ᓂᔥᑕᒻ ᐱᑕᕐ 2
2
ᐱᒫᑎᓯᐎ ᐊᓯᓂ ᓀᔥᑕ ᐊᓂᒪ ᐸᓓᑭ ᐃᑕᔅᑳᓀᓯᐎᓐ
1ᐁᐗᑯ ᐅᒋ, ᐁ ᐃᑲᑌᓇᒣᒃ ᒥᓯᐌ ᑭᒧᒋᐸᒀᑎᑐᐎᓐ, ᓀᔥᑕ ᒥᓯᐌ ᑲᑳᔦᓕᓯᐎᓐ, ᓀᔥᑕ ᐋᔭᒥᐁᑳᓱᐎᓇ, ᓀᔥᑕ ᐅᑌᓕᒥᑐᐎᓇ, ᓀᔥᑕ ᒥᓯᐌ ᒪᒋ ᐋᔭᒥᐎᓇ, 2ᑖᐱᔅᑯᒡ ᑳ ᐅᔥᑭ ᓂᑕᐎᑭᒋᒃ ᐊᐱᔅᑕᐙᔑᔕᒃ, ᓇᑕᐌᓕᑕᒧᒃ ᑖᐺ ᒍᒍᒋᒫᐳ ᐋᔭᒥᐎᓂᒃ ᑳ ᐅᒋᐸᓕᒃ, ᑭᒋ ᐅᒋ ᐅᐱᑭᔦᒃ; 3ᑮᔥᐱᓐ ᑮ ᑯᒋᔅᑕᒣᒃ ᐁ ᑭᔐᐙᑎᓰᑦ ᐅᑎᐯᓕᒋᑫᐤ᙮
4ᐊᓇ ᐁ ᐯᒋ ᓈᑌᒃ, ᑖᐱᔅᑯᒡ ᐯᒫᑎᓰᑦ ᐊᓯᓂ, ᑖᐺ ᐁ ᐋᑕᐌᓕᒥᑯᑦ ᐃᓕᓕᐗ, ᒫᑲ ᐁ ᐙᐌᓛᐸᒥᑯᑦ ᑭᒋᒪᓂᑐ, ᐁ ᑭᔅᑕᑭᓯᑦ ᓀᔥᑕ, 5ᑭᓚᐗᐤ ᓀᔥᑕ ᑖᐱᔅᑯᒡ ᐱᒫᑎᓯᐎ ᐊᓯᓂᔭᒃ ᑭᑦ ᐅᔑᐃᑲᐎᓇᐗᐤ ᐊᒑᑯᐎ ᐙᔅᑳᔨᑲᓐ, ᐸᓓᑭ ᓵᓵᑭᐎᓕᐌᐎᓕᓕᐎᐎᓐ, ᑭᒋ ᐸᑭᑎᓂᑫᔦᒃ ᐊᒑᑯᐎ ᓵᓵᑭᐎᓕᐌᐎᓇ, ᑳ ᓇᐃᓚᐌᐃᑯᑦ ᑭᒋᒪᓂᑐ ᐎᓚ ᐅᒋ ᒋᓴᔅ ᙭᙮ 6ᐁᐗᑯ ᐅᒋ ᓀᔥᑕ, ᐃᑕᓯᓇᐃᑳᑌᐤ ᒪᓯᓇᐃᑫᐎᓂᒃ, ᒫᑎᑲ, ᓂᑦ ᐊᓚᐤ ᓵᐃᐊᓂᒃ ᑳ ᑭᔅᑕᑭᓯᑦ ᑭᑫᔮᑭ ᐊᓯᓂ, ᑳ ᐙᐌᓛᐸᒫᑲᓂᐎᑦ, ᑳ ᑭᔅᑕᑭᓯᑦ; ᐊᓇ ᒫᑲ ᑳ ᑖᐺᔦᓕᒫᑦ ᓇᒪᐎᓚ ᑲᑕ ᐋᐙᓀᓕᑕᒥᐊᐤ᙮ 7ᑭᓚᐗᐤ ᒫᑲ ᑳ ᑖᐺᑕᒣᒃ ᑭ ᑭᔅᑕᑭᒫᐗᐤ, ᒫᑲ ᐊᓂᑭ ᑳ ᔑᐱᑕᑭᒃ ᐅᒋ ᐊᓂᐃ ᐊᓯᓂᔭ ᑳ ᑮ ᐋᑕᐌᓕᒫᒋᒃ ᐅᐙᔅᑳᔨᑲᓂᑫᐗ, ᐁᐗᒀᓇ ᑳ ᓂᑳᓀᓕᑖᑯᐋᑲᓂᐎᑦ ᐁ ᑭᑫᔮᒃ; 8ᓀᔥᑕ ᐯᓱᔑᓄᐎ ᐊᓯᓂ, ᓀᔥᑕ ᓈᔦᑕᐌᓕᑕᒧᐎ ᑭᔅᑖᐱᔉ ᐊᓂᑭ ᐅᒋ ᑳ ᐱᓱᔅᑲᐊᑭᒃ ᐋᔭᒥᐎᓂᓕᐤ, ᐁ ᔑᐱᑕᑭᒃ; ᐃᑕ ᓀᔥᑕ ᑳ ᑮ ᐃᔑ ᐃᑕᑭᒫᑲᓂᐎᒋᒃ᙮
9ᒫᑲ ᑭᓚᐗᐤ ᑭᑦ ᐋᐎᓇᐎᐤ ᑳ ᐙᐌᓛᐸᒫᑲᓂᐎᒋᒃ ᑳ ᐋᓂᔅᑫ ᐱᒫᑎᓯᒋᒃ, ᑳ ᑭᔅᑌᓕᑖᑯᓯᒋᒃ ᓵᓵᑭᐎᓕᐌᐎᓕᓕᐗᒃ, ᑳ ᐸᓓᑭᓯᒋᒃ ᐁ ᐃᑕᔅᑳᓀᓯᒋᒃ ᐃᓕᓕᐗᒃ, ᑳ ᑭᔅᑕᑭᑖᑯᓯᒋᒃ ᐃᓕᓕᐗᒃ; ᑭᒋ ᐙᐸᑎᓕᐌᔦᒃ ᐅ ᒥᓨᑎᓰᐃᓇ ᐊᓇ ᐗᓂᑎᐱᔅᑭᓯᐎᓂᒃ ᑳ ᑮ ᐅᒋ ᓇᑐᒥᑖᒃ ᐅ ᒫᒪᔅᑳᒋ ᐙᓭᔮᓱᐎᓂᒃ ᐃᔑ; 10ᑭᓚᐗᐤ ᑳᔮᔥ ᐁᑳ ᑳ ᑮ ᐃᑕᔅᑳᓀᓯᔦᒃ ᐁ ᐃᓕᓕᐎᔦᒃ, ᒫᑲ ᐊᓄᒡ ᑯᑎᓕᓕᒥᒥᑯᐗᐤ ᑭᒋᒪᓂᑐ: ᐁᑳ ᑳ ᑮ ᒥᓕᑲᐎᔦᒃ ᔕᐌᓕᒋᑫᐎᓐ, ᐊᓄᒡ ᒫᑲ ᑳ ᑮ ᒥᓕᑲᐎᔦᒃ ᔕᐌᓕᒋᑫᐎᓐ᙮
ᑭᒋᒪᓂᑐ ᐅᑕᐗᑳᓇ
11ᑳ ᑭᒋ ᓵᑭᐃᑕᑾᒃ, ᑭ ᓇᑐᑕᒫᑎᓇᐗᐤ, ᑖᐱᔅᑯᒡ ᒫᓐᑌᐗᒃ ᓀᔥᑕ ᐅᐸᐹᒧᑌᐗᒃ, ᐌᐱᓇᒧᒃ ᐎᔮᓯᐎ ᓇᑕᐌᓕᑕᒧᐎᓇ, ᑳ ᓇᑐᐸᓖᔅᑖᑯᑦ ᐊᒑᒃ; 12ᒀᔭᔉ ᐁ ᐃᑎᔦᒃ ᑭᑦ ᐃᔑᐱᒫᑎᓯᐎᓂᐙᒃ ᐃᑕ ᐁ ᐃᑖᒋᒃ ᒉᓐᑖᐃᓚᒃ: ᐋᑕ ᐁ ᐸᑾᓄᒥᑖᑾᒃ ᑖᐱᔅᑯᒡ ᐅᒪᒋᐋᔨᑎᐗ, ᐁᓕᐌᒃ ᒫᑲ ᑭ ᒥᓗ ᐊᑑᔅᑫᐎᓂᐙᐗ, ᑫ ᐙᐸᑕᑭᒃ, ᑭᒋ ᐅᒋ ᒫᒥᒋᒫᒋᒃ ᑭᒋᒪᓂᑐᐗ ᓇᑕᐙᐸᒥᐌᐎ ᑭᔑᑳᑫ᙮
13ᐸᑭᑎᓂᑎᓱᒃ ᑭᒋ ᑎᐯᓕᒥᑯᐌᒃ ᒥᓯᐌ ᐅᑦ ᐅᓚᔓᐌᐎᓂᐙᐗ ᐃᓕᓕᐗᒃ ᐁ ᐃᔑ ᓇᑕᐌᓕᒥᑖᒃ ᐅᑎᐯᓕᒋᑫᐤ: ᑮᔥᐱᓐ ᑭᒋᐅᑭᒪᐤ ᐁ ᒪᐗᒋ ᑭᔅᑎᓯᑦ; 14ᓀᔥᑕᐱᑯ ᐅᑎᐯᓕᒋᑫᐗᒃ, ᑳ ᐃᑎᔕᐅᑯᒋᒃ ᑭᒋ ᓇᓀᑳᒋᐋᒋᒃ ᐅᒪᒋᐋᔨᑎᐗ, ᓀᔥᑕ ᑭᒋ ᒫᒪᑖᑯᒫᒋᒃ ᐊᓂᐃ ᑳ ᒥᓗ ᐋᔨᑎᓕᒋ᙮ 15ᐌᓴ ᐁᑯ ᐁ ᐃᑌᓕᑕᒃ ᑭᒋᒪᓂᑐ, ᐁ ᒥᓗ ᐋᔨᑎᔦᒃ ᑭᒋ ᐅᒋ ᑭᐳᑐᓀᐌᑾᒃ ᐅᑲᑫᐹᑎᓯᐗᒃ ᐁ ᑲᑫᐹᑎᓯᐎ ᐃᑗᒋᒃ: 16ᑖᐱᔅᑯᒡ ᐅᑎᐯᓕᒥᑎᓱᐗᒃ, ᐁᑳ ᒫᑲ ᐁ ᐋᐸᒋᑖᔦᒃ ᑭ ᑎᐯᓕᒥᑎᓱᐎᓂᐗᐤ ᑭᒋ ᐅᒋ ᐊᑾᓇᐊᒣᒃ ᒪᒋ ᐋᔨᑎᐎᓇ, ᒫᑲ ᑖᐱᔅᑯᒡ ᑭᒋᒪᓂᑐ ᐅᑦ ᐊᑑᔅᑫᓚᑲᓂᒪ᙮ 17ᑭᔅᑌᓕᒥᑯᒃ ᒥᓯᐌ ᐃᓕᓕᐗᒃ᙮ ᓵᑭᐃᑯᒃ ᑳ ᐋᔭᒥᐋᐎ ᐎᒋᔖᓂᑐᒋᒃ᙮ ᓇᓂᒌᔅᑖᒃ ᑭᒋᒪᓂᑐ᙮ ᑭᔅᑌᓕᒥᒃ ᑭᒋᐅᑭᒪᐤ᙮
ᑭ ᑲ ᐎᓴᑫᓕᑌᓈᓇᐤ ᑖᐱᔥᑯᒡ ᙭ ᑳ ᐃᔑ ᐎᓴᑫᓕᑕᒃ
18ᐊᑑᔅᑫᓛᑲᓂᑐᒃ, ᓇᓇᐃᑖᑯᒃ ᑭᑦ ᐅᑭᒫᒥᐙᐗᒃ ᒥᓯᐌ ᓇᓂᒋᐎᓂᒃ: ᓇᒪᐎᓚ ᐊᓂᑭ ᐱᑯ ᑳ ᒥᓗᑣᒋᒃ ᓀᔥᑕ ᑳ ᓗᔅᑳᑎᓯᒋᒃ, ᒫᑲ ᐊᓯᒋᒃ ᐊᓂᑭ ᑳ ᐊᒀᑎᓯᒋᒃ᙮ 19ᐌᓴ ᐅᒪ ᓇᓈᔅᑯᒥᑯᓯᐎ ᐃᑌᓕᑖᑾᓐ, ᑮᔥᐱᓐ ᐊᐌᓇ ᐅ ᒥᑐᓀᓕᒋᑲᓂᒃ ᐁ ᐅᒋ ᑖᐺᑕᐙᑦ ᑭᒋᒪᓂᑐᐗ, ᒣᑯᔅᑳᑌᓕᑕᒥᐋᑲᓂᐎᒋ, ᔐᔥᒀᑦ ᐁ ᐎᓴᑫᓕᑕᒥᐋᑲᓂᐎᑦ᙮ 20ᐌᓴ ᑖᓐ ᐁᔅᐱᒋ ᑭᔅᑌᓕᑖᑾᒃ, ᑭᔥᐱᓐ ᔑᐱᓚᐌᓯᔦᑴ ᐃᔅᐱ ᐙᑖᒪᐅᑲᐎᔦᑯ ᑭ ᐗᓂᑎᐎᓂᐙᐗ ᐅᒋ? ᒫᑲ ᑮᔥᐱᓐ, ᐁ ᒥᓗᑐᑕᒣᒃ ᓀᔥᑕ ᐊᓂᒪ ᐅᒋ ᐎᓴᑫᓕᑕᒥᐃᑲᐎᔦᒃ, ᔑᐱᓚᐌᓯᔦᑴ ᒫᑲ, ᐅᒣᓕᐤ ᓇᐃᓚᐌᐃᑯ ᑭᒋᒪᓕᑐ᙮ 21ᐌᓴ ᐁᐗᑯ ᐌᒋ ᓇᑐᒥᑲᐎᔦᒃ: ᐌᓴ ᙭ ᓀᔥᑕ ᑭ ᐙᐎᓴᑫᓕᑕᒥᔅᑕᒫᑯᓇᐤ, ᐁ ᓇᑲᑕᒫᑕᒃ ᑭᔅᑭᓄᐙᐸᑎᓕᐌᐎᓂᓕᐤ ᑭᒋ ᑖᑖᐸᐊᒣᐌᒃ ᐅ ᑕᑯᔅᑫᐎᓇ: 22ᐊᓇ ᐁᑳ ᑳ ᑮ ᒪᒋᑐᑕᒃ, ᐁᑳ ᓀᔥᑕ ᐙᔦᔑᐃᐌᐎᓐ ᑳ ᒥᔅᑭᑳᑌᓕᒃ ᐅᑐᓂᒃ: 23ᐊᓇ, ᐃᔅᐱ ᑳ ᑮ ᒫᓓᓕᒫᑲᓂᐎᑦ, ᓇᒪᐎᓚ ᒥᓇ ᑮ ᒫᓓᓕᒋᑫᐤ; ᐃᔅᐱ ᑳ ᑮ ᐙᐎᓴᑫᓕᑕᒥᐋᑲᓂᐎᑦ ᓇᒪᐎᓚ ᑮ ᐅᒋ ᐙᔦᔑᒧᑐᑖᑫᐤ; ᒫᑲ ᑮ ᐸᑭᑎᓂᑎᓱ ᐅᒋᒋᓕᒃ ᐊᓂᐃ ᒀᔭᔉ ᑳ ᑎᐹᔅᑯᓂᑫᓕᒋ: 24ᐎᓚ ᑫᒋᐙᒃ ᑳ ᑮ ᐅᑎᓇᒃ ᑎᐱᓚᐌ ᐎᔭᐎᒃ ᑭ ᒪᒋᑣᐎᓂᓇᐗ ᒥᔅᑎᑯᒃ; ᑭᓚᓇᓇᐤ, ᐁ ᓂᐱᔭᒃ ᒪᒋᑣᐎᓂᒃ ᐅᒋ, ᑭᒋ ᐱᒫᑎᓯᔭᒃ ᒀᔭᔅᑭᑖᑎᓯᐎᓂᒃ ᐃᔑ: ᐅ ᐸᐸᓴᔅᑕᐅᑯᓯᐎᓇ ᑳ ᐅᒋ ᒥᓇᐗᒋᐃᑲᐎᔦᒃ᙮ 25ᐌᓴ ᑭ ᑮ ᓇᔅᐱᑕᐙᐗᐗᒃ ᒫᓂᔥᒑᓂᔕᒃ ᐁ ᐗᓂᔑᑭᒃ; ᒫᑲ ᐊᓄᒡ ᑮ ᑭᐌᑐᑕᐗᐗᐤ ᑭᑦ ᐊᒑᑯᐗᐗᒃ ᐅ ᒫᓂᔥᒑᓂᔑᐎᓕᓕᒥᐙᐗ ᓀᔥᑕ ᐅ ᑭᒋᐋᔭᒥᐁᐎᑭᒫᒥᐗᐗ᙮
Currently Selected:
ᓂᔥᑕᒻ ᐱᑕᕐ 2: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.