Núm 1
1
Ri israelita xe'ajlex toq ek'o chuxe-pe ri juyu' Sinaí
1Ri e rijatzul kan ri Israel xe'el-pe chiri' pa ruwach'ulew Egipto y xe'apon pa tz'iran ruwach'ulew rubini'an Sinaí. Y chupan ri nabey q'ij richin ri ruka'n ik' chire ri ruka'n juna' ri ke'el-pe pan Egipto, jari' toq xch'on-pe ri Jehová chupan ri rachoch richin molojri'il y xubij chire ri Moisés: 2Tatz'ibaj k'a kibi' konojel winaqi': Achi'el ri kajlabal chi kach'alal-ki'. K'ari' tatz'ibaj kibi' konojel ri achi'a', 3ri k'o juwineq kijuna' pa jotol, roma rije' yetikir yebe pa labal. Y naben pa taq tzobaj chike, achi'el ri ruchojmilal ri niban kik'in ri aj-labal. Ri xtito'on awichin chubanik ronojel re' ja ri Aarón. 4Chuqa' xkixkito' jujun aj-raqen chikikojol chikijujunal ri tzobaj richin ri tinamit.
5-16Ja kibi' re achi'a' re' ri aj-raqen pa kiwi' ri tzobaj ri xketo'on iwichin. Ri aj-raqen richin ri tzobaj richin Rubén, ja ri Elisur ruk'ajol ri Sedeúr. Ri tzobaj richin Simeón ja ri Selumiel ruk'ajol ri Surisadai. Ri tzobaj richin Judá ja ri Nahasón ruk'ajol ri Aminadab. Ri tzobaj richin Isacar ja ri Natanael ruk'ajol ri Suar. Ri tzobaj richin Zabulón ja ri Eliab ruk'ajol ri Helón. Ri tzobaj richin Efraín ja ri Elisamá ruk'ajol ri Amihud. Ri tzobaj richin Manasés ja ri Gamaliel ruk'ajol ri Pedasur. Ri tzobaj richin Benjamín ja ri Abidán ruk'ajol ri Guidoní. Ri tzobaj richin Dan ja ri Ahiézer ruk'ajol ri Amisadai. Ri tzobaj richin Aser ja ri Paguiel ruk'ajol ri Ocrán. Ri tzobaj richin Gad ja ri Eliasaf ruk'ajol ri Reuel. Ri tzobaj richin Neftalí ja ri Ahirá ruk'ajol ri Enán, xcha' ri Dios.
17Ri Moisés y ri Aarón xekoyoj k'a konojel ri achi'a' ri xecha'ox, ri xnatex yan qa ri kibi'. 18Y k'ari' xekimol k'a konojel ri winaqi', chupan ri nabey q'ij chire ri ruka'n ik' y xkitz'ibaj k'a kibi' achi'el ri kajlabal chi kach'alal-ki'. Xkitz'ibaj k'a kibi' ri achi'a' ri k'o juwineq kijuna' pa jotol. 19Ri Moisés kan xuben-wi k'a ri tz'iban bi'aj ri rubin ri Jehová chire, ri chiri' chupan ri tz'iran ruwach'ulew Sinaí. 20-46Xtz'ibex k'a kibi' konojel ri achi'a' ri k'o juwineq kijuna' pa jotol, konojel ri yetikir yebe pa labal. Y xtz'ibex k'a kibi' achi'el ri kajlabal chi kach'alal-ki', xtiker-el rik'in ri tzobaj richin ri Rubén, ri nabey ruk'ajol ri Israel y xtane' rik'in ri tzobaj richin ri Neftalí. Jare' k'a ri kajlabal ri achi'a' ri xe'ajlex: Ri kajlabal ri achi'a' richin ri tzobaj ri richin kan ri Rubén e 46,500. Ri kajlabal ri achi'a' richin ri tzobaj ri richin kan ri Simeón e 59,300. Ri kajlabal ri achi'a' richin ri tzobaj ri richin kan ri Gad e 45,650. Ri kajlabal ri achi'a' richin ri tzobaj ri richin kan ri Judá e 74,600. Ri kajlabal ri achi'a' richin ri tzobaj ri richin kan ri Isacar e 54,400. Ri kajlabal ri achi'a' richin ri tzobaj ri richin kan ri Zabulón e 57,400. Ri kajlabal ri achi'a' richin ri tzobaj ri richin kan ri Efraín e 40,500. Ri kajlabal ri achi'a' richin ri tzobaj ri richin kan ri Manasés e 32,200. Ri kajlabal ri achi'a' richin ri tzobaj ri richin kan ri Benjamín e 35,400. Ri kajlabal ri achi'a' richin ri tzobaj ri richin kan ri Dan e 62,700. Ri kajlabal ri achi'a' richin ri tzobaj ri richin kan ri Aser e 41,500. Ri kajlabal ri achi'a' richin ri tzobaj ri richin kan ri Neftalí e 53,400. Konojel ri achi'a' ri xe'ajlex e 603,550.
Ri levita xecha'ox richin jun chik samaj
47Jak'a ri tzobaj richin ri Leví, chupan ri q'ij ri' man xtz'ibex ta kibi' y man xe'ajlex ta chuqa', achi'el ri xban kik'in ri ch'aqa' chik tzobaj. 48Roma ri Jehová kere' ri rubin chik chire ri Moisés: 49Man ke'awajlaj ri tzobaj richin ri Leví, ni man taya' ri kibi' chikikojol ri aj-labal richin ri Israel. 50Roma ri levita jari' ri xkebesamej chupan ri wachoch richin ri nujikibel-tzij y xkek'oje' chuqa' pa ruwi' ri samajibel y ronojel ri ch'aqa' chik ri ek'o chiri'. Ja chuqa' rije' ri xke'uk'uan ri wachoch banon rik'in tzieq y ronojel ri k'o chupan, toq k'o chi nuk'uex-el juk'an chik. Kan ja wi k'a rije' ri e aj samaj ri pa wachoch y ri kachoch rije' kan chunaqaj ok ri wachoch yin xkekipabala-wi. 51Roma ri', toq ri wachoch k'o chi nisilox-el richin chi niq'ax k'a juk'an chik, ja ri levita ri xkesolon-el. Y ri akuchi chik yebek'oje-wi, ja rije' ri yenuk'u-q'anej. Jak'a ri wineq ri xa man levita ta y nijel-apo chubanik ri samaj ri', kan xtikamisex k'a. 52Y ri ch'aqa' chik winaqi' richin ri tinamit Israel, toq ye'apon ri akuchi yek'oje-wi-qa, kan nibekinuk'u-ki' pa taq tzobaj, achi'el ri kinuk'ik ri banon-el; chuqa' ri aj-labal yek'oje' kik'in ri kitzobaj ri akuchi k'o-wi ri tzieq ruk'exewach ri kitzobaj. 53Jak'a ri levita kan xkekipabala-q'anej ri kachoch y xtikisutij-rij ri wachoch richin ri nujikibel-tzij, richin nikichajij chi man yixjel-apo, richin chi man niqaqa ta ri woyowal pan iwi'. Kan ja rije' ri xke'ok chajinela' richin ri wachoch richin ri nujikibel-tzij, xcha' ri Jehová.
54Y ri winaqi' richin ri tinamit Israel, kan xkitaqej k'a ri ch'abel richin ri Moisés ri bin chire roma ri Jehová.
Currently Selected:
Núm 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.