ᐦᐃᑉᕉᐗ 13
13
ᑫ ᐃᔑ ᓇᐃᓚᐌᐊᑦ ᑭᒋᒪᓂᑐ
1ᐁᑯᔑ ᐎᒋᔖᓂᑐᐎ ᓵᑭᐃᑐᐎᓐ ᑕᑭ ᑲᑕ ᐃᑕᑾᓐ᙮ 2ᐁᑳᐎᓚ ᐗᓂᑭᔅᑭᓯᒃ ᑭᒋ ᐱᑐᑲᐁᑾᒃ ᒫᓐᑌᐗᒃ: ᐌᓴ ᐁᐗᑯ ᐅᒋ ᐋᑎᑦ ᑮ ᐱᑐᑲᐁᐗᒃ ᐁᓐᒐᓚ ᐁᑳ ᐁ ᑭᔅᑫᓕᑕᑭᒃ᙮ 3ᑭᔅᑭᓯᑐᑕᑯᒃ ᐊᓂᑭ ᑳ ᒫᒫᒋᒀᐱᓱᒋᒃ, ᑖᐱᔅᑯᒡ ᐁ ᐎᒋ ᒫᒫᒋᒀᐱᓱᒣᑾᒃ; ᐊᓂᑭ ᓀᔥᑕ ᑲᒀᑕᑭᐃᑯᒋᒃ ᐊᓕᒥᓯᐎᓂᓕᐤ, ᑭᓚᐙᐤ ᑫᒋᐙᒃ ᓀᔥᑕ ᐁ ᐃᑖᔦᒃ ᒥᔭᐎᒃ᙮
4ᐎᑭᑐᐎᓐ ᑭᔅᑌᓕᑖᑾᓂᓕᐤ ᒥᓯᐌ ᑭᒋ ᐅᑎᓇᑭᒃ, ᓀᔥᑕ ᓂᐯᐎᓐ ᐸᔦᑲᓐ; ᒫᑲ ᐅᐎᓂᓯᐗᒃ ᓀᔥᑕ ᐅᐱᔑᒀᑎᓴᒃ ᑳᑕ ᑎᐹᔅᑯᓂᑯᐗᒃ ᑭᒋᒪᓂᑐᐗ᙮
5ᐁᑯᔑ ᑭᑦ ᐃᔑᐱᒫᑎᓯᐎᓂᐗᐤ ᐁᑳᐎᓚ ᒧᔅᑌᓇᒫᑫᐎᓐ ᑲᑕ ᐊᓯᒋᐸᓕᐤ; ᑌᐯᓕᑕᒧᒃ ᒫᑲ ᐊᓂᐃ ᐁ ᐃᔑ ᐋᔮᔦᒃ: ᐌᓴ ᑮ ᐃᑗᐤ, ᓇᒪᐎᔅᑳᑦ ᑭ ᑳ ᓇᑲᑎᑎᓐ, ᓇᒪᐎᔅᑳᑦ ᑭ ᑳ ᐌᐱᓂᑎᓐ᙮ 6ᐁᑯᔑ ᒫᑲ ᓱᑫᓕᑕᒧᐎᓂᒃ ᑲᑕ ᐃᑗᐗᒃ, ᐅᑎᐯᓕᒋᑫᐤ ᓂ ᐎᒋᐃᒃ, ᓇᒪᐎᓚ ᒫᑲ ᓂ ᑳ ᑯᔅᑕᒸᓐ ᑫᒀᓕᐤ ᐃᓕᓕᐤ ᑫ ᑐᑕᐎᑴ᙮
7ᑭᔅᑭᓯᑐᑖᑯᒃ ᐊᓂᑭ ᑳ ᑎᐯᓕᒥᑖᒀᒃ, ᑳ ᑮ ᐋᓕᒧᑕᒫᑖᑾᒃ ᑭᒋᒪᓂᑐ ᐅᑦ ᐋᔭᒥᐎᓐ: ᐅ ᑖᐺᔦᓕᑕᒧᐎᓂᐗᐤ ᓄᔅᐱᓈᑕᒸᒃ, ᐁ ᒫᒥᑐᓀᓕᑕᒣᒃ ᐁ ᐃᔑ ᐳᓂᐸᓕᓕᒃ ᐅᑦ ᐃᔑᐱᒫᑎᓯᐎᓂᐗᐤ᙮ 8ᒋᓴᔅ ᙭ ᒧᔕᒃ ᑖᐱᔅᑯᒡ ᐋᔭᐤ, ᐅᑖᑯᔑᒃ, ᓀᔥᑕ ᐊᓄᒡ ᐁ ᑭᔑᑳᒃ, ᓀᔥᑕ ᑳᑭᑫ᙮ 9ᐁᑳᐎᓚ ᑭ ᑳ ᐸᐱᒥᐎᓕᑯᓇᐗᐤ ᓇᓈᑲᐤ ᓀᔥᑕ ᐹᐱᑐᔥ ᑭᔅᑭᓄᐊᒫᑫᐎᓇ; ᐌᓴ ᒥᓨᔑᓐ ᒥᑌᐃ ᑭᒋ ᐋᔨᒋᑖᓂᐗᒃ ᔕᐌᓕᒋᑫᐎᓂᒃ, ᓇᒪᐎᓚ ᒥᒋᒥᒃ, ᐁᑳ ᓈᓐᑕᐤ ᑳ ᑮ ᐃᑖᐸᒋᐃᑯᒋᒃ ᐊᓂᑭ ᐁᑯᑕ ᑳ ᑮ ᐱᒧᑌᒋᒃ᙮
10ᑭᑦ ᐋᔮᓈᓇᐤ ᐸᑭᒋᑲᓈᐱᔉ, ᐊᓂᒪ ᐁᑳ ᒀᔭᔉ ᑭᒋ ᐅᒋ ᒥᒋᓱᒋᒃ ᐊᓂᑭ ᑳ ᐃᑖᐸᑎᓯᒋᒃ ᐋᔭᒥᐋᐎ ᒥᑭᐙᒥᒃ᙮ 11ᐌᓴ ᐎᔭᐎᐙᐗ ᐊᓂᑭ ᐊᐌᓯᓴᒃ ᐅᒥᑯᓕᐤ ᑳ ᐱᑐᑲᑕᐙᑦ ᑭᒋᓵᓵᑭᐎᓕᐌᐎᓕᓕᐤ ᐸᓓᑭᐎᑲᒥᑯᒃ ᒪᒋᑐᑕᒧᐎᓐ ᐅᒋ, ᐗᓚᐎᑎᒥᒃ ᑲᐯᔑᐎᓂᒃ ᑮ ᐃᔅᒀᓯᑳᑌᓕᐗ᙮ 12ᐁᐗᑯ ᐌᒋ ᒋᓴᔅ ᓀᔥᑕ, ᑭᒋ ᑮ ᐸᓓᑭᐋᑦ ᐃᓕᓕᐗ ᑎᐱᓚᐌ ᐅᒥᑯ ᐅᒋ ᐗᓚᐎᑎᒥᒃ ᑭᒋᐃᔥᒀᑌᒥᒃ ᑮ ᐙᐎᓴᑫᓕᑕᒻ᙮ 13ᐁᐗᑯ ᐅᒋ ᐁᑯᔑ ᐗᓚᐎᑎᒥᒃ ᑲᐯᔑᐎᓂᒃ ᓇᑕᐎ ᓈᑖᑕᐤ, ᐁ ᓇᔭᑕᒶᒃ ᐅ ᓇᓀᐯᐎᐃᑯᓯᐎᓐ᙮ 14ᐌᓴ ᐅᑕ ᓇᒪᐎᓚ ᑭᑦ ᐋᔮᓈᓇᐤ ᑳᑭᑫ ᐃᑖᐎᓐ, ᒫᑲ ᑭ ᓈᓇᑕᐌᓕᑌᓈᓇᐤ ᐯᔭᒃ ᑫ ᐹᐸᓕᒃ᙮ 15ᐎᓚ ᐅᒋ ᒫᑲ ᐁᑯᔑ ᐸᑭᑎᓂᑫᔅᑖᑕᐤ ᑭᒋᒪᓂᑐ ᒫᒥᒋᒥᐌᐎ ᓵᓵᑭᐎᓕᐌᐎᓐ ᒧᔕᒃ, ᐁᐗᑯ, ᑳ ᐅᒋᐸᓕᒃ ᑭᑐᓂᓈᒃ, ᐁ ᓇᓈᔅᑯᑕᒶᒃ ᐅᑦ ᐃᔑᓂᑳᓱᐎᓐ᙮ 16ᒫᑲ ᑭᒋ ᒥᓗᑐᑖᑫᔦᒃ ᓀᔥᑕ ᑭᒋ ᒪᑎᓇᒫᑫᔦᒃ, ᐁᑳᐎᓚ ᐗᓂᑭᔅᑭᓯᒃ: ᐌᓴ ᐁᑯ ᑐᐎ ᓵᓵᑭᐎᓕᐌᐎᓇ ᓈᔅᐱᒡ ᒥᓜᓕᑕᒻ ᑭᒋᒪᓂᑐ᙮
17ᓇᓇᐃᑖᑯᒃ ᐊᓂᑭ ᑳ ᑎᐯᓕᒥᑖᑾᒃ, ᓀᔥᑕ ᑕᐸᑌᓕᒥᑎᓱᔅᑖᑯᒃ: ᐌᓴ ᐊᔕᐙᐸᒣᐗᐤ ᑭᑦ ᐊᒑᑯᐙᐗ, ᑖᐱᔅᑯᒡ ᐊᓂᑭ ᑫ ᐃᑖᒋᒧᒋᒃ, ᒥᓚᐙᑕᒧᐎᓂᒃ ᑭᒋ ᐃᔑ ᑐᑕᑭᒃ, ᓇᒪ ᒫᑲ ᒪᒥᔕᒣᓕᑕᒧᐎᓂᒃ: ᐌᓴ ᐊᓂᒪ ᓇᒪᐎᓚ ᓈᓐᑕᐤ ᑭᑦ ᐃᑖᐸᒋᐃᑯᓇᐗᐤ᙮
18ᐋᔭᒥᐁᔅᑕᒫᑯᒃ: ᐌᓴ ᓂ ᐸᑯᓯᓕᒧᓈᓐ ᐁ ᒥᓗ ᒥᑐᓀᓕᒋᑲᓂᔮᒃ, ᒥᓯᐌ ᐃᔑ ᐁ ᐃᑌᓕᒧᔮᒃ ᒀᔭᔉ ᑭᒋ ᐃᔑ ᐱᒫᑎᓯᔮᒃ᙮ 19ᒫᑲ ᓇᐗᒡ ᑭ ᐸᑯᓭᓕᒥᑎᓇᐗᐤ ᐅᒪ ᑭᒋ ᐃᑐᑕᒣᒃ, ᓇᐗᒡ ᐎᐸᒡ ᑭᓚᐗᐤ ᑭᒋ ᐅᒋ ᐸᑭᑎᓂᑳᐎᔮᓐ᙮
ᐊᔭᒥᐋᐎᓐ ᐁ ᐊᑎ ᐳᓂᓈᓂᐗᒃ
20ᐁᑯ ᑭᒋᒪᓂᑐ ᑳ ᑎᐯᓕᑕᒃ ᑳᔮᒣᓕᑕᒧᐎᓂᓕᐤ, ᐊᓇ ᑳ ᑮ ᑭᐌ ᐯᔑᐙᑦ ᐅᓂᐱᐗ ᐅᒋ ᑭ ᑎᐯᓕᒋᑫᒥᓇᐗ ᒋᓴᓴ, ᐊᓇ ᐅ ᑭᒋ ᒫᓂᔥᒑᓂᔑᐎᓕᓕᒥᐗᐗ ᒫᓂᔥᒑᓂᔕᒃ, ᐊᓂᒪ ᑳᑭᑫ ᓇᑲᑕᒫᑫᐎ ᒪᓯᓇᐃᑲᓂ ᒥᑯ ᐅᒋ, 21ᑭ ᑳ ᐎ ᒥᑐᓂᐎᐃᑯᐗᐤ ᒥᓯᐌ ᑕᑐ ᒥᓗ ᐊᑑᔅᑫᐎᓂᒃ ᑭᒋ ᑐᑕᒬᒃ ᐅᑦ ᐃᑌᓕᑕᒧᐎᓐ, ᐁ ᐃᔑᒋᑫᑦ ᐱᒋ ᑭᔭᐎᐙᒃ ᐊᓂᐁᓕᐤ ᑳ ᒥᓗ ᑲᓇᐙᐸᑕᒃ, ᐎᓚ ᐅᒋ ᒋᓴᔅ ᙭: ᐊᓇ ᑫ ᑭᔅᑌᓕᑖᑯᐋᑲᓂᐎᑦ ᑳᑭᑫ ᓀᔥᑕ ᑳᑭᑫ᙮ ᐁᒣᓐ᙮
ᒫᒋᒡ ᐊᔭᒥᐎᓇ
22ᑭ ᐸᑯᓭᓕᒥᑎᓇᐗᐤ ᓀᔥᑕ, ᓂᒋᔖᓂᑐᒃ, ᐅᑎᓇᒧᒃ ᔑᑭᒥᐌᐎ ᐋᔭᒥᐎᓐ: ᐌᓴ ᑭ ᑮ ᒪᓯᓇᐊᒫᑎᓇᐗᐤ ᒐᑲᐙᔑᔥ ᐋᔭᒥᐎᓂᒃ᙮ 23ᑭ ᑭᔅᑫᓕᑌᓇᐗᐤ ᒫᑲ, ᑭᒋᔖᓂᓇᐤ ᑎᒧᑎ ᐁ ᐋᐸᐙᑲᓂᐎᑦ; ᐊᓯᒋ ᐎᓚ, ᐎᐸᒡ ᑕᑯᔑᑫ, ᑭ ᑳ ᐙᐸᒥᑎᓈᐗᐤ᙮
24ᐊᑕᒥᔅᑳᑯᒃ ᒥᓯᐌ ᐊᓂᑭ ᑳ ᑎᐯᓕᒥᑖᑾᒃ, ᓀᔥᑕ ᒥᓯᐌ ᐅᐸᓓᑭᓴᒃ᙮ ᐊᓂᑭ ᐃᑕᓕ ᑳ ᐅᒋᒋᒃ ᑭᑦ ᐊᑕᒥᔅᑳᑯᐗᐗᒃ᙮
25ᔕᐌᓕᒋᑫᐎᓐ ᒥᓯᐌ ᑭ ᑳ ᐎ ᐎᒉᐎᑯᓇᐗᐤ᙮ ᐁᒣᓐ᙮
Currently Selected:
ᐦᐃᑉᕉᐗ 13: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.