DEUTERONOMION 21
21
Ekwatakanifo letimba lomudipai ina shiivika
1“Moshilongo osho Omwene Kalunga koye, te ke shi ku pa, ove u shi nangale, nge tamu monika umwe ou a dipawa, ta nangala moixwa, ndele inapa shiivika olyelye e mu dipaa, 2opo nee ovakulunhu veni novatokoli veendjovo ve nokuya ko nokuyeleka oule weendjila dokoilando tai dingilile onhele oyo muyo omudipawa ta nangala; 3ndele oshilando shi li popepi nomudipawa, nokutya ovakulunhu voshilando ve nokukufa ondema imwe inai longifwa, oyo inai mangwa natango kondjoko. 4Novakulunhu voshilando osho ve nokutwala ondema oyo kefilu lomakungulukilomulonga ihaa pwiinine, mefilu olo inamu pululwa noinamu kunwa. Mefilu tuu olo ve nokuteya ondema ofingo. 5Opo nee ovapristeli, ovana ovamati vaLevi ve nokuuya ko, osheshi Omwene Kalunga koye, e va hoololela oku mu longela noku mu nangeka noupuna medina laye, ndele paendjovo davo detokolo eemhata keshe noshilonga keshe shii tashi tokolwa. 6Novakulunhu aveshe vomoshilando osho shi li popepi nomudipawa, ove nokukosha omake avo kombada yondema, ofingo yayo ya teywa po, 7ndele vo ve nokuhepaulula tava ti: ‘Omake etu inaa tila shi ohonde ei, nomesho etu inae shi mona. 8Akutu Omwene, kwatakanifa ovanhu voye Ovaisraeli, Ove we va xupifa, nohonde ihe netimba iha kale kombada yovanhu voye Ovaisraeli. Dima po etimba lohonde muvo.’ 9Osho ngaha u nokufeta po ohonde ihe netimba mokati keni, osheshi ove u nokulonga, eshi sha yuka momesho Omwene.
Okuhombola ovakainhu va kwatwa moita
10“Ove ngeenge to ka homona moita okulwifa ovatondadi, nOmwene Kalunga koye te ve ku pe momake oye, ndele to ka kwata ko eenghwate, 11ndele meenghwate to mono mo omukainhu e nondjelo ya wapala, ndele u mu hole, ndele to mu hombola, 12ove u noku mu eta meumbo loye. Ndele ye e nokukululifa eexwiki dokomutwe waye nokuteta eenyala daye. 13Ndele ye e nokulidula oikutu yaye, e i djala ye eshi a kwatwa po; na kale meumbo loye, ndele na itavelelwe okulila eefya daxe nodaina ohani imwe. Opo nee ove to shiiva okuya mo kuye noku mu hombola, ndele ta ningi omwalikadi woye. 14Ndele ove ngeenge ino mu hala vali, mu lekela hano ngaho; ino mu landifa po oimaliwa, ino mu hepeka, osheshi ove we mu fifa ohoni.
Oushiveli
15“Omulumenhu ngeenge e novalikadi vavali, umwe ou e holike kuye nomukwao ehe mu hole, ndele vo tave mu dalele ovana ovamati. Omwalikadi ou e holike kuye, na winya ehe mu hole, noshiveli oshomukainhu ou ehe holike. 16Opo nee mefiku olo ye ta tukulile ovana vaye ovamati efyuululo lemona laye, ye aha xutule oshiveli, omona waau ehe holike, a tule po komesho omona womuholike waye, e mu pe efyuululo loushiveli, 17ahowe, oshiveli shaau ehe holike, oye e noku shi yukifila noku shi pa oitukulwa ivali yomoinima yaye aishe, osheshi sho oshiveli sheenghono daye. Oushiveli owasho.
Ovana ovakolokoshi ve nokudipawa
18“Umwe ngeenge e nomona omumati omupwidi a lunduka, ye ina hala okuuda xe naina, ye iha dulika, nande ve mu denge, 19hano xe naina, vo ve noku mu twala kovakulunhu voshilando noponhu yonhele yavo, 20nokulombwela ovakulunhu voshilando, tava ti: ‘Omona wetu omumati, omupwidi nokwa lunduka, ye ita udu ko ondaka yetu, omuhanauni nongholwe.’ 21Opo nee ovalumenhu aveshe vomoshilando ve noku mu dipaa nomamanya. Osho ngaha hano mu nokudima po owii mokati keni; naIsrael ashishe tashi ke shi uda nokutila.
Oonakweendjelela momuti
22“Ndele ngeenge umwe ta nyono e netimba lokufya ndele ta dipawa po, okwa pondelwa momuti, ndee ta endjelela mo, 23oshimhu shaye shiha kale momuti oufiku, ndelenee mefiku tuu olo mu noku shi paka shili. Osheshi ou a endjelela momuti, oye omufingwa waKalunga. Ndelenee nye inamu nyateka oshilongo tamu ke shi pewa kOmwene Kalunga keni efyuululo.
Currently Selected:
DEUTERONOMION 21: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.