Matayo 4
4
Erɨlengwako lya Yesʉ
(Mar 1:12-13; Luk 4:1-13)
1Honyuma kw'aho oMʉthɨma Mwerʉ mwathwala Yesʉ mo mbwarara bʉshana ayalengweko na Sitani. 2Abere amamala iyima akalyo bɨro makumi ane kɨro na mwɨshɨ mwafwa nzala. 3Sitani, yo ʉnalenga ko bandʉ, mwayɨfʉnda hofɨ naye n'ɨmʉbwɨra athɨ: «Wamabya ʉlɨ Mʉgala wa Gongo, hamʉla amabwe aya ahɨndʉke mikati.» 4Yesʉ mwashubya athɨ: «Kushakirwe kʉthɨ: “Omʉndʉ athɨndabyeho bʉshana n'emikati mɨsha, he bʉshana n'obʉlɨ kɨnwa kyo kɨthoka mo bʉnʉ bwa Gongo.”#4:4 Ɨbʉka Mʉgomba 8:3.»
5Aho Sitani mwamʉthwala ɨYerʉsalemʉ, omuyi mubuyirire, n'ɨya muhira ko mʉnara w'eNyʉmba ya Gongo, 6n'ɨmʉbwɨra athɨ: «Wamabya ʉlɨ Mʉgala wa Gongo, yɨgʉshe ahishi, kʉshangwa kushakirwe kʉthɨ:
“Gongo andahamʉla abamalaɨka bʉwe,
nabo bandakʉheka mo minwe yabo,
bʉshana ekɨshando kyawe kɨthatsɨkalaga kw'ibwe.”#4:6 Saburi 91:11-12.»
7Yesʉ mwamʉbwɨra athɨ: «Kuthyo, kushakirwe kʉthɨ: “Ʉthalengaga kʉ Nyinya-kowethʉ Gongo wawe.”#4:7 Ɨbʉka mʉgomba 6:16.»
8 Sitani mwashʉba mʉthwala ko kɨthwa kɨre-kɨre, n'imukangya amamɨ woshi w'omo kɨhʉgo n'olʉkengerwa lwawo, 9n'ɨmʉbwɨra athɨ: «Wamafʉkama embere s'aye n'inyiramya, nɨnyakʉha amamɨ woshi aya.» 10Aho Yesʉ mwamʉbwɨra athɨ: «Thoka hano, Sitani! Kushakirwe mo mashako kʉthɨ: “Uramye Nyinya-kowethʉ Gongo wawe na ʉmʉkolere ɨye yowene mʉsha.”#4:10 Ɨbʉka mʉgomba 6:13.» 11Aho Sitani mwamumika. Aho n'aho abamalaɨka mobahika ahalɨ Yesʉ n'ɨthanga imuwathikya.
Yesʉ athangɨra omʉlɨmo ʉwe iNgalilaya
(Mar 1:14-15; Luk 4:14-15)
12Yesʉ abere onvwa ko Yoani#4:12 Yoani alɨ mo birisoYo wahʉlwa hano nɨ Yoani Mubatisya. Soma 14:3. alɨ mo biriso, mwaya iNgalilaya. 13Mwathoka iNasareti, mwaya ikala ɨKaperenaʉmʉ, muyi alɨ ko mʉsɨke w'engetsɨ y'iNgalilaya, mo kɨhʉgo kya Sabuluni n'ekya Nafutali.#4:13Sabuluni n'ekya Nafutali: Nɨ bɨhanda bɨbɨrɨ bya kera by'aBaisiraeli bɨrɨ ko mʉnda lʉgʉlʉ w'ekɨhʉgo ky'Isiraeli. 14Mwakola athyo bʉshana bɨbererere ebɨnwa ebyo byanegenawa kw'ɨtsʉkɨra omʉmɨnyeretsɨ Isaya bɨthɨ:
15«Kɨhʉgo kya Sabuluni na kɨhʉgo kya Nafutali,
erɨlolera ko ngetsɨ, ko mʉnda ishirya w'olwitsi lw'eYorotani,
mo kɨhʉgo ky'iNgalilaya, eyo yikere abandʉ b'ebɨhanda!
16Abandʉ bo babyaga bikere mo mwitsimya
bamashʉnga kyakakala kɨnene!
Na bo babyaga bikere mo kɨhʉgo ky'omwitsimya mʉnene w'olʉholo,
ekyakakala kyamahʉlʉkɨrabo!#4:16 Soma Isaya 8:23; 9:1.»
17Ɨthanga aho, Yesʉ mwathanga ɨkangɨrɨtsya athɨ: «Mʉbɨndʉke ɨthoka mo bɨtsɨbʉ byenyu, kʉshangwa oBwamɨ bw'elʉbʉla bʉlɨ hofɨ!»
Yesʉ abɨrɨkɨra abɨga bʉwe bambere
(Mar 1:16-20; Luk 5:1-11)
18Yesʉ abere anemʉtsʉka emʉsɨke w'engetsɨ y'iNgalilaya, mwashʉnga bandʉ babɨrɨ ba mʉ nda ngʉma, Simoni yo walʉkawamo Petero, na mʉgalabo nɨ yo Ndereya. Bagenda abagʉsha ehikira hyabo hyo mo ngetsɨ kʉshangwa babyaga barobi. 19Yesʉ mwabwɨrabo athɨ: «Mʉnyɨkwame nangye nyabayɨramo barobi ba bandʉ.» 20Aho n'aho mobamika ehikira hyabo n'ɨmʉkwama. 21Mwashʉba lotsya embere, mwashʉnga bandɨ bandʉ babɨrɨ ba mʉ nda ngʉma, Yakobo na Yoani bagala ba Sebetayo. Babyaga mo bwatho na Sebetayo ishe wabo, niabakomya ehikira hyabo. Yesʉ mwabɨrɨkɨrabo. 22Aho n'aho mobamika obwatho n'ishe wabo n'ɨmʉkwama.
Yesʉ akangɨrɨtsya n'ilamya
23Honyuma kw'aho Yesʉ mwathimba mo kɨhʉgo kyoshi ky'iNgalilaya, agenda akangɨrɨtsya mo sosinakoki s'aBayuta, alɨ afʉla eNgʉlʉ Mbʉya y'oBwamɨ n'ilamya abandʉ bw'amakoni wabo, n'obʉlema bwabo boshi. 24Engʉlʉ yɨwe moyahika mo kɨhʉgo kyoshi ky'eSuria. Bagenda abamʉlethera bo babyaga n'amakoni mɨna-mɨna, na bo bagenda abagalwa na magali mɨna-mɨna, abo babyagako emɨtsɨmʉ mɨbɨ, n'abebithutsa, n'abamakonongola. Na Yesʉ mwalamyabo. 25Muhindano mʉnene mwamʉkwama, bagenda abahʉlʉka iNgalilaya na mo kɨhʉgo ky'eMiyi iKumi, n'ɨYerʉsalemʉ, na mo kɨhʉgo ky'iYuteya, na ko ʉndɨ mwishirya w'eYorotani.
Currently Selected:
Matayo 4: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development