Nah 2
2
Rutzijol toq xtich'akatej ri Nínive
1Xyakatej yan k'a pe chiwij ri wulanel, rix aj-Nínive.
Ke'iya' chajinela' pa ruwi' ri tz'aq richin ri tinamit.
Tichajij jebel ri bey,
tixima' chi utzil ri ximibel-ipan.
ke'imolo' ri aj-labal.
2Roma ri Jehová nuya' chik ri ruwaq'ijaj y ri uchuq'a' chire ri ruwach'ulew Israel y ri Judá,
richin chi yek'oje' chik jun bey achi'el rubanon-pe, toq ri e etzelanel kichin man jani tikelesaj chuwi-kiq'a' ronojel ri k'o rejqalen.
3Ri kitobal ri aj-labal keq nitzu'un,
keri' chuqa' ri kitziaq.
Ri aj-labal kichojmirisan chik ki', ri ki-carruaje kan e achi'el q'aq'.
Ri kiej kan nikajo' yan yebe pa labal.
4Ri carruaje kan ye'anin rik'in janila uchuq'a' pa taq bey,
chuqa' pa taq nima'q ruwech bey richin molojri'il.
Ri kibanik kan achi'el ri q'aq',
ri yebiyin kan achi'el ri koyopa'.
5Ri aj-labal ye'oyox,
y rije' kan nikinimila-ki' richin nikajo' ye'apon yan chuchi' ri tz'aq,
richin chi nikichojmirisaj ri tobel richin ri nimalej che' ri nikusex richin niteq'ux ri ruchi' ri tz'aq.
6Nikijeq-el ri raqen-ya' ri k'o chuchi' ri tinamit;
ri winaqi' ri ek'o chupan ri jay richin ri q'atbel-tzij nikixibij-ki'.
7Ri reina y ri raj-ik' ye'uk'uex-el pa ximonri'il,
yebison achi'el ri taq paloma;
ye'oq' y nikitinila' ruwa-kik'u'x.
8Ri aj-Nínive ye'animej,
achi'el ri choy ri man tikirel ta richin niq'at.
¡Man kixanimej! ¡Kixtzolin-pe! nibix chike,
jak'a rije' xa man yetzolin ta.
9¡Ri e etzelanel kichin nikibij: ¡Qak'uaj-el ri saqipueq y ri q'anapueq!
¡Ri rubeyomel ri Nínive kan man yojtikir ta niqak'is-el!
10Man jun chik k'o kan chupan;
kan xk'is, kan xmalin y kan xok kan tz'iran.
Kan janila xibinri'il k'o chiri';
konojel winaqi' yebaybot,
y maneq chik kuchuq'a'.
Y janila kikajman roma xibinri'il.
11¿Akuchi kami ixk'o-wi rix aj-Nínive, ri ix achi'el koj?
¿Akuchi kami k'o-wi kan ri isok akuchi xik'iytisaj-wi ri taq alaji' koj?
¿Y akuchi kami k'o-wi ri isok ri xixk'oje' chupan ojer, chi achij, chi ixoq y chi alaji' y kan man xixibij ta iwi'?
12Rix aj-Nínive, ri kan ix achi'el koj ri ojer kan;
ri kan ye'ikamisaj ch'aqa' chik chikopi' richin ye'iya' chike ri alaji',
richin ye'iya' chike ri ixoqi' taq koj.
Y ri isok kan inojisan chi chikopi' ri e kaminaqi' chik.
13Ri Jehová k'iytisanel richin ronojel nubij:
Jare' ink'o richin yixink'is.
Xkenporoj k'a ri i-carruaje y xkebuqulin pa sib,
Kan xkenk'is k'a ri iwalk'ual.
Kan man xtinya' ta kan richin ja rix ta yixch'akon.
Y kan man jun bey chik k'a xtak'axatej kich'abel ri yech'on pan iwi' rix.
Currently Selected:
Nah 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.