Matayo 3
3
Amakangɨrɨtsya wa Yoani Mubatisya
(Mar 1:1-8; Luk 3:1-18; Yoa 1:19-28)
1Mo bɨro ebyo Yoani Mubatisya mwahʉlʉka mo mbwarara y'iYuteya n'ɨthanga ɨfʉla mwatsɨ athɨ: 2«Mʉbɨndʉke ɨthoka mo bɨtsɨbʉ byenyu, kʉshangwa oBwamɨ bw'elʉbʉla bʉlɨ hofɨ!» 3Yoani oyo yo wahʉlawa na Gongo ɨtsʉkɨra omʉmɨnyeretsɨ Isaya abere alɨanegena athɨ:
«Mʉndʉ mʉgʉma ahambala mo mbwarara athɨ:
“Muthungananie enzɨra ya Nyinya-kowethʉ,
mukomye aho atsʉka.”»
4Olʉkɨmba lwa Yoani lwakomibawa mʉ boya bwa ngamɨa, kandɨ abyaga niambithe mʉkaba wa ngobi mo mbɨndɨ.#3:4 2Bamɨ 1:8. Agenda alya emɨʉngʉra n'obʉkɨ bw'omo ndokolo. 5Abahimbani b'ɨYerʉsalemʉ, n'abo mo kɨhʉgo kyoshi ky'iYuteya, n'abo mo ndambɨ-ndambɨ y'olwitsi lw'eYorotani bagenda abamuhikira. 6Bagenda abayɨshʉbako ko bɨtsɨbʉ byabo, na Yoani agenda abatisyabo mo lwitsi lw'eYorotani.
7Yoani mwashʉnga Bafarisayo bangɨ na Basandukayo bangɨ bagenda abamuhikira abatisyebo, naye mwabwɨrabo athɨ: «Imwe, lʉbʉtho lwa nzoka! Nɨ ndɨ yo wabakangɨrɨtsaya ishondya ɨshaga esohi ya Gongo yo yɨrɨ hofɨ? 8Aho mukanganie mo mɨkolere enyu ko mwamalire ɨbɨndʉka ɨthoka mo bɨtsɨbʉ byenyu. 9Na mʉthagenda omʉganɨtsya mʉthɨ mʉhwere ɨyahʉlamo mʉthɨ: “Thʉlɨ bana ba Abʉrahamʉ#3:9 Lingania na Yoani 8:33,37,39.,” kʉshangwa enyɨbabwɨra, amabwe aya Gongo angahulukyamo bana ba Abʉrahamʉ. 10Embasha yamalire ɨgosholwa bʉshana n'ɨtsɨra emɨthɨ y'omo mirihi. Na bʉlɨ mʉthɨ w'athahekire biguma bikwire andakondwa n'ɨgʉshwa mo mʉtsanwa. 11Ingye enyibabatisya mo metsi bʉshana n'ikangania ko mwamabɨndʉka ɨthoka mo bɨtsɨbʉ byenyu. He yo uhika enyuma kw'ingye, andababatisya mo Mʉthɨma Mwerʉ na mo mʉtsanwa. Ɨye awithe maka mangɨ kw'inyirengya, kandɨ nyɨthatholere na hake ithokya ebɨrato bɨwe. 12Aho awithe ko lʉhʉngʉlo#3:12 Lʉhʉngʉlo nɨ lokwera lo bandʉ abanakolesa kw'ilongya mʉlo mo engano bʉshana n'erithokya mʉro mw'omʉsɨsɨ. mo minwe yɨwe, bʉshana n'ilongya engano. Andahira esombulu s'omo mbʉpʉ, hewetuwe and'okya omʉsɨsɨ mo mʉtsanwa ow'athatsɨma.»
Olubatiso lwa Yesʉ
(Mar 1:9-11; Luk 3:21-22)
13Aho Yesʉ mwathoka mo kɨhʉgo ky'iNgalilaya n'ihika ko lwitsi lw'eYorotani. Mwahikira Yoani bʉshana abatisibwe naye. 14Hewethuwe Yoani mwashondya ɨthɨnda, nɨamʉbwɨra athɨ: «N'ingye ngyo nyangabatisibwe nawe, ʉthɨ ko unyihikira ʉthɨ ingye ngyo nyikubatisye?» 15Hewethuwe Yesʉ mwamʉshʉbɨtsya athɨ: «Tsɨga bibye bithyo ko ndambi eno, kʉshangwa ni bathyo ko bɨtholere nɨthwabereretsya ebyoshi by'ekwenene byo Gongo ashabire.» Aho Yoani mwatsɨga. 16Yesʉ abere amamala ibatisibwa, mwathoka mo metsi. Kona ndambi eyo, olʉbʉla molwakɨngʉkala, mwashʉnga oMʉthɨma Mwerʉ wa Gongo mwamukimirako nga kalikuku. 17Na mʉlenge mwahʉlʉka mo lʉbʉla n'ɨnegena athɨ: «Oyu nɨ Mʉgala aye mʉtsɨɨrwa yo unanyimoya kʉtsɨbʉ.#3:17 Soma Isaya 42:1.»
Currently Selected:
Matayo 3: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development