Jn 9
9
Jesús en neloye ñe'me jiyaĝaua jo'ne jalchi'ena qanam joca'li niyiñe
1Mane'e ca'li ec ñe'me Jesús, qama'le yauana ñe'me jiyaĝaua jo'ne jalchi'ena qanam joca'li niyiñe. 2Jogaa'me lapaĝaguenataqa yenatetedapec:
—Paĝaguenataĝanaĝaic, ¿toqoch'e qanam joca'li niyiñe jenjo' jiyaĝaua? ¿Qo'li yajouaĝa't daa'me let'al loeco, uotaĝa gaa'me jo'ne mach'e loeco?
3Jesús 'yategueta jogaa'me:
—Ja naqaegaua gaa'me jo'ne mach'e loeco, nach'e ena'am ja naqaega ga'me jo'ne mach'e let'al loe'j. Qalaĝaja qaedi uoja'ae da'me en di'yoq q'aen 'me lañoqotaĝanaĝac joñe'me Dios, 4da'me yatemaliaĝa cha'li je'etaq jenjo' nolo' ga'me 'lonatac ñe'me jo'ne jayem namaĝaquena. Qa'a nayi yamta'le pi'yaq, qama'le ja yitaĝa 'uo ga'me yaqanatet ta'le t'onataĝan. 5Nayi da'me yatemaliaĝa joue'ta jenjo' aleua queda'me jayem jo'ne aleua laje'pi lecoyadaĝanaĝat.
6Ca'li yem da'me jo'ne 'yaĝatetac, Jesús natoĝolegue jena'me aleua, qama'le yachiyoĝotayi jaga'me 'lali ga'tae'me jaleca jo'ne jenal, qama'le yiyoĝolo'te naa'me 'lae'te ga'me jiyaĝaua jo'ne qanam. 7Qama'le yamaq, enaac:
—Oc, auec'ataĝajo'ma jañe'me noĝop lae't jo'ne lenaĝat da'me Siloé (jo'ne yeloteguet “da'me namaĝajec”) qama'le aviyo'y naa'me at'ae'te.
Qama'le ga'me qanam male yec'ataĝajo'ma qaedi napi'l, qama'le mane'e ca'li 'niyelaq male yaqanatet da'me neloye. 8Jogaa'me jiyaĝa'u jo'ne 'lachaqa' laje' choqogaa'me jo'ne 'uo di'me ua'a da'me yauata nale yajel'tape, male nenatetapega'ajalo jogaa'me:
—¿Qo'li ja naqaena jo'ne ñichiñe nale yiyaĝataque ga'me nachetaĝat?
9Qama'le uo'oe gaa'me jo'ne enapega't:
—Naqaeda.
Gaa'me jiyaĝa'u laqaya' enapega't:
—Da'me dojo' ja naqaeda, jeetapega ch'e 'loyaĝaua.
Qalaĝaja joñe'me mach'eñe da'me nenaĝategue:
—¡Naqayem!
10Qama'le ua'a da'me yenatetedac:
—¿Jach'e ga'me am qo'eetec queda'me nayi ma'te auaqanatet ta'le aneloye?
11Joñe'me male 'yategueta:
—'Uo jo'me jiyaĝaua jo'ne lenaĝat Jesús, ya'uo jo'tae'me jenal 'me yiyoĝolo'te naa'me 'yae'te, qama'le jayem yamaq, enaac: «Auec'ataĝajo'ma jañe'me noĝop lae't 'me lenaĝat da'me Siloé qama'le aviyo'y naa'me at'ae'te», qama'le jajoyi da'me jiyo'y. Chane'eja da'me yem da'me jiyo'y naa'me 'yae'te, male ua'a da'me ñeloye.
12Qanach'e ua'a da'me yenatetedapec ga'me ue'ta jo'me jiyaĝaua. Qama'le joñe'me 'yategueta, enaac:
—Jayem, ja jayaten.
13Chane'eja male yauegalo jogaa'me fariseopi ga'me jo'ne jalchi'ena qanam joca'li, qaedi qoyajoĝona'agueta. 14Jo'me nolo' joca'li Jesús ya'uo ga'me jenal nataq'aen en neloye joga'me qanam nach'ejo jo'me nolo' jo'ne niyamaqatac, 15qama'le gaa'me fariseopi yena't joñe'me qanam:
—¿Jach'e ga'me am qo'eetec joca'li da'me male aneloye?
Qama'le joga'me male 'yategueta:
—'Uo jo'me jiyaĝaua jo'ne yiyoĝolo'te jo'me jenal naa'me 'yae'te, qama'le da'me yem, male ñapi'l, qanach'e male ñeloye.
16Qama'le uo'oe gaa'me fariseopi jo'ne enapega't:
—Joga'me jo'ne ya'uo da'me dojo' ja chiyaqaje'ma ñe'me Dios, qa'a nach'ega ja yayaten ga'me nolo' jo'ne niyamaqatac.
Qalaĝaja uo'oe gaa'me laqaya' jo'ne enapega't:
—Ga'me jiyaĝaua jo'ne loeco lo'o, ¿qo'li yaqanatet ta'le ya'uo da'me dojo' 'nanec jo'ne yaloĝon?
Qama'le ua'a ca'li da'me male yodapecache naa'me lelnataĝaco. 17Qama'le yitaĝa 'viyelaĝadelegue da'me yena't ñe'me jiyaĝaua jo'ne qanam joca'li:
—Da'me am, ¿jach'e ga'me qo'mi a'uaĝatema jo'me jo'ne en aneloye q'aen?
Qama'le 'yategueta:
—Da'me ami ja'aĝatema: nach'ejo jo'me Dios 'laqataĝanaĝanec.
18Qalaĝaja jogaa'me ja 'yamaqate'n joñe'me da'me jalchi'ena qanam joca'li qalaĝaja nayi male neloye, chane'eja male ua'a da'me yiyaĝanalo gaa'me let'al 19qaedi yena't jogaa'me:
—¿Qo'li eja yataqachiñe ac'oĝoche da'me dojo'? Qom a'uaĝachetac da'me jo'ne qanam joca'li niyiñe, qama'le nayi, ¿jach'e ga'me chiyaqayi da'me qoyen neloye?
20Gaa'me let'al 'yategueta:
—Qo'mi jayatenaq da'me mach'e qochalec, nataq'aen da'me jalchi'ena qanam ca'li niyiñe; 21qalaĝaja da'me neloye nayi, qo'mi ja jayatenaq, nataq'aen da'me ja jayatenaq ga'me jo'ne ya'uo da'me lec'atenaĝanaĝac. Chane'eja da'me ami, mach'e auenachi, qa'a joote 'yaĝaic na'me, qama'le mach'ena na'me yaqanatet da'me 'uo ga'me ami 'yaĝatema.
22Chane'eja naq'aeta da'me 'laqataĝanaĝa'j gaa'me jo'ne mach'e let'al, qa'a 'uo da'me loqolanaqa', yajouaĝat jogaa'me judiopi lajoĝola'te queda'me joote 'uo da'me nomachidi: ga'me jo'ne 'yaĝatetac ñe'me Jesús da'me naqaeñe ñe'me Dios Liquiyac, nach'ega jo'ne qoyamaĝaye, ca'e qoyen ga'me nemaĝaiqui. 23Chane'eja ch'e naq'aeta da'me 'yaĝatetedac jogaa'me let'al: “Da'me ami, mach'e auenachi, qa'a joote 'yaĝaic na'me.”
24Jogaa'me judiopi lajoĝola'te yitaĝa yiyaĝata ñe'me jiyaĝaua jo'ne qanam qaedi yena't:
—Nayi da'me jajoyaqa'aguet ñe'me Dios, qama'le qo'mi a'uaĝatema ga'me yataqatelegue. Qa'a da'me qo'mi jayatenaq jo'me jiyaĝaua da'me loeco lo'o. ¿Jach'e ga'me mach'e at'aqatac?
25Joñe'me male 'yategueta:
—Uotaĝa eja naq'aeta da'me loeco lo'o, qalaĝaja uotaĝa ja naq'aeta, qa'a onolec da'me jo'ne jayaten: da'me naqayem jo'ne jayem qanam joca'li qalaĝaja nayi male 'uo da'me yec'atenaĝanaĝac.
26Qama'le yitaĝa 'viyelaĝadelegue da'me yena't:
—¿Jach'e ga'me am ee'tec? ¿Jach'e jo'me ya'uo da'me male en aneloye q'aen?
27Qama'le yitaĝa 'yategueta jogaa'me:
—Jayem, joote yema da'me ami ja'aĝatema da'me jo'ne jayem ee'tec, qama'le ¿toqoch'e ja aueñi 'te eja da'me jo'ne ami ja'aĝatema? ¿Toqoch'e jetaque yitaĝa aueñi ji'iyelaĝalegue da'me 'yaqataĝanaĝac? ¿Qo'li jetaque nach'e ena'am oquiyegue ñe'me Jesús?
28Qama'le jogaa'me judiopi lajoĝola'te male ja 'yamaqate'n joñe'me, qama'le eedapega:
—Am jo'ne mach'e am lapaĝaguenatac jo'me jiyaĝaua, qalaĝaja da'me qo'mi qamqa'me mach'e qo'mi lapaĝaguenataqa di'me Moisés. 29Chane'eja nach'e ena'am da'me qo'mi jayatenaq da'me Dios dojapegue' di'me Moisés ca'li, qalaĝaja jojo' jiyaĝaua qamqa'me ja jayatenaq ga'me jo'ne mach'e chiyoĝogue.
30Joñe'me jiyaĝaua 'yategueta:
—Yataqachiñe yoĝoja'a da'me dojo' jo'ne auauoyi queda'me toqoch'e ja auayachiñe ga'me jo'ne chiyoĝogue, jojo' jiyaĝaua jo'ne nach'ejo 'me e'n 'youatedegue naa'me 'yae'te. 31Qa'a jayatenaq da'me Dios ja naquiaĝanalo jogaa'me loeco lo'ol, yejamache jogaa'me jo'ne 'nonaĝachidegue joñe'me nataq'aen da'me yoqochideta da'me jo'ne lelnataĝac: nach'egaua jo'ne naquiaĝanalo. 32Qaya'te ta'le ua'a da'me qo'yaĝatetac ga'me jo'ne jalchi'ena qanam joca'li niyiñe ta'le qoyen neloye. 33Chane'eja jena'me jenjo' ta'le ja chiyaqaje'ma ñe'me Dios qama'le ja yaqanatet ta'le 'uo ga'me ye'et.
34Qama'le male qo'enapega joñe'me:
—Am jo'ne chiyoqochiñe joca'li aniyiñe da'me am loeco lo'o, qama'te ¿toqoch'e jetaque qo'mi auapaĝague'n?
Qama'le ua'a ca'li male qoyamaĝaye qoyen ca'e ga'me lemaĝaiqui' jogaa'me judiopi.
35Mane'e ca'li Jesús dip'iyeya ñe'me qanam da'me joote qoyamaĝaye qama'le ca'li male yauana ñe'me qanam qama'le yenat joñe'me:
—Da'me am, ¿qo'li auep'iya'a ñe'me Jiyaĝaua Lec'oĝot?
36Joga'me qanam male 'yateguet:
—Jaliaĝanec, ja jayaten da'me dojo'; 'noota qom jayem a'uaĝatem qaedi jep'iya'a.
37Jesús 'yateguet ñe'me:
—Joote jayem auana: naqayem jo'ne am jojetapegue'.
38Qama'le ñe'me jiyaĝaua male yejoidiñe naa'me leliquetel ca'li dajoya'aguet ñe'me Jesús, qama'le enaac:
—Am Yejaliaĝanec, nayi da'me male am jep'iya'a.
39Qama'le yitaĝa enaac ñe'me Jesús:
—Da'me jayem ñec'ata jenjo' aleua qaedi ja'uo da'me yec'atenaĝanaĝac qaedi jogaa'me qana'mi male nelodegue, nach'e ena'ama jogaa'me jo'ne te'me nelotedaye qaedi 'uo da'me laqanamaĝa'j.
40Uo'oe gaa'me fariseopi jo'ne ueteda'ajop joñe'me Jesús: mane'e ca'li domachita da'me dojo' 'laqatac qama'le paja'a da'me yena't:
—¿Qo'li nach'e ena'am da'me qo'mi qana'mi?
41Jesús 'yategueta:
—Ta'le naqa'ami jo'ne ami qana'mi, qama'le qaya'te adaviyaĝaje'che. Qalaĝaja queda'me aueñetapela't aneloyitaye, qama'le nach'e ami jo'ne 'uo da'me adaviyaĝaje'che.
Currently Selected:
Jn 9: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina