ᐊᐸᔅᑕᓚᒃ 27
27
ᐹᓪ ᐃᑖᔓᐤ ᕈᒥᒃ
1ᐃᔅᐱ ᒫᑲ ᑳ ᑮ ᐃᑕᔓᐙᓂᐗᒃ ᐊᓐᑕ ᐃᑕᓕ ᑭᒋ ᐃᑖᔑᔮᒃ, ᐹᓚ ᓀᔥᑕ ᐋᑎᑦ ᑯᑕᑭᔭ ᑭᐸᐙᑲᓇ ᑭ ᐸᑭᑎᓇᒪᐌᐗᒃ ᐊᐌᓕᐗ ᒎᓕᔭᔅ ᐁ ᐃᔑᓂᑳᓱᓕᒋ, ᓇᑐᐸᓕᐎᑭᒫᐗ ᐊᑲᔅᑕᔅ ᐅ ᒫᒪᐎᔭᑎᒥᒃ᙮ 2ᐁ ᐳᓯᔮᒃ ᒫᑲ ᐯᔭᒃ ᐋᑦᕋᒥᑎᔭᒻ ᓈᐱᒀᓂᒃ, ᓂ ᑮ ᑭᔑᒋᒫᓈᓐ, ᐁ ᐃᑌᓕᑕᒫᒃ ᑎᐱᔅᑯᒡ ᐁᔕ ᐊᔅᑮᒃ ᑭᒋ ᐃᑖᔑᔮᒃ; ᐋᕆᔅᑖᕐᑲᔅ, ᒫᓯᑐᓂᔭᐎᓕᓕᐤ ᑌᐃᓴᓗᓇᐃᑳᐃᒃ ᑳ ᐅᒌᑦ, ᐁ ᐎᒉᐎᔭᒥᑦ᙮ 3ᐎᐋᐸᒃ ᒫᑲ ᓂ ᑮ ᑕᒀᔑᓈᓐ ᓵᐃᑕᓂᒃ᙮ ᒎᓕᔭᔅ ᒫᑲ ᑮ ᑭᔐᐙᑐᑕᐌᐤ ᐹᓚ, ᓀᔥᑕ ᑮ ᐸᑭᑎᓀᐤ ᑭᒋ ᓈᑖᓕᒋ ᐅᑐᑌᒥᓕᐗ ᑭᒋ ᒥᓜᓕᑕᒥᐃᑎᓱᑦ᙮ 4ᐃᔅᐱ ᒫᑲ ᐁᑯᑕ ᑳ ᐅᒋ ᑭᔑᒋᒣᔮᒃ, ᓂ ᑮ ᐃᑖᔑᓈᓐ ᑭᔑᐙᒃ ᓵᐃᑉᕋᓯᒃ, ᐁ ᓇᑳᔮᔑᔮᒃ᙮ 5ᐃᔅᐱ ᒫᑲ ᑳ ᑮ ᐋᔓᐗᑲᒣᔮᔑᔮᒃ ᓯᓕᓯᔭ ᓀᔥᑕ ᐹᒻᐱᓕᔭ ᑭᒋᑲᒦᒃ, ᓂ ᑮ ᐅᑎᑕᐁᓈᓐ ᒪᐃᕋ, ᐃᑖᐎᓐ ᓕᓯᔭᐃᒃ᙮ 6ᐁᑯᑕ ᒫᑲ ᓇᑐᐸᓕᐎᑭᒪᐤ ᒣᔅᑲᒃ ᐯᔭᒃ ᐋᓕᒃᓵᓐᑦᕆᔭ ᓈᐱᒀᓂᓕᐤ ᐁ ᐎ ᐃᑖᔅᑕᓂᓕᒃ ᐊᓐᑕ ᐃᑕᓕ; ᐁᑯᑕ ᒫᑲ ᐱᐅᓯᐃᔭᒥᑦ᙮
7ᐃᔅᐱ ᒫᑲ ᒥᒉᑐ ᑭᔑᑳᐗ ᐯᑳᒡ ᑳ ᑮ ᐱᒫᔑᔮᒃ, ᐊᑳᐙᒡ ᓀᔥᑕ ᐁ ᑮ ᐯᒋ ᐊᔑᐗᑳᒣᔮᔑᔮᒃ ᑎᐱᔅᑯᒡ ᒃᓈᑕᔅ ᐁᑳ ᐁ ᓇᐃᑎᒃ, ᓂ ᑮ ᐃᑖᔑᓈᓐ ᑭᔑᐙᒃ ᒃᕇᑦ ᑎᐱᔅᑯᒡ ᓵᓪᒧᓂ; 8ᐊᑳᐙᒡ ᒫᑲ ᐁ ᒥᔮᔥᑲᐊᒫᒃ, ᓂ ᑮ ᐯᒋ ᐃᔑᒋᒫᓈᓐ ᐃᑕ ᐁ ᐃᔑᓂᑳᑌᒃ ᑳ ᒥᓨᔑᒃ ᐁ ᑎᐱᓇᐙᒃ; ᐯᔓᒡ ᐃᑕ ᐁ ᐃᑕᑾᒃ ᓓᓯᔭ ᐃᑖᐎᓐ᙮
9ᐃᔅᐱ ᒫᑲ ᒥᒉᑐ ᑭᔑᑳᐗ ᐋᔕᔾ ᑳ ᒥᔭᐎᐸᓕᑭ, ᓀᔥᑕ ᐁ ᐱᒫᔑᓈᓂᐗᒃ ᐊᓄᒡ ᐁ ᑯᔅᑖᑎᑾᒃ, ᐌᓴ ᓂᑲᓱᐎᓐ ᐋᔕᔾ ᑮ ᒥᔭᐎᐸᓕᐤ, ᐹᓪ ᑮ ᔮᑾᒥᒣᐤ, 10ᓀᔥᑕ ᑮ ᐃᑌᐤ, ᐅᑭᒫᑐᒃ, ᓂ ᐙᐸᑌᓐ ᐅᒪ ᐱᒫᔑᐎᓐ ᑭᒋ ᑯᔅᑖᑌᓕᑖᑾᒃ ᓀᔥᑕ ᓈᔅᐱᒡ ᑭᒋ ᐋᑴᓕᑖᑾᒃ, ᓇᒪᐎᓚ ᐱᑯ ᐳᓯᑖᓱᐎᓐ ᓀᔥᑕ ᓈᐱᒀᓐ ᐅᒋ, ᒫᑲ ᐊᓯᒋ ᑭ ᐱᒫᑎᓯᐎᓂᓈᐤ᙮ 11ᐁᓕᐌᒃ ᒫᑲ ᓇᑐᐸᓕᐎᑭᒪᐤ ᐊᐙᓯᑌ ᑮ ᑖᐺᑕᐌᐤ ᐊᓂᐃ ᑳ ᑎᐯᓕᑕᒥᓕᒋ ᓀᔥᑕ ᑳ ᐅᑦ ᐋᔮᓂᓕᒋ ᓈᐱᒀᓂᓕᐤ, ᐃᔥᐱᔥ ᐊᓂᐁᓕᐤ ᑳ ᐃᑗᓕᒋ ᐹᓚ᙮ 12ᐁᑳ ᒫᑲ ᐊᓐᑕ ᐁ ᑎᐱᓇᐙᒃ ᐁ ᒥᓨᔑᒃ ᑭᒋ ᐱᐴᓂᔑᓈᓂᐗᒃ, ᓇᐗᒡ ᐁ ᒥᒉᑎᒋᒃ ᑮ ᐃᑗᐗᒃ ᐊᓐᑕ ᓀᔥᑕ ᑭᒋ ᐅᒋ ᑭᔑᒋᒣᔮᒃ, ᒫᔅᑯᒡ ᓈᓐᑕᐤ ᐃᔑ ᑭᒋ ᐅᑎᑕᐊᑭᒃ ᐊᓐᑕ ᐱᓈᓯ, ᐁᑯᑕ ᒫᑲ ᑭᒋ ᐱᐴᓂᔑᒋᒃ; ᐁᑯᑕ ᐁ ᑎᐱᓇᐙᒃ ᒃᕆᑎᒃ, ᐁ ᐃᔑᑎᒃ ᐁ ᔖᐗᓄᓇᑳᐯᐊᒃ ᓀᔥᑕ ᐁ ᑭᐌᑎᓄᓇᑳᐯᐊᒃ ᐃᔑ᙮
ᑮᔅᑎᓐ ᓰᐲᒃ
13ᐃᔅᐱ ᒫᑲ ᐯᑳᒡ ᔑᐋᐗᓂᓗᐌᒃ, ᓂ ᑲᔥᑭᑖᓈᓐ ᑳ ᐃᑌᓕᑕᒫᒃ ᐁ ᐃᑌᓕᑕᑭᒃ, ᐊᓐᑕ ᐁ ᐅᒋ ᑭᔑᒋᒣᒋᒃ, ᒋᑭᒡ ᒃᕇᑦ ᑮ ᐃᑖᔑᐗᒃ᙮ 14ᒫᑲ ᓇᒪᐎᓚ ᑭᓉᔥ ᐃᓕᑯᒃ ᑭ ᒫᒋ ᑮᔅᑎᓐ, ᐊᓂᒪ ᔫᕋᒃᓚᑕᓐ ᐁ ᐃᔑᓂᑳᑌᒃ᙮ 15ᐃᔅᐱ ᒫᑲ ᑳ ᐅᑎᒋᐸᓕᒃ ᓈᐱᒀᓐ, ᐁᑳ ᓀᔥᑕ ᐁ ᑮ ᓇᐃᐸᓕᒃ ᐁ ᐃᔅᐱᒋ ᓗᑎᒃ, ᓂ ᑮ ᑭᒋᐸᓕᐃᑳᐎᓈᓐ᙮ 16ᓀᔥᑕ ᐁ ᐃᑖᔑᔮᒃ ᒋᑭᒡ ᐯᔭᒃ ᒥᓂᔅᑎᑯᒃ ᒃᓚᑕ ᐁ ᐃᔑᓂᑳᑌᒃ, ᓈᔅᐱᒡ ᓂ ᑮ ᐊᓕᒥᐃᑯᓈᓐ ᒥᔅᑎᑯᒋᒫᓐ ᑭᒋ ᐅᑎᓇᒫᒃ: 17ᐃᔅᐱ ᒫᑲ ᑳ ᑮ ᐳᓯᑖᒋᒃ, ᑮ ᐋᔨᒋᑖᐗᒃ ᐊᑖᒥᒃ ᐁ ᐙᔅᑲᑕᑯᐱᑕᑭᒃ ᓈᐱᒀᓂᓕᐤ; ᓀᔥᑕ ᒫᑲ ᐁ ᓭᑭᓯᑭᒃ ᑭᒋ ᐃᔅᐸᓕᒋᒃ ᒥᓂᔅᑎᑾᐗᑳᒃ, ᒫᓐᔒᔥ ᐁ ᐅᐯᑲᐃᑫᒋᒃ, ᐁᑯ ᓀᔥᑕ ᑳ ᐃᔑ ᐃᔅᐸᓕᐋᑲᓂᐎᒋᒃ᙮ 18ᓈᔅᐱᒡ ᒫᑲ ᓂ ᑮ ᐋᔮᓱᐎᐸᐹᒪᐅᑯᓈᓐ ᐁ ᑮᔅᑎᒃ, ᐎᐋᐸᒃ ᒫᑲ ᑮ ᓛᑭᑖᐗᒃ ᓈᐱᒀᓂᓕᐤ; 19ᐁᑎ ᓂᔅᑐ ᑭᔑᑳᒃ ᒫᑲ ᑎᐱᓚᐌ ᓂᒋᒋᓈᒃ ᓂ ᑮ ᐅᒋ ᐗᓚᐎᐌᐱᓀᓈᓐ ᐋᐸᒋᑖᑲᓇ ᓈᐱᒀᓂᒃ᙮ 20ᐃᔅᐱ ᒫᑲ ᐱᓯᒻ ᓀᔥᑕ ᐊᒐᑯᔕᒃ ᐁᑳ ᑳ ᓄᑯᓯᒋᒃ ᒥᒉᑐ ᑭᔑᑳᐗ, ᓀᔥᑕ ᓈᔅᐱᒡ ᐁ ᑮᔅᑎᒃ ᐁ ᐸᑲᒥᔅᑳᑯᔭᒃ ᒥᑐᓂ ᓂ ᑮ ᐗᓂᑖᓈᓐ ᐊᔅᐯᓕᒧᐎᓐ ᑭᒋ ᐱᒫᑎᓯᔮᒃ᙮
21ᐃᔅᐱ ᒫᑲ ᑭᓉᔥ ᑳ ᑮ ᓂᑲᓱᒋᒃ ᐹᓪ ᑮ ᓂᐸᐎᐤ ᒣᑴᔭᔥ ᐁ ᐃᑕᓯᓕᒋ, ᓀᔥᑕ ᑮ ᐃᑗᐤ, ᐅᑭᒫᑐᒃ, ᑭ ᑳ ᑮ ᓇᑐᑕᐎᑖᐗᐤ, ᓇᒪ ᓀᔥᑕ ᑭ ᑳ ᑮ ᓇᑲᑕᐁᑖᐗᐤ ᒃᕆᑦ, ᑳ ᐅᒋ ᑲᔥᑭᑕᒫᓱᔦᒃ ᐅᒪ ᐋᑯᐃᑯᓯᐎᓐ ᓀᔥᑕ ᐗᓂᑖᓱᐎᓐ᙮ 22ᐊᓄᒡ ᒫᑲ ᑭ ᔑᑭᒥᑎᓇᐗᐤ ᑭᒋ ᐗᒉᑲᒣᓕᑕᒣᒃ: ᐌᓴ ᓇᒪᐎᓚ ᐊᐌᓇ ᐁ ᐃᑕᔑᔦᒃ ᑲᑕ ᐗᓂᑕᐤ ᐅ ᐱᒫᑎᓯᐎᓐ, ᐱᑯ ᓈᐱᒀᓐ᙮ 23ᐌᓴ ᑌᐱᔅᑳᒃ ᓂ ᑮ ᐎᒋᑳᐸᐎᔅᑖᑯᓕᐗ ᐅᑦ ᐁᓐᒐᓕᒪ ᑭᒋᒪᓂᑐ, ᐊᓇ ᑳ ᑎᐯᓕᒥᑦ, ᐊᓇ ᓀᔥᑕ ᑳ ᐊᑐᔅᑫᔅᑕᐗᒃ, 24ᐁ ᐃᑗᑦ, ᐁᑳᐎᓚ ᑯᔅᑖᒋ, ᐹᓪ; ᑭ ᑳ ᐯᔑᑳᐎᓐ ᐁᑖᔅᑕᒪᐱᑦ ᓯᓴᕐ: ᒫᑎᑲ, ᒫᑲ, ᑭᒋᒪᓂᑐ ᑭ ᑮ ᐸᑭᑎᓇᒫᒃ ᒥᓯᐌ ᐊᓂᑭ ᑳ ᐎᒋᐱᒫᔑᒥᔅᑭᒃ᙮ 25ᐁᐗᑯ ᐅᒋ, ᐅᑭᒫᑐᒃ, ᐗᒉᑲᒣᓕᑕᒧᒃ: ᐌᓴ ᓂ ᑖᐺᑕᐗᐤ ᑭᒋᒪᓂᑐ, ᒬᒋ ᑭᒋ ᐃᑭᒃ ᑳ ᑮ ᐃᔑ ᐎᑕᒫᑲᐎᔮᓐ᙮ 26ᐁᓕᐌᒃ ᒫᑲ ᑭ ᑳ ᐋᒀᔮᔑᓇᐗᐤ ᐯᔭᒃ ᒥᓂᔅᑎᑯᒃ᙮
27ᒫᑲ ᐃᔅᐱ ᑳ ᐅᑎᒋᐸᓕᒃ ᓀᐅᔖᑉ ᐁ ᑎᐱᔅᑳᒃ, ᒣᒀᒡ ᐁ ᓇᓂᑕᐋᔑᔮᒃ ᓀᔥᑕ ᐁ ᒪᒫᐋᔑᔮᒃ ᐁᑦᕆᔭᐃᒃ, ᓈᓐᑕᐤ ᐁ ᐋᐱᑕᑎᐱᔅᑳᒃ ᐅᐹᐸᒫᔑᐗᒃ ᑮ ᐃᑌᓕᑕᒶᒃ ᐁ ᐯᔣᐸᑕᑭᒃ ᓈᓐᑕᐤ ᐊᔅᑭᓕᐤ; 28ᑮ ᑎᐹᐸᑕᒶᒃ ᒫᑲ, ᓀᔥᑕ ᑮ ᒥᔅᑲᒶᒃ ᓂᔑᑕᓇᐤ ᑕᑐᓂᔉ: ᐃᔅᐱ ᒫᑲ ᐊᐙᓯᑌᔑᔥ ᑳ ᐃᔅᐸᓕᒋᒃ, ᒥᓇ ᑮ ᑎᐹᐸᑕᒶᒃ, ᐁᑯ ᒣᔅᑲᑭᒃ ᓂᔮᓚᓗᔖᑉ ᑕᑐᓂᔉ᙮ 29ᐁᑯ ᒫᑲ ᐁ ᑯᔅᑕᑭᒃ ᑭᒋ ᐃᔅᐱᓕᔮᒃ ᒥᓂᔅᑎᒀᐱᔅᑯᔑᒃ, ᑮ ᐸᑲᔅᑕᐌᐊᒶᒃ ᓀᐤ ᒌᔅᑖᐹᓱᓇ ᐅᑖᑫᑕᑯᒃ ᐅᒋ, ᐁᑯ ᓀᑕᐌᓕᑕᑭᒃ ᑭᒋ ᑭᔑᑳᓕᒃ᙮ 30ᒣᒀᒡ ᒫᑲ ᐅᐹᐸᒫᔑᐗᒃ ᐁ ᐎ ᐅᔑᒧᒋᒃ ᓈᐱᒀᓂᒃ ᐅᒋ, ᐃᔅᐱ ᑳ ᑮ ᐸᑲᔅᑕᐌᐊᑭᒃ ᒥᔅᑎᑯᒋᒫᓂᓕᐤ ᑭᒋᑲᒥᒃ, ᓂᔥᑖᒧᑕᒃ ᒫᓇ ᐱᑯ ᐁ ᐎ ᐸᑲᔅᑕᐌᐊᑭᒃ ᒌᔅᑖᐹᓱᓇ ᓃᔥᑖᒧᑖᑯᒃ, 31ᐹᓪ ᑮ ᐃᑌᐤ ᓇᑐᐸᓕᐎᑭᒫᐗ ᓀᔥᑕ ᐅᓇᑐᐸᓕᐗ, ᑮᔥᐱᓐ ᐅᑯ ᐁᑳ ᑕᔑᑫᑡᐌ ᓈᐱᒀᓂᒃ, ᓇᒪᐎᓚ ᑭ ᑳ ᐱᒫᑎᓯᓇᐗᐤ᙮ 32ᐁᑯ ᐅᓇᑐᐸᓕᐗᒃ ᑳ ᑭᔥᑲᐊᑭᒃ ᔐᔥᑎᑴᔭᐱᔭ ᒥᔅᑎᑯᒋᒫᓂᒃ ᐅᒋ, ᓀᔥᑕ ᑮ ᐸᑭᑎᑖᐗᒃ᙮
33ᒣᒀᒡ ᒫᑲ ᑳ ᐯᑖᐸᓂᓕᒃ, ᐹᓪ ᑮ ᐸᑯᓭᓕᒣᐤ ᒥᓯᐌ ᐁ ᐃᑕᓯᓕᒋ ᑭᒋ ᒥᒋᓱᓕᒋ, ᐁ ᐃᑗᑦ, ᐊᓄᒡ ᐁ ᑭᔑᑳᒃ ᐁᐗᑯ ᓀᐅᔖᑉ ᐁ ᑭᔑᑳᒃ ᐁ ᑮ ᐯᐅᔦᒃ ᐁᑳ ᐁ ᒥᒋᓱᔦᒃ, ᐁᑳ ᑫᒀᓐ ᐁ ᑮ ᐅᑎᓇᒣᒃ᙮ 34ᐁᐗᑯ ᐌᒋ ᐸᑯᓭᓕᒥᑕᑾᒃ ᑭᒋ ᐅᑎᓇᒣᒃ ᐋᐱᔒᔥ ᒥᒋᒻ: ᐌᓴ ᐁᐗᑯ ᑫ ᐅᒋ ᒥᓗᐋᔮᔦᒃ: ᐌᓴ ᓇᒪᐎᓚ ᐙᐙᒡ ᐯᔭᒃ ᒥᔅᑎᑾᓂᐱᐌ ᑲᑕ ᐅᒋ ᐸᑭᑎᓂᓕᐤ ᐊᐌᓇ ᐁ ᐃᑕᔑᔦᒃ ᐅᔅᑎᒀᓂᒃ᙮ 35ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ ᑮ ᐅᑎᓀᐤ ᐊᓚᑯᓈᐗ, ᓀᔥᑕ ᑮ ᓈᓈᔅᑯᒣᐤ ᑭᒋᒪᓂᑐᐗ ᐁ ᑲᓇᐙᐸᒥᑯᑦ ᒥᓯᐌ ᐁ ᐃᑕᓯᓕᒋ: ᐃᔅᐱ ᒫᑲ ᑳ ᑮ ᐸᑴᓈᑦ, ᑮ ᒫᒋ ᒥᒋᓱ᙮ 36ᐁᑯ ᒥᓯᐌ ᐁ ᐃᑕᓯᒋᒃ ᑳ ᐗᒉᑲᒣᓕᑕᑭᒃ, ᐎᓚᐗᐤ ᓀᔥᑕ ᑮ ᐅᑎᓇᒶᒃ ᒥᒋᒥᓕᐤ᙮ 37ᒥᓯᐌ ᒫᑲ ᓈᐱᒀᓂᒃ ᓂ ᑮ ᐃᑕᔑᓈᓐ ᓂᔡᐤ ᒥᑖᑐᒥᑕᓇᐤ ᓂᔂᓱᒥᑕᓇᐤ ᓂᑯᑣᓱᔖᑉ ᑕᑐ ᐊᒑᑾᒃ᙮ 38ᐃᔅᐱ ᒫᑲ ᑳ ᑮ ᑌᐱ ᒥᒋᓱᔮᒃ, ᑮ ᓛᑭᑖᐗᒃ ᓈᐱᒀᓂᓕᐤ, ᓀᔥᑕ ᑭᒋᑲᒦᒃ ᑮ ᐸᑲᔅᑕᐌᐌᐱᓀᐗᒃ ᐸᑴᔑᑲᓂᒥᓇ᙮
ᐱᑾᐊᓐ ᓈᐱᑾᓐ
39ᐃᔅᐱ ᒫᑲ ᐁᑎ ᑭᔑᑳᒃ, ᓇᒪᐎᓚ ᑮ ᑭᔅᑫᓕᑕᒶᒃ ᐊᔅᑭᓕᐤ: ᒫᑲ ᑮ ᒥᔅᑲᐙᑖᐗᒃ ᓯᐱᔑᔑᓕᐤ ᒋᑭᐯᒃ ᐁ ᓓᑲᐗᓂᓕᒃ, ᐁᑯᑕ ᐁᑌᓕᑕᑭᒃ, ᑮᔥᐱᓐ ᑲᔥᑭᑕᑣᐌ, ᑭᒋ ᐱᑐᑫᐸᓕᑖᒋᒃ ᓈᐱᒀᓂᓕᐤ᙮ 40ᐃᔅᐱ ᒫᑲ ᑳ ᑮ ᒪᓂᔕᑭᒃ ᒋᔅᑖᐹᓱᓇ, ᑮ ᓇᑲᑕᐊᒶᒃ ᑭᒋᑲᒦᒃ, ᓀᔥᑕ ᑮ ᐸᑭᑎᓂᑎᓱᐗᒃ ᑭᒋ ᐃᔅᐸᓕᐃᑯᒋᒃ ᑭᒋᑲᒥᓕᐤ, ᑮ ᐋᐸᐊᒶᒃ ᒫᑲ ᑳ ᐅᒋ ᒫᑯᐱᒋᑳᑌᓕᒃ ᑕᑾᐊᒧᐎᓐ, ᓀᔥᑕ ᐁ ᐅᐯᑲᐊᑭᒃ ᒥᔑᓚᑳᔅᑕᒧᐎᓂᓕᐤ ᐁ ᐃᔑᓚᐌᓕᒃ, ᑮ ᓈᑕᑳᒣᐋᔑᐗᒃ᙮ 41ᐁ ᐃᔅᐸᓕᒋᒃ ᒫᑲ ᐃᑕ ᐁ ᐃᔑ ᒪᐗᑐᐸᓕᑭ ᓂᔓ ᑭᒋᑲᒥᔭ, ᑮ ᓯᔅᑳᐗᑳᔑᐗᒃ; ᐊᓂᒪ ᒫᑲ ᓃᔥᑖᒧᑕᒃ ᑮ ᒥᒋᒧᑎᓐ, ᐁᑳ ᐁ ᐱᒋᒋᐸᓕᒃ, ᒫᑲ ᐊᓂᒪ ᐅᑖᑫᑕᒃ ᑮ ᐱᑯᑎᓐ ᑳ ᐃᔅᐱᒋ ᒪᒪᑲᐊᒃ᙮
42ᐊᓇᑐᐸᓕᐗᒃ ᒫᑲ ᑮ ᐃᑗᐗᒃ ᑭᒋ ᓂᐹᔨᒥᒋ ᑭᐸᐙᑲᓇ, ᐁᑳ ᐊᐌᓂᑳᓇᒃ ᐁ ᐃᑕᓯᒋᒃ ᑭᒋ ᑲᐹᔑᒧᒋᒃ ᓀᔥᑕ ᑭᒋ ᐅᔑᒧᒋᒃ᙮ 43ᒫᑲ ᓇᑐᐸᓕᐎᑭᒪᐤ, ᐁ ᐎ ᐱᒫᒋᐋᑦ ᐹᓚ, ᑮ ᓵᑭᑕᒪᐌᐤ ᑳ ᐃᑌᓕᑕᒥᓕᒋ; ᐁᑯ ᐁᑕᔓᐌᑦ ᐊᓂᑭ ᑳ ᑮ ᑲᐹᔑᒧᒋᒃ ᓃᔥᑕᒻ ᑭᒋ ᐸᑲᔅᑕᐌᐅᒋᒃ ᑭᒋᑲᒥᒃ, ᓀᔥᑕ ᑭᒋ ᓈᑕᑳᒣᐋᑕᑳᒋᒃ: 44ᑯᑕᑭᔭᒃ ᒫᑲ, ᐋᑎᑦ ᓇᐸᑳᑎᑯᒃ, ᐋᑎᑦ ᓀᔥᑕ ᐁ ᐱᐙᐊᒃ ᓈᐱᒀᓐ᙮ ᐁᑯ ᒫᑲ ᑳ ᐃᔑ ᐃᑭᒃ ᒥᓯᐌ ᐁ ᐃᑕᓯᒋᒃ ᐁ ᑮ ᒥᓗ ᑲᐹᒋᒃ ᐊᔅᑮᒃ᙮
Currently Selected:
ᐊᐸᔅᑕᓚᒃ 27: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.