Jos 7
7
Ri mak ri xuben ri jun achin rubini'an Acán.
1K'o k'a jun achin rubini'an Acán ruk'ajol ri Carmí, rumam kan ri Zabdí, ruxikin rumam kan ri achin rubini'an Zérah, richin ri tzobaj Judá. Ri Acán man xunimaj ta tzij y xuk'en-pe juba' chire ri kan banon chire richin nik'is jumul. Y roma ri' ri Jehová xyakatej royowal chikij konojel ri e rijatzul kan ri Israel.
2Xeri' ri Josué xeruteq-el achi'a' y xe'el-el pa Jericó y xebe k'a pa jun chik tinamit rubini'an Ai ri k'o chunaqaj ri Bet-avén ri k'o pa relebel-q'ij chire ri tinamit Betel y xubij-el chike: Kixbiyin y tibenik'oj kan jebel ri tinamit Ai, xcha'. Rije' xebe k'a y xbekinik'oj ri tinamit.
3Y toq xetzolin-el xkibij chire ri Josué: Man ke'ateq-q'anej konojel ri aj-labal, xa rik'in ka'i' o rik'in e 3,000 achi'a' ri yebe richin nikich'ek ri tinamit Ai. Man taben chi yebe-q'anej konojel ri achi'a', roma xa e juba' ok ri ek'o chiri', xecha'. 4Y xebe k'a e 3,000 achi'a', y rije' xa xe'animej-pe roma xa xkixibij-pe-ki' chikiwech ri aj-Ai. 5Ri aj-Ai xekikamisaj k'a pe e juba' ma e juwineq waqlajuj achi'a' chike ri e rijatzul kan ri Israel y xekitzeqelibej-pe ri ch'aqa' chik toq xe'el-pe chiri' chuchi' ri tinamit y xe'apon k'a akuchi ye'elesex-wi abej; y xech'akatej chupan ri xulan-bey y roma ri' ri e rijatzul kan ri Israel xmayamo-qa ri kánima.
6K'ari' ri Josué y ri e tata'al kichin ri e rijatzul kan ri Israel xkiretz ri kitziaq chikij y xkijopij ulew pa kijolon, retal richin yebison. K'ari' xkiqasaj-ki' k'a pan ulew chuwech ri káxa richin ri rujikibel-tzij ri Jehová; keri' xkiben k'a toq xqaqa na ri q'ij. K'ari' xeyakatej-q'anej. 7K'ari' ri Josué xubij: ¡Ajaw Jehová! ¿Achike roma xak'owisaj-pe re tinamit re' chupan ri raqen-ya' Jordán? ¿Xaxe kami richin yojajech chike ri amorreo richin yojkik'is? K'ate' ta xojk'oje' ta kan ri juk'an-apo chire ri raqen-ya' Jordán. 8¡Ajaw! ¿Achike chik k'a xtinbij, roma ri achi'a' richin ri e rijatzul kan ri Israel xa xe'animej chikiwech ri etzelanel qichin? 9Roma ri aj-Canaán y konojel ri ek'o chuwech re ruwach'ulew xtikak'axaj re xbanatej; xtikisutij-qij, y kan xqojkik'is k'a jumul chuwech re ruwach'ulew. ¿Achike k'a xtaben wakami richin nanimirisaj ri utzilej atzijol?, xcha'.
10Y ri Jehová xubij chire ri Josué: Kayakatej. ¿Achike roma aqasan-awi' pan ulew? 11Ri e rijatzul ri Israel xemakun; xkiq'ej ruwi' ri nujikibel-tzij ri xinya' chike, roma xkichop ri banon chire chi nik'is jumul. Kan xe'eleq' k'a, kan xkitz'uk-tzij y kan xkewaj chukojol ri iwichin rix ri xa banon chire chi nik'is jumul. 12Roma ri' rix man chik xkixtikir ta xkixch'akon chikij ri e etzelanel iwichin. Xa xkixanimej k'a pe chikiwech rije', roma rix chuqa' ruk'amon richin yixk'is jumul. Yin man xkik'oje' ta chik iwik'in, wi man xtik'is ta el chi'ikojol ri ruk'amon richin nik'is jumul. 13Kayakatej k'a, y tabij chire ri atinamit: Tich'ajch'ojirisaj k'a ri ik'aslen, richin chua'q ix ch'ajch'oj chik, roma ri Jehová ri qa-Dios kere' nubij. Pa inik'ajal rix Israel k'o-wi ri mak. Man xkixtikir ta xtipaba-iwi' chikiwech ri e etzelanel iwichin, k'a toq xiwelesaj yan chi'ikojol ri nubin chi nik'is jumul. 14Ri chua'q, xkixjel k'a pe achi'el ri itzobaj. Ri tzobaj ri xtuk'ut ri Jehová; jari' ri xkejel-pe ri chi achijlonel chi ixjayilonela' chi alk'ualaxela' chi iy-mam. Ri xtuk'ut ri Jehová xtijel k'a pe achi'el ri aj pa kachoch. Ri aj pa kachoch ri xtuk'ut ri Jehová xkejel k'a pe kik'in konojel ri achi'a' aj pa kachoch. 15Y ri xtilitej chi k'o rik'in ri banon chire chi nik'is jumul, xtiporox k'a: Rija' y ronojel ri k'o rik'in, roma xuq'ej ruwi' ri rujikibel-tzij ri Jehová y roma kan xuben re jun mak re' chiqakojol roj, xkacha' chike, xcha' ri Jehová.
16Toq ri Josué xyakatej nimaq'a' yan kan xuben chi xejel-pe ri e rijatzul ri Israel achi'el ri kitzobaj, y ri Jehová xuk'ut ri tzobaj richin ri Judá. 17Y xuben chi xejel-pe ri tzobaj richin ri Judá, y xcha'ox kan ri ach'alalri'il richin ri Zérah. Toq xcha'ox xuben chi xejel k'a pe ri ach'alalri'il richin ri Zérah, jari' toq xcha'ox k'a ri Zabdí. 18Y toq xban chi xejel-apo ri achi'a' ri ek'o chupan ri tzobaj richin ri aj pa rachoch ri Zabdí, jari' toq xcha'ox k'a kan ri Acán ruk'ajol ri Carmí, rumam ri Zabdí, ruxikin-rumam ri Zérah y rijatzul ri Judá.
19Jari' toq ri Josué xubij chire ri Acán: Kan chuwech k'a ri Jehová ri qa-Dios tabij ri qitzij, y tabij chuwe wakami achike ri xaben. Man k'a tawewaj chinuwech, xcha'.
20K'ari' ri Acán xubij chire ri Josué: Kan qitzij na wi ja yin ri' ri xmakun chuwech ri Jehová ri qa-Dios richin Israel, y kere' k'a ri xinben: 21Yin xintz'et k'a chukojol ri k'o rejqalen ri xqamej-pe chuwi-kiq'a' ri e etzelanel qichin, jun tzieq banon pa tinamit Babilonia ri janila utz, y wo'o' libra saqipueq y jun ti tz'ajaj q'anapueq ralal juwineq onza; jari' k'a xinrayij ruwech y xinchop-pe y ronojel re' wewan chuxe' ulew pa runik'ajal ri wachoch, nabey nuya'on-qa ri q'anapueq y ri saqipueq y pa ruwi' re' nuya'on-qa ri tzieq, xcha'.
22Y jari' ri Josué xeruteq k'a samajela' pa rachoch ri Acán; y rije' kan chi'anin k'a xebe y xkil k'a pe ronojel ri rewan chiri', y ri q'anapueq y ri saqipueq kan k'a chuxe' ronojel k'o-wi. 23Y xkik'en k'a pe ronojel, y xkik'uaj k'a apo chuwech ri Josué y chikiwech ri winaqi', y xkiya-apo chuwech ri Jehová. 24K'ari' ri Josué y konojel ri e rijatzul kan ri Israel xkichop ri Acán ri rijatzul ri Zérah; y xkik'uaj-el ri saqipueq, ri tzieq y ri tz'ajaj q'anapueq; y xekichop chuqa' ri e ruk'ajol, ri e rumi'al, y ronojel ri rubóyix, ri rubur y ri kokoj rawej y chuqa' ri rachoch banon rik'in tzieq y ronojel ri k'o rik'in; y xekik'uaj-q'anej pa taq'aj kojol juyu' rubini'an Acor. 25Y chiri' ri Josué xubij chire ri Acán: ¿Achike roma xaya' re ruk'ayewal re' pa qawi'? Ri Jehová xtuya' k'a ruk'ayewal pan awi' rat re q'ij re', xcha'. Keri' k'a konojel ri e rijatzul ri Israel xekik'eq chi abej, y toq xekikamisaj yan chi abej, xekiporoj. 26K'ari' xkiya-q'anej jun molaj abej pa kiwi', ri k'a k'o na chiri' k'a re wakami. Keri' ri Jehová xik'o-qa ri royowal pa kiwi'. Roma ri' ri chiri' xubini'aj taq'aj kojol juyu' richin Acor*f2* k'a re wakami.
Currently Selected:
Jos 7: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.