ᒉᒻᔅ 2
2
ᐁᑳᐎᓚ ᑎᐹᔅᑯᓕᒃ ᐃᓕᓕᐗᒃ ᐅᑎᔑᓈᑯᓯᐎᓂᐗᐤ ᐅᒋ
1ᓂᒋᔖᓂᑐᒃ, ᐁᑳᐎᓚ ᐋᔭᐙᒃ ᐅ ᑖᐺᔦᓕᑕᒧᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᑳ ᑎᐯᓕᑕᒃ ᑭᔅᑌᓕᑖᑯᓯᐎᓂᓕᐤ, ᐹᐱᑐᔥ ᑭᒋ ᐃᑌᓕᒣᑾᒃ ᐃᓕᓕᐗᒃ᙮ 2ᐌᓴ ᑮᔥᐱᓐ ᐹᑐᑫᒋ ᑭᑦ ᐋᔭᒥᐁᐎᑲᒥᑯᐙᒃ ᐃᓕᓕᐤ ᐁ ᑭᑭᔥᑲᐙᑦ ᐅᓵᐎᔔᓕᐋᓈᐱᔉ ᑖᐱᒋᒉᐱᓱᓇ, ᐁ ᒥᓗ ᐎᓛᒋᑲᓂᑦ, ᑮᔥᐱᓐ ᓀᔥᑕ ᐹᑐᑫᒋ ᐁ ᑭᑎᒫᑭᓯᑦ ᐃᓕᓕᐤ ᐁ ᒪᒋ ᐃᓛᒋᑲᓂᑦ; 3ᓀᔥᑕ ᑭ ᑭᔅᑌᓕᒪᐗᐤ ᐊᓇ ᑳ ᒥᓗ ᐎᓛᒋᑲᓂᑦ, ᓀᔥᑕ ᑭᑦ ᐃᑕᐗᐤ ᐅᑕ ᐊᐱ ᒥᓗ ᐊᐱᐎᓂᒃ; ᓀᔥᑕ ᑭᑦ ᐃᑖᐗᐤ ᐊᓇ ᑳ ᑭᑎᒫᑭᓯᑦ, ᐊᓐᑕ ᓂᐸᐎ, ᓀᔥᑕᐱᑯ ᐅᑕ ᐊᐱ ᔑᐸ ᓂ ᑕᑯᔅᑳᒋᑲᓂᒃ: 4ᓇᒪ ᓈ ᓇᓈᑲᐤ ᑭᑦ ᐋᔨᑌᓕᑌᓇᐗᐤ ᑭ ᒥᑐᓀᓕᒋᑲᓂᐙᒃ, ᓀᔥᑕ ᑭ ᑎᐸᔅᑯᓀᓕᑌᓇᐗᐤ ᒪᒋ ᒥᑐᓀᓕᒋᑫᐎᓇ?
5ᓇᑐᑕᒧᒃ, ᓯᐋᑭᐃᑕᑾᒃ ᓂᒋᔖᓂᑐᒃ, ᓇᒪ ᓈ ᑭᒋᒪᓂᑐ ᑮ ᐙᐌᓛᐸᒣᐤ ᐊᓂᐃ ᑳ ᑭᑎᒫᑭᓯᓕᑭ ᐅᑕ ᐊᔅᑮᒃ, ᐁ ᒥᔕᑭᓯᓕᑭ ᑖᐺᔦᓕᑕᒧᐎᓂᒃ, ᓀᔥᑕ ᑫ ᐊᑎ ᐋᔮᓕᒋ ᐊᓂᐁᓕᐤ ᐅᑭᒫᐎᐎᓂᓕᐤ ᑳ ᑮ ᐊᔓᑕᒪᐙᑦ ᐊᓂᐃ ᑳ ᓵᑭᐃᑯᑦ? 6ᒫᑲ ᑭ ᑮ ᑕᐌᓕᒪᐗᐗᒃ ᐅᑭᑎᒫᑭᓴᒃ᙮ ᓇᒪ ᓈ ᑭᑦ ᐋᓕᒥᐃᑯᐙᐊᒃ ᑳ ᒥᔕᑭᓯᒋᒃ ᐃᓕᓕᐗᒃ, ᓀᔥᑕ ᑭᑦ ᐃᑐᑕᐃᑯᐗᐗᒃ ᐅᑎᔥᑲᐤ ᑎᐸᔅᑯᓂᑫᐎ ᐊᐱᐎᓂᒃ? 7ᓇᒪ ᓈ ᒪᒋᐋᓕᒧᑕᒶᒃ ᐊᓂᐁᓕᐤ ᑎᐁᐸᑫᓕᑖᑾᓂᓕᒃ ᐃᔑᓂᑳᓱᐎᓂᓕᐤ ᑳ ᐃᔑ ᐃᔑᓂᑳᑎᑲᐎᔦᒃ?
8ᑮᔥᐱᓐ ᑎᐱᑐᑕᒣᒃ ᐊᓂᒪ ᑭᒋᐅᑭᒪᐎ ᐅᓚᔓᐌᐎᓐ, ᐁ ᐃᑗᒪᑲᒃ ᒪᓯᓇᐃᑫᐎᓐ, ᑭ ᑳ ᓵᑭᐊᐤ ᑭᒋᐃᓕᓕᐤ ᐁ ᐃᔑ ᓵᑭᐃᑎᓱᔭᓐ, ᑭ ᒥᓗ ᑐᑌᓇᐗᐤ: 9ᒫᑲ ᑮᔥᐱᓐ ᐹᐱᑐᔥ ᐃᑌᓕᒣᑾᒃ ᐃᓕᓕᐗᒃ, ᑭ ᒪᒋᑐᑌᓇᐗᐤ, ᓀᔥᑕ ᑭ ᑎᐹᔅᑯᓂᑯᓇᐗᐤ ᐅᓚᔓᐌᐎᓐ ᑖᐱᔅᑯᒡ ᐅᐗᓂᑐᑕᒧᔅᑲᒃ᙮ 10ᐌᓴ ᐊᐌᓇ ᑫ ᑲᓇᐌᓕᑕᒧᑴ ᒥᓯᐌ ᐅᓚᔓᐌᐎᓂᓕᐤ, ᐯᔭᒃ ᒫᑲ ᐱᑯ ᑫ ᐗᓂᑐᑕᒧᑴ, ᐃᑌᓕᑖᑯᓯᐤ ᒥᓯᐌ ᐁ ᑮ ᐗᓂᑐᑕᒃ᙮ 11ᐌᓴ ᐊᓇ ᑳ ᑮ ᐃᑗ, ᐁᑳᐎᓚ ᑭ ᑳ ᐱᔑᒀᑎᓰᓐ, ᑮ ᐃᑗᐤ ᓀᔥᑕ, ᐁᑳᐎᓚ ᑭ ᑳ ᓂᐹᔨᐙᓐ᙮ ᑮᔥᐱᓐ ᒫᑲ ᐁᑳ ᐱᔑᒀᑎᓯᔭᓐ, ᒫᑲ ᑮᔥᐱᓐ ᓂᐹᔨᐌᔭᓐ, ᑭ ᐗᓂᑐᑌᓐ ᐅᓚᔓᐌᐎᓐ᙮ 12ᐃᔑ ᐋᔭᒥᒃ, ᓀᔥᑕ ᐃᔑ ᑐᑕᒧᒃ, ᑖᐱᔅᑯᒡ ᐊᓂᑭ ᑎᐯᓕᒥᑎᓱᐎ ᐅᓚᔓᐌᐎᓐ ᑫ ᐅᒋ ᑎᐹᔅᑯᓈᑲᓂᐎᒋᒃ᙮ 13ᐌᓴ ᐎᓚ ᑲᑕ ᐋᔭᐤ ᑎᐹᔅᑯᓂᑯᓯᐎᓂᓕᐤ ᐁᑳ ᐁ ᐊᓯᒋᐸᓕᓕᒃ ᔕᐌᓕᒋᑫᐎᓂᓕᐤ, ᐁᑳ ᑳ ᑮ ᐙᐸᑎᓕᐌᑦ ᔕᐌᓕᒋᑫᐎᓂᓕᐤ; ᔕᐌᓕᒋᑫᐎᓐ ᒫᑲ ᒥᓚᐙᑕᒧᒪᑲᓐ ᐁ ᔖᑯᒋᑳᑌᒃ ᑎᐹᔅᑯᓂᑫᐎᓐ᙮
ᑖᐺᔦᓕᑕᒧᐎᓐ ᓀᔥᑕ ᐃᑎᐎᓇ
14ᑖᓐ ᐁᑖᐸᑕᒃ, ᓂᒋᔖᓂᑐᒃ, ᐋᑕ ᐃᓕᓕᐤ ᐁᑗᒋ, ᓂᑦ ᐋᔮᓐ ᑖᐺᔦᓕᑕᒧᐎᓐ, ᐁᑳ ᒫᑲ ᐁ ᐋᔮᑦ ᐊᑑᔅᑫᐎᓇ? ᑖᐺᔦᓕᑕᒧᐎᓐ ᓈ ᑲᑕ ᐱᒫᒋᐃᑯ? 15ᑮᔥᐱᓐ ᐎᒋᔖᓂᒪᐤ ᓀᔥᑕᐱᑯ ᐎᒋᔖᓂᔅᑴᒪᐤ ᒥᐅᔐᔥᑯᑌᒋ ᓀᔥᑕ ᑶᑕᒫᒋ ᐁ ᑭᔑᑳᒃ ᒥᒋᒥᓕᐤ; 16ᓀᔥᑕ ᐊᐌᓇ ᐁ ᐃᑕᔑᔦᒃ ᑫ ᐃᑖᑴ, ᑭᑐᑌᒃ ᑳᔮᒣᓕᑕᒧᐎᓂᒃ, ᑭᓱᓯᒃ, ᓀᔥᑕ ᑮᔥᐳᒃ; ᐁᑳ ᒫᑲ ᐁ ᒥᓓᑾᒃ ᐊᓂᐃ ᑫᒀᓇ ᑫ ᐋᐸᒋᐃᐌᒃ ᒥᔭᐤ; ᑖᓐ ᐁᑖᐸᑕᒃ? 17ᐁᑯ ᑖᐱᔅᑯᒡ ᑖᐺᔦᓕᑕᒧᐎᓐ, ᑮᔥᐱᓐ ᐁᑳ ᐋᔮᒪᑲᓐ ᐊᑑᔅᑫᐎᓇ, ᓂᐱᒪᑲᓐ, ᐁ ᐯᔭᑾᒃ᙮
18ᐁᐁ, ᐃᓕᓕᐤ ᑲᑕ ᐃᑗᐤ, ᑭᓚ ᑭᑦ ᐋᔮᓐ ᑖᐺᔦᓕᑕᒧᐎᓐ, ᓂᓚ ᒫᑲ ᓂᑦ ᐋᔮᓐ ᐊᑑᔅᑫᐎᓇ: ᐙᐸᑎᓕᓐ ᑭ ᑖᐺᔦᓕᑕᒧᐎᓐ ᐁᑳ ᑭᑭ ᑭᑦ ᐊᑑᔅᑫᐎᓇ, ᓂᓚ ᒫᑲ ᑭ ᑳ ᐙᐸᑎᓕᑎᓐ ᓂ ᑖᐺᔦᓕᑕᒧᐎᓐ ᓂᑦ ᐊᑑᔅᑫᐎᓇ ᐅᒋ᙮ 19ᑭ ᑖᐺᑌᓐ ᐁ ᐃᑖᑦ ᐯᔭᒃ ᑭᒋᒪᓂᑐ; ᒀᔭᔉ ᑭ ᑐᑌᓐ: ᒪᒋᐊᒑᑾᒃ ᓀᔥᑕ ᑕᐺᑕᒶᒃ, ᓇᓇᒥᐸᓕᐗᒃ ᒫᑲ᙮ 20ᒫᑲ ᑭ ᑳ ᑭᔅᑫᓕᑌᓐ, ᐅ ᑭᔥᑴᐎ ᐃᓕᓕᐤ, ᑖᐺᔦᓕᑕᒧᐎᓐ ᐁᑳ ᐁ ᐊᓯᒋᐸᓕᒃ ᐊᑑᔅᑫᐎᓇ ᐁ ᓂᐱᒫᑲᒃ? 21ᓇᒪ ᓈ ᐁᑉᕃᐋᒻ ᑯᑖᐎᓇᐤ ᑮ ᒀᔭᔅᑭᑖᑎᓯᐃᑯ ᐊᑑᔅᑫᐎᓇ, ᐃᔅᐱ ᑮ ᐸᑭᑎᓂᑫᑦ ᐅᑯᓯᓴ ᐋᐃᓯᒃ ᐸᑭᒋᑲᓈᐱᔅᑯᒃ? 22ᑭ ᐙᐸᑌᓐ ᑳ ᑮ ᐃᔑ ᐎᒋ ᐊᑑᔅᑫᒪᑲᒃ ᑖᐺᔦᓕᑕᒧᐎᓐ ᐊᓯᒋ ᐅᑦ ᐊᑑᔅᑫᐎᓇ, ᐊᑑᔅᑫᐎᓇ ᒫᑲ ᐅᒋ ᑖᐺᔦᓕᑕᒧᐎᓐ ᑮ ᒥᑐᓂᐎᐃᑳᑌᐤ᙮ 23ᐊᓂᒪ ᒪᓯᓇᐃᑫᐎᓐ ᒫᑲ ᑮ ᑎᐱᐸᓕᐤ ᑳ ᐃᑗᒪᑲᒃ, ᐁᑉᕃᐋᒻ ᑮ ᑖᐺᔦᓕᒣᐤ ᑭᒋᒪᓂᑐᐗ, ᓀᔥᑕ ᒀᔭᔅᑭᑖᑎᓯᐎᓐ ᑮ ᐃᔑ ᐃᑕᑭᑕᒪᐗᐤ: ᑭᒋᒪᓂᑐ ᐅᑐᑌᒪ ᒫᑲ ᑮ ᐃᔑᓂᑳᑕᐤ᙮ 24ᑭ ᐙᐸᑌᓇᐗᐤ ᒫᑲ ᐁ ᐃᔑ ᒀᔭᔅᑭᑖᑎᓯᐃᑯᑦ ᐃᓕᓕᐤ ᐊᑑᔅᑫᐎᓇ, ᓇᒪ ᒫᑲ ᑖᐺᔦᓕᑕᒧᐎᓐ ᐱᑯ᙮
25ᓀᔥᑕ ᒫᑲ ᓇᒪ ᓇ ᐊᓇ ᐱᔑᒀᑎᔅᑴᐤ ᕃᐋᑉ ᑮ ᒀᔭᔅᑭᑖᑎᓯᐃᑯ ᐊᑑᔅᑫᐎᓇ, ᐃᔅᐱ ᑳ ᑮ ᐱᑐᑲᐋᑦ ᐊᓂᐃ ᐃᔑᑎᔕᐙᑲᓇ, ᓀᔥᑕ ᐱᑐᔥ ᒣᔅᑲᓈᒃ ᐁ ᑮ ᑭᐌᑎᔕᐙᑦ?
26ᐌᓴ ᑖᐱᔅᑯᒡ ᒥᔭᐤ ᐁᑳ ᐁ ᐊᓯᒋᐸᓕᒃ ᐊᒑᒃ ᓂᐱᒫᑲᓐ, ᐁᑯ ᑖᐱᔅᑯᒡ ᑖᐺᔦᓕᑕᒧᐎᓐ ᐁᑳ ᐁ ᐊᓯᒋᐸᓕᒃ ᐊᑑᔅᑫᐎᓇ ᓂᐱᒫᑲᓐ ᓀᔥᑕ᙮
Currently Selected:
ᒉᒻᔅ 2: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.