Miq 4
4
Ri rajawaren ri Jehová chupan ri ruk'isibel q'ij
1Xtibek'uluwachitej chupan ri ruk'isibel taq q'ij,
chi ri juyu' ri akuchi k'o-wi ri rachoch ri Jehová
kan xtiya'ox chik k'a ruq'ij jun bey.
Ri juyu' ri' más nim rujotolen chikiwech ri ch'aqa' chik juyu',
y konojel k'a winaqi' richin ri ch'aqa' chik ruwach'ulew, xke'apon-el chiri'.
2Xkepe k'a janila chi winaqi' richin ch'aqa' chik ruwach'ulew, y xtikibixaj re bix re':
Qojjote-el pa ruwi' ri juyu' ri richin ri Jehová.
Xqojapon k'a pa rachoch ri ki-Dios ri winaqi' israelita.
Y rija' xtuk'ut chiqawech ri bey ri niqa' chuwech,
richin niqatzeqelibej ri rupixa', xkecha'.
Ri Dios xtuk'ut k'a rupixa' pa ruwi' ri juyu' Sión.
Kan pa Jerusalem k'a xtel-pe ri ruch'abel ri Jehová.
3Rija' xtuben ka' ri ruchojmilal chikikojol ri ch'aqa' chik ruwach'ulew.
Ri ruwach'ulew ri ek'o janila nej y ri k'o kuchuq'a' xke'apon rik'in,
richin xkeruchojmirisaj.
Ri ki-espada xtikiben azadón chire,
y xtikikusaj richin nisamajix ri ulew.
Ri kikum xtikiben jos chire.
Richin keri' maneq chik labal chikikojol ri winaqi',
ni man jun xtik'utu chikiwech richin yebe pa labal.
4Chupan ri q'ij ri' konojel k'a winaqi' man xtikixibij ta ki',
y chikijujunal k'o kijuwi-uva y ri ruche'el ri kiwíkix,
richin xtikitej pa ruk'iyal.
Keri' nubij ri Jehová ri k'o pa ruwi' ronojel.
5Stape' ri ch'aqa' chik winaqi' xkebiyin pa rubi' ri ki-dios,
man rik'in ri' roj kan xqojbiyin pa rubi' ri Jehová ri qa-Dios,
richin q'asen y tibe-q'ij tibe-seq.
6-7Toq xtapon ri q'ij ri' ri Jehová kan xkerumol chik ri xekajtej kan,
y xtuben k'a chike ri e kajtajineq chi xke'ok jun tinamit.
Xkerumol chuqa' ri kitalun-ki' richin xke'ok jun nimalej ruwach'ulew ri kan k'o ruchuq'a'.
Y stape' xuben chike chi xkik'owisaj tijoj-poqonal,
ri Jehová xtiq'aton-tzij pa kiwi' ri chiri' pa ruwi' ri juyu' Sión.
Y keri' k'a xtuben tibe-q'ij tibe-seq.
8Ri ojer kan ri Jerusalem xok jun tinamit richin tobel chike ri qawinaq.
Y chiqawech-apo xtitzolin-pe ri ajawaren ri xk'oje' qik'in pa nabey,
y kan xtik'oje' chik k'a jun qa-rey.
9Jak'a re wakami, rix yixsik'in
roma maneq chik i-rey y xa xeken-el ri ipixabanela'.
Rix nina' janila q'axo'n achi'el ruq'axo'n jun ixoq ri nalex yan ti ral.
10Ruk'amon chi keri' yixq'axo y yixjilo;
roma rix nuwinaq k'o chi yixel-el re wawe' pa tinamit Jerusalem,
y xa xkixbek'oje' pa taq ulew richin tiko'n.
Rix xa xkixbe k'a pa Babilonia,
y toq ixk'o chik chiri' xkixbekol-pe.
K'a chiri' k'a xkixrelesaj chik pe ri Jehová pa kiq'a' ri e etzelanel iwichin.
11Y toq xtapon ri q'ij ri', xa xtikimol-ki' e k'iy winaqi'
richin xkeyakatej chiwij.
Y rije' xtikibij: Jare' ri qarayibel pa ruwi' ri tinamit Sión.
Kan xtiqasex k'a ruq'ij, xkecha'.
12Jak'a ri yebin keri' xa man ketaman ta ri ruch'obonik ri Jehová,
man niq'ax ta chikiwech ri nrajo' nuben rija'.
Roma ri Jehová xkerumol k'a re winaqi' re'
achi'el nimol ri boraj trigo richin nich'ay.
13Ri Jehová nubij chike ri aj-Sión: ¡Kixyakatej richin nich'ey ri trigo!
Yin xtinya' iwuchuq'a' achi'el ruchuq'a' jun achij wákix ri k'o ruk'a' ri banon rik'in q'eqapueq y ri rupi'ch banon rik'in q'enq'oj-pueq.
Rix xke'ik'is janila tzobaj winaqi' richin ri ruwach'ulew.
Xtimej ri beyomel ri xk'oje' kik'in roma ri kamisanik y xtiya' chuwe yin, ri in rajaw ri ruwach'ulew.
Currently Selected:
Miq 4: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.