DEUTERONOMION 19
19
Oihondamenolando
1“Omwene Kalunga koye ngeenge ta hanauna po oiwana, edu layo Omwene Kalunga koye te ke li ku pa, ndele ove to va te mo moshilongo shavo, ndele ove ho kala moilando yavo nomeengulu davo, 2opo nee ove u nokulihoololela oilando itatu moshilongo shoye Omwene Kalunga koye te ke shi ku pa u shi nangele. 3U noku li ningila ondjila nokutukula oshilongo shoye, Omwene Kalunga koye te ke shi ku fyuululifa, oitukulwa itatu, opo keshe ou a dipaa omunhu ta dulu okuya ko onhapo.
4“Nonghedimhango yaau a dipaa, ndele ta dulu okuya ko onhapo, a xupife omwenyo waye, oyei: Ngeenge pe na ou a dipaa mukwao ine shi teelela, ye ine mu tonda onghela nongheleinya, 5naau ta i pamwe namukwao momufitu, va ka komangela omiti, ndele ta yelula eke laye li nekuva, a ke po omuti, ndele ekuva tali xukuka mo momupini, ndele tali shashe mukwao, ndele ta fi, oye e nokuya onhapo koshilando shimwe shomoilando oyo, opo a kale nomwenyo. 6Opo omupuli wohonde mokuhanduka kwaye nomokushikula omudipai ehe mu hange ondjila ngeenge oile, ndele e mu dipae po, nande winya ke netimba, shaashi ina tonda winya onghela nongheleinya. 7Onghee hano ohandi ku lombwele ndele handi ti: Lihoololela oilando itatu.
8“NOmwene Kalunga koye ngeenge ta tandavelifa oshilongo shoye, ngaashi a udanekela ooxo nokwaana, ndele te ku pe edu alishe olo, Ye a udaneka e li pe ooxo. 9Ove ngeenge oho diinine shili oipango aishe ei, ame ohandi ku lombwele nena eli, opo u kale nokuhola Omwene Kalunga koye ndele ho ende alushe neendjila daye, ove u nokuweda ko natango itatu koilando ei itatu, 10opo ohonde ihe netimba iha tilweshi moshilongo shoye, Omwene Kalunga koye te ke shi ku pa efyuululo, opo uha kale u netimba.
11“Ndelenee umwe ngeenge ta tondo mukwao ndele te mu nangele, ndele te mu nhukile, ndele te mu denge, Ye ta fi, ndele winya ta i onhapo koshilando shimwe shomoilando oyo, 12opo nee ovakulunhu voshilando tave ke mu tala ko noku mu kufa mo ndele ve noku mu yandja momake omupuli wohonde, opo a fye. 13Ino mu fila onghenda, ndelenee u nokudima po muIsrael ou a tilashi ohonde ihe netimba, opo u kale u nelao.
Ino lundulula ongaba
14“Ino lundulula omufinda wongaba yamukweni, wa findilwa oshitukulwafyuululwa shaye komapupi onale, moshilongo sheni, tamu ke shi pewa kOmwene Kalunga keni, opo mu shi nangale.
Omuhepaululi omunaipupulu na handukilwe
15“Omuhepaululi umwe auke ina wana okupwilikinwa moihokolola komunhu ngee moshilonga shii ile metauluko ile metimba keshe eli lomunhu. Eendjovo di nokupamekwa kovahepaululi vavali ile vatatu.
16“Omuhepaululi omunaipupulu ngeenge ta hokololifa omunhu noku mu pa oushima omolwetauluko, 17opo nee ovalumenhu aveshe vavali ava hava twilafana eemhata ve nokuholoka koshipala shOmwene moipafi yovapristeli nomoipafi yaava ve li ovatokoli veendjovo pefimbo olo. 18Ovatokoli nava konakone shili eendjovo, nomuhepaululi ngeenge omunaipupulu, ou a hokololifa mukwao nande ke netimba, 19ye na ningwe ngaashi kwa li a hala okuningila omukwao. Dima po owii mokati keni. 20Novakwao ngeenge tave shi udu otava kala nokutila, opo paha kale vali ou ta ningi owii wa tya ngaha mokati keni. 21Ino mu fila onghenda: omwenyo omomwenyo, eisho omeisho, eke omeke, omhadi omomhadi.
Currently Selected:
DEUTERONOMION 19: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.