Mt 28
28
Ca'li 'niyelaĝajeguem ñe'me Jesús
(Mc 16.1-8; Lc 24.1-12; Jn 20.1-10)
1Ca'li joote yenoĝonegue jo'me nolo' 'me niyamaqatac, ga'me ne'teta ga'me nolo' domingo, María jo'ne Magdala laje nataq'aen jaga'me María laqaya yec'adeta ga'me napa'l lae't. 2Qanach'e 'uo ga'me yataqachiñe let'adaic ledaĝa jena'me aleua, qa'a 'uo ñe'me Jaliaĝanec lamaĝajec 'me piyem le'ec chiyaqaje'ma di'me piyem da'me nenochiñe qama'le yec'ata ga'me napa'l lae't, yamaĝaye ga'me qa' t'adaic qama'le nalegue joga'me. 3Joñe'me piyem le'ec ena'am ga'me qajoĝonaĝa lauaq da'me 'loyaĝac, nataq'aen ga'me leuo yataqachiñe yapaga't ena'am jaga'me loñi. 4Jogaa'me vitaĝayaqa yataqachiñe jalcote t'oita joñe'me qama'le yataqachiñe diviloĝo'l chayovida'a ena'am ta'le yele'u. 5Joñe'me piyem le'ec dojapegue'to gaa'me yauo', enaac:
—Ena'te at'oiyi, qa'a jayaten queda'me aueloyitaque ñe'me Jesús, ñe'me jo'ne qoyep'enajeguem ca'li. 6Ja ue'ta jena'me jenjo'; joote 'niyelaĝajeguem, naq'aeta da'me 'yaĝatetac ca'li. Anec'achiya qaedi auec'achiñe di'me qoyacha'ña quelqaya. 7Jamoyi nataq'aen a'uaqataĝañema gaa'me lapaĝaguenataqa joñe'me: «¡Joote 'niyelaĝajeguem! Qama'le yec'ata di'me Galilea qaedi yitaĝa ami yemata'a't. Naqaedi di'me ua'a da'me auañiya qomle.» Naq'aeta da'me 'yaqatac 'me ami ja'aĝatema.
Jesús naloĝonegueta gaa'me yauo'
8Chane'eja gaa'me yauo' paja'a queda'ae ga'me napa'l lae't, jalcote da'me t'oitedapega qalaĝaja nach'e ena'am 'uo da'me lamai'j let'adaic, chiyoqodañe ca'li yeda'alo da'me 'naqataĝanaĝac jogaa'me napaĝaguenataqa. 9Qanach'ega ua'a ca'li Jesús naloĝonegueta gaa'me nataq'aen yep'iye'n. Gaa'me yauo' yec'adeta ñe'me Jesús qama'le qapaleque jonaa'me lichil da'me 'nonaĝachidegue. 10Qama'le joñe'me enaac:
—Ena'te at'oiyi. Oquiyi qama'le a'uaqataĝañema gaa'me yaqaya'olqa qaedi yec'adeta di'me Galilea, qama'le ñauanaĝa't da'me daja'.
Qoyejete'n jogaa'me vitaĝayaqa qaedi doqovinaĝa'n
11Ca'li quetedapegue' ga'me ladi'j gaa'me yauo', jogaa'me vitaĝayaqa yec'adeta ga'me noic qama'le t'aqataĝanema jogaa'me lejaliaĝanaqa ga'me tamenaĝaiqui lo'olpi yema ga'me jo'ne 'uo ca'li. 12Naajo' jaliaĝanaqa dojapegue'to ca'li ga'me 'yaĝaicachidipi qaedi nayachidiñgui ga'me jo'ne jetaque yauote. Nataq'aen jalcote jaga'me laicaua qoyanema jogaa'me vitaĝayaqa, 13nach'egaua qouaqatalo ca'li:
—A'uaĝachetac qomle jo'me pi'yaq queda'me cha'li a'uochetac qanach'e novi't gaa'me Jesús lalemaĝaje'te qama'le decachita ga'me lapat. 14Qom noma'a da'me dojo' ñe'me adejaliaĝanequi Poncio Pilato qama'le mach'e qo'mi da'me ja'ataĝaguet qaedi ja ami 'te ualo'te gamachaqaega adajouaĝajechi.
15Jogaa'me vitaĝayaqa yacoteguet jaga'me laicaua, qama'le yauote ga'me jo'ne qo'yaĝatema. Qama'le chayovida'alo naa'me naajo' noloqo'ote uetauelo dojo' 'naqataĝanaĝac joga'me judiopi.
Joda'me 'nelopague'j jogaa'me Jesús lapaĝaguenataqa
(Mc 16.14-18; Lc 24.36-49; Jn 20.19-23)
16Chane'eja jogaa'me once lapaĝaguenataqa ñe'me Jesús tategue di'me Galilea, qama'le yec'adeta ga'me qajoĝonaĝa jo'ne Jesús joote yaloĝonalo ca'li. 17Mane'e ca'li yauata ñe'me Jesús, qama'le 'nonaĝachidegue, temaqaedi 'uo da'me loqoleguetaĝanaĝa'j ta'le naqaeñe joñe'me. 18Jesús nichiidi'uo jogaa'me qama'le yanema da'me laqataĝac, enaac:
—Dios joote jayem yachalegue da'me yañoqotaĝanaĝac let'adaic, qaedi ñejaliaĝatelo'te yemeda gaa'me ueteda'ague di'me piyem nataq'aen gaa'me uetedalegue jena'me aleua. 19Chane'eja oquiyi nayi, auec'achiyalo ena'uaque ga'me jiyaĝadipi qama'le a'uaqataĝañema qaedi auauoyi' yapaĝaguenaqa. Anachilaĝañi' jogaa'me, da'me auachiyalo'te da'me lañoqotaĝanaĝac ñe'me Qadet'a choqoñe'me Lec'oĝot choqoñe'me Dios Lepaqal 'me ja 'nalegue, 20nataq'aen auapaĝagueñi' qaedi quetede'egue yema ga'me jo'ne joote ami jamaĝalo'te. Qama'le jayem nach'e eta't da'me ami joue'tajopa chayovida'a qom loiquiaqa' jena'me aleua.
Currently Selected:
Mt 28: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina