1 Timoteus 3
3
Ovaviyuli veongalo
1Ondaka hendji oyatjatjili ndjimai tya omuntu nguma hala a kale omuviyuli weongalo, ma hala otjilinga otjiwa. 2Omuviyuli weongalo ka tha okukala nombedhi, u tha okukala nomukadhintu umo, nguu liyunga nawa, onkengela, nguu na onkalo ombwa, nguu yakula ovayenda, nguma ulu okulonga ovantu,#Tit. 1:6-9 3hankolwe, hampuhi, iya omuntu nguu na olweembya, nguha tanguna, nguhe na olwiho nodhombongo. 4Omuviyuli weongalo u tha okukala omuntu nguu tji i okutekula onganda ye. Odhondele dhe va tha okutila ovantu. 5Omuntu andaa kaa ulu okutekula onganda ye, ma ulu vi okutakametha eongalo lyaKalunga? 6Omuviyuli ka tha okukala omuntu ngoka ngwaa dhi pokuliteyulula, mpe me linomo, ha yumanekwa ngahi tja yumanekwa omudiapoli. 7Nga kale omuntu nguu tumbalekwa nokovantu mbahave thi ovakwaneongalo, opo há penywa, ye ahama i momoo womudiapoli.
Ovapopili veongalo
8Ovapopili veongalo va tha okukala ovantu mbava pukuluka, mbahave na ovithithi. Kava tha okukala odhonkolwe ne mbave na olwiho nodhombongo. 9Wo va tha okukambulitha otjiholekwa tjeitavelo melityoo ewa. 10Ovantu hemba olutenga va tha wo okutalwa, andaa kava monekele ombedhi, opo mave tjiiwa okwiila ovapopili veongalo. 11Ovakadhintu wovapopili va tha okukala ovantu mbava pukuluka. Kava tha okukala ovantu womalwaambo. Kava tha okukala odhonkolwe. Va tha okukala ovaliun̯ikwa movipuka avihe. 12Omupopili weongalo u tha okukala nomukadhintu umo, ye nga kale ae tji i okutekula ovana nonganda ye. 13Mbamava undapa nawa ovilinga vyawo, mava ka mona etumbalo meongalo. Mava kala nouvandhi meitavelo okwiitavela Kristus Jesus.
Eongalo onganda yaKalunga
14Ame nandaku tiwa ndji na eliun̯iko okuya dhiva kwoove, me ku sonekele omukanda hembu, 15opo andaa hí dhile dhiva, omukanda hembu u ku heele hitu tha okukala monganda yaKalunga. Onganda hendji oyo i li eongalo lyaKalunga nguu na omwenyo, ndii li ongundhi nekulameno lyatjatjili. 16Kape na tja omuntu nguma tetha ombata okutya otjiholekwa tjeitavelo lyetu otjinene:
Kalunga we ya molutu,
Ombepo ye mu yulika okutya omuvyuuki,
wa moneka kovaengeli.
Wa teethelwa mokati koviwan̯a,
wa itavelwa mouye,
ha twalwa meulu.
Currently Selected:
1 Timoteus 3: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.