Lev 27
27
Ronojel ri ch'aron chire ri Dios
1Ri Jehová xubij chik k'a chire ri Moisés: 2Kere' k'a tabij chike ri awinaq: Wi k'o ta jun wineq nrajo' nukol jun chik wineq ri sujun chik chuwe yin, xtuk'en k'a pe ri saqipueq y xtetex rik'in ri etabel ri ek'o chupan ri wachoch. Xtutoj k'a chuwe achi'el ri rajlabal ri k'o: 3Wi jun achin ri najowex nikol-el y ri achin ri' k'o chik juwineq rujuna' y man jani titz'aqet oxk'al rujuna', rija' xtutoj juwineq onza saqipueq; 4y wi jun ixoq ri najowex nikol-el y ri ixoq ri' k'o chik juwineq rujuna' y man jani titz'aqet oxk'al rujuna', rija' xtutoj kablajuj onza saqipueq; 5wi jun ti ala' ri najowex nikol-el y ri ti ala' ri' k'o chik wo'o' rujuna' y man jani titz'aqet juwineq rujuna', rija' xtutoj nik'aj libra saqipueq, y wi ta jun ti xten ri najowex nikol-el y ri ti xten ri' k'o chik wo'o' rujuna' y man jani titz'aqet juwineq rujuna', rija' xtutoj kaji' onza saqipueq; 6wi ta jun ti ala' ri k'ari' jun rik' y man jani titz'aqet wo'o' rujuna' xtitoj ka'i' onza saqipueq roma rija'; y wi ta jun ti xten ri k'ari' jun rik' y k'a man jani titz'aqet wo'o' rujuna' xtitoj k'a más juba' jun onza saqipueq roma rija'; 7wi ta jun achin ri najowex nikol-el y ri achin ri' xtz'aqet yan oxk'al rujuna', rija' k'o chi xtutoj waqi' onza saqipueq, y wi ta jun ixoq ri najowex nikol-el y ri ixoq ri' xtz'aqet yan oxk'al rujuna', rija' k'o chi xtutoj kaji' onza saqipueq. 8Wi ri wineq man jun k'o rik'in richin nuya' ri k'o chi nutoj, k'ari' xtuk'ut-ri' chuwech ri sacerdote, y k'a ja rija' ri xtibin ri janipe' nitikir nutoj.
9Y wi ta jun wineq nusuj jun chikop chuwe yin ri kan utz richin kamelabel, re chikop re' kan ch'aron chik chuwe yin. 10Re chikop re' man tiya' chik kan jun pa ruk'exel stape' jun más utz o jun itzel. Wi ta nijel jun, kan chi e ka'i' k'a xke'ijech kan chuwe yin.
11Wi k'o ta jun nusuj chikop ri man ch'ajch'oj ta richin kamelabel ri nusuj chuwe yin, re chikop re' xtuk'uex chuwech ri sacerdote. 12Richin keri' rija' nuch'ob janipe' rajel ri chikop ri' ri achi'el ri rubanik. Keri' ri rajel ri xtuk'utuj rija'; kan keri' k'o chi xtitoj. 13Y wi ri xtik'amon-pe ri chikop ri' nrajo' nukol-el, kan xtutoj k'a kan ri rajel ri rubin ri sacerdote, y pa ruwi' ri rajel kan xtuya' chik kan jun chire ri ro' chire ri rajel.
14Toq k'o jun wineq nujech ri rachoch chuwe, ja ri sacerdote xtibin ri janipe' ri rajel. Stape' jotol rajel o qajineq rajel ja ri rubin ri sacerdote jari' k'o chi nitoj. 15Y ri xtijachon ri jay chuwe, wi nrajo' nukol kan, ja ri rajel ri xtuk'utuj ri sacerdote, jari' k'o chi xtutoj y pa ruwi' ri' xtuya' chik kan jun chire ri ro' chire ri rajel.
16Wi k'o ta jun wineq richinan kan jun ulew y nipe pa ránima chi juba' chire ri ulew ri' nusuj chuwe yin Jehová, ri sacerdote xtuch'ob k'a rij janipe' nuya' ri ulew ri' pa jun juna' richin nuch'ob rij janipe' nuya' pa kawineq lajuj juna'. Y pa ruwi' ri' nipe-wi ri janipe' k'o chi nutoj ri rajaw ri ulew, roma pa ruwi' chi lajujteq quintal cebada, k'o chi nutoj jun onza saqipueq y k'o chi nutoj kan pa jun bey ri janipe' chik juna' nrajo' richin napon ri juna' toq nitzolix ronojel. 17Wi ri wineq ri' nusuj ri juba' rulew ri' toq k'ari' jun juna' tiq'ax kan toq xtzolix ronojel, ri sacerdote nuch'ob k'a ri janipe' ri k'o chi nutoj kan richin ri kawineq lajuj juna'. 18Jak'a wi xa k'o yan chik k'a juna' tiq'ax toq xtitzolix ronojel, ri sacerdote nuch'ob k'a ri janipe' chik juna' nrajo' chi napon ri jun chik kawineq lajuj juna' y pa ruwi' ri' nrelesaj wi ri janipe' k'o chi nutoj kan ri rajaw ri ulew ri'. 19Y wi ri rajaw ri ulew nrajo' nukol yan ri ulew ri rusujun chuwe yin, k'o chi nutoj jun chik ro' chire ri saqipueq ri xutoj yan pa nabey, richin chi nitzolin chik pa ruq'a'. 20Jak'a wi xa man nukol ta chik ri rulew, o wi xa ruk'ayin chik kan chire jun chik wineq, re' man xtitzolin ta chik pa ruq'a' toq napon ri juna' richin nitzolix ronojel. 21Y roma ri' kan maneq chik k'a banel, chi toq napon ri juna' ri', kan xtok wi kan wichin yin Jehová, ri ulew ri', y ri sacerdote kan xke'ichinan-wi wik'in yin.
22Jak'a wi ri ulew xa man richinan ta, xa ruloq'on y nipe pa ránima ri rajaw chi nusuj chuwe yin Jehová, 23ri sacerdote kan xtuch'ob k'a janipe' saqipueq ri k'o chi nutoj ri rajaw ri ulew, roma nuk'en chirij ri janipe' juna' nrajo' richin napon toq nitzolix ronojel; ri rajaw kan xtutoj k'a ri saqipueq toq ri sacerdote kan ruch'obon chik ri janipe' k'o chi nutoj; y re saqipueq re' xtijach chuwe yin. 24Y toq napon ri juna' toq nitzolix ronojel, ri ulew ri' xtitzolix k'a chire ri nabey rajaw o chike ri e rijatzul kan rija'. 25Ronojel ri rajel ri niya'ox xtetex rik'in ri etabel ri ek'o chupan ri wachoch.
26Jak'a ri nabey taq al achija' chike ri iwawej kan e wichin yin, y man ruk'amon ta chi yesuj chik chuwe yin jun bey, y ri' stape' wákix, karne'l o tzuntzun, roma ronojel re' kan e wichin chik yin. 27Y wi xa jun nabey al achij chike ri chikopi' ri man e utz ta richin kamelabel, k'o chi nik'ayix rik'in ri rajel ri nuch'ob ri sacerdote, ri janipe' saqipueq ri nrejqalej. Y wi xa ja ri rajaw ri niloq'on chik el k'o chi nuya' chik q'anej jun ro' chire ri rajel, y wi rija' xa man nrajo' ta, xtik'ayix-el rik'in ri rajel ri rubin chik ri sacerdote.
28Jak'a ek'o ri kan e jachon chik chuwe yin, ri kan man jun xtitikir xtikolon ni ta xtik'ayin kichin, wi ta wineq, chikop, o ulew; kan ronojel wi k'a ri e jachon chik chuwe yin kan pa nuq'a' k'a yin ek'o-wi. 29Y chuqa' ri wineq ri kan ch'aron chik richin napon pa kamik, kan man jun xtikolon richin, kan k'o k'a chi napon na chupan ri kamik.
30Ri jun chire ri lajuj chire ri itiko'n ri ibanon-qa y ri kiwech che' ri yetij kan yech'ar k'a richin ye'ok wichin yin. 31Wi k'o ta jun nrajo' nukol-el jun chire ri lajuj ri xa ruya'on chik chuwe yin, kan xtuya' k'a ri rajel y pa ruwi' chik re' xtuya' chik jun ro' chire ri rajel. 32Y chuqa' jun chire ri lajuj chike ri wákix, karne'l o tzuntzun, kan yech'ar k'a kan richin ye'ok wichin yin. Y ri rajaw nuchop kajlaxik chikijujunal y achoq pa ruwi' xtiqaqa-wi ri lajuj xtuya' retal richin chi jari' wichin yin. 33Y kan man xkerucha' ta k'a ri e utz y ri man e utz ta, richin chi man nusuj ta jun chikop ri xa man utz ta. Jak'a wi ri rajaw nrajo' nujel kan jun ti chikop, xa kan chi e ka'i' k'a re chikopi' re' xke'ok wichin yin, y man jun chik banel chi xke'ok ta chik richin ri rajaw, xcha' ri Jehová chire ri Moisés.
34Ja ronojel k'a pixa' re' ri xuya' ri Jehová chire ri Moisés ri chiri' pa ruwi' ri Sinaí, richin chi kan tikitaqej ri ruwinaq, ri e rijatzul kan ri Israel.
Currently Selected:
Lev 27: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.