Jos 8
8
Toq ri e rijatzul ri Israel xkichop ri tinamit Ai
1Ri Jehová xubij chire ri Josué: Man taxibij-awi' ni man kamayamo-qa. Ke'ak'uaj konojel ri aj-labal y kixjote-el richin nichop ri tinamit Ai. Wakami yin xtinjech k'a chawe ri rey, ri ruwinaq, ri rutinamit y ronojel ri kulew. 2Rix xtiya' k'a pikbel chirij ri tinamit. Y xtiben chike ri winaqi' richin ri tinamit Ai y chire ri ru-rey achi'el xiben rik'in ri tinamit Jericó y chire ri ru-rey. Xaxe k'a re wakami xtimej-pe ri k'o rejqalen chuwi-kiq'a' y ri kawej, ronojel k'a re' xke'ok iwichin rix, xcha'.
3Keri' ri Josué y ri aj-labal xkinaba-ki' richin nibekibana' oyowal rik'in ri tinamit Ai. Ri Josué xerucha' k'a el e 30,000 achi'a' ri kan janila e utz richin oyowal, jare' k'a xeruteq-el ri chi'aq'a' ri'. 4Kere' k'a xubij-el chike: Tiwak'axaj, xtiya' k'a jun pikbel ri chirij-el ri tinamit. Man yixjel ta k'a el nej chire ri tinamit, tinaba' k'a iwi' y kan k'ula' k'a xkixtzu'un-wi. 5Yin y konojel k'a ri achi'a' ri ek'o wik'in kan xqojel k'a apo chupan ri nima-tinamit. Y toq xke'el-pe rije' chiqij roj, xqojanimej-pe chikiwech achi'el ri xqaben ri pa nabey. 6Xkepe k'a chiqij, y xkeqelesaj-pe nej chire ri tinamit, roma xtikibij: Xa ye'animej chiqawech achi'el ri nabey mul, xkecha' rije'. Jari' toq xqojanimej k'a pe chikiwech. 7Y jari' toq rix xkixyakatej-pe chire ri pikbel, y xkixok k'a chupan ri tinamit, roma ri Jehová ri qa-Dios xtujech chiqe. 8Y toq ichapon chik ri tinamit, xtiya' ruq'aq'al. Xtiben k'a achi'el ri xubij ri Jehová. Tiwak'axaj chi kan keri' xinbij chiwe, xcha'. 9K'ari' ri Josué xeruteq-el, y rije' xebe k'a ri akuchi k'o chi nikiben-wi ri pikbel chukojol ri tinamit Ai y ri tinamit Betel, pa qajbel-q'ij chire ri Ai. Ri Josué xk'oje' k'a ri akuchi ek'o-wi-qa, chikikojol ri ch'aqa' chik ruwinaq chupan ri aq'a' ri'.
10Y xyakatej k'a nimaq'a' yan ri Josué y xerumol ri achi'a' ri'. K'ari' xjote' k'a el rija' y e rachibilan-el ri e aj-raqen. Y rije' xe'el-el pa nabey chikiwech ri achi'a' richin nibekibana' oyowal rik'in ri tinamit Ai. 11Y konojel ri achi'a' ri' xejote-q'anej, y xe'apon chunaqaj ri tinamit Ai. Y xek'oje-qa chiri' pa xaman chire ri tinamit ri' juk'an chire ri taq'aj pa xaman chire ri tinamit ri'. 12Xerucha' k'a 5,000 achi'a' y xeruya' richin pikbel pa qajbel-q'ij chire ri Ai, pa ruchojmilal ri tinamit Betel. 13Kere' ruchojmilal xuben kik'in ri achi'a': Ri aj-labal xek'oje' pa xaman chire ri tinamit, y ri xechajin ri pikbel xek'oje' pa qajbel-q'ij chire ri tinamit. Y ri Josué xuq'axaj ri aq'a' ri' pa runik'ajal ri taq'aj kojol juyu'. 14Toq ri rey richin ri Ai y ri ruwinaq xkitz'et ronojel re', jari' toq xeyakatej nimaq'a' yan richin xkiteleche'ej-ki'; k'ari' xebe chikik'ulik ri e rijatzul kan ri Israel, richin nibekichapa' oyowal pa ruchojmilal ri taq'aj richin ri raqen-ya' Jordán, y kan man ketaman ta chi ya'on pikbel chirij ri tinamit. 15Ri Josué y konojel ri achi'a' xkiben richin xech'akatej yan; xe'animej chikiwech ri aj-Ai chupan ri bey richin ri tz'iran ruwach'ulew. 16Konojel ri achi'a' ri ek'o chiri' pa tinamit Ai xkimol-ki' richin xekitzeqelibej-el konojel ri achi'a' ri e rachibilan ri Josué; y keri' xban chike richin xe'elesex-el chupan ri kitinamit. 17Keri', konojel ri achi'a' xe'el-el y man jun xk'oje' kan chupan ri tinamit Ai ni pa Betel. Y roma ri' xkijaqaba' kan ruchi' ri kitinamit.
18K'ari' ri Jehová xubij chire ri Josué: Tayaka-q'anej ri akamisabal ri k'o pan aq'a' pa ruchojmilal ri Ai, roma yin xtinjech chawe, xcha'. Y ri Josué kan xuyek-q'anej ri rukamisabal pa ruchojmilal ri tinamit ri'. 19Y toq ri e okineq pikbel xkitz'et re', chi'anin k'a xeyakatej ri akuchi ek'o-wi, y junanin k'a xebe y xe'ok chupan ri tinamit. Keri' xkichop ri tinamit y chi'anin xkiya' ruq'aq'al. 20Y ri achi'a' aj-Ai xetzu'un kan chikij, y xkitz'et chi janila sib nel chupan ri kitinamit, jari' toq rije' man jun akuchi xe'animej-wi roma ri achi'a' ri ek'o rik'in ri Josué ri e animajineq pa tz'iran ruwach'ulew xa xetzolin-pe chikij. 21Y xetzolin-pe roma xkitz'et chi ri e okineq pikbel xkichop yan ri tinamit y kan nibuqun k'a ri sib. K'ari' rije' xkichop kikamisaxik ri aj-Ai. 22Y ri ch'aqa' chik achi'a' aj-Israel xebe'el-pe chupan ri tinamit ri' richin xebekik'ulu'. Keri' toq ri aj-Ai xek'oje' pa kinik'ajal ri e rijatzul kan ri Israel; ri ch'aqa' chikij y ri ch'aqa' chikiwech. Xekikamisaj k'a konojel ri aj-Ai y man jun xk'ase' kan y man jun xanimej. 23Jak'a ri ki-rey xkichop-el y xkik'uaj chuwech ri Josué.
24Y toq ri achi'a' aj-Israel xekikamisaj yan konojel ri achi'a' aj-Ai ri e beneq pa taq'aj ri pa tz'iran ruwach'ulew ri akuchi e kitzeqeliben-el, y kan konojel xeken yan rik'in espada, jari' toq xetzolin chupan ri tinamit Ai y xekikamisaj konojel ri winaqi' ri ek'o chiri'. 25Ri kajlabal ri aj-Ai ri xeken chupan ri q'ij ri', chi achi'a', chi ixoqi' xapon e 12,000. 26Ri Josué kan man xubij ta k'a chike ri achi'a' chi tikitanaba' ri oyowal k'a toq xek'is na kikamisaxik konojel ri aj-Ai. 27Jak'a ri rijatzul ri Israel xkimej k'a pe chuwi-kiq'a' ri kawej y ronojel ri k'o rejqalen ri xkil chupan ri tinamit, achi'el rubin ri Jehová chire ri Josué. 28K'ari' xkiya' ruq'aq'al ri tinamit richin xk'is jumul; y kan xtole' kan, k'a re wakami. 29Y ri rey richin ri Ai, xtzeqebex chire ruq'a' jun che' k'a toq xqaq'ij na qa. K'ari' ri Josué xubij chi tiqasex ri ruch'akul, y tikiya-el chuchi' ri tinamit, y chiri' xkimol kan jun molaj abej pa ruwi', y kan k'o chiri' k'a re wakami.
Ri pixa' ri xsik'ix chuwech ri juyu' Ebal
(Deut 27:1-26)
30K'ari' ri Josué xubij chi tipabex-q'anej jun porobel richin kamelabel richin ri Jehová Dios richin Israel chiri' chuwech ri juyu' rubini'an Ebal. 31Ri porobel ri' xban rik'in abej ri man e toch'on ta ni man jun bey samajin ta, achi'el xubij kan ri Moisés ri rusamajel ri Jehová toq xtz'ibatej kan chupan ri wuj richin ri pixa'. K'ari' xkisuj chuwech ri Jehová, poron chikop y chuqa' kamelabel richin nuq'alajirisaj chi junan kiwech rik'in rija'. 32Y ri Josué chuqa' chiri' chikiwech ri ruwinaq xutz'ibaj chuwech ri abej ri ukusan chire ri porobel ri ch'abel richin ri pixa' ri ruya'on ri Dios chire ri Moisés. 33Y chiri' chuwech ri porobel y ri káxa richin ri rujikibel-tzij ri Dios, ri e sacerdote rijatzul ri Leví ri e uk'uayon ri káxa kibanon ka'i' tzobaj, ri nik'aj ek'o ri juk'an y ri nik'aj chik ek'o re juk'an chire ri káxa. Konojel ri e rijatzul kan ri Israel, ri aj-raqen pa kiwi' ri winaqi', ri aj-raqen pa kiwi' ri aj-labal, ri to'onela', y chuqa' ek'o-apo ri man e kiwinaq ta: Konojel rije' e pa'el-apo chikiwech ri e ka'i' tzobaj. Nik'aj chike rije' ek'o chuwech ri juyu' Ebal y ri nik'aj chik ek'o chuwech ri juyu' Gerizim, y ri e ka'i' tzobaj kan e kitzuliben k'a ri e sacerdote, achi'el rubin kan ri Moisés ri rusamajel ri Dios toq xch'on chirij ri urtisanik pa ruwi' ri Israel. 34Chiri' ri Josué xuben chi xsik'ix ronojel ri ch'abel richin ri pixa', y chuqa' ri urtisanik y ri etzelanik, achi'el tz'ibatel kan chupan ri wuj richin ri pixa' kichin konojel winaqi'. 35Y man jun ch'abel ri man ta xsik'ix chikiwech ri winaqi', ri rubin kan ri Moisés chi nisik'ix chikiwech ri kimolon-ki'; jajun ri ixoqi' y ri ak'uala' y ri man e kiwinaq ta ri ek'o chikikojol rije'.
Currently Selected:
Jos 8: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.