DEUTERONOMION 23
23
Oolyelye itava tambulwa meongalo lOmwene
1“Omulumenhu ou a fenghenyenwa ile a tetwa omatondo, ine uya meongalo lOmwene.
2“Omulatu nande umwe ita dulu okukala meongalo lOmwene; nande umwe womoludalo lwaye ita dulu okuuya moshiongalele shOmwene.
3“Omuammoni ile Omumoabi nande umwe ine uya meongalo lOmwene. Fiyo kepupi lavo etimulongo, ye ine uya meongalo lOmwene. 4Osheshi vo, nye eshi mwa dja muEgipiti, inave mu shakeneka mondjila nomingome nomeva. Ndele vo va yandja ondjabi kuBileam yaBeor, ou a dja muPetor muMesopotamia, oku mu lyangula. 5Ndelenee Omwene Kalunga koye ina uda Bileam. Ndelenee Omwene Kalunga koye a lundulula efingo, la ninga enangeko noupuna, osheshi Omwene Kalunga koye okwa li e ku hole. 6Ino va halela ombili nelao nande, fimbo u nomwenyo, heeno, fiyo alushe.
7“Omuedom, ino mu tala ye omutondadi, osheshi ye omukweni. Omuegipiti ino mu tonda, osheshi ove wa li omunailongo medu lavo. 8Oludalo lavo lomepupi etitatu nali tambulwe meongalo lOmwene.
Oukoshoki womonhanda
9“Ove ngeenge to homona moita u lwife ovatondadi, ndele to ongo onhanda, lungama keshe oixuna, eshi inashi wapala. 10Punye ngeenge ope na umwe te linyateke oufiku, ye e nokuya pondje yonhanda. Ehe nokwaalukila monhanda. 11Ndelenee onguloshi ye e nokulikosha momeva, ndele etango eshi tali ningine mo, ye ta dulu okuuya mo. 12Ove u nokulihoololela onhele pondje yonhanda, noko u nokuya okulivatela. 13Mekutu loye mu nokukala okaxupuloshiti. Ngeenge to ke livatela pondje, u nokufa nako, naashi sha dja mwoove u noku shi fufila. 14Osheshi Omwene Kalunga koye ota ende mokati konhanda yoye oku ku xupifa nokuyandja ovatondadi voye momake oye. Onghee hano onhanda yoye i nokukala ya yapulwa, Ye opo aha mone sha shoififahoni pwoove, ndele aha pilamene kwoove.
Eemhango di lili nadi lili
15“Omupika ou a dja po pomwene waye nokwe uya kwoove, ino mu yandja momake omwene waye. 16Ye e nokukala pwoove, mokati keni, monhele tuu ei, ye ta hoolola meni loshivelo shoshilando shimwe shomoilando yoye, omo ye e udite ouwa. Ino mu fininika.
17“Movana oukadona Ovaisraeli muha kale nande ombwada, ndele movana ovamati Ovaisraeli muha kale nande omumati omufifahoni.
18“Mongulu yOmwene Kalunga koye, ino eta mo oyoonda yomuhaelwa ile ofuto yombwa komaudanekoyambo. Osheshi yo aishe ivali oixuna kOmwene Kalunga koye. 19Omukweni ino mu pula oshishoshela shoimaliwa ile sheendja ile sha shimwe shi lili, ovanhu tave shi pula mokuyandja eengele. 20Omunailongo ove oto dulu oku mu pula oishoshela, ndelenee ino shi pula komukweni, Omwene Kalunga koye, opo a shiive oku ku nangeka noupuna moinima aishe to i ningi medu olo ove to i mo u ke li nangale.
21“Ove ngeenge to udanekele Omwene sha, ino dimbwa oku shi wanifa yo. Osheshi Omwene Kalunga koye, ote ke shi pula shili kwoove ndele tashi ka ninga etimba loye. 22Ndelenee ngeenge ino udaneka eudaneko, ito ka pewa oushima. 23Odo omilungu doye tadi popi, u noku di diinina nokuninga eshi we shi udanekela Omwene kehalo liwa, heeno, odo we di tonga nokanya koye.
24“Ngeenge to uya moshikokola shamukweni shomiviinyu, ove to dulu okulya eeviinyu di fike pahalo loye, ndelenee ino tula sha moshimbale shoye.
25“Ngeenge to uya mepya lamukweni, ove to dulu okupolola omasha. Ndelenee oshikashulifo ino shi kufa, u kashule po oilya.
Currently Selected:
DEUTERONOMION 23: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.