ᓂᔥᑕᒻ ᐱᑕᕐ 1
1
1ᐱᑕᕐ, ᐅᑦ ᐊᐸᔅᑕᓕᒪ ᒋᓴᔅ ᙭, ᐁ ᒪᓯᓇᐊᒪᐙᑦ ᐊᓂᐃ ᒫᓐᑌᐗ ᓇᓈᓂᔅ ᑳ ᐃᑖᓕᒋ ᐸᓐᑕᓯᒃ, ᑲᓓᔕᐃᒃ, ᑳᐸᑐᔕᐃᒃ, ᐁᔕᐃᒃ, ᓀᔥᑕ ᐹᐃᑎᓐᔭᐃᒃ, 2ᑳ ᑮ ᐙᐌᓛᐸᒥᒋᒃ ᑳ ᐃᑕᔅᑌᓕᒃ ᑭᒋᒪᓂᑐ ᐌᐅᑖᐎᒪᐎᑦ ᐅ ᓂᑳᓂ ᑭᔅᑫᓕᑕᒧᐎᓐ, ᐅ ᐸᓓᑭᐃᐌᐎᓐ ᐊᒑᒃ ᐅᒋ, ᓇᓇᐃᑕᒧᐎᓂᒃ ᐃᔑ ᓀᔥᑕ ᐁ ᐊᑭᑲᐎᐌᐱᓂᑳᑌᓕᒃ ᐅᒥᑯ ᒋᓴᔅ ᙭: ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ ᑭ ᑳ ᐎ ᓚᑭᑕᒫᑲᐎᓇᐗᐤ᙮
ᐸᑯᓭᓕᒧᐎᓐ ᑳ ᑫᒋᓇᐌᓕᑖᑾᒃ
3ᑲᑕ ᐎ ᒫᒥᒋᒥᑯᓯᐤ ᑭᒋᒪᓂᑐ ᐅᑖᐎᔭ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᐊᓇ ᑳ ᒥᒉᓂᓕᒃ ᐅ ᔕᐌᓕᒋᑫᐎᓐ ᐅᒋ ᒥᓇ ᑳ ᑮ ᓂᑖᐎᑭᐃᑕᒃ ᑭᒋ ᐱᒫᑎᓯᐎ ᐊᔅᐯᓕᒧᐎᓂᔭᒃ, ᐅ ᐗᓂᔥᑲᐎᓐ ᒋᓴᔅ ᙭ ᐅᓂᐱᐗ ᐅᒋ, 4ᑭᒋ ᐅ ᑎᐯᓕᒋᑲᓂᔭᒃ ᐁᑳ ᑫ ᓂᔑᐗᓈᑕᒃ, ᐁᑳ ᑳ ᐎᓕᐹᒃ, ᐁᑳ ᓀᔥᑕ ᑳ ᐊᑎ ᐌᐱᐸᓕᒃ, ᐁ ᐊᔅᑖᒫᑲᐎᔦᒃ ᑭᒋᑭᔑᑯᒃ, 5ᑭᒋᒪᓂᑐ ᐅ ᑲᔥᑭᐅᐎᓐ ᑳ ᐅᒋ ᑲᓇᐌᓕᒥᑲᐎᔦᒃ ᐁ ᑖᐺᔦᓕᑕᒣᒃ ᐱᒫᒋᐃᐌᐎᓂᒃ ᐃᔑ ᑳ ᐋᔦᔅᑯᐗᒃ ᒫᒋᒡ ᐁ ᑭᔑᑳᑭ ᑭᒋ ᓄᑯᑖᓂᐗᒃ᙮
6ᐃᑕ ᑳ ᐃᔑ ᓈᔅᐱᒡ ᒥᓚᐙᑕᒣᒃ, ᐊᑕ ᐊᓄᒡ ᐱᑕᒪ, ᑮᔥᐱᓐ ᐃᑌᓕᑖᑾᒃ ᑭᒋ ᐃᑭᒃ, ᑭ ᑯᓯᑾᒪᒋᐅᓇᐗᐤ ᐁ ᒫᒥᒉᑎᑭ ᑭ ᑲᑴᒋᐃᑯᓯᐎᓂᐙᐗ; 7ᐁ ᑲᑴᒋᑖᓂᐗᒃ ᑭ ᑖᐺᔦᓕᑕᒧᐎᓂᐗᐤ, ᐊᐙᓯᑌ ᐁ ᑭᔅᑕᑭᑖᑾᒃ ᐃᔥᐱᔥ ᐅᓵᐎᔔᓕᐋᓈᐱᔉ ᑳ ᓂᔑᐗᓈᑕᒃ, ᐋᑕ ᐃᔥᑯᑌᒃ ᐁ ᑮ ᑯᒋᑖᓂᐗᒃ, ᑭᒋ ᒥᔅᑭᑳᑌᒃ ᑭᒋ ᐅᒋ ᒫᒪᑕᑯᒥᑲᐎᔦᒃ, ᓀᔥᑕ ᑭᔅᑌᓕᒥᑲᐎᔦᒃ, ᓀᔥᑕ ᑭᔅᑌᓕᑖᑯᐃᑲᐎᔦᒃ ᐯᒋ ᓄᑯᓯᑌ ᒋᓴᔅ ᙭; 8ᐊᓇ ᐋᑕ ᐁᑳ ᐁ ᑮ ᐙᐸᒣᒃ, ᑭ ᓵᑭᐊᐗᐤ; ᐊᓇ, ᐋᑕ ᐁᑳ ᐊᓄᒡ ᐁ ᐙᐸᒣᒃ, ᐁᓕᐌᒃ ᒫᑲ ᐁ ᑖᐺᑕᒣᒃ, ᑭ ᒥᓚᐙᑌᓇᐗᐤ ᐊᓂᒪ ᒥᓚᐙᑕᒧᐎᓂᒃ ᐁᑳ ᑫ ᑮ ᐎᒋᑳᑌᒃ ᓀᔥᑕ ᐁ ᓵᑲᔅᑭᓀᒃ ᑭᔅᑌᓕᑖᑯᓯᐎᓐ: 9ᐁ ᒥᓕᑲᐎᔦᒃ ᐁ ᐃᔑ ᑲᔥᑭᑖᒪᑲᒃ ᑭ ᑖᐺᔦᓕᑕᒧᐎᓂᐗᐤ, ᑭᒋ ᐱᒫᒋᐋᑲᓂᐎᒋᒃ ᑭᑦ ᐊᒑᑯᐙᐗᒃ ᐅᑎ᙮
10ᐊᓂᒪ ᐱᒫᒋᐃᐌᐊᓐ ᒫᑲ ᐅᑭᔅᑭᐙᐃᑫᐗᒃ ᑮ ᐅᒋ ᑲᑴᒋᑫᒧᐗᒃ ᓀᔥᑕ ᐌᐌᓕᑦ ᑮ ᓈᓇᑕᐌᓕᑕᒶᒃ, ᐊᓂᑭ ᑳ ᑮ ᓂᑳᓂᐎᑕᑭᒃ ᐊᓂᒪ ᔕᐌᓕᒋᑫᐎᓐ ᑫ ᐅᑎᑎᑯᔦᑭᐸᓐ: 11ᐁ ᓈᓇᑕᐌᓕᑕᑭᒃ ᑫᒀᓐ, ᓀᔥᑕᐱᑯ ᑫᑯ ᐁ ᐃᔑᑭᔑᑳᑭ, ᐅᑦ ᐊᒑᑾ ᙭ ᑳ ᑮ ᐱᒋᔅᑳᑯᓕᒋ ᑫ ᐋᒋᒧᓕᒋ, ᐃᔅᐱ ᓂᑳᓐ ᑳ ᑮ ᐋᓕᒧᑕᒥᓕᑭ ᑫ ᐃᔑ ᐙᐎᓴᑫᓕᑕᒥᓕᔅᐸᓐ ᙭ᑕ, ᓀᔥᑕ ᐊᓂᐁᓕᐤ ᑭᔅᑌᓕᑖᑯᓯᐎᓂᓕᐤ ᑫ ᐹᐸᓕᓕᑭᐸᓐ᙮ 12ᐊᓂᑭ ᑳ ᑮ ᐙᐸᑎᓛᑲᓂᐎᒋᒃ, ᓇᒪᐎᓚ ᐎᓚᐗᐤ ᑫᒋᐙᒃ, ᒫᑲ ᑭᓚᓈᓇᐤ ᐊᓂᐃ ᐁ ᑮ ᐊᑐᔅᑫᔅᑕᒫᑕᑾᒃ, ᐊᓂᐃ ᐊᓄᒡ ᑳ ᐎᑕᒫᑖᑾᒃ ᐊᓂᑭ ᑳ ᑮ ᑲᑫᔅᑭᒥᑖᑾᒃ ᒥᓗᐋᒋᒧᐎᓐ ᐯᓓᑭᓯᑦ ᐊᒑᒃ ᐅᒋ ᑭᒋᑭᔑᑯᒃ ᑳ ᑮ ᐯᒋ ᓛᔑᑎᔕᐙᑲᓂᐎᑦ: ᐅᐅ ᑫᒀᓇ ᐁᓐᒐᓚᒃ ᑮ ᐸᑯᓭᓕᒧᐗᒃ ᑭᒋ ᑲᓇᐗᐸᑕᑭᒃ᙮
ᑭ ᑌᑄᑎᑲᐎᓈᓇᐤ ᒋ ᐸᓓᑭ ᐱᒫᑎᓯᔭᒃ
13ᐁᐗᑯ ᐅᒋ, ᐸᑾᑌᐊᒧᒃ ᑭ ᒥᑐᓀᓕᒋᑲᓂᐙᐗ, ᐯᑳᒡ ᐃᑖᑎᓰᒃ, ᓀᔥᑕ ᐃᔅᒀᔮᒡ ᐃᔅᑯ ᐊᔅᐯᓕᒧᑐᑕᒧᒃ ᐊᓂᒪ ᔕᐌᓕᒋᑫᐎᓐ ᑫ ᐯᒋ ᒥᓕᑲᐎᔦᒃ ᑭᔅᑫᓕᑖᑯᐋᑲᓂᐎᑌ ᒋᓴᔅ ᙭; 14ᑖᐱᔅᑯᒡ ᑳ ᓇᓇᐃᑕᑭᒃ ᐊᐙᔑᔕᒃ, ᐁᑳ ᐁ ᐃᔑᐃᑎᓱᔦᒃ ᑳ ᑮ ᐃᔑ ᒪᒋ ᓇᑕᐌᓕᑕᒣᒃ ᐌᔅᑳᒡ ᐃᔅᐱ ᐁᑳ ᑳ ᑮ ᑭᔅᑫᓕᑕᒣᒃ; 15ᒫᑲ ᑖᐱᔅᑯᒡ ᐁ ᐃᔑ ᐸᓓᑭᓯᑦ ᐊᓇ ᑳ ᑮ ᓇᑐᒥᑖᒃ, ᐁᑯ ᓀᔥᑕ ᑭᓚᐗᐤ ᐸᓓᑭᓯᒃ ᒥᓯᐌ ᐁ ᐃᔑ ᐱᒫᑎᓯᓈᓂᐗᒃ; 16ᐌᓴ ᒪᓯᓇᐃᑳᑌᐤ; ᐸᓓᑭᓯᒃ ᑭᓚᐗᐤ; ᐌᓴ ᓂᓚ ᓂ ᐸᓓᑭᓯᓐ᙮
17ᑮᔥᐱᓐ ᒫᑲ ᓈᓇᑕᒣᑴ ᐌᐅᑕᐎᒪᐎᑦ, ᐊᓇ ᐁᑳ ᐹᐱᑐᔥ ᑳ ᐃᑌᓕᒫᑦ ᐃᓕᓕᐗ ᑳ ᑎᐹᔅᑯᓇᒸᑦ ᐁ ᐃᔑᓈᑾᓂᓕᒃ ᒥᓯᐌ ᑕᑐ ᐃᓕᓕᐗ ᐅᑦ ᐊᑑᔅᑫᐎᓂᓕᐤ, ᒣᒀᒡ ᐅᑕ ᐁ ᑕᔑᑫᔦᒃ ᐱᒫᑎᓰᒃ ᓇᓂᒋᐎᓂᒃ: 18ᐌᓴ ᑭ ᑭᔅᑫᓕᑌᓇᐗᐤ ᐁᑳ ᐁ ᑮ ᐅᒋ ᐱᒫᒋᐃᑳᐎᔦᒃ ᑳ ᓂᔑᐗᓈᑕᑭ ᑫᒀᓇ, ᑖᐱᔅᑯᒡ ᔖᓕᐋᓈᐱᔉ ᓀᔥᑕᐱᑯ ᐅᓵᐎᔔᓂᐋᓈᐱᔉ, ᑭ ᑲᑫᐹᑎᓯᐎ ᐃᔑᐱᒫᑎᓯᐎᓂᐙᒃ ᐅᒋ ᑳ ᐋᔭᔦᒃ ᐅ ᑭᔅᑭᓄᐊᒫᑫᐎᓂᐙᒃ ᑯᑖᐎᐗᐗᒃ ᐅᒋ; 19ᒫᑲ ᑳ ᑭᔅᑕᑭᑖᑾᓂᓕᒃ ᐅᒥᑯ ᙭ ᐅᒋ, ᑖᐱᔅᑯᒡ ᒫᓂᔥᒑᓂᔑᔥ ᐁᑳ ᑳ ᒫᔅᑭᓯᑦ ᐁᑳ ᓀᔥᑕ ᑳ ᐎᓕᐱᓯᑦ: 20ᐊᓇ ᑖᐺ ᓂᑳᓐ ᑳ ᑮ ᐹᑲᓂᐋᑲᓂᐎᑦ ᐸᒧᔑ ᑮ ᒫᒋ ᐃᑕᑾᒃ ᐊᔅᑭ, ᒫᑲ ᒣᒀᒡ ᐅᐅ ᒫᒋᒡ ᐁ ᑭᔑᑳᑭ ᑭᓚᐗᐤ ᑳ ᐅᒋ ᓄᑯᐋᑲᓂᐎᑦ; 21ᑭᓚᐗᐤ ᐎᓚ ᑳ ᐅᒋ ᑖᐺᔦᓕᒣᒃ ᑭᒋᒪᓂᑐ, ᑳ ᑮ ᐗᓂᔥᑳᓈᑦ ᐅᓂᐱᐗ ᐅᒋ, ᓀᔥᑕ ᑳ ᑮ ᒥᓛᑦ ᑭᔅᑌᓕᑖᑯᓯᐎᓂᓕᐤ: ᑭᒋ ᑮ ᑖᐺᔦᓕᒣᒃ ᓀᔥᑕ ᐊᔅᐯᓕᒧᑐᑕᐌᒃ ᑭᒋᒪᓂᑐ᙮
22ᐁ ᓄᑾᒃ ᐁ ᑮ ᐹᔦᑭᐁᑾᒃ ᑭᑦ ᐊᒑᑯᐙᐗ, ᐊᒑᒃ ᐅᒋ ᐁ ᑮ ᓇᓇᐃᑕᒣᒃ ᑖᐺᐎᓐ, ᑭᒋ ᑖᐺ ᓵᑭᐁᑾᒃ ᐎᒋᔖᓂᒪᐗᒃ, ᐸᓓᑭ ᒥᑌᐃᒃ ᐌᐌᓕᑦ ᓵᑭᐃᑐᒃ: 23ᒥᓇ ᐁ ᑮ ᓂᑕᐎᑭᔦᒃ ᓇᒪᐎᓚ ᑳ ᓂᔑᐗᓈᑕᑭ ᓯᒥᓇ ᐅᒋ, ᒫᑲ ᐁᑳ ᑫ ᓂᔑᐗᓈᑕᑭ, ᑭᒋᒪᓂᑐ ᐅᑦ ᐋᔭᒥᐎᓐ ᐅᒋ ᑳ ᐱᒫᑕᓂᓕᒃ ᓀᔥᑕ ᑳᑭᑫ ᑳ ᐃᑕᑾᓂᓕᒃ᙮ 24ᐌᓴ ᒥᓯᐌ ᑳ ᐎᔮᓯᒋᒃ ᓇᔅᐱᑕᒶᒃ ᒪᔅᑯᔑᐊ, ᓀᔥᑕ ᒥᓯᐌ ᐅ ᑭᔅᑌᓕᑖᑯᓯᐎᓐ ᐃᓕᓕᐤ ᐃᔑᓈᑾᓂᓕᐤ ᑖᐱᔅᑯᒡ ᒪᔅᑯᔑᐊ ᐁ ᐙᐱᑯᓂᐗᑭ᙮ ᒪᔅᑯᔑᐊ ᓂᐱᒪᑲᓋ, ᓀᔥᑕ ᐁ ᐃᔑ ᐙᐱᑯᓂᐗᑭ ᐸᑭᑎᓋ; 25ᒫᑲ ᑭᒋᒪᓂᑐ ᐅᑦ ᐋᔭᒥᐎᓐ ᑳᑭᑫ ᐱᒫᑕᓂᓕᐤ᙮ ᐁᐗᑯ ᒫᑲ ᐅᒪ ᐋᔭᒥᐎᓐ ᒥᓗᐋᒋᒧᐎᓂᒃ ᑳ ᐅᒋ ᑲᑫᔅᑭᒥᑲᐎᔦᒃ᙮
Currently Selected:
ᓂᔥᑕᒻ ᐱᑕᕐ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.