1 R 2
2
Lajub chekbanilej max yak' cham rey David
1Cawilxa chi jayoc camichal cham rey David, yuj tu' xan max yal bay Salomón is c'ajol axca ti': 2Toxa ok in camok axca chi yunc'al masanil eb jet animail. I wal ajtek a c'ulok, cax tx'ijan winak chot a ba. 3Ikej is chekbanil Jehová co Diosal, atac'ala' tzet chi yochej Cham, c'al tzet chi yal is ley, c'al is chekbanil, c'al cuybej aycan yul tx'an un yet cham Moisés. Axca tu' caw wal watx'c'al ok ach eloc yin masanil tzet ok onej, 4yet watx' chi yuncan el tzet albilcan yuj Jehová ayin. Max yal axca ti': Tatol yikemc'al ok yut ba eb enatil ayin, ta tojolc'al ok yut ba eb in satak yetok masanil is c'ul, c'al yetok masanil yanimail; ta axca tu', manc'al ok majax aj enatil ok occ'al yajawilal bay conob Israel ti', ẍi Cham ayin.
5Ti wal ojtakxa tzet max quin yut Joab is yune' xal Sarvia, max mak' cam cawan eb yajawil eb soldado jet israelal: a ton Abner is c'ajol Ner, c'al yetok Amasa c'ajol Jeter. A yet c'am owal, cax max mak'lay cam eb yuj, axca tol xol owal max mak' cam eb, axca tol max bonchajtok is c'alil c'al is xanab yuj chiq'uil eb. 6Yuj tu' xan aj nabal c'al chot a ba, tol man ok cam Joab tu' yin cac'al tu'. 7A pax eb nak is c'ajol Barzilai aj Galaad, cha camc'ulnej eb in k'ana', chic'al awtej eb low etok. A eb nak tu' max colwaj eb wetok yet max quin el bay oẍtak Absalón. 8A pax Simei ayic' cayti', a ton c'ajol Gera aj Bahurim yet is tribual Benjamín, caw wal yob tzet max yal win yet ayin oc yin beyil bay Mahanaim, palta max apni oc quin is chaon bay a' Jordán. Max tewi ayin tol chi wak' mimanc'ulal yin, xan yin is bi Jehová max wak'on in ti' tol c'am chin mak' camok. 9A nak tu' c'am chak' mimanc'ulal yin. Asan xin, ach ti' ay a nabal. Chi cam a naon tzet ok otej. Manokab toc'alok chi cam axca tu', palta tol ok mak'lay camok, ẍi cham rey David.
Camichal cham rey David
(1 Cr 29.26-30)
10Axa yet max cam cham rey David, a tu' max muklay bay chi yik conobal David. 11Cawinak abil max yak' reyal yiban conob Israel; ukeb abil max ayji bay Hebrón, axa junxa 33 abil xin, a tu' max ayji bay Jerusalén. 12A Salomón max cancan yin reyal q'uexelok cham rey David, caw wal tec'an max yuncan is yikbej tu'.
C'aybanilal el Adonías yetok eb ayoc yetok
13Axa Adonías yune' xal Haguit, max bet il-lay xal Betsabé yuj, xal is txutx Salomón. Max k'anlej xal bay:
—¿Watx' mi a nabal chach jayi? ẍi xal.
14—Ja' toni, ay wal jun in nabal en, ẍi bay xal.
—Al xin, tzet a nabal tu', ẍi xal.
15—Ojtak tol wet-xa yayji ikbej tu', masanil conob Israel max echbaneni bak'in chin oc yin reyal. Axa tinani' xin, axa nak wuẍtak max oc yin reyal, yujtol a Jehová axca tu' max yutej. 16Axa tinani' xin, ay jun tzet chin k'an ayach, matawal ok ekej xin, ẍi bay xal.
—Al tzet chochej tu', ẍi xal.
17Max yaloni:
—Chin k'an ayach tol chal bay cham rey Salomón, tol chi yak' cham ix Abisag aj Sunem wistzilok, ok yikejc'alta' bay tzet chala', ẍi bay xal.
18—Yunokabi, ok wal bay cham tzet chochej tu', ẍi xal.
19Max lajwi tu' cax max toj xal Betsabé k'anjab bay Salomón yuj Adonías. Maxc'al yil cham yocapnok xal cax max aj wanok, max ay nojan satak xal. Max lajwi tu xin, axa yay pax chotan bay yul is trono, cax max yak'on ilaytek jun miman ẍila bay max ay chotan xal bay yetc'ulal is watx' k'ab. 20Max yalon xal:
—Ay jay belan k'anej chi wal ayach, c'amokab cha tenic' tzet chi wala', ẍi xal.
—A masanil tzet cha k'an txutx, c'am cha na' tol c'am chi wikej, ẍi cham.
21—Chi mi je' chak' ix Abisag sunamita yistzilok oẍtak Adonías, ẍi xal.
22—¿Tzet yuj xan chi ul a k'ana', tol chi wak' ix Abisag bay Adonías? ¿Axca tol chi ul a k'ana' tol chi wak' wikbej ti' bay nak tu', yujtol babel winak nak in satak, cax ayoc cham sacerdote Abiatar c'al Joab yune' xal Sarvia yetok? ẍi bay xal.
23Max lajwi yalon Salomón axca tu', max yak'on is ti': Camokab in yuj Jehová, ta c'am chi cam Adonías yuj tzet chi k'an ti'. 24A Jehová max in aon oc yin reyal q'uexelok in mam yet watx' chi yuncan el bay max yak' is ti', tol max yak' jun ikbej ti' ayin c'al bay masanil winatil, xan chi wak' in ti' satak Cham, tol a tinani' ok cam Adonías tu', ẍi Salomón.
25A wal yet jun bek tu' max yalon cham bay Benaía is c'ajol Joiada tol chi toj mak' cam Adonías, xan axca tu' max yunej. 26Max yalon c'apax bay cham sacerdote Abiatar: A tinani' chi wal ayach tol chach toj bay a tx'otx'al bay Anatot; tol moj wal chach cami, palta man ok ach in mak' camok, yujtol ach ayach oc yilomalok te caẍail is trato Jehová bay in mam, cax ach jun max ab yatakil yetok in mam tu', ẍi Salomón. 27Axca tu' max yun yelcan Abiatar yin sacerdoteal yuj Salomón, cax max yunencan el tzet albil yuj Jehová bay Silo yin yinatil Elí.
28Ac'ala' c'apax Joab max yaoc ba yetok Adonías, caxc'al maj yaoc ba yetok Absalón. Yuj tu xin, a yet max apni oc jun k'anej ti' bay, max toj c'uban el ba bay yul cajlobal Jehová yaloni, max oc lacan yin yuc'a' altar bay txiquinlak. 29Cax max apni pax oc k'anej bay cham rey Salomón tzetbil tol a bay is cajlobal Jehová, a tu' chi col ba Joab bay altar. Max yalon Salomón bay Benaía tol chi toj mak' cam bay tu'. 30Max toj xin, max yaloni:
—Mayal yal cham rey tol chach eltek bay tu', ẍi bay.
Max tak'wi Joab:
—C'amak, a tu' chin cam cayti', ẍi.
Max toj pax Benaía yalon bay Salomón tzet max yut tak'wok ba Joab. 31Max yalon cham rey:
—Camokab bay tu', yunokab axca chi yochej tu', cax cha mukoni, yet watx' chi c'ayil binaj yin in mam c'al win yuj eb anima c'am is mul max mak' cam Joab. 32Ocokab is mulok yuj Jehová, yujtol man yojtakok in mam yet max mak'lay cam Abner is c'ajol Ner is yajawilal eb soldado Israel yuj, c'al Amasa c'ajol Jeter is yajawil eb soldado Judá. A eb nak cawan tu' caw wal watx' eb, yikem eb is satak. 33A is camichal eb tu' ocokabcan mulok c'al mulok eb is yinatil yin tojbalk'inal. Palta titokab watx'c'ulal Jehová jiban on ayon yinatil on cham rey David tol ok on ayc'al chotan bay yiban is trono, ẍi Salomón.
34Max lajwi tu' cax max toj Benaía mak'on cam Joab. Axa yet mayal cam tu xin, cax max mukon bay is na yul yet tz'inan tx'otx'. 35Axa Benaía max yaoc cham rey yin yajawilok eb soldado is q'uexelok Joab, c'al cham sacerdote Sadoc max occan is q'uexelok Abiatar. 36Max lajwi tu' cax max yak'on tit cham rey nak Simei, cax max yalon bay:
—Watx'nej aj junok a na bay Jerusalén ti' bay chach cajayi, junelnej chach can cayti'. 37Tatol chach el cayti' cax chach ec'tok bay yul a' Cedrón, c'am chi ec'tok a cami. A a camichal tu', ach caw chetek eban, ẍi bay. 38Max tak'wi Simei:
—Yunokabi, chi wikej bay tzet chal, mamin rey, ẍi.
Najatil max ec' cajan Simei tu' bay Jerusalén. 39Yinxa oxeb abil, cax max el can cawan is chekbej yintak, axa yintak Aquis c'ajol Maaca ayoc reyal bay Gat max apni oc eb. Axa yet max al-lay bay Simei tol a tu' ay eb nak is chekbej bay Gat bay cajan Aquis, 40ayman max yaoc tz'um is burro, max toj bay conob Gat bay ay Aquis, sayon is chekbej tu'. Axa yet max meltzoj yetok eb is chekbej tu', 41max yaben aj Salomón tol a Simei max betic' bay Gat palta mayal meltzoj pax bay Jerusalén. 42Max chekon cham rey toj tit Simei, max yalon bay:
—¿Tom maj wal ayach, tol max ak' a ti' satak Jehová tol c'am chach eltok jabok bay yul conobal Jerusalén ti', max cam walon ayach ta ay bay chach toj bay junokxa lugar c'am chi ec'tok a cami? ¿Tom maj ach tak'wok xin, max aloni tol ok ekej tzet max wala'? 43¿Tzet yuj xan maj ekej bay max ak' a ti' satak Jehová cax maj ekej tzet max wala'? 44Natek tinani' jantak yobtakil max al bay in mam. A tinani' a Jehová ok ach beyc'ulnenok, cax chi titcan eban yuj masanil tzet max on tu'. 45A pax wiban ayin ti', yak'okab Jehová is watx'ilal. A yinatil rey David ok occ'al bay yul trono yin tojbalk'inal, ẍi cham rey.
46Max lajwi tu xin, max yalon cham rey bay Benaía c'ajol Joiada tol chi toj mak'lay cam Simei yuj. Axca tu' max yun cawxican oc ikbej yul k'ab Salomón.
Currently Selected:
1 R 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989