Lukas 4
4
Jesus ma lolwa
(Mat. 4:1-11; Mark. 1:12-13)
1 Jesus wa dha koJordan ae yula Ombepo Ondhilikwa. Ombepo hai mu twala mokuti, 2hoka omudiapoli hwee mu lola omatango omilongo vine. Omatango ngoka ke na hiaa lya. Iya omatango ngoka hiaa piti po, wa li aa t̯a ondjala.
3Omudiapoli we mu heela ha tyaa: “Andaa oove OmunwaKalunga, heela ewe hendi, li tjituke omungome.”
4Jesus we mu yaka ha tyaa: “Kwa sonekwa amaku tiwaa: ‘Hakomungome awiika omuntu ma ulu okukala nomwenyo.’ ”#Deut. 8:3
5Iya omudiapoli we mu twala kondundu onde, he mu yulikile ovilongo avihe vyomouye mepathaelo limo, 6ha tyaa: “Etumino hendi alihe netumbalo lyalyo me ku pa lyo, mena lyokutya ame mbe li pewa, me li yandja kungoka ngume hala. 7Ove andaa mo ntumbaleke, avihe hembi mavi ningi ovyoye.”
8Jesus we mu yaka ha tyaa: “Kwa sonekwa okutyaa: ‘Muhona Kalunga koye u tha oku mu tumbaleka, oye vala aika wa thele okuundapela.’ ”#Deut. 6:13
9Iya omudiapoli wa twala Jesus koJerusalem, he mu londeke kohulo yotempeli, he mu heele ha tyaa: “Andaa oove OmunwaKalunga, lombokela pohi, 10mena lyokutya kwa sonekwa okutyaa:
‘Ye ma heele ovaengeli ve,
ve ku amene,#Eps. 91:11
11wo ve ku tjinde momawoko awo,
opo hó tono ompadhi yoye kewe.’ ”#Eps. 91:12
12Jesus we mu yaka ha tyaa: “Kwa tiwaa: ‘Hó lolo Muhona Kalunga koye.’ ”#Deut. 6:16
13Iya omudiapoli hiaa mana omatyoletho aehe, wa dha po puye nkele.
Jesus ma i koGalilea
(Mat. 4:12-17; Mark. 1:14-15)
14 Jesus wa tjuna koGalilea, ha endethwa kodhonkono dhOmbepo yaKalunga. Iya omipopyo ouhunga naJesus vya ya noulongo auhe wopoulaanganda. 15Ye we ve longela modhosinagoga dhawo, avehe have mu tumbaleke.
Jesus moNasaret
(Mat. 13:53-58; Mark. 6:1-6)
16 Jesus we ya koNasaret, moka mwaa kulila, ha i mosinagoga metango lyEsabati ngahi a ninganinga ae. Wa kulama a tange, 17ha pewa edhingwambo lyomuprofeti Jesaja. Hiaa dhingulula edhingwambo he lipumu pompuka mpapa sonekwa okutyaa:
18“Ombepo yaMuhona i li kombanda yandje,
mena lyokutya ye wa ntjolowola
ndji ka teethele ovathona ondaka ombwa.
Wa ntuma ndji teethele ovakambulwa ekutululo
novapot̯i epathumuko,
ndji yandje kovatatethwa ekutululo,#Jes. 61:1-2
19ndji ivithe okutya otembu ye thiki,
Muhona hima hupitha ovantu ve.”
20Iya hiaa t̯iti embo, we li pa omupopili, ye ha kala pohi. Ovantu avehe mbava li mosinagoga ve mu tongolola. 21Jesus wa uta oku ve heela ha tyaa: “Ndino hendi esoneko hendi lya hwithilwa po, ngahi mwa tee.”
22Avehe ve mu hipulula nawa, have kuminwa odhondaka ndhoka dhonkenda ndhaa dha motjinyo tje, hava tyaa: “Nan̯i hengu hamunkwaJosef?”
23Jesus we ve heela ha tyaa: “Ndji tji i nawa okutya mamu hala okuntjeela eeli hendi ndimali tyaa: ‘Tjimbanda lihakula omwene.’ Ovipuka mbitwa tyaa mbyaa ningwa moKapernaum, vi ninga wo muno moyen̯i.” 24Ye we ve yaka ha tyaa: “Me mu heele otjatjili, kaku na tja omuprofeti ngwaa tumbala mondolopa yawo.#Joh. 4:44
25“Me mu heele otjatjili okutya moIsrael mwa li ovahepe ovengi potembu yaElia, hikwa li ondjala onene motjilongo atjihe, mena lyokutya kai lokele oule wodhombula ndatu nomiedhi epandu.#1 Hamb. 17:1 26Elia ka tuminwe kovahepe wokoIsrael, iya wa tumwa komuhepe wokoSarepta, okalongo komoSidon.#1 Hamb. 17:8-16 27MoIsrael mwa li ovavedhi wovilundu ovengi potembu yomuprofeti Elisa, iya kaku velulilwe noumo, oNaeman Omusiria vala aika a velulwa.”#2 Hamb. 5:1-14
28Ovantu avehe mbava li mosinagoga hiva tee otjipuka hehi, va li ava yumana unene. 29Va kulama, have mu lamba mo mondolopa, have mu twala kontyo yondundu ndjoka ondolopa yawo huya tungilwa, ve ke mu yundulile pohi. 30Iya Jesus wa dha mo mokati kawo, ha i.
Omulumentu ngwaa li nombepo yondemoni ma velulwa
(Mark. 1:21-28)
31 Jesus wa ya koKapernaum, kotjitungwalongo tjaGalilea, ha utu okulonga ovantu mEsabati. 32Wo ve kuminwa elongo lye, mena lyokutya odhondaka dhe dha li nodhonkono.#Mat. 7:28-29 33Mosinagoga mwa li omulumentu ngwaa li nombepo ombi yondemoni. Ye wa wololoka ha tyaa: 34“Utatyei, Jesus Omunasareta, mo tu halele tji? We ya oku tu han̯auna? Ndji ku i, oove Omudhilikwa waKalunga.”
35Jesus wa anda ombepo ha tyaa: “Tutuvala, pita mo muye.” Iya ondemoni ye mu sata po mokati kovantu, yo hai dhi mo muye, ahamai mu ihameke.
36Ovantu avehe ve kumwa unene, hava i mokulipula hava tyaa: “Elongo patji hendi? U heela odhombepo odhombi netumino nodhonkono, dho hadhi dhi mo.” 37Etumbuko lyaJesus lya handjana noulongo wopoulaanganda.
Inaivi yaSimon novavedhi ovengi mava velulwa
(Mat. 8:14-17; Mark. 1:29-34)
38 Jesus wa dha mosinagoga, ha i koyooSimon. Inaivi yaSimon wa li aa kambulwa unene kelema, wo have mu dhimbula kuJesus. 39Jesus wa hweena kuye, ha anda elema, lyo hali dhi mo. Inaivi wa kulama po dhivadhiva, he ve twiile po ovikulya.
40Iya etango hilya hiti, ovantu avehe mboka mbava li novavedhi womauvela ngae lili nangae lili, ve ve eta kuJesus. Ye wa tendeka omawoko e komuvedhi auhe, wo avehe he ve velula. 41Odhondemoni wo dha dha mo movengi, hadhi wololoka hadhi tyaa: “Oove OmunwaKalunga!”
Iya Jesus we dhi anda, ye ke dhi yethele dhi popye, mena lyokutya dha li adhi mu i okutya ye oye e li Messias.
Jesus ma teetha moJudea
(Mark. 1:35-39)
42Iya hikwa tji, Jesus wa pita mo, ha i kompuka hoka huhaku na tja ovantu, owingi wovantu we mu taendha. Hive thiki puye, ve mu tjaela, opo há dhi po puwo. 43Iya we ve heela ha tyaa: “Mba thele wo okuteethela ovitungwalongo vimo ondaka ombwa yotjilongo tjaKalunga, mena lyokutya hehi otjo mba tuminwa.”
44Iya Jesus wa li ama teethele modhosinagoga dhomoJudea.
Currently Selected:
Lukas 4: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.