Nah 3
3
Ri Nínive kan xtiwulex-wi jumul
1Toq'ex awech, rat Nínive roma kan at kamisanel.
Y kan xaxe tz'ukun-tzij naben.
Y at nojineq rik'in q'oloj,
y kan man yatane' ta chubanik ri eleq'.
2Ri aj-labal yekirapaj ri kikiej.
Xkeq'ajan ri ki-rueda ri carruaje,
chuqa' ri kaqen ri kiej.
3Ri achi'a' ri e beneq chirij kiej ri nikiben oyowal.
nich'ich'an k'a ri ki-espada y ri kikum.
Ri kaminaqi' kan man e ajlatel ta chik;
janila k'a e k'iy ri xeken.
Ri winaqi' kan xtikipajk'ila' k'a kaqen chikij ri kaminaqi'.
4Y ronojel re' nibanatej roma rat Nínive xa kan xak'ayij-awi' achi'el nuben jun ixoq itzel ruk'aslen.
Stape' kan janila at jebel ok,
Xe'atijoj ch'aqa' chik chubanik ri itz.
Rik'in ri itzel taq abanobal y ri banoj itz xe'ach'ek winaqi' richin ch'aqa' chik ruwach'ulew.
5Ri Jehová k'iytisanel richin ronojel kere' nubij:
Yin kan xkiyakatej k'a chawij:
Xkatinch'anaba' richin chi xkatkitz'et at ch'anel.
Y ri winaqi' richin ch'aqa' chik ruwach'ulew xtikitz'et ri ak'ixbilal.
6Xtinben chi xtibek'aq kan ronojel q'ayis chawij,
xtinya' k'ixbilal pan awi' y xkatok jun toribel q'ayis, xcha' ri Dios.
7Konojel k'a ri xketz'eton awichin xke'animej chawech;
Xkesik'in y xtikibij: ¡Ri Nínive xa xwulatej!
¿Achike k'a xtijoyowan ruwech?
¿Achike k'a xtikuquban ruk'u'x?, xkecha'.
8Ri Tebas jun tinamit ri kan k'o kuqubabel-k'u'x rik'in,
ri xk'oje' pa runik'ajal ri raqen-ya' Nilo.
Y ri raqen-ya' re' kan jari' xe'ok tz'aq richin rija'.
¿Y kan más ta k'a at utz rat chuwech ri q'asen tinamit ri'?
9Xukuquba' ruk'u'x kik'in ri Egipto y ri Etiopía.
Ri Fut y ri Libia xe'ok to'oy richin.
10Man rik'in ri' ri Tebas xa xuk'uex-el pa ximonri'il.
Chuqa' ri taq ak'uala' xek'aq tzan taq abej pa taq krusin-bey.
Ri achi'a' ri k'o kiq'ij xban sakinik pa kiwi' richin achike ri yekik'uaj-el,
y ri k'o kuchuq'a' xe'uk'uex-el y xexim-el rik'in q'eqapueq.
11Nínive, wakami ja rat k'a ri xkabek'uluwachin keri',
rat chuqa' xkabeq'aber y xtabewewaj-awi'.
Xtakanoj akuchi xtato-awi' chikiwech ri e etzelanel awichin.
12Ri jay ri ek'o awik'in richin tobel xa xketzaq,
achi'el yetzaq-pe ri wíkix toq e cheq' chik.
Toq nisilox, kan xkebetzaq k'a pe k'a pa ruchi' ri najowan nitijo richin.
13Ri aj-labal ri ek'o iwik'in toq nikicholajij-ki',
nikixibij-ki' achi'el nikiben ri ixoqi'.
Ri q'eqapueq ri e q'eban chirij ri ruchi' ri itinamit kan xtuk'is q'aq';
y roma ri' kan yejaqatej k'a ri ruchi' chikiwech ri e etzelanel iwichin.
14Tinaba' k'a kan k'iy iya' richin nikoch' toq xtisutix-iwij;
ke'ichojmirisaj ri jay richin tobel.
Kixok k'a chupan ri ch'abeq
y tixeq'a' jebel richin niben ri xan,
keri' ye'ito' ri tz'aq richin tobel.
15Stape' k'a keri' xtiben, jak'a ri q'aq' ri' kan xtuk'is ri itinamit.
Chuqa' kan xkixruk'is ri espada.
Xkixruk'is achi'el nikiben ri sak' toq nikik'is ri itiko'n;
Ke'imolo' k'a janila e k'iy iwinaq, achi'el nikiben ri sak'.
16Ri k'ayinela' kan yek'iyer k'a;
kan más k'a e k'iy chikiwech ri ch'umila' ri ek'o chila' chikaj.
Jak'a rije' xa kan nikik'uaj-el ronojel ri iméro y yebe
achi'el nikiben ri sak' toq nikik'is-el ronojel tiko'n y yebe.
17Ri yechajin iwichin y ri aj-raqen ri ek'o pan iwi' kan achi'el nikiben ri sak';
Toq nuben tew jun q'ij, rije' kan nikitz'araba-ok-ki' chirij ri xan,
y toq nitzu'un-pe ri q'ij xa yebe, y man jun netaman akuchi yebe-wi.
18Rat rey richin Asiria, ri e aj-raqen ri ek'o awik'in xa xewer-qa.
Chuqa' ri achi'a' ri k'o kiq'ij xa xe'uxlan-qa.
Ri awinaq xa xkitaluj-ki' pa taq q'ayis achi'el nikiben ri taq karne'l.
Y man jun yuq'unel k'o richin nimolon kichin.
19Rat Nínive kan maneq chik raq'omal ri asokotajik;
ri sal ri k'o chawij kan man jun nitikir nik'achojirisan.
Konojel k'a ri ye'ak'axan chi rat natej poqon kan nikipaq'apa' k'a ri kiq'a' chawij roma kikoten.
Roma konojel winaqi' richin ri ruwach'ulew kitijon poqon pan aq'a';
konojel xkina' yan ri awetzelal ri man k'isel ta.
Currently Selected:
Nah 3: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.