Matayo 2
2
Abengenge abayashʉnga Yesʉ
1Yesʉ mwabʉthɨrwa ɨBetelehemʉ, mo kɨhʉgo ky'iYuteya mo mʉgʉlʉ Herote abyaga mwamɨ. Honyuma w'erɨbʉthwa lɨwe abengenge#2:1 Abengenge bo abahʉlwa hano, nɨ bandʉ bo ban'ɨga byo birebitsye esongununu. mobathoka ebʉbʉkɨra ɨtsʉba, mobahika ɨYerʉsalemʉ. 2Mobabʉtsya bathɨ: «Alɨ hayi omwamɨ w'aBayuta yo wamabʉthwa? Kʉshangwa mothʉshʉnga engununu yɨwe y'ebʉbʉkɨra ɨtsʉba. Bʉshana n'ekyo, nethwe thwamahika imuramya.» 3Omwamɨ Herote abere onvwa omwatsɨ oyo, mwathabagana, n'abandʉ boshi b'ɨYerʉsalemʉ nabo kuthyo mobathabagana. 4Aho mwabɨrɨkɨra abakʉlʉ boshi b'abaheri n'abakangɨrɨtsya b'oMʉgomba, n'ɨbʉtsyabo nga Kirisito angabuthirwe hayi. 5Nabo mobamʉshʉbɨtsya bathɨ: «ɨBetelehemʉ y'omo kɨhʉgo ky'iYuteya. Kʉshangwa kuthyo ko byashakawa n' omʉmɨnyeretsɨ kʉthɨ:
6“Ɨwe Betelehemʉ, mo kɨhʉgo ky'iYuteya,
ʉthalɨ wo mʉke mo miyi mɨkʉlʉ y'omo kɨhʉgo ky'iYuteya,
kʉshangwa nɨ mw'ɨwe mo mwandathoka omuthegeki
yo wandashondola abandʉ baye, Baisiraeli.”»
7Aho ye Herote mwabɨrɨkɨra abengenge mʉ bubisho-bisho n'ɨbʉlɨrɨtsyabo ng'engununu yahʉlʉkaga kʉ mʉgʉlʉ ohɨ. 8Honyuma kw'aho mwathʉmabo ɨBetelehemʉ n'ɨbwɨrabo athɨ: «Mʉyabʉlɨrɨtsye kʉbʉya emyatsɨ y'omwana, na mwabya mwamʉshʉnga, nɨmwanyɨbwɨra bʉshana nangye nyiyamuramye.»
9Abengenge babere bamamala ɨonvwa ebɨnwa by'omwamɨ Herote, mobagenda. Aho mobashʉba shʉnga engununu yo bashʉngaga ebʉbʉkɨra ɨtsʉba, moyashondolerabo, moyimana mo kyanya, elʉgʉlʉ y'aho omwana abyaga. 10Babere bashʉnga engununu eyo mobamoga kʉtsɨbʉ. 11Mobɨngɨra mo nyʉmba, mobashʉnga omwana hagʉma na Marɨa nyinya ʉwe. Mobafʉkama bʉshana n'imuramya. Honyuma kw'aho, mobakanʉla emɨtsɨgo yabo na mobamʉha bɨhembo bya horo, na bya bubani, na bya marasi. 12Honyuma kw'aho Gongo mwabwɨrabo mo bɨlotho ko bathashʉbaga ew'omwamɨ Herote. Aho mobashʉba mo kɨhʉgo kyabo mw'ɨtsʉkɨra mʉ ɨndɨ nzɨra.
Yosefʉ ashayɨra iMisiri
13Abengenge babere bamagenda, malaɨka wa Nyinya-kowethʉ mwahʉlʉkɨra Yosefʉ mo bɨlotho n'ɨmʉbwɨra athɨ: «Bathʉka, tsɨmba omwana na nyinya ʉwe na mʉshayɨre iMisiri. Ubye eyo ihika ko kɨro nyandakʉbwɨra nyɨthɨ ʉshʉbʉle, kʉshangwa Herote ashondya omwana bʉshana amwithe.» 14Yosefʉ mwimana n'ɨtsɨmba omwana na nyinya ʉwe, na mo kɨro kɨsha-kɨsha mobashayɨra iMisiri 15Mwabyayo ihika ko mʉgʉlʉ Herote afwaga. Ebyo mobyabya bʉshana bɨbererere ebyo Nyinya-kowethʉ anegenaga kw'ɨtsʉkɨra omʉmɨnyeretsɨ athɨ: «Monyabɨrɨkɨra mʉgala aye athoke iMisiri.»#2:14-15 Soma Osea 11:1.
Ithwa ly'abana ɨBetelehemʉ
16 Herote abere amɨnya abengenge ko mobamʉthɨma, mwakapɨkɨra kʉtsɨbʉ. Aho, Herote mwathʉma abashirikani mo muyi w'ɨBetelehemʉ na mo ndambɨ-ndambɨ sawo bayithe abana b'obʉtsana boshi ɨthoka kw'ɨbʉthwa ihika kʉ myaka ibiri. Akolaga athyo ɨkwamana n'ebɨro abengenge bamʉbwɨraga. 17Aho mobyabererera ebyo byanegenawa mw'ɨtsʉkɨra omʉmɨnyeretsɨ Yeremia athɨ:
18«Omʉlenge wa bɨrɨro n'ishishikana ɨtsɨbʉ, mobyonvwɨka ɨRama.
Nɨ Rakeli yo ʉlɨrɨra abana bʉwe,
athalɨ ashondya ikiranibwa,
kʉshangwa abana bʉwe bamalire ɨfwa.»#2:17-18 Yeremia 31:15.
Yosefʉ ashʉbʉla ɨthoka iMisiri
19Honyuma w'olʉholo lwa Herote, malaɨka wa Nyinya-kowethʉ mwahʉlʉkɨra Yosefʉ mo bɨlotho iMisiri. 20Mwamʉbwɨra athɨ: «Bathʉka, tsɨmba omwana na nyinya ʉwe ʉshʉbe mo kɨhʉgo ky'Isiraeli, kʉshangwa abandʉ bo babyaga niabashondya itha omwana bamalire ɨfwa.» 21Aho Yosefʉ mwimana, mwatsɨmba omwana na nyinya ʉwe, n'ɨshʉba mo kɨhʉgo ky'Isiraeli. 22Hewethuwe Yosefʉ abere onvwa ko Arikelao#2:22 Arikelao abyaga mʉgala wa Herote na kandɨ mwashiba mo kifumbi ky'ishe mʉkʉlʉ, mwathegeka mɨaka ine embere w'erɨbʉthwa lya Yesʉ na mɨaka ndathʉ enyuma y'erɨbʉthwa lya Yesʉ. yo ʉthegeka mo mwanya w'ishe ʉwe Herote mo kɨhʉgo ky'iYuteya, aho mwafwa bʉba bw'erɨshʉbayo. Gongo mwabwɨra Yosefʉ mo bɨlotho athɨ athashʉbagayo. Bʉshana n'ekyo, mwaya mo kɨhʉgo ky'iNgalilaya. 23Mwayikala mo muyi w'agenda ahʉlwamo Nasareti. Mobyakoleka bithyo bʉshana kɨbererere ekɨnwa kyanegenawa kʉ Yesʉ ɨtsʉkɨra abamɨnyeretsɨ kɨthɨ: «Andahʉlwamo Munyanasareti.#2:23 Andahʉlwamo Munyanasareti: Erɨtsɨna eryo molyabya nga mʉthɨ wa lyamɨ bʉshana na Yesʉ (lingania Mat 21:11) na kandɨ yabyaga kw'ikangania abakirisito bambere (Mɨkolo 24:5).»
Currently Selected:
Matayo 2: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development