Jn 8
8
Yauo jo'ne leuaua ga'me ja yataqachiñe ta'le loua
1Qama'le ñe'me Jesús queje'mec joga'me qajoĝonaĝa jo'ne Olivo lichidijat. 2Jojo'me ne'teta 'me nolo' laqaya, qama'le yitaĝa 'viyelaĝa ga'me tamenaĝaiqui, qama'le jogaa'me jiyaĝadipi yec'adeta joñe'me, da'me ñichiñe qaedi yapaĝague'n.
3Qama'le joga'me judiopi napaĝaguenoqo'tpi choqoga'me fariseopi doĝotaĝatec jañe'me yauo jo'ne leuaua ga'me jo'ne ja yataqachiñe ta'le loua, qama'le yauedi't qaedi nichalataĝaidiñgui laeñi jogaa'me jiyaĝadipi 'me dajo'tagueta joñe'me Jesús. 4Qama'le qo'yaĝatot da'me loec jaga'me yauo joñe'me Jesús:
—Am paĝaguenataĝanaĝaic, janjo' yauo jotaĝanaĝaq queda'me leuaua ga'me jo'ne ja yataqachiñe ta'le loua. 5Qa'a da'me Dios lamaĝajoĝonaĝac jo'ne Moisés qo'mi yapaĝagueneque qo'mi yamaĝalo'te da'me qoyajaĝaque jogaa'me qadi da'me qoyalat jaga'me ena'am janjo' yauo. Qama'le da'me am, ¿jach'e ga'me at'aqatac?
6Jenjo' jo'ne yenadetec jogaa'me qa'a yauote da'me lapinaĝanataĝanaĝa'j qaedi yoqocha'alo da'me yauote laviyaĝajet joñe'me Jesús. Qalaĝaja ñe'me Jesús male naĝañi da'me yedelegue jena'me aleua dedaĝana jajo'me liaĝata. 7Qama'le da'me queta da'me nenataĝanaĝac chayovida'a yitaĝa ñijeguem qama'le enaac:
—Ga'me jo'ne qaya'te loec da'me ami, nach'ega jo'ne 'uaeñe da'me yajaĝac ga'me qa'.
8Qama'le yitaĝa naĝañi da'me yedelegue jena'me aleua. 9Mane'e da'me domachita da'me dojo' jo'ne nenaĝategue, qama'le jogaa'me male onolqa'tape da'me queda'ae joñe'me, jaa'me 'uaetegue nach'egaua jo'ne 'yaĝaicachidi, nataq'aen jogaa'me laqaya', chayovida'a da'me male onolec ñe'me Jesús chaqañe'me yauo. 10Chane'eja da'me yitaĝa ñijeguem, male yenat jañe'me yauo:
—Jega, ¿jach'e ga'me dajotegue jaa'me jo'ne jetaque am yala't? ¡Ma'te qaya'te ta'le en adaviyaĝajet!
11Jaga'me yauo male 'yateguet:
—Am Jaliaĝanec, qaya'te jayem 'yedetec.
Jesús male enaac:
—Qama'le nach'e ena'am da'me jayem, qaya'te ta'le jen adaviyaĝajet. Qama'le nayi da'me male oc, ena'te yitaĝa a'viyelaĝa't naa'me adoeco.
Jesús jo'ne lecoyadaĝanaĝat jogaa'me aleua laje'pi
12Jesús yitaĝa yapaĝague'n jogaa'me jiyaĝadipi, qama'le enaac:
—Naqayem jo'ne lecoyadaĝanaĝat jogaa'me aleua laje'pi; gaa'me jo'ne jayem quetegue ja yitaĝa uetedaue da'me 'lalaĝa, dite da'me male yauata da'me yoqochiñe jo'ne nec'alaĝa.
13Jogaa'me fariseopi eedapega joñe'me:
—Da'me am mach'e a'naĝatetapela't, qama'le da'me dojo' at'aqataĝanaĝac qaya'te ta'le lajo'viyaĝac.
14Jesús male 'yategueta:
—Da'me dojo' yapaĝaguenataĝanaĝac 'uo da'me lajo'viyaĝac, mate mane'e mach'e jayem da'me 'ñaĝatetapela't, qa'a jayaten ga'me jo'ne jachiyoĝogue nataq'aen ga'me jo'ne jec'ata qomle. Qama'le ja ena'am da'me ami: ja auayachiñe ga'me jachiyoĝogue nataq'aen di'me jo'ne jec'ata qomle. 15Ami jo'ne analoqochiñe joga'me jo'ne ch'e jiyaĝaua lelnataĝac, jayem qamqa'me ja ñaloqote'n gamachaqaegaua lelnataĝaco jogaa'me jiyaĝa'u. 16Qalaĝaja qom jaloqotenaĝan, da'me yec'atenaĝanaĝac yataqachiñe 'uo da'me lajo'viyaĝac, qa'a ja jayem 'te onolec da'me jaloqotenaĝan, dite da'me nach'e ena'am 'uo ñe'me Taĝadena' 'me jayem namaĝaquena: naqaeñe jo'ne naloqoten ena'uac. 17Da'me Dios lamaĝajoĝonaĝac jo'ne ami qoyanema joca'li, qoyediñe da'me qom dos gaa'me jiyaĝa'u jo'ne t'aqataĝa'n nataq'aen da'me nalo'ta'ajalo gaa'me 'laqataĝanaĝaco, qama'le 'uo da'me lajo'viyaĝac. 18Qo'che' da'me jayem nach'e ena'am da'me mach'e 'ñaĝatetapela't, qama'le ñe'me Taĝadena' jo'ne jayem namaĝaquena, naqaeñe jo'ne aqataĝanaĝaic laqaya 'me jayem 'yaĝatetac.
19Qama'le qoyenatec:
—¿Jach'e ga'me ue'ta ga'me adet'a?
Jesús male 'yategueta:
—Da'me ami ja jayem 'te auatetoñi, nach'e ena'am ja auatetoñi ñe'me Taĝadena'; ta'le jayem auatetoñi qama'le nach'e ena'am auatetoñi ñe'me Taĝadena'.
20Jesús nenaĝategue jenjo' ca'li da'me cha'li dapaĝaguenataĝatapegoue joga'me tamenaĝaiqui, ga'me jo'ne na'ña jaga'me najaqaje lae't. Qalaĝaja qaya'te ta'le yaqanatet ta'le yacona louaq qaedi yecoñe', qa'a maliaĝa ja yovita da'me mach'e laloqo'.
Gaa'me ja p'iida'a ñe'me Jesús ja yaqanate't ta'le yec'adeta di'me jo'ne na'ña
21Jesús yitaĝa yapaĝague'n jogaa'me jiyaĝa'u, qama'le enaac:
—Da'me jayem jec qomle, qama'le da'me ami male jayem aueloyitaque, qalaĝaja da'me en adelevi q'ae'n qomle jonaa'me adoecodi'. Qama'le da'me jo'ne jajoyi ja auaqanachichi ta'le auec'achiya.
22Jogaa'me judiopi lajoĝola'te male enapega'ajalo:
—Da'me dojo' jo'ne nenaĝategue, ena'am ta'le jetaque mach'e nalatela't qomle, qo'che' nenaĝategue da'me eetapega ja jaqanatetaq ta'le jajoĝogue joga'me jo'ne yec'ata.
23Jesús t'aqataĝanema jogaa'me:
—Ami jo'ne mach'e auachiyoqoya'ña jenjo' p'añe, qalaĝaja da'me jayem qamqa'me jachiyoĝogue di'me p'ajeguem. Queda'me ami jo'ne aleua laje'pi; da'me jayem qamqa'me ja jayem 'te aleua le'ec. 24Qo'che' ami ja'aĝatema da'me en adelevi q'ae'n qomle jonaa'me mach'e adoecodi', qa'a qom ja jayem 'te auep'iiya'a queda'me eja naqayem, qama'le en adelevi q'ae'n naa'me mach'e adoecodi'.
25Male qoyenat:
—¿Jach'e am?
Jesús 'yategueta:
—Da'me jo'ne jalchi'ena ami ja'aĝatema, chiyoqotelegue da'me 'uaechiñe. 26Qa'a da'me jayem maliaĝa jalcote da'me jo'ne jetaque ami ja'aĝatema nataq'aen da'me jec'ate'n naa'me adaviyaĝaje'chedi'. Qalaĝaja ñe'me jo'ne jayem namaĝaquena eja da'me 'laqatac, qama'le da'me jo'ne joote jayem 'yaĝatem joñe'me, nach'eda da'me jo'ne ami ja'aĝatema da'me joue'ta jenjo' aleua.
27Qalaĝaja jogaa'me jiyaĝadipi ja yayateteguet da'me nach'eñe ñe'me Let'a da'me 'yaĝatema. 28Qo'che' ñe'me Jesús enapegalo:
—Qomle jayem auañiyajeguem da'me male jayem auep'eñiyajeguem, queda'me naqayem jo'ne jayem Jiyaĝaua Lec'oĝot, qama'le yemta da'me auayachiñe da'me eja naqayem. Nataq'aen auayachiñe qomle da'me qaya'te ta'le ja'uo ga'me ch'e yelnataĝac; onolec da'me ja'aĝatetac da'me jo'ne jayem yapaĝaguenec ñe'me Taĝadena'. 29Qa'a ñe'me Taĝadena' jo'ne jayem namaĝaquena nach'e eta't da'me jayem ue'tajop; nataq'aen da'me ja jayem 'te yejamaĝat, qa'a da'me jayem nach'e eta't ja'uo da'me jo'ne 'yamaqaten joñe'me.
30Ca'li naq'aeta da'me dojo' 'yaĝatetac, qama'le jalcote jogaa'me jo'ne naquiaĝata male p'iida'a joñe'me.
Jesús nach'eñe jo'ne p'ajaye, napacalegue di'me Abraham
31Qama'le Jesús t'aqataĝanema jogaa'me judiopi jo'ne naquiaĝata nataq'aen da'me p'iida'a joñe'me, enaac:
—Da'me ami, qom nach'e eta't da'me aviyamaĝache'tape naa'me 'yaqataqa, qama'le naqa'ami jo'ne yataqachiñe ami yapaĝaguenataqa; 32auayachiñe qomle da'me jo'ne eja, qama'le da'me eja male ami yejodegue.
33Jogaa'me male 'yadeteguet:
—Da'me qo'mi, di'me jo'ne mach'e jachiyojoĝoguet Abraham, nataq'aen da'me ja ch'e qo'mi lotaĝanaqa'te gamachaqaega qaedi e'n qo'mi lelataqa. Qama'le da'me am, ¿toqoch'e anenaĝategue da'me qo'mi qoyejodegue qomle?
34Jesús yitaĝa t'aqataĝanema, enaac:
—Eja da'me dojo' ami ja'aĝatema: yemeda jogaa'me loeco lo'ol nach'egaua jo'ne lotaĝanaqa'te da'me loeco. 35Ga'me nelatac ja nale'en ta'le ue'tajop ga'me te'me ladipa, qalaĝaja ga'me mach'e nec'oĝot qamqa'me eja da'me nach'e eta't uetauelo jogaa'me jo'ne mach'e 'lachaqadiaĝa'u. 36Chane'eja naq'aeta, qom japalaĝa't naa'me adoecodi', queda'me jayem Lec'oĝot joñe'me Dios, qama'le eja yataqachiñe ami qoyejodegue. 37Jayem joote jayaten da'me auachiyoqoya'aguet di'me Abraham, qalaĝaja jetaque jayem aualachi da'me aueñi yaviyaĝajet da'me jo'ne ami ja'aĝatema. 38Da'me ñenaĝategue da'me jo'ne jayem yaloĝona ñe'me Taĝadena', qama'le nach'e ena'am da'me ami, 'noota qom auoqochiiya da'me joote auomachiiya ñe'me Adet'ai.
39Jogaa'me male enapega't:
—¡Di'me mach'e qadet'a Abraham!
Qama'le Jesús 'yategueta jogaa'me:
—Ta'le naqa'ami jo'ne yataqatelo'te lec'oqo'tepi di'me Abraham, qama'le auoqochiiyalo naa'me lapaĝaguenataĝanaĝaco. 40Qama'le da'me jayem, mate mane'e ami ja'aĝatema da'me eja jo'ne Dios jayem yapaĝaguenec, qama'te jetaque jayem aualachi. ¡Di'me Abraham yataqachiñe qaya'te 'lonatac ta'le naq'aeta! 41Qama'le da'me ami ¡auadenaĝachi da'me ya'uo joca'li di'me adet'ai!
Jogaa'me enapega'ajalo:
—Da'me qo'mi, ja qo'mi 'te lec'oqo'te ga'me jo'ne chiyaqaue da'me nequejeguetaĝa. ¡Onolec ñe'me Qadet'a, Dios!
42Jesús 'yategueta jogaa'me:
—Ta'le eja da'me Adet'ai ñe'me Dios, qama'le jayem adoqopichiya, qa'a da'me jayem jachiyaqaje'ma ñe'me Dios, chane'eja jayem 'uo. Nataq'aen da'me ja mach'e yelnataĝac da'me ñanaequena, dite da'me nach'eñe ñe'me Dios da'me jayem namaĝaquena. 43Da'me ami ja auaqanachichi ta'le auayachiñe da'me dojo' jo'ne ami japaĝagueneque, qa'a da'me ami yajouaĝa't queda'me nach'eda da'me ja anaquiaĝañiyalo naa'me 'yaqataqa. 44Ñe'me adet'ai nach'eñe ñe'me payac, chane'eja da'me mach'e lelnataĝac a'vichetac, ga'me jo'ne mach'e 'yamaqaten. Da'me jo'ne 'uaechiñe joca'li nach'eñe ñe'me payac jo'ne dalataĝanac; Ñe'me nach'e eta't da'me ja ue'tajop ga'me eja, nataq'aen da'me ja yaqanatet ta'le 'yaĝatetac da'me eja. Mane'e qom nenaĝategue ga'me loqovinaĝanaĝac qama'le 'yaĝatetac ga'me mach'e loĝot, qa'a nach'eñe jo'ne qovinaĝanaĝaic, nataq'aen e'n qovinaĝanaĝayaqa gaa'me jiyaĝa'u jo'ne mach'e lec'oqo'te. 45Qalaĝaja da'me jayem ami ja'aĝatema da'me eja, qama'te ja jayem 'te auep'iiya'a. 46Da'me ami, ¿jach'e ga'me yaqanatet ta'le jayem naloĝona queda'me 'uo ga'me yoec? Da'me ja'aĝatetac da'me eja, qama'le ¿toqoch'e ja jayem 'te auep'iiya'a? 47Gaa'me Dios lec'oqo'te naquiaĝanalo naa'me 'laqataqa. Qalaĝaja queda'me ja ami 'te Dios lec'oqo'te, ja jetaque anaquiaĝañiya joñe'me.
48Jogaa'me judiopi male enapega't:
—Nayi male yepaquichigui da'me eja da'me ñenaĝataĝaye ca'li jenaqaac da'me am jo'ne Samaria le'ec, 'me am payac lae't.
49Jesús 'yategueta jogaa'me:
—Da'me jayem ja jayem 'te payac lae't. Da'me jo'ne ja'uo, jen p'ajaye da'me 'ñonaĝachigui ñe'me Taĝadena'; qama'te da'me ami ja jayem 'te a'nonaĝachiyegui. 50Jayem ja jelaque da'me jayem qo'nonaĝachigui, qalaĝaja 'uo ñe'me jo'ne yelaque da'me ñi'yoĝodenataguec, qama'le nach'eñe jo'ne jayem naloqoten. 51Eja da'me dojo' jo'ne ami ja'aĝatema: ga'me jo'ne yoqo'cha da'me 'yaqatac, nach'ega ja yeleu, dite da'me male yauana da'me lec'alaĝa jo'ne qaya'te loiquiaqa'.
52Gaa'me judiopi male enapega't:
—Nayi male yataqachiñe jayatenaq da'me am payac lae't. Qa'a di'me Abraham yeleu ca'li, nataq'aen dia'me Dios 'laqataĝanaĝanaqa, qama'te da'me am aueetapega: «Ga'me jo'ne yoqocha'a da'me 'yaqatac, nach'ega jo'ne yauana qomle da'me lec'alaĝa jo'ne qaya'te loiquiaqa'.» 53¿Qo'li aueetapega da'me anapacalegue di'me qadet'a Abraham? Di'me yeleu ca'li, nataq'aen dia'me Dios 'laqataĝanaĝanaqa; qama'te ¿jach'e jogamaĝa auenapela't?
54Jesús 'yategueta:
—Ta'le mach'e jayem da'me ñi'yoĝodela't, qama'le da'me ñi'yoĝodenaĝac qaya'te lajo'viyaĝac. Qalaĝaja da'me 'uo ñe'me Taĝadena' jo'ne jayem yi'yoĝoden, ñe'me jo'ne aueñetapega Adet'ai. 55Qalaĝaja queda'me ja auatetoñi joñe'me, dite jayem qamqa'me jateton. Chane'eja qom jenaac da'me ja jateton, qama'le naqayem jo'ne pecaic, qama'le ami jena'ama. Qalaĝaja queda'me eja da'me jateton joñe'me nataq'aen da'me joqoch'alo daa'me 'laqataqa. 56Di'me adet'ai Abraham matac joca'li queda'me yayaten da'me 'uo qomle ga'me nolo' da'me male jayem yauana. Chane'eja jalcote da'me lamaic ca'li male jayem yauana.
57Jogaa'me judiopi enapega't joñe'me Jesús:
—Da'me am maliaĝa ja auanalo cincuenta gaa'me 'uoidi, qama'le ¿teua'atoqo' auana di'me Abraham?
58Qama'le Jesús 'yategueta:
—Da'me dojo' jo'ne eja 'me ami ja'aĝatema: joca'li maliaĝa qaya ñe'me Abraham, joote jayem 'uo.
59Chane'eja jogaa'me jiyaĝa'u male yaconapegalo gaa'me qadi da'me yija' ñe'me Jesús. Qalaĝaja joñe'me yalegoue ga'me jiyaĝadipi 'me uetaue ga'me tamenaĝaiqui da'me male nañoĝochiñe, qama'le chiyoqotoue ga'me tamenaĝaiqui da'me male ec.
Currently Selected:
Jn 8: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina