ᒉᒻᔅ 1
1
1ᒉᒻᔅ ᐅᑦ ᐊᑑᔅᑫᓛᑲᓇ ᑭᒋᒪᓂᑐ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭, ᐊᓂᐃ ᑳ ᓂᔓᔖᐳᑌᐎᓯᓕᑭ ᑳ ᓇᓈᓂᔅ ᐃᑖᓕᒋ, ᐊᑖᒥᔅᑲᐌᐤ᙮
ᑖᐺᔦᓕᑕᒧᐎᓐ ᓀᔥᑕ ᑲᑫᑖᐌᓕᑕᒧᐎᓐ
2ᓂᒋᔖᓂᑐᒃ, ᒥᓯᐌ ᒧᒋᑫᓕᑕᒧᐎᓐ ᐃᑕᑭᑕᒧᒃ ᐯᑭᔑᓂᔦᑯ ᓇᓈᑲᐤ ᑲᑴᒋᐃᐌᐎᓂᒃ: 3ᐅᒪ ᐁ ᑭᔅᑫᓕᑕᒣᒃ, ᐁ ᑲᑴᒋᑖᓂᐗᒃ ᑭ ᑖᐺᔦᓕᑕᒧᐎᓂᐗᐤ ᐅᒋ ᐃᑕᑾᓐ ᔑᐱᓚᐌᓯᐎᓐ᙮ 4ᐁᑯᔑ ᒫᑲ ᔑᐱᓚᐌᓯᐎᓐ ᑲᑕ ᒥᑐᓂᐎᐃᑎᓱᒪᑲᓐ, ᑭᒋ ᒥᑐᓂᐎᓯᔦᒃ ᓀᔥᑕ ᒥᓯᐌᓯᔦᒃ, ᐁᑳ ᑫᒀᓐ ᐁ ᑶᑕᒫᔦᒃ᙮ 5ᑮᔥᐱᓐ ᒫᑲ ᐊᐌᓇ ᐁ ᐃᑕᔑᔦᒃ ᐁᑳ ᐁᔮᑴ ᑲᑫᑕᐌᓕᑕᒧᐎᓂᓕᐤ, ᐁᑯᔑ ᑲᑕ ᓇᑐᑕᒪᐌᐤ ᑭᒋᒪᓂᑐᐗ, ᐊᓇ ᑳ ᑭᔐᐙᑎᓯᐎ ᒥᓛᑦ ᒥᓯᐌ ᐃᓕᓕᐗ, ᐁᑳ ᓀᔥᑕ ᑳ ᑭᑐᑖᑦ; ᑲᑕ ᒥᓛᑲᓂᐎᐤ ᒫᑲ᙮ 6ᒫᑲ ᐁᑯᔑ ᑲᑕ ᓇᑐᑕᒪᐤ ᑖᐺᔦᓕᑕᒧᐎᓂᒃ, ᐁᑳ ᒥᑐᓂ ᐁ ᔖᑴᓕᒧᑕᒃ: ᐌᓴ ᐊᓇ ᑳ ᔖᑴᓕᒧᑕᒃ ᓇᔅᐱᑕᐌᐤ ᑲᔅᑲᓇ ᑭᒋᑲᒦᒃ, ᐁ ᐱᒋᑕᔑᓕᒋ ᓀᔥᑕ ᐁ ᐅᐹᔑᓕᒋ᙮ 7ᐌᓴ ᐁᑳᐎᓚ ᐊᓇ ᐃᓕᓕᐤ ᑲᑕ ᐃᑌᓕᑕᒻ ᑫᒀᓕᐤ ᑭᒋ ᒥᓕᑯᑦ ᐅᑎᐯᓕᒋᑫᐗ᙮ 8ᓂᔣᔭᒃ ᑳ ᐃᑌᓕᑕᒃ ᐃᓕᓕᐤ ᑲᑭᐌᔦᓕᑕᒻ ᒥᓯᐌ ᑳ ᑐᑕᒃ᙮
ᑭᑎᒫᑭᓯᐎᓐ ᓀᔥᑕ ᒥᓴᑭᓯᐎᓐ
9ᐁᑯᔑ ᐎᒋᔖᓂᒪᐤ ᑳ ᑕᐸᑌᓕᑖᑯᓯᑦ ᑲᑕ ᒥᓚᐙᑕᒻ ᐁ ᐃᔅᐯᓕᑖᑯᐋᑲᓂᐎᑦ: 10ᒫᑲ ᐊᓇ ᑳ ᒥᔕᑭᓰᑦ, ᐁ ᑕᐸᑌᓕᑖᑯᐋᑲᓂᐎᑦ: ᐌᓴ ᑖᐱᔅᑯᒡ ᒪᔅᑯᔑᐊ ᐁ ᑆᐱᑯᓂᐗᑭ ᑲᑕ ᐃᔑ ᐌᐱᐸᓕᐤ᙮ 11ᐌᓴ ᐱᓯᒻ ᐎᐸᒡ ᓯᐋᑳᔅᑕᐌᒋ ᐁ ᑭᔖᓯᑫᑦ, ᓂᐸᑕᐤ ᒪᔅᑯᔑᐊ, ᐁ ᐙᐱᑯᓂᐗᒃ ᒫᑲ ᐸᑭᑎᓐ, ᓀᔥᑕ ᐁ ᐃᔅᐱᒋ ᒥᓗᓈᑾᒃ ᓂᔑᐗᓈᑕᓐ: ᐁᑯ ᑖᐱᔅᑯᒡ ᑳ ᒥᔕᑭᓯᑦ ᐃᓕᓕᐤ ᑫ ᐊᑎ ᐹᔑᑯᓈᑯᓯᑦ ᐅᑦ ᐃᔑᑡᐎᓂᒃ᙮
ᑯᒋᐃᐌᐎᓐ ᓀᔥᑕ ᑲᑴᒋᐃᐌᐎᓐ
12ᔕᐌᓕᑖᑯᓯᐤ ᐊᓇ ᐃᓕᓕᐤ ᑳ ᑎᐸᒪᒋᑖᑦ ᑲᑴᒋᐃᑯᓯᐎᓂᓕᐤ: ᐌᓴ ᐃᔅᐱ ᑮ ᑲᑴᒋᐋᑲᓂᐎᑌ, ᑲᑕ ᒥᓚᐤ ᐱᒫᑎᓯᐎᓂ ᑭᒋᐅᑭᒪᐗᔅᑐᑎᓂᓕᐤ, ᐅᑎᐯᓕᒋᑫᐤ ᑳ ᑮ ᐊᔓᑕᒪᐙᑦ ᐊᓂᐃ ᑳ ᓵᑭᐃᑯᑦ᙮ 13ᐁᑳᐎᓚ ᐊᐌᓇ ᐃᓕᓕᐤ ᑲᑕ ᐃᑗᐤ ᐃᔅᐱ ᑲᑴᒋᐋᑲᓂᐎᑦ, ᓂ ᑲᑴᒋᐃᒃ ᑭᒋᒪᓂᑐ: ᐌᓴ ᑭᒋᒪᓂᑐ ᓇᒪᐎᓚ ᑲᑕ ᑮ ᑲᑴᒋᐃᑯ ᑳ ᒫᓛᑕᓂᓕᒃ, ᓇᒪ ᓀᔥᑕ ᑲᑴᒋᐁᐤ ᐊᐌᓕᐗ: 14ᒫᑲ ᒥᓯᐌ ᑕᑐ ᐃᓕᓕᐤ ᑲᑴᒋᐊᐤ, ᐃᔅᐱ ᐯᔅᑫᓂᑯᒋ ᑎᐱᓚᐌ ᐅ ᒪᒋ ᓇᑕᐌᓕᑕᒧᐎᓐ ᓀᔥᑕ ᔑᐃᑭᐋᑲᓂᐎᒋ᙮ 15ᐁᑯᔅᐱ ᒫᑲ, ᐱᔅᐱ ᒪᒋ ᓇᑕᐌᓕᑕᒧᐎᓐ ᑮ ᑲᓄᔥᑲᑕᐗᓱᒪᑲᒃ ᓂᑕᐎᑭᑖᒪᑲᓐ ᒪᒋᑐᑕᒧᐎᓐ; ᓀᔥᑕ ᒪᒋᑐᑕᒧᐎᓐ ᐃᔅᐱ ᑭᔑᒋᑳᑌᒃ, ᓂᑖᐎᑭᑖᒪᑲᓐ ᓂᐱᐎᓐ᙮
16ᐁᑳᐎᓚ ᐗᓂᑌᓕᑕᒧᒃ, ᓯᐋᑭᐃᑕᑾᒃ ᓂᒋᔖᓂᑐᒃ᙮ 17ᒥᓯᐌ ᑕᑐ ᒥᓗ ᒥᓕᐌᐎᓐ ᓀᔥᑕ ᑕᑐ ᒫᐗᒋ ᒥᓗ ᒥᓕᐌᐎᓐ ᐃᔥᐱᒥᒃ ᐅᒋᐸᓕᐤ ᐅᒋ ᓛᔑᐸᓕᐤ ᒫᑲ ᐊᓇ ᑳ ᐅᑖᐎᒥᑯᑦ ᐙᔅᑌᐎᓇ, ᐊᓇ ᒥᑐᓂ ᐁᑳ ᑳ ᑳᑭᐌᔦᓕᑕᒃ ᐁᑳ ᓀᔥᑕ ᒥᑐᓂ ᑳ ᑴᔅᑳᑎᓰᑦ᙮ 18ᑎᐱᓚᐌ ᐅᑦ ᐃᑌᓕᑕᒧᐎᓂᒃ ᑭ ᑮ ᓂᑕᐎᑭᐃᑯᓇᐤ ᑖᐺᐎᓂ ᐋᔭᒥᐎᓂᓕᐤ ᐅᒋ, ᑭᓚᓈᓇᐤ ᑭᒋ ᓂᑳᓄᑕᐗᑯᒃ ᐅᑦ ᐅᔑᐋᑲᓇ᙮
ᐯᑕᒧᐎᓐ ᓀᔥᑕ ᑑᑕᒧᐎᓐ
19ᐁᐗᑯ ᐅᒋ, ᓯᐋᑭᐃᑕᑾᒃ ᓂᒋᔖᓂᑐᒃ, ᐁᑯᔑ ᒥᓯᐌ ᑕᑐ ᐊᐌᓇ ᑲᑕ ᑭᓕᐱᐤ ᐁ ᐱᔑᒋᑕᒃ, ᑲᑕ ᐯᑭᑳᑎᓯᐤ ᐁ ᐋᔭᒥᑦ, ᑲᑕ ᐯᑭᑳᑎᓯᐤ ᐁ ᑭᓯᐙᓯᑦ: 20ᐌᓴ ᐃᓕᓕᐤ ᐅ ᑭᓯᐙᓯᐎᓐ ᓇᒪᐎᓚ ᓂᑕᐎᑭᑖᒪᑲᓂᓕᐤ ᑭᒋᒪᓂᑐᐗ ᐅ ᒀᔭᔅᑭᑖᑎᓯᐎᓂᓕᐤ᙮ 21ᐁᐗᑯ ᐅᒋ, ᓇᑲᑕᒧᒃ ᒥᓯᐌ ᐎᓂᓯᐎᓐ ᓀᔥᑕ ᑳ ᒥᒉᑎᒃ ᒪᒑᑎᓯᐎᓐ, ᐅᑎᓇᒧᒃ ᒫᑲ ᓗᔅᐹᑎᓯᐎᓂᒃ ᐊᓂᒪ ᑭᒋᑭᔑᑲᐎ ᐋᔭᒥᐎᓐ ᑫ ᑮ ᐅᒋ ᐱᒫᒋᐋᑲᓂᐎᒋᒃ ᑭᑦ ᐊᒑᑯᐙᐗᒃ᙮
22ᒫᑲ ᑐᑕᒧᒃ ᑳ ᐃᑗᒪᑲᒃ ᐋᔭᒥᐎᓐ, ᐁᑳ ᒫᑲ ᐯᑕᒧᒃ ᐱᑯ, ᐁ ᐙᔦᔑᐃᑎᓱᔦᒃ: 23ᐌᓴ ᑮᔥᐱᓐ ᐊᐌᓇ ᐱᐁᑕᒧᑴ ᐋᔭᒥᐎᓂᓕᐤ, ᐁᑳ ᒫᑲ ᑎᐅᑕᑭ, ᓇᔅᐱᑕᐌᐤ ᐃᓕᓕᐗ ᐁ ᑲᓇᐙᐸᑕᒥᓕᒋ ᐅᑖᔅᑕᒥᒃ ᐙᐸᒧᐎᓂᒃ: 24ᐌᓴ ᐙᐸᒥᑎᓱ, ᐁᑯ ᑫᑐᑌᑦ, ᑣᔦᒃ ᒫᑲ ᐗᓂᑭᔅᑭᓯᐤ ᑖᓐ ᐁᔑᓈᑯᓯᑦ᙮ 25ᒫᑲ ᐊᐌᓇ ᑫᓇᐙᐸᑕᒧᑴ ᐊᓂᐁᓕᐤ ᒫᐗᒡ ᑳ ᒥᓨᔑᓂᓕᒃ ᑎᐯᓕᒥᑎᓱᐎ ᐅᓚᔓᐌᐎᓂᓕᐤ, ᓀᔥᑕ ᒧᔕᒃ ᑫᓇᐎᑖᒋ, ᐎᓚ ᐁᑳ ᐁ ᐗᓂᑭᔅᑭᓯᑦ ᐁ ᐯᑕᒃ, ᒫᑲ ᐁ ᑐᑕᒃ ᐊᓂᐁᓕᐤ ᐊᑑᔅᑫᐎᓂᓕᐤ, ᐊᐗ ᐃᓕᓕᐤ ᑲᑕ ᔕᐌᓕᑖᑯᓯᐤ ᐅᑦ ᐋᔨᑎᐎᓂᒃ᙮
26ᑮᔥᐱᓐ ᐊᐌᓇ ᐁ ᐃᑕᔑᔦᒃ ᐅᑖᔭᒥᐊᐤ ᐙ ᐃᑌᓕᑖᑯᓯᑴ, ᐁᑳ ᒫᑲ ᑌᐯᓕᑕᑭ ᐅᑌᓕᓕ, ᒫᑲ ᐁ ᐙᔦᔑᑖᑦ ᑎᐱᓚᐌ ᐅᑌᐃ, ᐊᐗ ᐃᓕᓕᐤ ᐅᑦ ᐋᔭᒥᐋᐎᓐ ᓇᒪᐎᓚ ᐙᔦᔥ ᐃᑖᐸᑕᓂᓕᐤ᙮ 27ᐊᓂᒪ ᐋᔭᒥᐋᐎᓐ ᑳ ᐃᑌᓕᑕᒃ ᑭᒋᒪᓂᑐ ᐌᐅᑖᐎᒫᐎᑦ ᐁ ᒀᔭᔅᑾᓂᓕᒃ ᓀᔥᑕ ᐸᓓᑲᓂᓕᒃ, ᐁᐗᑯ ᐅᒪ, ᐊᐌᓇ ᑭᒋ ᒪᐗᑎᑖᑦ ᐁᑳ ᑳ ᐅᑖᐎᓕᒋ ᓀᔥᑕ ᐃᔅᑴᐗ ᑳ ᓂᐱᓕᒋ ᐅ ᓈᐯᒥᓕᐗ ᐅᑦ ᐊᓕᒥᓯᐎᓂᓕᒃ, ᓀᔥᑕ ᑭᒋ ᑲᓇᐌᓕᒥᑎᓱᑦ ᐁᑳ ᒥᑐᓂ ᑭᒋ ᐎᓕᐱᐃᑯᑦ ᐊᔅᑭᓕᐤ᙮
Currently Selected:
ᒉᒻᔅ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.