin iquisto ti' cax che yak'on nannanok yet junjun eb ix, ẍi cham.
26A ix ay yet jun yaliẍ unin iquisto tu', max oc pitz'naj cusc'ulal yin ix, max yalon ix bay cham rey:
—Elokab yin a c'ul mamin rey, c'am chi c'uplay cam jun unin ti', ak'layokab bay ix ti', ẍi ix. Max yalon junxa ix tu':
—C'am chi can wetok, tamwal yetok ix tu', c'uplayokab ay nan, ẍi ix.
27Xan max yal cham rey:
—Manchak e mak' cam jun unin tu', ak'layokab bay ix c'am chi yal c'ul chi mak'lay cam tu', yujtol yel a ix ay yet, ẍi cham rey.
28Masanil conob Israel max abeni yuj tzet max yun watx'nen el cham rey jun k'anej tu', caw wal ay is mayk'ak'al yul sat anima, max nachaj el yuj eb tol max ak'lay is jelanil yuj Dios, yet chi watx'nej el k'anej.
Currently Selected:
1 R 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989