ᐃᐱᓯᔭᓇ 6
6
ᐊᐙᔑᔕᒃ ᓀᔥᑕ ᓂᑭᐃᑯᒫᐗᒃ
1ᐊᐙᔑᔑᑐᒃ, ᓇᓇᐃᑖᑯᒃ ᑭ ᓂᑭᐃᑯᐙᐗᒃ ᐅᑎᐯᓕᒋᑫᒃ; ᐌᓴ ᐅᒪ ᐁ ᐃᔑ ᑾᔭᔅᑾᒃ᙮ 2ᑭᔅᑌᓕᒻ ᑯᑖᐎ ᓀᔥᑕ ᑭᑳᐎ; ᐁᐗᑯ ᓂᔥᑕᒻ ᑲᑫᔅᑴᐎᓐ ᑳ ᐊᔓᑕᒫᑫᒪᑲᒃ; 3ᑭᒋ ᒥᓗᐸᓕᐃᑯᔭᓐ, ᓀᔥᑕ ᑭᓉᔥ ᑭᒋ ᐱᒫᑎᓯᔭᓐ ᐅᑕ ᐊᔅᑮᒃ᙮
4ᓀᔥᑕ, ᑭᓚᐗᐤ ᐅᑖᐎᒫᑐᒃ, ᐁᑳᐎᓚ ᑭᔑᐙᐃᑯᒃ ᑭᑦ ᐊᐙᔑᒥᔑᐗᐗᒃ; ᒫᑲ ᐅᐱᑭᐃᑯᒃ ᐅ ᐱᑭᐃᐌᐎᓂᒃ ᓀᔥᑕ ᐅ ᑭᔅᑭᓄᐊᒫᑫᐎᓂᒃ ᐅᑎᐯᓕᒋᑫᐤ᙮
ᐊᐗᑳᓇᒃ ᓀᔥᑕ ᐅᑭᒫᐗᒃ
5ᐊᑑᔅᑫᓛᑲᓂᑐᒃ, ᓇᓇᐃᑖᑯᒃ ᐊᓂᑭ ᐎᔮᓯᐎᓂᒃ ᑳ ᐅᑭᒫᒥᔦᒃ, ᑯᔅᐹᓀᓕᑕᒧᐎᓂᒃ ᓀᔥᑕ ᓭᑭᓯᐎᓂᒃ, ᐁ ᒀᔭᔅᑯᑌᐁᔦᒃ, ᑖᐱᔅᑯᒡ ᙭ ᐁ ᑐᑕᒧᐌᒃ; 6ᓇᒪᐎᓚ ᐙᐸᒥᑯᐎ ᐊᑑᔅᑫᐎᓂᒃ, ᑖᐱᔅᑯᒡ ᐊᓂᑭ ᐃᓕᓕᐗ ᐱᑯ ᐁ ᓇᐃᓚᐌᐋᒋᒃ: ᒫᑲ ᑖᐱᔅᑯᒡ ᙭ ᐅᑦ ᐊᑑᔅᑫᓛᑲᓂᒪ, ᐁ ᑐᑕᒬᒃ ᑭᑌᐃᐙᒃ ᐅᒋ ᑭᒋᒪᓂᑐ ᐅᑦ ᐃᑌᓕᑕᒧᐎᓐ; 7ᒥᓗ ᐃᑌᓕᑕᒧᐎᓂᒃ ᐁ ᐊᑑᔅᑫᔦᒃ ᑖᐱᔅᑯᒡ ᐅᑎᐯᓕᒋᑫᐤ ᐁ ᑐᑕᒪᐌᒃ, ᓇᒪᐎᓚ ᐃᓕᓕᐗᒃ᙮ 8ᐁ ᑭᔅᑫᓕᑕᒣᒃ ᐱᑯ ᑫᒀᓐ ᐁ ᒥᓨᔑᒃ ᐊᐌᓇ ᐃᓕᓕᐤ ᐁ ᑐᑕᒃ, ᐁᐗᑴᓕᐤ ᑫ ᒥᓕᑯᑦ ᐅᑎᐯᓕᒋᑫᐗ, ᐃᐊᐗᒀᓂᐎᑴ ᓀᔥᑕᐱᑯ ᑌᐯᓕᒥᑎᓱᑴ᙮
9ᓀᔥᑕ, ᑭᓚᐗᐤ ᐅᑭᒫᑐᒃ, ᐁᑯ ᑖᐱᔅᑯᒡ ᐃᑐᑖᑯᒃ, ᐁ ᑆᔅᑕᐎ ᐊᔓᒥᐌᔦᒃ: ᐁ ᑭᔅᑫᓕᑕᒣᒃ ᑭᑦ ᐅᑭᒫᒥᐗᐤ ᓀᔥᑕ ᑭᒋᑭᔑᑯᒃ ᐁ ᐃᑖᑦ: ᐎᓚ ᓀᔥᑕ ᓇᒪᐎᓚ ᐹᐱᑐᔥ ᐃᑌᓕᒣᐤ ᐃᓕᓕᐗ᙮
ᐊᓂᒪ ᐅᓇᑐᐸᓕᐎ ᐋᐸᒋᑖᐎᓐ ᑭᒋᒪᓂᑐ
10ᒫᒋᒡ, ᓂᒋᔖᓂᑐᒃ, ᒪᔥᑲᐎᓯᒃ ᐅᑎᐯᓕᒋᑫᒃ, ᓀᔥᑕ ᐁ ᐃᔑ ᑲᔥᑭᐅᒪᑲᓂᓕᒃ ᐅ ᓯᑳᑎᓯᐎᓐ᙮ 11ᐳᔅᑎᔥᑲᒸᒃ ᒥᓯᐌ ᐅ ᓇᑐᐸᓕᐎ ᐋᐸᒋᑖᐎᓇ ᑭᒋᒪᓂᑐ, ᑭᒋ ᑮ ᓂᐸᐎᔅᑕᒬᒃ ᒪᒋᒪᓂᑐ ᐅ ᐙᔦᔑᐃᐌᐎᓇ᙮ 12ᐌᓴ ᓇᒪᐎᓚ ᑭ ᒫᔑᑖᓈᓇᐤ ᐎᔮᔅ ᓀᔥᑕ ᒥᑯ, ᒫᑲ ᑎᐯᓕᒋᑫᐎᓇ, ᓀᔥᑕ ᓱᑳᑎᓯᐎᓇ, ᐊᓂᑭ ᓀᔥᑕ ᑳ ᑎᐯᓕᑕᑭᒃ ᐗᓂᑎᐱᔅᑭᓯᐎᓂᓕᐤ ᐅᑕ ᐊᔅᑮᒃ, ᐊᒑᑯᐎ ᒪᒋᑣᐎᓐ ᐃᑕ ᐁ ᐃᔅᐯᓕᑖᑾᒃ᙮ 13ᐁᐗᑯ ᐅᒋ ᐅᑎᓇᒫᓱᒃ ᒥᓯᐌ ᐅ ᓇᑐᐸᓕᐎ ᐋᐸᒋᑖᐎᓇ ᑭᒋᒪᓂᑐ, ᑭᒋ ᑮ ᓇᔅᑯᔦᒃ ᒪᒋ ᑭᔑᑳᑫ, ᓀᔥᑕ ᑮ ᔖᑯᒋᑖᔦᑴ ᒥᓯᐌ, ᑭᒋ ᓂᐸᐎᔦᒃ᙮
14ᓂᐸᐎᒃ ᒫᑲ, ᐁ ᐸᑯᑌᐅᓂᔥᑲᒣᒃ ᐋᐱᑕᐎᔭᐤ ᑖᐺᐎᓐ, ᓀᔥᑕ ᐁ ᑭᑭᔥᑲᒣᒃ ᒀᔭᔅᑭᑖᑎᓯᐎᓐ ᑖᐱᔅᑯᒡ ᒥᔅᑳᔅᑭᑲᓈᐱ; 15ᓀᔥᑕ ᐁ ᑭᑭᔥᑲᒣᒃ ᑭᓯᑎᐙᒃ ᐁ ᐋᔦᔅᑳᐎᑖᓂᐗᒃ ᑳᔮᒣᓕᑕᒧᐎᓂ ᒥᓗᐋᒋᒧᐎᓐ; 16ᐊᐙᓯᑌ ᒥᓯᐌ ᑯᑕᑭᔭ, ᐁ ᐅᑎᓇᒣᒃ ᑖᐺᔦᓕᑕᒧᐎᓂ ᐊᑾᓇᐅᓱᐙᑲᓐ, ᑫ ᑮ ᐅᒋ ᐋᔅᑕᐌᐊᒬᒃ ᒥᓯᐌ ᐅᑦ ᐃᔥᑯᑌᐎ ᒥᒋᑭᐗ ᐅᒪᒋᑡᐤ᙮ 17ᐅᑎᓇᒧᒃ ᓀᔥᑕ ᐱᒫᒋᐃᐌᐎᓐ ᑖᐱᔅᑯᒡ ᓇᑐᐸᓕᐎ ᐊᔅᑐᑎᓐ, ᓀᔥᑕ ᐊᒑᒃ ᐅ ᔑᒫᑲᓐ, ᐁᐗᑯ ᑭᒋᒪᓂᑐ ᐅᑦ ᐋᔭᒥᐎᓐ: 18ᒧᔕᒃ ᐁ ᐋᔭᒥᐋᔦᒃ ᒥᓯᐌ ᐋᔭᒥᐋᐎᓂᒃ ᓀᔥᑕ ᓇᑐᑕᒫᑫᐎᓂᒃ ᐊᒑᑯᒃ, ᐁᑯᑕ ᓀᔥᑕ ᐁ ᐃᔑ ᐊᔕᐙᐱᔦᒃ ᒥᓯᐌ ᐋᔑᑫᓕᑕᒧᐎᓂᒃ, ᓀᔥᑕ ᐁ ᐋᔭᒥᐁᔅᑕᒪᐌᑾᒃ ᒥᓯᐌ ᐅᐸᓓᑭᓴᒃ; 19ᓀᔥᑕ ᓂᓚ ᐊᓯᒋ, ᑭᒋ ᒥᓕᑲᐎᔮᓐ ᑭᒋ ᐹᔅᑭᑐᓀᓕᔮᓐ, ᑭᒋ ᑭᔅᑫᓕᑖᑯᑖᔮᓐ ᐁ ᐃᔑ ᒫᒪᔅᑳᑌᓕᑖᑾᒃ ᒥᓗᐋᒋᒧᐎᓐ: 20ᐊᓂᒪ ᑳ ᐅᒋ ᐃᔑᑎᔕᐗᑲᓂᔮᓐ ᐁ ᒫᒫᒋᒀᐱᔅᑳᐅᑲᐎᔮᓐ: ᐁᐗᑯ ᑭᒋ ᑮ ᑎᐹᑐᑕᒫᓐ ᐁ ᓱᑭᑌᐁᔮᓐ ᑫ ᐃᔑ ᑎᐹᑐᑕᒫᐸᓐ᙮
ᐹᓪ ᒫᒋᒡ ᐁ ᐗᒉᑫᒧᑦ
21ᒫᑲ ᑭᓚᐗᐤ ᓀᔥᑕ ᑭᒋ ᑭᔅᑫᓕᑕᒣᒃ ᑳ ᐊᔨᑐᑕᒫᓐ, ᓀᔥᑕ ᐁ ᐃᔑ ᐋᔮᔮᓐ, ᑎᑭᑲᔅ, ᑳ ᓴᑭᐋᑲᓂᐎᑦ ᐎᒋᔖᓂᒪᐤ, ᓀᔥᑕ ᑳ ᒀᔭᔅᑭᑎᑦ ᐋᔭᒥᐋᐃ ᐊᑑᔅᑫᓛᑲᓐ ᐅᑎᐯᓕᒋᑫᒃ, ᒥᓯᐌ ᑫᒀᓇ ᑭ ᑳ ᑭᔅᑫᓕᑕᒥᐃᑯᐗᐤ: 22ᐊᓇ ᐁᐗᑴᓕᐤ ᑳ ᑮ ᐅᒋ ᐃᔑᑎᔕᐊᒫᑕᑾᒃ, ᑭᒋ ᑭᔅᑫᓕᑕᒣᒃ ᑳ ᐊᔨᑎᔮᒃ, ᓀᔥᑕ ᑭᒋ ᑳᑭᒋᐃᑖᒃ ᑭᑌᐎᐙᒃ᙮
23ᑳᔮᒣᓕᑕᒧᐎᓂᓕᐤ ᑲᑕ ᐎ ᐋᔭᐗᒃ ᐎᒋᔖᓂᒪᐗᒃ, ᓀᔥᑕ ᓵᑭᐃᐌᐎᓂᓕᐤ ᐊᓯᒋ ᑖᐺᔦᓕᑕᒧᐎᓂᓕᐤ, ᑭᒋᒪᓂᑐ ᐌᐅᑖᐎᒪᐎᑦ ᐅᒋ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮ 24ᔕᐌᓕᒋᑫᐎᓂᓕᐤ ᑲᑕ ᐎ ᐎᒉᐃᑯᐗᒃ ᒥᓯᐌ ᐊᓂᑭ ᑳ ᓵᑭᐋᒋᒃ ᑭ ᑎᐯᓕᒋᑫᒥᓇᐗ ᒋᓴᔅ ᙭ᑕ ᑖᐺᐎᓂᒃ᙮ ᐁᒣᓐ᙮
Currently Selected:
ᐃᐱᓯᔭᓇ 6: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.