ᐊᐸᔅᑕᓚᒃ 26
26
ᐹᓪ ᓈᑕᒫᓱ ᐅᑎᔥᑲᐤ ᐋᒃᕆᐸ
1ᐁᑯ ᐊᒃᕆᐸ ᐁᑖᑦ ᐹᓚ, ᑭᑦ ᐃᓕᓈᑲᐎᓐ ᑭᒋ ᐋᔭᒥᔅᑕᒫᓱᔭᓐ᙮ ᐁᑯ ᐹᓪ ᔑᐅᐎᓂᔅᑫᓕᑦ, ᓀᔥᑕ ᑭ ᓇᔥᑴᐗᔑᑕᒫᓱ᙮
2ᓂ ᒥᓚᐙᑎᑴᓕᒥᑎᓱᓐ, ᑭᒋᐅᑭᒪᐤ ᐊᒃᕆᐸ, ᐁ ᓇᔥᑴᐗᔑᑕᒫᓱᔮᓐ ᐁ ᑖᔅᑕᒪᐱᔭᓐ ᐊᓄᒡ ᐁ ᑭᔑᑳᒃ ᐊᓂᐃ ᑫᒀᓇ ᐅᒋ ᑳ ᒫᒥᔑᒥᒋᒃ ᒎᐗᒃ: 3ᒫᑲ ᐅᓵᒻ ᐁ ᑭᔅᑫᓕᒥᑖᓐ ᐁ ᓇᐃᑭᔅᑫᓕᑕᒪᓐ ᒥᓯᐌ ᐅᑦ ᐋᔨᑎᐎᓂᐙᐗ ᓀᔥᑕ ᐅ ᑲᑴᒋᑫᒧᐎᓂᐙᐗ ᒎᐗᒃ: ᐁᐗᑯ ᐌᒋ ᐸᑯᓭᓕᒥᑖᓐ ᔑᐱᓚᐌᓯᐎᓂᒃ ᑭᒋ ᓇᑐᑖᐎᔭᓐ᙮
4ᓂᑦ ᐃᔑ ᐱᒫᑎᓯᐎᓐ ᐊᔅᐱᓐ ᑳ ᐯᒋ ᐅᔥᑭᓂᑭᔮᓐ ᒣᒀᒡ ᓃᔥᑕᒻ ᑳ ᐎᒉᐗᑭᒃ ᓂ ᐎᑕᔅᑭᒫᑲᓇᒃ ᒋᕉᓴᓚᒥᒃ, ᑭᔅᑫᓕᑕᒶᒃ ᒥᓯᐌ ᒎᐗᒃ; 5ᐊᓂᑭ ᐌᔅᑲᒡ ᑳ ᑮ ᐅᒋ ᑭᔅᑫᓕᒥᒋᒃ, ᑮᔥᐱᓐ ᑫ ᐎ ᑎᐹᒋᒧᒀᐌ, ᑖᐱᔅᑯᒡ ᐁ ᐃᑎᒋᒃ ᑳ ᒫᐗᒋ ᔮᒀᒥᓯᒋᒃ ᓂᑦ ᐋᔭᒥᐋᐎᓂᓈᒃ ᓂ ᑮ ᐹᕋᓯᐎ ᐃᑖᑎᓰᓐ᙮ 6ᐊᓄᒡ ᒫᑲ ᓂ ᓂᐹᐎᓐ ᓀᔥᑕ ᓂᑦ ᐅᒋ ᑎᐹᔅᑯᓂᑳᐎᓐ ᐁ ᐊᔅᐯᓕᒧᑐᑕᒫᓐ ᐊᓂᒪ ᐊᔓᑕᒫᑫᐎᓐ ᑭᒋᒪᓂᑐ ᑳ ᑮ ᐊᔓᑕᒪᐙᑦ ᑯᑖᐎᓇᐗ: 7ᐊᓂᒣᓕᐤ ᐊᔓᑕᒫᑫᐎᓂᓕᐤ ᐊᓂᑭ ᓂᔓᔖᑉ ᐁ ᑕᑐᑌᐎᓯᒋᒃ ᐁ ᐃᑕᔑᔭᒃ, ᑕᑭᓀ ᐁ ᐊᑑᔅᑫᔅᑕᐙᒋᒃ ᑭᒋᒪᓂᑐᐗ ᐁ ᑭᔑᑳᓕᒃ ᓀᔥᑕ ᐁ ᑎᐱᔅᑳᓕᒃ, ᐊᔅᐯᓕᒧᐗᒃ ᑭᒋ ᐅᑎᒋᐸᓕᓕᒃ᙮ ᐁᐗᑯ ᐊᔅᐯᓕᒧᐎᓐ ᐅᒋ, ᑭᒋᐅᑭᒪᐤ ᐋᒃᕆᐸ, ᓂᑦ ᐅᒋ ᒫᒥᔑᒥᑾᒃ ᒎᐗᒃ᙮ 8ᑫᒀᓐ ᑫ ᐅᒋ ᐃᑌᓕᑕᒣᒃ ᐁᑳ ᑭᒋ ᑖᐺᑕᒣᒃ, ᑭᒋᒪᓂᑐ ᑭᒋ ᐗᓂᔥᑳᓈᑦ ᐅᓂᐱᐗ?
9ᑖᐺ ᓂᓚ ᓂ ᑮ ᐃᑌᓕᑕᒫᓱᓐ ᒥᒉᑦ ᑫᒀᓐ ᑭᒋ ᑐᑕᒫᓐ ᐁ ᐋᓉᑕᒶᒃ ᐅᑦ ᐃᔑᓂᑳᓱᐎᓐ ᒋᓴᔅ ᓈᓴᕆᑎᒃ ᑳ ᐅᒌᑦ᙮ 10ᐁᐗᑯ ᓀᔥᑕ ᑳ ᑮ ᑐᑕᒫᓐ ᒋᕉᓴᓚᒥᒃ: ᒥᒉᑦ ᒫᑲ ᐅᐸᓓᑭᓴᒃ ᓂ ᑮ ᑭᐸᐙᐗᒃ ᑭᐸᐅᑐᐎᑲᒥᑯᒃ, ᑲᔥᑭᐅᐎᓂᓕᐤ ᐁ ᑮ ᒥᓕᒋᒃ ᑭᒋ ᓵᓵᑭᐎᓕᐌᐎᓕᓕᐗᒃ; ᐃᔅᐱ ᒫᑲ ᑳ ᓂᐸᐋᑲᓂᐎᒋᒃ ᓂ ᑮ ᓇᔅᑯᒧᓐ ᑭᒋ ᓂᐸᐋᑲᓂᐎᒋᒃ᙮ 11ᓀᔥᑕ ᒥᓯᐌ ᑕᑐ ᐋᔭᒥᐁᐎᑲᒥᑯᒃ ᒥᒉᑡᐤ ᓂ ᑮ ᑲᒀᑕᑭᐋᐗᒃ, ᓀᔥᑕ ᓂ ᑮ ᔖᑯᒋᒫᐗᒃ ᑭᒋ ᐸᐹᔅᑕᒧᒋᒃ; ᓀᔥᑕ ᓈᔅᐱᒡ ᐁ ᐋᑯᓚᐌᓯᔅᑕᐗᑭᒃ, ᓂ ᑮ ᑲᒀᑕᑭᐋᐗᒃ ᐙᐙᒡ ᐹᐱᑐᔥ ᐃᑖᐎᓂᒃ᙮
ᐹᓪ ᑎᐹᑐᑕᒻ ᐅᑴᔅᑳᑎᓯᐎᓐ
(ᐃᓯᒋᑫᐎᓇ 9:1–19; 22:6–16)
12ᒣᒀᒡ ᒫᑲ ᑳ ᐊᑎ ᐃᑐᑌᔮᓐ ᑎᒫᔅᑲᓯᒃ ᐁ ᑮ ᒥᓕᒋᒃ ᑲᔥᑭᐅᐎᓂᓕᐤ ᓀᔥᑕ ᐃᑕᔓᐌᐎᓂᓕᐤ ᑭᒋ ᓵᓵᑭᐎᓕᐌᐎᓕᓕᐗᒃ, 13ᐃᔅᐱ ᐁ ᐋᐱᑕᑭᔑᑳᒃ, ᐅ ᑭᒋᐅᑭᒪᐤ, ᓂ ᑮ ᐙᐸᑌᓐ ᒣᔅᑲᓈᒃ ᐙᔅᑌᐎᓐ ᑭᒋᑭᔑᑯᒃ ᐅᒋ, ᐊᐙᓯᑌ ᐁ ᐙᓯᑌᒃ ᐃᔥᐱᔥ ᐱᓯᒻ, ᐙᔅᑲ ᐁ ᐙᓭᔅᑳᑯᔮᓐ ᐊᓯᒋ ᐊᓂᑭ ᑳ ᑮ ᐎᒉᐎᒋᒃ᙮ 14ᐃᔅᐱ ᒫᑲ ᒥᓯᐌ ᐁ ᐃᑕᔑᔮᒃ ᑳ ᐸᑭᔑᓈᒃ ᒧᔅᑕᔅᑲᒥᒃ, ᓂ ᑮ ᐯᑌᓐ ᐯᑖᑯᓯᐎᓐ ᐁ ᐋᔭᒥᐃᑯᔮᓐ, ᓀᔥᑕ ᐁ ᐃᑗᒪᑲᒃ ᐦᐃᑉᕉ ᐃᔑᑭᔗᐎᓂᒃ, ᓵᓪ, ᓵᓪ, ᑖᓀᑭ ᐌᒋ ᑲᒀᑕᑭᐃᔭᓐ; ᐋᓕᒪᓐ ᐃᓴ ᑭᒋ ᑕᑭᔥᑳᑕᒪᓐ ᐊᓂᐃ ᑳ ᑭᓂᑳᑭ᙮ 15ᓂ ᑮ ᐃᑣᓐ ᒫᑲ, ᐊᐌᓇ ᑭᓚ ᑌᐯᓕᒋᑫᔭᓐ? ᑮ ᐃᑗᐤ ᒫᑲ ᓂᓚ ᐁᐗᑯ ᒋᓴᔅ, ᐊᓇ ᑳ ᑲᒀᑕᑭᐊᑦ᙮ 16ᒫᑲ ᐗᓂᔥᑳ, ᓀᔥᑕ ᓂᐸᐎ ᑭᓯᑎᒃ: ᐌᓴ ᐁᐗᑯ ᐌᒋ ᓄᑯᓰᔅᑖᑖᓐ, ᑭᒋ ᐋᔭᒥᐋᐎᐋᑑᔅᑫᓛᑲᓂᐃᑖᓐ ᓀᔥᑕ ᑭᒋ ᑎᐹᑐᑕᒪᓐ ᑖᐱᔅᑯᒡ ᐅᐅ ᑫᒀᓇ ᑳ ᑮ ᐙᐸᑕᒪᓐ, ᓀᔥᑕ ᐊᓂᐃ ᑫᒀᓇ ᑫ ᐅᒋ ᓄᑯᓰᔅᑖᑖᓐ; 17ᐁ ᐱᒫᒋᐃᑖᓐ ᐃᓕᓕᐗᒃ ᐅᒋ, ᓀᔥᑕ ᒉᓐᑖᐃᓚᒃ ᐅᒋ, ᐁᐗᒀᓂᑭ ᐊᓄᒡ ᑳ ᐃᑎᔕᐅᑖᓐ ᑭᒋ ᓈᑕᒋᒃ, 18ᑭᒋ ᐹᔅᑭᑌᓇᒶᑦ ᐅᔅᑭᔑᑯᐙᐗ, ᓀᔥᑕ ᑎᐱᔅᑭᓯᐎᓂᒃ ᑭᑭ ᐅᒋ ᑴᔅᑭᓇᒋᒃ ᐙᓭᔮᓯᐎᓂᒃ ᐃᔑ, ᓀᔥᑕ ᓭᑖᓐ ᐅ ᑲᔥᑭᐅᐎᓂᒃ ᐃᔑ ᑭᒋ ᑖᐺᔦᓕᒫᒋᒃ ᑭᒋᒪᓂᑕᐗ, ᑭᒋ ᒥᓛᑲᓂᐎᒋᒃ ᑭᒋ ᐌᐯᓕᑕᒫᒋᒃ ᐅ ᒪᒋᑣᐎᓂᐙᐗ, ᓀᔥᑕ ᑎᐯᓕᑕᒧᐎᓂᓕᐤ ᒣᑴᔭᔥ ᐊᓂᐃ ᑳ ᐸᓓᑭᐋᑲᓂᐎᓕᒋ ᑖᐺᔦᓕᑕᒧᐎᓐ ᐅᒋ ᑳ ᐯᒋᔅᑳᑯᔮᓐ᙮
ᐹᓪ ᑎᐹᑐᑕᒻ ᐅᑕᑐᔅᑫᐎᓐ
19ᐁᐗᑯ ᐅᒋ, ᐅ ᑭᒋᐅᑭᒪᐤ ᐋᒃᕆᐸ, ᓇᒪᐎᓚ ᓂ ᑮ ᐋᓉᑌᓐ ᐊᓂᒪ ᑭᒋᑭᔑᑳᐎ ᐃᔑᓇᒧᐎᓐ: 20ᒫᑲ ᓃᔥᑕᒻ ᓂ ᑮ ᐙᐸᑎᓛᐗᒃ ᐊᓂᑭ ᑎᒫᔅᑲᓯᒃ ᑳ ᐃᑖᒋᒃ ᓀᔥᑕ ᒋᕉᓴᓚᒥᒃ, ᓀᔥᑕ ᒥᓯᐌ ᐙᔅᑲ ᒎᑎᐊᐃᒃ, ᐁᑯ ᓀᔥᑕ ᒉᓐᑖᐃᓚᒃ, ᑭᒋ ᑴᔅᑳᑎᓯᒋᒃ ᓀᔥᑕ ᑭᒋ ᑴᔅᑭᔅᑕᐙᒋᒃ ᑭᒋᒪᓂᑐᐗ, ᓀᔥᑕ ᑭᒋ ᑐᑕᑭᒃ ᐁ ᐃᔑ ᐊᑑᔅᑫᒪᑲᒃ ᑴᔅᑳᑎᓯᐎᓐ᙮ 21ᐅᐅ ᒫᑲ ᐅᒋ ᒎᐗᒃ ᓂ ᑮ ᐅᑎᑎᓂᑾᒃ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᓂ ᑮ ᓇᑕᐎ ᓂᐹᔨᑾᒃ᙮ 22ᐁ ᑮ ᐎᒋᐃᑦ ᒫᑲ ᑭᒋᒪᓂᑐ, ᐱᓕᔥ ᐊᓄᒡ ᐁ ᑭᔑᑳᒃ ᓂᑦ ᐃᑎᓐ, ᐁ ᑎᐹᒋᒧᔅᑕᐗᑭᒃ ᑳ ᐋᐱᔅᑌᓕᑖᑯᓯᒋᒃ ᓀᔥᑕ ᑳ ᑭᔅᑌᓕᑖᑯᓯᒋᒃ, ᐁᑳ ᐱᑐᔥ ᑫᒀᓐ ᐁ ᐃᑗᔮᓐ ᐱᑯ ᐊᓂᐃ ᑳ ᑮ ᐃᑗᒋᒃ ᐅᑭᔅᑭᐙᐃᑫᐗᒃ ᓀᔥᑕ ᒧᓯᔅ ᑭᒋ ᐅᑎᒋᐸᓕᑭ: 23᙭ ᑭᒋ ᐙᐎᓴᑫᓕᑕᒃ, ᓀᔥᑕ ᐎᓚ ᓃᔥᑕᒻ ᐅᓂᐱᐗ ᑭᒋ ᐅᒋ ᐗᓂᔥᑳᑦ, ᓀᔥᑕ ᑭᒋ ᐙᐸᑎᓛᑦ ᐙᓭᔮᓯᐎᓂᓕᐤ ᐃᓕᓕᐗ, ᐊᓯᒋ ᓀᔥᑕ ᒉᓐᑖᐃᓚ᙮
24ᒣᒀᒡ ᒫᑲ ᐅᒪ ᑳ ᐃᔑ ᐋᔭᒥᔅᑕᒫᓱᑦ, ᐯᔅᑕᔅ ᑮ ᐃᑗᐤ ᐁ ᑭᔗᐌᑦ, ᐹᓪ, ᑭ ᐗᓂᒥᑲᐎᓐ; ᒥᔅᑕᐃ ᑭᔅᑫᓕᑕᒧᐎᓐ ᑭ ᑭᔥᑴᐃᑯᓐ᙮
25ᒫᑲ ᑮ ᐃᑗᐤ, ᓇᒪᐎᓚ ᓂ ᑮᔥᒀᓐ, ᒥᔭᐗᒋ ᑭᔅᑎᓯᔭᓐ ᐯᔅᑕᔅ; ᒫᑲ ᓂᑦ ᐋᔭᒥᓐ ᐋᔭᒥᐎᓇ ᑖᐺᐎᓂᒃ ᓀᔥᑕ ᑲᑫᑕᐌᓕᑕᒧᐎᓂᒃ ᑳ ᐅᒋᐸᓕᑭ᙮ 26ᐌᓴ ᑭᒋᐅᑭᒪᐤ ᑭᔅᑫᓕᑕᒻ ᐅᐅ ᑫᒀᓇ, ᐎᓚ ᐁ ᑖᔅᑕᒪᐱᑦ ᒧᔑᔐ ᑳ ᐋᔭᒥᔮᓐ: ᐌᓴ ᓂ ᑫᒋᓇᐅᓐ ᐁᑳ ᐙᐙᒡ ᐯᔭᒃ ᐅᐅ ᑫᒀᓇ ᐁ ᑳᑕᐙᑲᓂᐎᑦ; ᐌᓴ ᐅᒪ ᓇᒪᐎᓚ ᐁ ᐃᔑ ᑭᑫᔮᒃ ᑮ ᐃᑐᒋᑳᑌᐤ᙮ 27ᑭᒋᐅᑭᒪᐤ ᐋᒃᕆᐸ, ᑭ ᑖᐺᑕᐙᐗᒃ ᓈ ᐅᑭᔅᑭᐙᐃᑫᐗᒃ? ᓂ ᑭᔅᑫᓕᑌᓐ ᐁ ᑖᐺᑕᒪᓐ᙮
28ᐁᑯ ᐋᒃᕆᐸ ᐁᑖᑦ ᐹᓚ, ᑫᑳᑦ ᑭ ᔖᑯᒋᒥᓐ ᑭᒋ ᒃᕆᔅᑎᔮᓂᐎᔮᓐ᙮
29ᐹᓪ ᒫᑲ ᑮ ᐃᑗᐤ, ᓂ ᐸᑯᓭᓕᒪᐤ ᑭᒋᒪᓂᑐ, ᓇᒪᐎᓚ ᑭᓚ ᐱᑯ, ᒫᑲ ᐊᓯᒋ ᒥᓯᐌ ᐊᓂᑭ ᑳ ᐯᑖᐎᒋᒃ ᐊᓄᒡ ᐁ ᑭᔑᑳᒃ ᒫᒪᐤ ᑫᑳᑦ ᑭᒋ ᐃᑎᒋᒃ, ᓀᔥᑕ ᒥᑐᓂ ᑖᐱᔅᑯᒡ ᐁ ᐃᑎᔮᓐ, ᐱᑯ ᐅᐅ ᒫᒫᒋᑯᐱᓱᐎᓇ᙮
30ᐃᔅᐱ ᒫᑲ ᐅᒣᓕᐤ ᑳ ᑮ ᐃᑗᑦ, ᑭᒋᐅᑭᒪᐤ ᑭ ᐸᓯᑯ, ᓀᔥᑕ ᐅᑎᐯᓕᒋᑫᐤ ᓀᔥᑕ ᐸᕐᓇᐃᓯ, ᓀᔥᑕ ᐊᓂᐃ ᑳ ᑮ ᐎᑕᐱᒥᑯᒋᒃ: 31ᐃᔅᐱ ᒫᑲ ᐅᐱᒣ ᑳ ᑮ ᐃᑐᑌᒋᒃ ᑮ ᐎᒋᐋᔭᒥᒥᑐᐗᒃ, ᐁ ᐃᑗᒋᒃ, ᐊᐗ ᐃᓕᓕᐤ ᓇᒪᐎᓚ ᑫᒀᓕᐤ ᑐᑕᒻ ᑫ ᐅᒋ ᓂᐱᑦ ᓀᔥᑕᐱᑯ ᑫ ᐅᒋ ᒫᒫᒋᑯᐱᓱᑦ᙮ 32ᐁᑯ ᐋᒃᕆᐸ ᐁᑖᑦ ᐯᔅᑕᓴ, ᐊᐗ ᐃᓕᓕᐤ ᑲᑕ ᑮ ᐋᐸᐙᑲᓂᐎᐸᓐ ᑮᔥᐱᓐ ᐁᑳ ᑳ ᑮ ᐃᑗᑴ ᑭᒋ ᑎᐹᔅᑯᓂᑯᑦ ᓯᓴᕋ᙮
Currently Selected:
ᐊᐸᔅᑕᓚᒃ 26: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.