Hch 27
27
Pablo qoyamaĝague di'me Roma
1Mane'e ca'li joote qo'yatelegue da'me male jajoĝogue di'me Italia, qama'le qoyaneuo'o ñe'me Pablo choqogaa'me necoñetae's laqaya' ñe'me coico le'ec lenaĝat Julio, jo'ne mach'e lejaliaĝanec ga'me necoicopi ñe'me jaliaĝanec Augusto. 2Chane'eja jonaqañgui jaga'me licota jo'ne napi'ña di'me Adramitio, 'me yamta'le dajoyi di'me Asia. Nach'e ena'am qo'mi uetauelo ñe'me Aristarco, jo'ne Tesalónica le'ec, noic jo'ne na'ña di'me aleua Macedonia. 3Ga'me nete' laqaya jovitaĝa di'me Sidón, ua'a da'me Julio yataqachiñe yichoĝoden ñe'me Pablo, chane'eja yaje'tem da'me dejapichiyalo jogaa'me laqaya'olqa nataq'aen mach'egaua yeloteguet ñe'me. 4Jachiyaqa'ña di'me Sidón, qama'le qanequedaĝataĝana'a jañe'me nepe jo'ne Chipre, qa'a jajoqo'teguet ga'me layat ca'li. 5Jaĝa'ya ga'me dajoya'ya di'me Cilicia nataq'aen Panfilia, qama'le jovitaĝa di'me Mira, noic jo'ne na'ña di'me aleua Licia.
6Ñe'me lajoĝola' ga'me coicopi yauana jaga'me licota jo'ne Alejandría laje 'me taya'ague di'me Italia, qama'le qo'mi yanedañgui qaedi yitaĝa qolaq. 7Qayoĝode' gaa'me noloqo'ote da'me ja enegue da'me qadeuoĝoc, nataq'aen jalcote da'me qat'onataĝanaĝac da'me jovita ga'me loogue di'me Cnido, qama'le queda'me maliaĝa jajoqo'teguet ga'me layat, jaĝa'ya ga'me dajoya'ya di'me Salmona qolaĝajop jañe'me nepe jo'ne Creta; 8qama'le yataqachiñe jalcote da'me qadaqalaic da'me qolaĝa'tegue ga'me loogue da'me, qama'le jovita ga'me noic lenaĝat Onaĝaic Nadiyaĝajom, yauaqa'a di'me noic lenaĝat Lasea.
9Chane'eja qayoĝode' gaa'me noloqo'ote yenoĝodegue nataq'aen male 'uo da'me lichic ta'le qoyeuoĝon jena'me noĝop, qa'a yauaqa'a ga'me naqaviaĝa. Qo'che' Pablo noqotetenalo jogaa'me, enaac:
10—Ami jaliaĝanaqa, jela'a queda'me jenjo' qadeuoĝoc 'uo da'me lichic qomle, queda'me 'uo qomle da'me lajouaĝac jana'me licota nataq'aen ga'me li'yac, nataq'aen chayovida'a qo'mi 'uo qomle da'me qadajouaĝac.
11Qalaĝaja ga'me coicopi lajoĝola' ja qoyoqo'cha ñe'me Pablo dite ñe'me loqote jaga'me licota nataq'aen ñe'me lajoĝola' gaa'me licota lo'ol. 12Qama'le ga'me napi'ña jana'me licota ja 'noota cha'li qoue'ta qom naqaviaĝa, ena'uaque joga'me lelnataĝa'j da'me queda'ae joga'me qama'le napiyela'ajalo yec'adeta di'me Fenice, napi'ña jana'me licota di'me Creta jo'ne dajo'tegue ga'me laqaua't jena'me chaje'ma nataq'aen chaĝajo'ma, qama'le ueteda'a ga'me naqaviaĝa.
Ga'me layat let'adaic 'me uañgui ga'me noĝop let'a
13Ca'li yajediñe ga'me layat jo'ne qolauaic qama'le jepetaqatapega da'me male naqaeda da'me jepagaqataque, qama'le yitaĝa japagaĝaye qolaqa'tegue ga'me lae jaga'me nepe jo'ne Creta. 14Qalaĝaja qampaja'a qaale novi' ga'me layat let'adaic jo'ne uaquiaĝaic, chiyoĝogue ga'me p'aye jaga'me nepe qama'le yauaĝalegue jaga'me licota. 15Qama'le yamaqata jaga'me licota ga'me layat, nataq'aen ja qoyaqanatet ta'le dajo'teguet ga'me layat, chane'eja jemachaqa'ta da'me yamaqata ga'me layat. 16Qama'le qo'mi yovidaĝateda'ague jaga'me nepe jo'ne lenaĝat Cauda, qanach'e ua'a da'me maqachaĝa ja vichaĝaguet jo'me layat, qama'le yataqachiñe jalcote da'me qat'onataĝanaĝac da'me ñauegaqatedañe ga'me licotal 'me jaleca'y. 17Ca'li yem da'me qoyanalegue ga'me 'lañaĝa, qama'le qoyecoñetec ga'me ñec ga'me qo'yañaĝada't jaga'me licota. Nataq'aen queda'me t'oidapega ta'le daqapidañgui ga'me pogaĝanaĝa di'me Sirte, najejaĝadiñe ga'me layat lo'o qama'le yemachide'ta da'me layat yamaqate'. 18Ca'li nete' ga'me layat maliaĝa vichaĝaguet ca'li, chane'eja yijaĝadiñgui ga'me noĝop ga'me li'yac jaga'me licota; 19qama'le yenoĝodegue gaa'me tres noloqo'ote, chayovida'a mach'egaua naqa't yema ga'me jo'ne dejali jaga'me licota. 20Qayoĝode' gaa'me noloqo'ote da'me ja yauata jañe'me ajeua nataq'aen gaa'me uaqachiñil, nataq'aen queda'me 'uo ga'me nauomaĝa jo'ne qo'mi yauaĝalo'te qama'le yataqachiñe qaya da'me jenaqatapega ta'le qadec'alegue.
21Qama'le queda'me qayoĝode' ga'me noloqo'ote da'me qaya'te jaliguinaq, Pablo uañe laeñi da'me nechachiñe qama'le enaac:
—Ami yaqaya'olqa, yataqachiñe 'noota ta'le jayem auoqochiiya ca'li, qama'le ja qolaqa'e di'me Creta; qama'le lochiyalegue ta'le da'me dojo' ja no'en nataq'aen ga'me qo'naĝat. 22Qalaĝaja nayi, ena'te ami nejalidiñe, qa'a qaya'te yeleu da'me ami, mate mane'e janjo' licota qamqa'me eja da'me qaga qomle. 23Qa'a jepi'yaq jayem naloĝoneguet ñe'me piyem le'ec, namaĝaquena ñe'me Dios jo'ne nach'eñe joue'tot nataq'aen jo'onataĝaneuo'o, 24qama'le jayem t'aqataĝanem: «Ena'te ado'e, Pablo, qa'a auajoya'aguet qomle ñe'me jaliaĝanec 'me ne'tague di'me Roma, qama'le queda'me yajouaĝat am, Dios ja en 'te yedalo'te da'me leleuaqa' ena'uaque gaa'me jo'ne am ueteda'ajop jana'me janjo' licota.» 25Chane'eja ami jiyaĝadipi, a'nañaĝachi, qa'a jep'iya'a joñe'me Dios nataq'aen yepaque'teguelo gaa'me uo'oe jo'ne jayem 'yaĝatema ñe'me piyem le'ec. 26Qalaĝaja jaqapiyaqa'ña qomle jaga'me nepe.
27'Uo jo'me pi'yaq ca'li, yenoĝodegue catorce gaa'me noloqo'ote da'me qadeuoĝoc qama'le jovitaĝa di'me noĝop let'a lenaĝat Adriático, jaĝa'ya nale ga'me qo'mi yamaqateda'ague ga'me layat, qama'le joga'me licota lo'olpi yetade'n da'me male qadauaqa'a ga'me 'lañaĝa. 28Ca'li naloqote'n ga'me noĝop, qama'le nalo'taguet treinta y seis metros; ca'li qo'mi qaya'tayelo qama'le yitaĝa naloqote'n, qama'le nalo'taguet veintisiete. 29T'oidapega ta'le netouoĝo'yeto ga'me qadipi, chane'eja yajaĝadegue cuatro gaa'me lajapaqa'te ga'me p'ategue jaga'me licota, nataq'aen yiyaĝadetapecot joñe'me Dios qaedi paja'a 'yoĝoñi. 30Qalaĝaja joga'me licota lo'olpi lelnataĝa'j da'me queda'e jaga'me licota, chane'eja nenotaĝadiñe ga'me licota 'me jaleca'y, ena'am ta'le jetaque yajaĝadegue ga'me lajapaĝat ga'me dajoya'ague jaga'me licota. 31Qalaĝaja Pablo t'aqataĝanem ñe'me najoĝola' nataq'aen ga'me coico laje', enaac:
—Qom queda'e jana'me licota naa'me naajo', qama'le ami ja adec'aliyegue.
32Chane'eja jogaa'me coico laje' yichaĝadegue ga'me leque'te joga'me licota 'me jaleca'y qama'le tadiñgui ga'me noĝop.
33Ca'li jaya'agueteda, Pablo netouenaĝanaĝa'tape ena'uaque jogaa'me qaedi 'uo ga'me yali'j, enaac:
—Male yenoĝodegue nayi gaa'me catorce noloqo'ote da'me yajouaĝat da'me jajoqo'ta da'me jach'e jogamaĝa 'uo, qaya'te gamachaqaega aualiqui. 34Nayi ami ñachoĝodenouelo qaedi 'uo ga'me aualiqui. Dojo' auoviñetaque qom jetaque adec'aliyegue, qa'a ena'uaque ami qaya'te adajouaĝajechi uotaĝa ta'le ch'e onole jaga'me adayoĝochi na'me adaqai'godi'.
35Ca'li nenaĝategue da'me dojo', Pablo yacona ga'me pan, yanem da'me lamaic joñe'me Dios da'me dajo'tagueta jogaa'me. Yecolaĝatapiye qama'le yalic. 36Yem qama'le yemeda 'nañaĝadijeguem jogaa'me qama'le ch'e ena'am deque'y. 37Qo'mi doscientos setenta y seis jiyaĝadipi da'me qonaqatañgui jaga'me licota. 38Ca'li yataqachiñe yoma't da'me liqui'yaĝa'j qama'le yijaĝadiñgui ga'me noĝop ga'me trigo qaedi e'n ja dejali jaga'me licota.
Ca'li domaliñe jaga'me licota
39Ca'li 'yoĝoñi, joga'me licota lo'olpi ja yateto'n ga'me aleua, qalaĝaja yauata ga'me loogue jo'ne chiyoqochi'ña ga'me noĝop let'a; qama'le jetaque qoyayoqotena jaga'me licota joga'me lae. 40Chane'eja qoyichaĝadegue gaa'me leque'te ga'me lajapaqa'te, qoyegue'm da'me uedaue jena'me noĝop, nataq'aen qoyen yolae'telo'te gaa'me loqolegaĝanaqa'te jogaa'me jo'ne lo'ol da'me leuoĝoc jaga'me licota. Yem qama'le qoyachimaĝachidiñe ga'me layat lo'ol jo'ne dajoya'elo, qama'le jaga'me licota paja'a uayoĝo'ta ga'me loogue. 41Qalaĝaja netouoĝo'ye' ga'me comadaĝa 'me pogaĝanaĝa qama'le t'añañe jaga'me licota, ga'me dajoya'ague yataqachiñe taue ga'me pogaĝanaĝa qama'le ja dedayapiye't, qaale gaa'me lepa' ga'me noĝop yolaĝachigui ga'me p'ategue jaga'me licota.
42Jogaa'me coico laje' jetaque yala't ga'me necoñetae'spi, qaedi ja yaĝa'n qom daloĝo'n da'me dajodegue. 43Qalaĝaja ñe'me lajoĝola't gaa'me coico laje', da'me jetaque nec'alaĝategue ñe'me Pablo, ja yajeta ta'le naq'aeta, dite da'me damaĝajoĝolegue da'me 'uaediñe uenochidiñgui ga'me noĝop gaa'me jo'ne yayate'n da'me daloĝo'n qaedi yovidedeta ga'me 'lañaĝa. 44Ga'me jiyaĝa'u laqaya' qamqa'me p'atedegue en latoqo ga'me epa'qaelo uotaĝa lael jaga'me licota. Chane'eja qadiyamaqachiñe da'me jovidaĝa'ta ga'me 'lañaĝa.
Currently Selected:
Hch 27: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina