Miq 5
5
1Kixyakatej k'a rix aj-labal aj-Jerusalem, roma sutin chik iwij koma ri e etzelanel iwichin. Re winaqi' re' kan xtikijich'aj rupalej ri i-rey rik'in jun xik'a'y.
Ri Dios xtuteq k'a pe jun k'ak'a' rey pa ruwi' ri Israel
2Jak'a xtipe pe jun q'atoy-tzij pa tinamit Belén ri chuqa' nibix Efrata chire. Stape' ri tinamit ri' maneq rejqalen chikiwech konojel ri tinamit richin Judá, kan kik'in rije' xtel-wi-pe re q'atoy-tzij re'. Y rija' kan samajineq-wi-pe pa nabey. 3Y re' k'a man jani tibanatej, roma ri Dios xkerumalij k'a kan ri qawinaq israelita, k'a xtapon na ri q'ij toq xtalex ri rey ri'. Chupan ri q'ij ri' xketzolej-pe pa taq ruwach'ulew konojel ri qawinaq. 4Y rija' kan xkeruyuq'uj rije' rik'in ri runimirinen y ri uchuq'a' richin ri Jehová ri qa-Dios. Y rije' kan kuqul k'a kik'u'x xkek'ase', roma ri rey ri' kan xtinimirisex k'a ruq'ij chuwech chijun ruwach'ulew. 5Ja rija' k'a xtik'amo-pe uxlanibel-k'u'x chupan ri q'ij ri'. Toq ri aj-Asiria xke'ok-pe chupan ri qaruwach'ulew richin xkekich'ek ri qawinaq, y xke'ok chupan ri jay richin q'atbel-tzij, jari' toq roj kan xkeqateq k'a chikij ri aj-Asiria e k'iy aj-raqen. 6Re aj-raqen re' kan xtikiq'et-tzij pa ruwi' ri tinamit Asiria rik'in uchuq'a'. Keri' chuqa' xtikiben chire chijun ri ruwach'ulew Asiria.*f1* Keri' re achi'a' re' kan xqojkikol k'a chikiwech ri e etzelanel qichin, toq xkeyakatej-pe chiqij y xke'ok-pe chupan re qaruwach'ulew. 7Ri qawinaq israelita xtikitaluj-ki' chuwech ri ruwach'ulew, jak'a xtapon chik k'a ri q'ij toq xkek'iyer. Y ri Dios xtibanon ronojel re' achi'el nuteq-pe ri raxq'ab y ri job, y man wineq ta ri nibanon. 8Keri' chuqa' ri xkekolotej kan chire ri qawinaq, ri kitalun-ki', xkeyakatej chikij ri e etzelanel kichin achi'el jun koj ri niyakatej chikij ri chikopi' ri ek'o pa k'echelaj. Xkekik'is achi'el jun koj ri yeruwech' ri q'ataj karne'l, y kan yeruk'is konojel. Y kan man jun xtitikir xtuto-ri' chuwech. 9Keri' k'a xkech'akon ri qawinaq chikij ri e etzelanel kichin. Kan konojel k'a ri xkeyakatej chikij, xkek'is.
Ri Dios xkeruch'ajch'ojirisaj ri israelita
10Ri Jehová nubij chi toq xtapon k'a ri q'ij ri', rija' xkerukamisaj ri kiej kichin ri qawinaq israelita, y kan xkeruwulaj k'a ronojel ri ki-carruaje e richin labal. 11Kan xkeruwulaj k'a ronojel ri qatinamit y ronojel ri jay ri e tz'apen chi tz'aq. 12Keri' chuqa' xkerukamisaj ri e banoy itz, y kan man jun aj-q'ij ri xtik'oje' chikikojol. 13Xkeruwulaj k'a el chikiwech ronojel ri wachibel y ri paban taq abej. Y chuqa' man jun bey chik k'a xkexuke' chikiwech ri wachibel ri xa ja ri kiq'a' ri banayon. 14Xtrelesaj k'a el chikiwech ri paban-che' richin ri dios Asera, y kan xkeruwulaj k'a ronojel ri qatinamit. 15Chuqa' rik'in k'a royowal xtuya' rutojbalil-mak pa kiwi' ri winaqi' kichin ch'aqa' chik ruwach'ulew ri man xkinimaj ta rutzij.
Currently Selected:
Miq 5: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.