ᐦᐃᑉᕉᐗ 12
12
ᑭᒋᒪᓂᑐ ᑯᑖᐎᓇᐤ
1ᐁ ᐙᐸᑕᒪᒃ ᒫᑲ ᐁ ᐙᔅᑳᔅᑳᑕᑾᒃ ᐁ ᐃᔅᐱᒋ ᒥᒉᑎᒋᒃ ᐅᑎᐹᒋᒧᐗᒃ, ᐁᑯᔑ ᐃᑲᑌᔅᑖᑕᐤ ᒥᓯᐌ ᑳ ᑯᓯᑾᒃ, ᐊᓂᒪ ᒪᒋᑐᑕᒧᐎᓐ ᓀᔥᑕ ᓈᔅᐱᒡ ᑳ ᐌᒋᐸᑭᔑᒥᑯᔭᒃ, ᐁᑯᔑ ᒫᑲ ᔑᐱᓚᐌᓯᐎᓂᒃ ᐱᒥᐸᑖᑕᐤ ᐊᓂᒪ ᑲᑴᒋᔅᑲᑎᑐᐎᓐ ᑳ ᓂᑳᓇᔅᑕᒫᑲᐎᔭᒃ; 2ᐁ ᑲᓇᐙᐸᒪᒃ ᒋᓴᔅ, ᐊᓇ ᑳ ᑭᒋᑖᑦ ᓀᔥᑕ ᑳ ᑭᔑᑖᑦ ᑭ ᑖᐺᔦᓕᑕᒧᐎᓂᐗᐤ; ᐊᓇ ᒥᓚᐙᑕᒧᐎᓐ ᐅᒋ ᑳ ᑮ ᓂᑳᓇᔅᑕᒫᑦ ᑳ ᑮ ᓇᔭᑕᒃ ᐋᔑᑌᐋᑎᑯᓕᐤ, ᐁ ᐋᑕᐌᓕᑕᒃ ᓇᓀᐯᐎᓯᐃᓂᓕᐤ, ᓇᐊᐱᐤ ᒫᑲ ᑭᒋᓂᔅᑮᒃ ᐃᑌᑫ ᐅᑦ ᐅᑭᒪᐗᐱᐎᓂᓕᒃ ᑭᒋᒪᓂᑐᐗ᙮
3ᐌᓴ ᒫᒥᑐᓀᓕᒥᒃ ᐊᓇ ᑳ ᑮ ᓇᔭᑕᒫᓱᑦ ᐅᒪᒋᑣᐗ ᐅᑦ ᐋᓉᔦᓕᒋᑫᐎᓂᓕᐤ, ᐁᑳ ᑭᓚᐗᐤ ᑭᒋ ᐋᔦᔅᑯᓯᔦᒃ ᓀᔥᑕ ᓄᑌᓯᔦᒃ ᑭ ᒥᑐᓀᓕᒋᑲᓂᐙᒃ᙮ 4ᓇᒪᐎᓚ ᐁᔥᑾ ᒥᑯᒃ ᐃᔑ ᑭ ᑮ ᒫᒫᔑᑳᓇᐗᐤ, ᐁ ᓇᔅᑯᔅᑕᒣᒃ ᒪᒋᑣᐎᓐ᙮ 5ᑭ ᑮ ᐗᓂᑭᔅᑭᓯᓇᐗᐤ ᒫᑲ ᐊᓂᒪ ᔑᑭᒥᐌᐎᓐ, ᑳ ᐋᔭᒥᐃᑯᔦᒃ ᑖᐱᔅᑯᒡ ᐊᐙᔑᔕᒃ, ᓂᑯᓯᔅ, ᐁᑳᐎᓚ ᐋᑕᐌᓕᑕᒻ ᐅᑎᐯᓕᒋᑫᐤ ᐅ ᒫᒥᓗᐃᐌᐎᓐ, ᐁᑳ ᓀᔥᑕ ᓄᑌᓯ ᐃᔅᐱ ᓀᑭᒥᔅᑭ; 6ᐌᓴ ᐊᓂᐃ ᑳ ᓵᑭᐋᑦ ᐅᑎᐯᓕᒋᑫᐤ ᒫᒥᓗᐁᐤ, ᓀᔥᑕ ᐸᐸᓴᔅᑌᐌᐤ ᒥᓯᐌ ᑕᑐ ᐅᑯᓯᓴ ᑳ ᐅᑎᓈᑦ᙮ 7ᑮᔥᐱᓐ ᓇᔭᑕᒣᐤ ᒫᒥᓗᐃᐌᐎᓐ, ᑭᒋᒪᓂᑐ ᑖᐱᔅᑯᒡ ᐅᑯᓯᓴ ᑭᑦ ᐃᑐᑖᑯᐗᐤ; ᐌᓴ ᐊᐌᓇ ᐅᑯᓯᓯᒪᐤ ᐁᑳ ᑳ ᒫᒥᓗᐃᑯᑦ ᐊᑖᐎᔭ? 8ᒫᑲ ᑮᔥᐱᓐ ᐁᑳ ᒫᒥᓗᐃᑲᐎᔦᒃ, ᐃᑌ ᒥᓯᐌ ᐁᔑ ᑌᐯᓕᑖᑯᓯᒋᒃ, ᑭ ᐸᑯᑐᔖᓂᐎᓇᐗᐤ, ᓇᒪᐎᓚ ᒫᑲ ᑭᑦ ᐅᑯᓯᓯᒪᐎᓇᐗᐤ᙮ 9ᒥᓇ ᒫᑲ, ᐃᑖᐗᒃ ᑯᑖᐎᓇᐗᒃ ᑳ ᓇᔅᐱᑕᐗᑭᒃ ᑳ ᑮ ᒫᒥᓗᐃᑕᑾᒃ, ᑭ ᑮ ᑭᔅᑌᓕᒫᓇᐗᒃ ᐋᑕ: ᓇᒪ ᓈ ᓈᔅᐱᒡ ᐊᐙᓯᑌ ᑭ ᑳ ᐸᑭᑎᓂᑎᓱᔅᑕᐙᓇᓐ ᐊᓇ ᑳ ᐅᑖᐎᐎᑯᑦ ᐊᒑᑾ, ᓀᔥᑕ ᑭᒋ ᐱᒫᑎᓯᔭᒃ? 10ᐌᓴ ᐎᓚᐗᐤ ᑖᐺ ᐋᑎᑐ ᑭᔑᑳᐗ ᑭ ᑮ ᒫᒥᓗᐃᑯᓇᐗᒃ, ᐁ ᐃᔑ ᒥᓜᓕᑕᑭᒃ: ᒫᑲ ᐎᓚ ᑭᑭ ᒥᓗᑐᑖᑯᐗᒃ, ᑭᒋ ᐅᑎᓇᒶᒃ ᐅ ᐸᓓᑭᓱᐎᓐ᙮ 11ᐸᐸᓴᔅᑌᐅᐌᐎᓐ ᒫᑲ ᓇᒪᐎᓚ ᐊᓄᒡ ᒥᓗᐙᑎᑯᓈᑾᓐ, ᒫᑲ ᑯᓯᑴᓕᑖᑾᓐ: ᐌᓕᐌᒃ ᒫᑲ ᐹᑎᒪ ᓂᑖᐎᑭᑖᒪᑲᓐ ᑳᔮᒣᐎᓯᐎ ᒥᓂᔕ ᒀᔭᔅᑭᑖᑎᓯᐎᓂᒃ ᑳ ᐅᒋᐸᓕᑭ, ᐊᓂᑭ ᐅᒋ ᐁᑯᑕ ᑳ ᓄᒋᒋᑫᒋᒃ᙮
ᑭᔅᑭᓄᐊᒫᑫᐎᓇ ᓀᔥᑕ ᔭᑾᒥᒥᐌᐎᓇ
12ᐁᐗᑯ ᐅᒋ, ᐅᐱᓇᒧᒃ ᒥᒋᒋᔭ ᑳ ᓕᐌᑯᑌᑭ, ᓀᔥᑕ ᒥᒋᑾᓇ ᑳ ᓕᓚᒥᓯᒪᑲᑭ; 13ᒀᔭᔅᑯᒧᑖᒃ ᑭᓯᑎᐙᐗ ᐅᒋ, ᐊᓇ ᑳ ᒫᔅᑭᑳᑌᑦ ᐁᑳ ᑭᒋ ᐸᔅᑫᓈᑲᓂᐎᑦ; ᒫᑲ ᐁᑯᔑ ᓇᐗᒡ ᑲᑕ ᒥᓇᐙᒋᐊᐤ᙮
14ᑳᔮᒣᐎᓰᔅᑖᑯᒃ ᒥᓯᐌ ᐃᓕᓕᐗᒃ, ᓀᔥᑕ ᓄᔅᐱᓈᑕᒧᒃ ᐸᓓᑭᓯᐎᓐ, ᐊᓂᐁᓕᐤ ᐁᑳ ᐁ ᐋᔮᑦ, ᓇᒪᐎᓚ ᐊᐌᓇ ᐃᓕᓕᐤ ᑲᑕ ᐙᐸᒣᐤ ᐅᑎᐯᓕᒋᑫᐗ: 15ᐁ ᑭᓯᓴᐎᓯᐎ ᐊᔕᐙᐱᔦᒃ, ᐁᑳᐎᓚ ᐊᐌᓇ ᐃᓕᓕᐤ ᑭᒋ ᐸᑭᔑᒃ ᐅ ᔕᐌᓕᒋᑫᐎᓂᓕᐤ ᑭᒋᒪᓂᑐᐗ ᐅᒋ; ᐁᑳ ᐁ ᐅᒉᐱᑭᐗᒃ ᐎᓴᑯᐅᐌᐎᓐ ᐁ ᓵᑭᑭᒃ ᑭᒋ ᒥᑯᔥᑳᒋᐃᑯᔦᒃ, ᑫ ᐅᒋ ᐎᓂᐅᒋᒃ ᑳ ᒥᒉᑎᑭᒃ; 16ᐁᑳ ᑭᒋ ᐃᑖᑦ ᐊᐌᓇ ᐯᔑᒀᑎᓯᔅᑭᑦ, ᓀᔥᑕᐱᑯ ᑳ ᐅ ᒪᒋ ᒥᑐᓀᓕᒋᑲᓂᑦ, ᑖᐱᔅᑯᒡ ᐃᓴᐤ, ᐊᓇ ᐯᔭᑯ ᓴᔅᑲᒧᐎᓐ ᒥᑭᒥᓕᐤ ᑳ ᑮ ᐊᑖᐙᑫᑦ ᐅ ᓃᔥᑕᒧᔖᓂᐎᐎᓐ᙮ 17ᐌᓴ ᑭ ᑭᔅᑫᓕᑌᓇᐗᐤ ᐹᑎᒫ ᐃᔅᐱ ᐙ ᐅᑎᓇᒃ ᐊᓂᐁᓕᐤ ᒥᓦᑭᒥᑯᓯᐎᓂᓕᐤ, ᐁ ᑮ ᐋᑕᐌᓕᒫᑲᓂᐎᑦ: ᐌᓴ ᓇᒪᐎᓚ ᑮ ᒥᔅᑲᒻ ᐃᑕ ᑭᒋ ᐃᔑ ᒥᒋᓚᐌᔦᓕᑕᒃ, ᐋᑕ ᐁ ᐅᒋᑲᐙᐱᑦ ᐯᐯᔭᑕᒃ ᐁ ᑮ ᓈᓇᑕᐌᓕᑕᒃ᙮
18ᐌᓴ ᓇᒪᐎᓚ ᑮ ᐯᒋ ᓈᑌᓇᐗᐤ ᐊᓂᒪ ᐗᒋ ᑫ ᓵᒥᓂᑳᑌᒃ, ᓀᔥᑕ ᑳ ᑮ ᐸᓯᑌᒃ, ᓇᒪ ᓀᔥᑕ ᐁ ᐃᔑ ᒪᑲᑌᐗᔅᑾᒃ, ᓀᔥᑕ ᐁ ᐗᓂᑎᐱᔅᑳᒃ ᓀᔥᑕ ᐁ ᑮᔅᑎᒃ, 19ᓀᔥᑕ ᐁ ᓄᑖᑾᒃ ᐳᑖᒋᑲᓐ, ᓀᔥᑕ ᐁ ᐯᑖᑾᑭ ᐋᔭᒥᐎᓇ; ᐊᓂᒪ ᐊᓂᑭ ᑳ ᑮ ᐯᑕᑭᒃ ᑮ ᐸᑯᓭᓕᑕᒶᒃ ᐁᑳᐎᔅᑳᑦ ᒥᓇ ᑭᒋ ᐋᔭᒥᐃᑯᒋᒃ: 20(ᐌᓴ ᓇᒪᐎᓚ ᑮ ᔑᐯᓕᑕᒶᒃ ᐊᓂᐁᓕᐤ ᑳ ᑮ ᐃᑕᔓᐙᓂᐗᓂᓕᒃ, ᑮᔥᐱᓐ ᒫᑲ ᐊᐌᓯᔅ ᐱᑯ ᓴᒥᓇᑫ ᐗᒋᓕᐤ, ᑲᑕ ᐱᒶᓯᓇᑕᐗᐤ, ᓀᔥᑕᐱᑯ ᑕᑲᒋᑲᓂᓕᐤ ᑲᑕ ᐅᒋ ᑕᑲᒪᐤ; 21ᑮ ᐃᔅᐱᒋ ᑯᔅᑕᓯᓈᑾᓐ ᒫᑲ, ᐌᒋ ᑮ ᐃᑗᑦ ᒧᓯᔅ, ᓈᔅᐱᒡ ᓂ ᑯᔅᑖᒋᓐ ᓀᔥᑕ ᓂ ᓇᓇᒥᐸᓕᓐ:)
22ᒫᑲ ᑭ ᑮ ᐯᒋ ᓈᑌᓇᐗᐤ ᓵᐃᐊᓐ ᐗᒋ, ᓀᔥᑕ ᐯᒫᑎᓰᑦ ᑭᒋᒪᓂᑐ ᐅᑦ ᐃᑖᐎᓐ, ᑭᒋᑭᔑᑳᐎ ᒋᕉᓴᓕᒻ, ᓀᔥᑕ ᐁᑳ ᑫ ᑮ ᑌᐸᑭᒫᑲᓂᐎᒋᒃ ᐁᓐᒐᓚᒃ, 23ᐊᓂᒪ ᒫᒪᐎ ᒪᐗᒋᐃᑐᐎᓐ ᓀᔥᑕ ᐅ ᒫᒪᐎᐋᔭᒥᐊᒥᐗᐗ ᓃᔥᑕᒧᔖᓇᒃ, ᑭᒋᑭᔑᑯᒃ ᑳ ᒪᓯᓇᐃᑳᓱᒋᒃ, ᓀᔥᑕ ᑭᒋᒪᓂᑐ ᒥᓯᐌ ᑳ ᑎᐹᔅᑯᓈᑦ, ᓀᔥᑕ ᐅᑦ ᐊᒑᑯᐗᐗ ᑳ ᒀᔭᔅᑭᑎᒋᒃ ᐃᓕᓕᐗᒃ ᐁ ᒥᑐᓂᐋᑲᓂᐎᒋᒃ, 24ᓀᔥᑕ ᒋᓴᔅ ᑳ ᐋᔭᒥᐁᔅᑕᒫᑫᑦ ᐅᔥᑭ ᓇᔅᑯᒥᑐᐎᓂᒃ, ᓀᔥᑕ ᒥᑯ ᐁ ᐸᑭᑲᐎᐌᐱᓂᑳᑌᒃ, ᓇᐗᒡ ᒥᓗ ᑫᒀᓇ ᑳ ᐋᓕᒧᑕᒧᒪᑲᑭ ᐃᔥᐱᔥ ᐅᒥᑯᒻ ᐁᐱᓪ᙮
25ᔮᒀᒃ ᐁᑳ ᐋᑕᐌᓕᒣᒃ ᐊᓇ ᑳ ᐋᔭᒥᑦ, ᐌᓴ ᑮᔥᐱᓐ ᐁᑳ ᑮ ᐱᒫᒋᐅᒋ ᐊᓂᑭ ᑳ ᑮ ᐋᑕᐌᓕᒫᒋᒃ ᐊᓂᐃ ᑳ ᑮ ᐋᔭᒥᓕᒋ ᐅᑕ ᐊᔅᑮᒃ, ᐙᐐᔅ ᓇᒪᐎᓚ ᑭᓚᓈᓇᐤ ᑭ ᑳ ᐱᒫᒋᐅᓈᓇᐤ, ᑮᔥᐱᓐ ᐃᑲᑌᓂᑌᓱᔅᑕᐗᒃ ᐊᓇ ᑭᒋᑭᔑᑯᒃ ᑳ ᐅᒋ ᐋᔭᒥᑦ: 26ᐊᓇ ᐁ ᐯᑖᑯᓯᑦ ᐌᒋ ᑮ ᓇᓇᒥᐸᓕᓕᒃ ᐊᔅᑭᓕᐤ; ᒫᑲ ᐊᓄᒡ ᑮ ᐊᔓᑕᒫᑫᐤ, ᐁ ᐃᑗᑦ, ᑫᔮᐸᒡ ᐯᔭᑾᐤ ᓇᒪᐎᓚ ᐱᑯ ᐊᔅᑭ ᓂ ᓇᓇᒥᐸᓕᑖᓐ, ᒫᑲ ᑭᒋᑭᔑᒃ ᐊᓯᒋ᙮ 27ᐅᒪ ᐋᔭᒥᐎᓐ ᒫᑲ, ᑫᔮᐸᒡ ᐯᔭᑾᐤ, ᐃᑗᒪᑲᓐ ᐁ ᐃᑲᑌᓂᑳᑌᑭ ᐊᓂᐃ ᑳ ᓇᓂᑭᐸᓕᑭ, ᑖᐱᔅᑯᒡ ᐊᓂᐃ ᑳ ᑮ ᐅᔑᑖᓂᐗᑭ, ᐊᓂᐃ ᐁᑳ ᑫ ᑮ ᓇᓇᒥᐸᓕᑭ ᑭᒋ ᐃᑕᑾᑭ᙮
28ᐁᐗᑯ ᐅᒋ ᑭᓚᓈᓇᐤ ᐁ ᒥᓕᑲᐎᔭᒃ ᐅᑭᒪᐎᐎᓐ ᐁᑳ ᑫ ᑮ ᐋᔭᒡ ᐊᔅᑖᓂᐗᒃ, ᐁᑯᔑ ᒥᒋᒥᓈᑕᐤ ᔕᐌᓕᒋᑫᐎᓐ, ᐊᓂᒪ ᑫ ᐅᒋ ᒀᔮᔉ ᐊᑑᔅᑫᔅᑕᐗᒃ ᑭᒋᒪᓂᑐ ᑭᔅᑌᓕᑕᒧᐎᓂᒃ ᓀᔥᑕ ᒪᓂᑐᐎ ᓇᓂᒋᐎᓂᒃ; 29ᐌᓴ ᑭ ᑭᒋᒪᓂᑐᒥᓇᐤ ᐃᔅᒀᓱᐌᐎ ᐃᔥᑯᑌᐎᐤ᙮
Currently Selected:
ᐦᐃᑉᕉᐗ 12: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.