DEUTERONOMION 24
24
Eemhango domahengafano
1“Omulumenhu ngeenge ta kufa omukainhu, ndele te mu hombola, ndelenee ine mu hala vali, osheshi ye okwa mona sha muye showii, ndele te mu shangele ehenganomushangwa ndele te li mu pe momake aye, ndele te mu lekele meumbo lavo, 2ndele ye ota di mo meumbo laye ndele ta ka hombolwa komulumenhu umwe, 3nomulumenhu tuu ou omutivali yo ine mu hala, ndele te li mu shangele ehenganomushangwa, ndele te mu pe momake aye, ndele te mu lekele, ta di meumbo laye, ile omulumenhu waye wa xuuninwa ou e mu hombola, ta fi, 4opo nee omulumenhu waye wotete, ou e mu lekelele, ehe mu tambule omwalikadi waye, ye eshi e linyatekifa, osheshi osho oixuna koshipala shOmwene, ndele ove ino nyatekifa oulunde oshilongo, Omwene Kalunga koye, te ke shi ku pa efyuululo.
5“Umwe ngeenge a hombola omukainhu mupe, ye ke nokuya koita, ye ke nokufininikilwa keshe oupyakadi. Na kale meumbo laye omudo umwe, ye na hafife omwalikadi waye, ou e mu hombola.
Eemhango dimwe di lili
6“Paha kale nande umwe ta kufa po oshini ombabyona, nonande emanya loshini lokombada, osheshi ye ota kufa po omwenyo ombabyona.
7“Umwe ngeenge ta hangika a vaka Omuisraeli mukwao, ndele e mu hepeka, ile e mu landifa po omupika, hano omulunga ou na dipawe. Dima po owii mokati keni.
8“Lungameni oudu woshilundu, ove u diinine shili nokuwanifa omapukululo aeshe tamu longwa kovapristeli Ovalevi. Ame ngaashi nde va lombwela, nye mu noku shi diinina shili. 9Dimbulukwa Mirjam, Omwene Kalunga koye, nhumbi e mu ninga mondjila, ove eshi wa dja muEgipiti.
10“Omukweni ngeenge to mu pe eengele dakeshe eshi, ino ka ya meumbo oku mu kufa ombabyona. 11Ove u nokukala ofika pondje, nomulumenhu ou e ku lila eengele, ne ku etele pondje ombabyona. 12Ndele ye ngeenge omulumenhu omukwanaluhepo, ino ka nangala, u nombabyona yaye. 13Ove u noku mu alulila ombabyona fimbo etango inali ningina, opo a shiive okunangala moshikutu shaye, ndele te ku nangeke noupuna; ndele sho otashi ku valulilwa ouyuki koshipala shOmwene Kalunga koye.
14“Omulongeli wondjabi ohepele, ino mu hepeka, ngee umwe wovakweni ile omunailongo, ou ha kala moshilongo sheni peenhu doye. 15Mu pa ondjabi yaye mefiku tuu olo, etango fimbo inali ningina mo, osheshi ye ohepele, ndele a hala ondjabi yaye, opo aha kuwe kOmwene omolwoye ndele ove u mone etimba.
16“Ooxe vaha dipaelwe ovana, novana vaha dipaelwe ooxe. Keshe umwe e nokufya omolwoulunde waye mwene.
Ovanawike nava filwe onghenda
17“Ino pengifa ouyuki womunailongo ile ofiye, ndele ino kufa ko omufiyekadi oshikutu shaye ombabyona. 18Dimbulukwa ove wa li omupika muEgipiti, Omwene Kalunga koye okwe ku xupifa mo. Onghee hano ame ohandi ku lombwele u wanife eshi.
19“Mokwoongela kwoye oilya mepya loye ngeenge wa dimbwa ko oshipandi shimwe, ino shuna ko u ke shi tale ko. Sho nashi ninge shomunailongo noshofiye noshomufiyekadi, opo Omwene Kalunga koye a shiive oku ku nangeka noupuna moilonga aishe yomake oye.
20“Ove ngeenge to nyeme eemono doye, ino endulula vali, u konakone moitai yado. Odo da fyaala ko, nadi ninge dovanailongo nodeefiye nodovafiyekadi.
21“Ove ngeenge to teya oshikokola shoye shomuviinyu, ino shi pupudulula, odo da fyaala ko nadi ninge dovanailongo nodeefiye nodovafiyekadi. 22Dimbulukwa, ove wa li omupika muEgipiti, onghee ohandi ku lombwele u longe ngaha.”
Currently Selected:
DEUTERONOMION 24: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.