ᐃᐱᓯᔭᓇ 5
5
ᐁ ᐱᒫᑎᓯᓈᓂᐗᒃ ᐙᔅᑌᐎᓂᒃ
1ᐁᐗᑯ ᐅᒋ ᒫᑲ ᓇᔅᐱᑖᒃ ᑭᒋᒪᓂᑐ, ᑖᐱᔅᑯᒡ ᐁ ᓵᑭᐋᑲᓂᐎᒋᒃ ᐊᐙᔑᔕᒃ: 2ᐱᒧᑌᒃ ᒫᑲ ᓵᑭᐃᐌᐎᓂᒃ, ᑖᐱᔅᑯᒡ ᑳ ᐃᔑ ᓵᑭᐃᑕᒃ ᙭, ᓀᔥᑕ ᑭᓚᓈᓇᐤ ᑳ ᑮ ᐅᒋ ᒥᓕᐌᑦ ᐎᔭᐤ, ᐸᑭᑎᓂᑫᐎᓂᓕᐤ ᓀᔥᑕ ᓵᓵᑭᐎᓕᐌᐎᓂᓕᐤ ᐁ ᐸᑭᑎᓇᒪᐙᑦ ᑭᒋᒪᓂᑐᐗ, ᐸᑭᑎᓂᑫᐎᓂᓕᐤ ᑳ ᐎᑭᒫᑾᓂᓕᒃ᙮
3ᒫᑲ ᐱᔑᒀᑎᓯᐎᓐ, ᓀᔥᑕ ᒥᓯᐌ ᐎᓂᓯᐎᓐ, ᓀᔥᑕ ᒧᔅᑌᓇᒫᑫᐎᓐ, ᐁᑳᐎᓚ ᐎᔅᑲᑦ ᑲᑕ ᐋᓕᒧᒋᑳᑌᐤ ᐃᑌ ᐁ ᐃᑕᔦᒃ, ᑳ ᐃᔑ ᓇᑕᐌᓕᑖᑯᓯᒋᒃ ᐅᐸᓓᑭᓴᒃ; 4ᐁᑳ ᓀᔥᑕ ᐎᓂᑐᑕᒧᐎᓐ, ᐁᑳ ᓀᔥᑕ ᐸᑾᓐᑕᐤ ᐋᔭᒥᐎᓐ, ᐁᑳ ᓀᔥᑕ ᒪᒋ ᐗᐎᔭᑗᐎᓐ, ᐁᑳ ᑳ ᒥᓗᐃᑌᓕᑖᑾᒃ; ᒫᑲ ᐊᐙᓯᑌ ᐁ ᓈᓈᔅᑯᒧᓈᓂᐗᒃ᙮ 5ᐌᓴ ᐅᒪ ᑭ ᑭᔅᑫᓕᑌᓇᐗᐤ, ᓇᒪᐎᓚ ᐊᐌᓇ ᑳ ᐱᔑᒀᑎᓯᑦ, ᓀᔥᑕ ᐊᐌᓇ ᑳ ᐎᓂᓯᑦ, ᓀᔥᑕ ᐊᐌᓇ ᑳ ᒧᔅᑌᓇᒫᑫᑦ, ᐁ ᓇᐗᑭᔅᑕᐙᑦ ᒪᓂᑐᑳᓇ, ᐋᔭᐤ ᑎᐱᓚᐌᐎᓯᐎᓐ ᑭᒋᒪᓂᑐ ᓀᔥᑕ ᙭ ᐅᑦ ᐅᑭᒪᐎᐎᓂᒃ᙮
6ᐁᑳᐎᓚ ᐊᐌᓇ ᐸᑾᓐᑕᐤ ᐋᔭᒥᐎᓇ ᑭ ᑳ ᐅᒋ ᐙᔦᔑᒥᑯᐗᐤ, ᐌᓴ ᐅᐅ ᑫᒀᓇ ᐅᒋ ᐅᑎᑎᑯᐗᒃ ᑭᒋᒪᓂᑐᐗ ᐅᑦ ᐊᑯᓚᐌᓯᐎᓂᓕᐤ ᑳ ᐋᓉᑖᑫᒋᒃ ᐊᐙᔑᔕᒃ᙮ 7ᐁᐗᑯ ᐅᒋ ᐁᑳᐎᓚ ᑖᐱᔅᑯᒡ ᑐᑕᒧᒃ᙮ 8ᐌᓴ ᐌᔅᑲᒡ ᑭ ᑮ ᐗᓂᑎᐱᔅᑭᓯᓇᐗᐤ, ᐊᓄᒡ ᒫᑲ ᑭ ᐙᔅᑌᐎᓇᐗᐤ ᐅᑎᐯᓕᒋᑫᒃ: ᐱᒧᑌᒃ ᑖᐱᔅᑯᒡ ᐙᔅᑌᐎᓂ ᐊᐙᔑᔕᒃ᙮ 9ᐌᓴ ᐊᓂᒪ ᑳ ᒥᓂᔑᐎᑦ ᐊᒑᒃ ᐃᑕᑾᒃ ᒥᓯᐌ ᒥᓨᑎᓯᐎᓂᒃ, ᓀᔥᑕ ᒀᔭᔅᑭᑖᑎᓯᐎᓂᒃ, ᓀᔥᑕ ᑖᐺᐎᓂᒃ; 10ᐁ ᑯᒋ ᑭᔅᑫᓕᑕᒣᒃ ᐊᓂᒪ ᑳ ᓇᐃᓚᐌᐃᑯᑦ ᐅᑎᐯᓕᒋᑫᐤ᙮ 11ᐁᑳᐎᓚ ᒫᑲ ᐎᒉᐙᑲᓂᑕᒪᒃ ᐊᓂᐃ ᐁᑳ ᑳ ᒥᓂᔑᐗᑭ ᐗᓂᑎᐱᔅᑭᓯᐎ ᐊᑑᔅᑫᐎᓇ, ᒫᑲ ᐊᐙᓯᑌ ᑭᑐᑕᒧᒃ᙮ 12ᐌᓴ ᓇᓀᐯᐌᓕᑖᑾᒃ ᐙᐙᒡ ᑭᒋ ᐋᓕᒧᒋᑳᑌᑭ ᐊᓂᐃ ᑲᑕᓄᒃ ᑳ ᑐᑕᑭᒃ᙮ 13ᒫᑲ ᒥᓯᐌ ᑫᒀᓇ ᑳ ᑭᔅᑫᓕᒋᑳᑌᑭ ᓄᑯᑖᑲᓂᐗᓋ ᐙᔅᑗᐎᓐ ᐅᒋ; ᐌᓴ ᑕᑐ ᑫᒀᓐ ᑳ ᓄᑯᑖᑫᒪᑲᒃ ᐙᔅᑗᐎᓂᐗᓐ᙮ 14ᐁᐗᑯ ᐌᒋ ᐃᑗᑦ, ᑯᔅᑯᓯ, ᑭᓚ ᑳ ᓂᐹᔭᓐ, ᐗᓂᔥᑳ ᐅᓂᐱᐗ ᐅᒋ, ᙭ ᒫᑲ ᑭ ᑳ ᒥᓕᒃ ᐙᔅᑌᐎᓂᓕᐤ᙮
15ᔮᑾᒥᓯᒃ ᒫᑲ ᑭᒋ ᓕᑆᑲᐎ ᐱᒧᑌᔦᒃ, ᓇᒪᐎᓚ ᑖᐱᔅᑯᒡ ᑳ ᑲᑫᐹᑎᓯᒋᒃ, ᒫᑲ ᑖᐱᔅᑯᒡ ᑳ ᑲᑫᑕᐌᓕᑕᑭᒃ, 16ᒀᔭᔉ ᐁ ᐋᐸᒋᑕᔦᒃ ᐁ ᑭᔑᑳᑭ, ᐁ ᒫᓛᑕᑭ ᐅᐅ ᑭᔑᑳᐗ᙮ 17ᐁᐗᑯ ᐌᒋ ᐁᑳᐎᓚ ᑲᑫᐹᑎᓰᒃ, ᒫᑲ ᐁ ᓂᓯᑐᑕᒬᒃ ᐅᑎᐯᓕᒋᑫᐤ ᐅᑦ ᐃᑌᓕᑕᒧᐎᓐ᙮
18ᐁᑳᐎᓚ ᓀᔥᑕ ᑮᔥᑴᐯᒃ ᔓᒥᓈᐳ ᐅᒋ, ᐁᐗᑯ ᐅᓵᒥᐃᓱᐎᓐ: ᒫᑲ ᑭ ᑳ ᐎ ᓴᑲᔅᑭᓀᔅᑳᑯᐗᐤ ᐊᒑᒃ; 19ᐁ ᐊᔭᒥᐃᑐᔦᒃ ᓵᒥᒃ ᓀᔥᑕ ᐋᔭᒥᐋᐎ ᓂᑲᒧᐎᓂᒃ, ᓀᔥᑕ ᐊᒑᑯᐎ ᓂᑲᒧᐎᓂᒃ, ᐁ ᓂᑲᒧᔅᑕᐌᒃ ᓀᔥᑕ ᐁ ᒥᓗᑖᑯᓰᔅᑕᐌᒃ ᐅᑎᐯᓕᒋᑫᐤ ᑭᑌᐃᐙᒃ; 20ᒧᔕᒃ ᒥᓯᐌ ᑫᒀᓇ ᐁ ᐅᒋ ᓇᓈᔅᑯᒣᒃ ᑭᒋᒪᓂᑐ ᐌᐅᑖᐎᒪᐎᑦ, ᐅᑦ ᐃᔑᓂᑳᓱᐎᓂᒃ ᑭ ᑎᐯᓕᒋᑫᒥᓇᐤ ᒋᓴᔅ ᙭᙮
ᐎᐎᒫᐗᒃ ᓀᔥᑕ ᐅᓈᐯᒥᒫᐗᒃ
21ᐁ ᑕᐸᑌᓕᒥᑎᓱᔅᑖᑐᔦᒃ ᐅ ᓇᓂᒌᔅᑖᑯᓯᐎᓂᒃ ᑭᒋᒪᓂᑐ᙮
22ᐃᔅᑴᑐᒃ, ᓇᓇᐃᑖᑯᒡ ᑭ ᓈᐯᒥᐙᐗᒃ, ᑖᐱᔅᑯᒡ ᐅᑎᐯᓕᒋᑫᐤ ᐃᔑ᙮ 23ᐌᓴ ᓈᐯᐤ ᑎᐯᓕᒣᐤ ᐎᐗ, ᑖᐱᔅᑯᒡ ᙭ ᐁ ᑎᐯᓕᒫᑦ ᒫᒪᐎᐋᔭᒥᐊᐗ: ᐎᓚ ᒫᑲ ᐁᐗᑯ ᑳ ᐱᒫᒋᑖᑦ ᒥᔭᐎᓕᐤ᙮ 24ᐁᐗᑯ ᐅᒋ ᑖᐱᔅᑯᒡ ᒫᒪᐎᐋᔭᒥᐋᐗᒃ ᐁ ᓇᓇᐃᑕᐙᒋᒃ ᙭ᑕ, ᐁᑯ ᓀᔥᑕ ᑖᐱᔅᑯᒡ ᐃᔅᑴᐗᒃ ᑲᑕ ᓇᓇᐃᑕᐌᐗᒃ ᐅ ᓈᐯᒥᐗᐗ ᒥᓯᐌ ᐃᔑ᙮
25ᓈᐯᑐᒃ, ᓵᑭᐃᑯᒃ ᑭ ᐎᐙᐗᒃ, ᑖᐱᔅᑯᒡ ᙭ ᑳ ᑮ ᐃᔑ ᓵᑭᐋᑦ ᒫᒪᐎᐋᔭᒥᐊᐗ ᓀᔥᑕ ᑳ ᑮ ᐸᑭᑎᓂᑎᓱᔅᑕᒪᐙᑦ; 26ᑭᒋ ᑮ ᐸᓓᑭᐋᑦ ᐁ ᑭᒋᔅᑖᐸᐗᓛᑦ ᓂᐱᓕᐤ ᐅᒋ, ᐋᔭᒥᐎᓂᓕᐤ ᐅᒋ, 27ᑭᒋ ᑮ ᐸᑭᑎᓇᒫᓱᑦ ᐁ ᑭᔅᑖᑎᓯᓕᒋ ᒫᒪᐎᐋᔭᒥᐊᐗ, ᐁᑳ ᐁ ᐸᐸᑌᐎᓯᓕᒋ, ᐁᑳ ᓀᔥᑕ ᐁ ᐅᓯᑭᓯᓕᒋ, ᐁᑳ ᓀᔥᑕ ᐁ ᐋᔮᓕᒋ ᐅᒪ ᑐᐎ ᑫᒀᓕᐤ; ᒫᑲ ᑭᒋ ᐸᓓᑭᓯᓕᒋ ᓀᔥᑕ ᐁᑳ ᑭᒋ ᒪᔅᑭᓯᓕᒋ᙮ 28ᐁᑯ ᓈᐯᐗᒃ ᑫ ᐃᔑ ᓵᑭᐋᐙᔅᐸᓐ ᐎᐎᐗᐗ ᑖᐱᔅᑯᒡ ᑎᐱᓚᐌ ᐎᔭᐎᐙᐗ᙮ ᐊᓇ ᑳ ᓵᑭᐋᑦ ᐎᐗ, ᓵᑭᐃᑌᓱ᙮ 29ᐌᓴ ᓇᒪᐎᔅᑳᑦ ᐁᔥᑾ ᓈᐯᐤ ᑮ ᐸᒀᑕᑕᒻ ᑎᐱᓚᐌ ᐎᔮᔅ, ᒫᑲ ᑲᓇᐌᓕᑕᒻ ᓀᔥᑕ ᑭᔐᐙᑐᑕᒻ, ᑖᐱᔅᑯᒡ ᐅᑎᐯᓕᒋᑫᐤ ᐁ ᐃᑐᑕᐙᑦ ᒫᒪᐎᐋᔭᒥᐊᐗ: 30ᐌᓴ ᑭᑦ ᐊᔑᑕᑭᑖᑯᓯᓈᓇᐤ ᐎᔭᐎᒃ, ᐅᐎᔮᓯᒃ, ᓀᔥᑕ ᐅᔅᑲᓂᒃ᙮ 31ᐁᐗᑯ ᐅᒪ ᐅᒋ ᐃᓕᓕᐤ ᑫ ᓇᑲᑖᑦ ᐅᑖᐎᔭ ᓀᔥᑕ ᐅᑳᐎᔭ, ᓀᔥᑕ ᑫ ᐎᒉᐙᑦ ᐎᐗ, ᐅᑯ ᑳ ᓂᔑᒋᒃ ᒫᑲ ᑲᑕ ᐯᔭᑯ ᐎᔮᓯᐗᒃ᙮ 32ᐅᒪ ᓈᔅᐱᒡ ᒫᒫᑕᐌᓕᑖᑾᓐ: ᒫᑲ ᓂᑦ ᐊᓕᒧᒪᐗᒃ ᙭ ᓀᔥᑕ ᐅ ᒪᒪᐎᐋᔭᒥᐋᒪ᙮ 33ᐁᓕᐌᒃ ᒫᑲ ᒥᓯᐌ ᑕᑐ ᐁ ᐃᑕᔑᔦᒃ ᑲᑕ ᐃᔑ ᓵᑭᐁᐤ ᐎᐗ ᑖᐱᔅᑯᒡ ᐁ ᐃᔑᓵᑭᐃᑎᓱᑦ: ᓀᔥᑕ ᐃᔅᑴᐤ ᑲᑕ ᔮᒀᒥᓯᐤ ᐁ ᑭᔅᑌᓕᒫᑦ ᐅ ᓈᐯᒪ᙮
Currently Selected:
ᐃᐱᓯᔭᓇ 5: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.