2 Ovatessalonika 3
3
Tu kumbilen̯i
1Vakwetu, iya tu kumbilen̯i, ondaka yaMuhona opo i tjiiwe okuhandjana, i ka tumbalekwe ngahi i tumbalekwa kun̯e. 2Tu kumbilen̯i, tu hupithwe movantu ovavi nomodhomputji, mena lyokutya havantu avehe va itavela ondaka yaMuhona.
3Muhona omuliun̯ikwa me mu pameke, ye me mu amene kouvi. 4Tu na eliun̯iko muMuhona ngahi twe liun̯ika mun̯e, okutya napano nokomeho mamu ningi ovipuka mbyoka mbitwe mu heela.
5Iya napano Muhona nga viyule omitima vyen̯i mu kale amu hole Kalunga, n̯e mu kale noutakamethi waKristus.
Hámu kala nondende
6Vakwetu, matu mu heele mena lyaMuhona Jesus Kristus. Kalen̯i kokule novantu mboka mbahava hala okuundapa, wo mbahava tee hitu mu longa. 7N̯e ovene mu tji i nawa okutya mwa thele oku tu holela, mena lyokutya nt̯e katwa li nondende nahi hitu kala nan̯e. 8Nt̯e nahi katu li ovikulya otjali pomuntu nokanunu, iya tu undapa nodhonkono omutenya nout̯iku, katu yandjele oudheu komuntu noumo mun̯e. 9Hehi katu tji ningile vala mena lyokutya tu na odhonkono, iya twe tji ninga mena lyokutya mu ithe ko otjiholelwa, opo mu tu holele. 10Hitwa li pamo nan̯e, twe mu heelele okutyaa: “Nguhama hala okuundapa, há li.”
11Twa tyaa okutya mokati ken̯i mu na ovantu vamo, mbave na ondende, mbahave na hiva undapa, mbava tjivauluka vala. 12Iya napano ovantu mbave li nyahoka, matu ve londola amatu ve pukulula muMuhona Jesus Kristus okutya ngava tutuvale, ve liundapele ovikulya vyawo ovene.
13Iya vakwetu, hámu poyola, undapen̯i ouwa. 14Andaa pe na omuntu nguhama tee odhondaka dhetu ndhii li momikanda hembi, omuntu ngoka hámu liende, opo a t̯ithwe ohon̯i. 15Hámu mu ningi ngondjedhi, iya mu pukululen̯i ngomwiitaveli mukwen̯i.
Omameneko
16Iya napano Muhona nguu yandja ouwa, nge mu pe ouwa apehe. Muhona nga kale pamo nan̯e amuhe.
17Aame Paulus, me mu menekele po, mba soneke nokuwoko kwandje omwene. Otjo ndji soneka hinyahi omikanda vyandje.
18Et̯ilonkenda lyaMuhona wetu Jesus Kristus ngali kale nan̯e amuhe.
Currently Selected:
2 Ovatessalonika 3: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.