DEUTERONOMION 20
20
Eemhango domoita
1“Ove ngeenge to ka homona koita okulwifa omutondadi woye ndele to mono eenghambe nomatemba oita, novanhu vahapu ve ku dule, ino va tila. Osheshi Omwene Kalunga koye, e ku pitifa mo medu laEgipiti, e li pamwe naave. 2Nye ngeenge tamu li longekidile olwoodi, omupristeli e nokweehena popepi nokupopifa ovanhu, 3ndele ye e noku va lombwela: ‘Ovaisraeli, udeni! Nye otamu lilongekidile olwoodi lwovatondadi nena eli. Inamu limbililwa, inamu tila, inamu kakama ndele inamu va haluka. 4Osheshi Omwene Kalunga keni, ota ka ya pamwe nanye okulwifa ovatondadi veni, opo e mu pe efindano.’
Ovalumenhu ava vehe nokuya kolwoodi
5“Nomalenga naa popife ovanhu ndele naa tye: ‘Ou e lidikila eumbo lipe, ndele ine li yapula, ye na shune keumbo, opo aha file molwoodi, nomukwao te li yapula. 6Nomulumenhu ou a twika oshikokola shomiviinyu, ndelenee ina teya natango oiimati yasho yotete, na shune keumbo laye, opo aha file molwoodi, namukwao ta teya oiimati yasho yotete. 7Ndele omulumenhu ou a valeka omukainhu, ndele ine mu hombola natango, na shune keumbo, opo aha file molwoodi, ye umwe ta hombola omuvalekwa waye.’ 8Omalenga naa popife vali ovanhu noku va lombwela: ‘Ou ha tila ndele e noumbada, na shune keumbo, opo vakwao yo vaha kanife onyati yavo ngaashi winya.’ 9Ndele omalenga eshi a lombwela ovanhu edi, naa nangeke mo ovakulunhu vomatanga va kwatele ovanhu komesho.
Eemhango dokuyukifa oilando ya kwatelwa moita
10“Nye ngeenge tamu ehene popepi noshilando mu shi lwife, mu noku shi shiivifila okukalafana nombili. 11Ndele vo ngeenge tave mu nyamukula nombili, ndele tave shi mu yeululile, oonakukalamo aveshe musho, ve nokuninga ovalongeli veni noku mu longela. 12Ndelenee vo ngeenge itava pange ombili nanye, ndele va hala okulwa nanye, nye mu noku shi fitikinina. 13NOmwene Kalunga koye ote shi yandje momake oye, ndele ove u nokudipaa neongamukonda ovalumenhu aveshe ve li mo. 14Ovakainhu aveke nounona noimuna naashishe shi li moshilando, heeno, oixuulwa aishe u nokulitinhila, ndele u nokulya oihakanwa ei Omwene Kalunga koye e ku pa. 15Osho u nokuninga oilando aishe ei i li kokule naave, oyo inai nangalwa koiwana ei. 16Ndelenee ovanamwenyo ava ve li moilando yoiwana ei, Omwene Kalunga koye, te i mu pe efyuululo, ino va xupifa nande umwe. 17Ndelenee ove u noku va komba po sheke: Ovaheti nOvaamori nOvakaanan, nOvaperesi nOvahevi nOvajebusi, ngaashi Omwene Kalunga koye e ku lombwela. 18Opo vo vehe mu longe okulonga oixuna yavo, oyo ve i ningila oikalunga yavo, ndele nye otamu nyono kOmwene Kalunga keni.
19“Ove ngeenge u nokufitikinina oshilando noku shi lwifa efimbo lile, u shi nangale, ino hanauna po omiti dasho, ino di tetifa po ekuva loye. Lya oiimati yado, ndelenee ino di ka po, osheshi omiti domoixwa kadi fi ovatondadi voye, u di fitikinine mo. 20Omiti edi adike u di shii, itadi imi oiimati hai liwa, ove oto dulu oku di nyona po noku di ka po nokudikifa oikelelifoshiyo fimbo to lwifa oshilando shi li moita naave, fiyo tashi tewa.
Currently Selected:
DEUTERONOMION 20: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.