ᕉᑎᐅᑉ ᐅᓂᒃᑲᐅᓯᓂᖓ 1
1
ᐃᓔᒥᓕᑭᐅᑉ ᐃᓚᖏᑕᓗ ᒧᐊᐱᒧᐊᕐᖕᓂᖓᑦ
1ᑍᑦᓱᒪᓂᐊᓗᒃ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖃᓚᐅᖅᑎᓐᓇᒋᑦ ᐃᓱᐊᖅᓮᔨᓄᑦ ᓱᓕ ᐊᐅᓚᑕᐅᑎᓪᓗᒋᑦ, ᑳᖕᓇᖅᑐᕐᔪᐊᖃᓕᓚᐅᖅᐳᖅ ᓄᓇᒥ. ᐊᖑᑦ ᐱᑦᓕᐊᒥᐅᑕᖅ ᔫᑕᒦᑦᑐᒥᑦ ᐃᓔᒥᓕᑭ ᓄᓕᐊᖓᓗ ᓁᐅᒥ ᐃᕐᖕᓂᖏᒡᓗ ᒪᕐᕉᒃ ᒪᓛᓂ ᑭᓕᐊᓂᓗ ᐊᐅᓪᓚᓚᐅᖅᐳᑦ ᒧᐊᐱᒥᐅᑦ ᓄᓇᖓᓄᑦ. 2ᑖᓐᓇᓕ ᐃᓔᒥᓕᒃ ᐃᕗᕅᑎᐅᑉ ᑭᖑᕚᖏᑕ ᐃᓚᖓᑦ ᓄᓕᐊᖃᓚᐅᖅᐳᖅ ᓁᐅᒥᒥ, ᐃᕐᖕᓂᖏᒃ ᒪᕐᕉᒃ ᐊᑎᖃᖅᐴᒃ ᒪᕼᐊᓚᓐ ᐊᒻᒪ ᓯᓕᐅᓐ; ᐃᕗᕅᑎᒥᐅᖑᕗᑦ ᓄᓇᖃᖅᓗᑎᒃ ᐱᑦᓕᐊᒥ ᔫᑕᒦᑐᒥ. ᑖᒃᑯᐊ ᐃᓚᒌᑦ ᒧᐊᐱᒥᐅᑦ ᓄᓇᖓᓄᐊᓚᐅᖅᐳᑦ ᑕᕝᕙᓃᓕᖅᓗᑎᒡᓗ. 3ᓱᓕᓕ ᑕᕝᕙᓃᑎᓪᓗᒋᑦ ᐃᓔᒥᓕᒃ ᓁᐅᒥᐅᑉ ᐅᐃᖓ ᑐᖁᓚᐅᖅᐳᖅ, ᓁᐅᒥᓗ, ᐃᕐᖕᓂᖏᒡᓗ ᕿᒪᒃᑕᐅᕗᑦ ᐃᓕᐊᕐᔪᓐᖑᖅᓗᑎᒃ. 4ᑖᒃᑯᐊᒃ, ᐃᕐᖕᓂᖏᒃ ᓄᓕᐊᓂᓚᐅᖅᐴᒃ ᒧᐊᐱᒥᐅᑖᖕᓂᒃ: ᐂᑉᐸᖓ ᐊᑎᖃᖅᐳᖅ ᐆᕐᐸᒥᒃ ᐂᑉᐸᖓᓗ ᐊᑎᖃᖅᓗᓂ ᕉᑎᒥᒃ. ᑖᒃᑯᐊᓗ ᑕᕝᕙᓃᓚᐅᖅᐳᑦ ᓄᓇᒥ ᐊᕐᕌᒍᑦ 10 ᖃᓂᒋᔮᓂ. 5ᒪᕼᐊᓚᓂᓕ ᓯᓕᐅᓂᓗ ᑐᖁᓚᐅᕆᕘᒃ; ᓁᐅᒥᓗ ᐅᐃᖃᕋᓂ ᐃᕐᖕᓂᖃᕈᓐᓃᖅᐳᖅ ᐊᒥᐊᒃᑯᑑᓕᖅᓗᓂᓗ.
ᓁᐅᒥᐅᑉ ᕉᑎᐅᓪᓗ ᐱᑦᓕᐊᒧᑦ ᐅᑎᕐᖕᓂᖓᒃ
6ᑕᒪᑐᒪ ᑭᖑᕐᖓᒍᑦ ᓁᐅᒥ ᑐᓴᕋᒥ ᐊᑕᓂᐅᑉ ᐃᓄᖁᑎᓂ ᓂᕿᒃᓴᖃᑦᓯᐊᖅᑎᓕᕐᖕᒪᒋᑦ; ᑕᕝᕙ ᐊᐅᓪᓚᕈᒪᓕᖅᐳᖅ ᒧᐊᐱᒥᐅᑦ ᓄᓇᖓᓐᓂᑦ ᐅᑯᐊᖕᓂ ᒪᕐᕉᒃ ᐃᓚᒋᓗᒋᒃ. 7ᑍᒤᒻᒪᑦ ᐊᐅᓪᓚᖃᑎᒌᓕᖅᐳᑦ ᑕᕝᕙᓐᖓᑦ ᓇᔪᖅᑕᒥᖕᓂᑦ, ᓁᐅᒥᐅᑉ ᓄᓇᑐᖃᖓᓄᑦ ᔫᑕᒦᑦᑐᒧᑦ; ᑍᑯᓐᖓᐅᓕᖅᓗᑎᒡᓕ; 8ᓁᐅᒥᐅᑉ ᐅᑯᐊᖕᓂ ᐅᖃᐅᑎᕚᒃ, “ᐊᖏᕐᕋᓕᕆᑦᓯᒃ ᐊᓈᓇᒃᑯᓯᖕᓄᑦ, ᐃᑲᔪᑦᓯᐊᖃᑦᑕᓚᐅᕋᑦᓯᒃ ᐅᕙᓐᓂᒃ ᐃᓚᒋᓚᐅᖅᑕᑦᑎᓐᓂᒡᓗ ᐃᓅᔪᓐᓃᖅᑐᓂᒃ, ᐊᑕᓂᖅ ᑐᒃᓯᐊᕐᕕᒋᕙᕋ ᐃᑲᔪᑦᓯᐊᖁᓪᓗᒍᑦᑕᐅᖅ ᐃᓕᑦᓯᖕᓂᒃ. 9ᐊᑕᓂᐅᑉ ᐅᐃᓂᒃᑲᓐᓂᕈᓐᓇᖅᑎᓪᓕᓯᒃ ᑕᒪᑦᓯᒃ ᐊᖏᕐᕋᖃᑦᓯᐊᓕᖅᓗᓯᒡᓗ.”
ᓁᐅᒥᐅᑉ ᑕᕝᕙ ᐃᕿᓪᓗᒋᒃ ᑯᓂᒃᐹᒃ ᑕᕝᕙᐅᕗᑏᖅᓗᒋᒃ, ᑖᒃᑯᐊᒡᓕ ᓂᓪᓕᕋᓗᐊᖅᓗᑎᒃ ᕿᐊᓯᕘᒃ. 10ᐅᖃᖅᓗᑎᒡᓗ ᓴᑭᒥᖕᓄᑦ, “ᒪᓖᓐᓇᕈᒪᓕᖅᑐᒍᒡᓕ ᓄᓇᒋᔭᕐᖕᓄᑦ ᐃᓅᖃᑎᖕᓄᑦ.”
11ᓁᐅᒥᐅᑉ ᑭᐅᕚᒃ, “ᓇᒡᓕᒋᒐᓗᐊᖅᐸᑦᓯᒃ; ᐅᑎᓕᕆᑦᓯᒃ ᒪᓕᒐᒃᓴᐅᔪᓐᓃᕋᒪ ᕿᑐᕐᖓᖅᑖᒃᑲᓐᓂᑦᔮᓇᖓᓗ ᐅᐃᒃᓴᑦᓯᖕᓂᒃ. 12ᐸᓃᒃᑲᒃ ᐊᖏᕐᕋᓕᕆᑦᓯᒃ, ᐃᓄᑐᖃᐅᓗᐊᓕᕋᒪ ᐅᐃᓂᒃᑲᓐᓂᕆᐊᒃᓴᖅ. ᒫᓐᓇᓗ ᐅᓐᓄᒃ ᐅᐃᓂᒃᑲᓐᓂᕋᓗᐊᕈᒪ ᐃᕐᖕᓂᖅᑖᒃᑲᓐᓂᖅᓗᖓᓗ. 13ᐅᑦᑕᖅᑭᔪᓐᓇᕋᔭᖅᐱᓰᒃ ᐱᕈᕐᕇᖅᓯᐊᕆᓗᒋᒃ? ᑍᒫᒃ ᐊᑯᓂᐊᓗᒃ ᐅᐃᓂᒃᑍᓕᑦᔪᑎᒋᒐᔭᖅᐱᓯᒃᑰᒃ? ᐸᓃᒃᑲ ᖃᐅᔨᒪᕗᓯᒃ ᑍᒫᒃ ᐊᔪᕐᖕᓇᑦᓯᐊᖅᑐᖅ; ᐊᖏᔪᒥᒃ ᕿᒃᓵᒍᑎᒋᒐᓗᐊᖅᐸᑦᓯᒃ ᓇᒡᓕᒋᓪᓗᓯᒃ ᑭᓯᐊᓂ ᐊᑕᓂᐅᑉ ᑍᒤᑦᓱᓐᓁᓪᓕᑎᑖᖓ.”
14ᐊᒻᒪ ᐅᑯᐊᖏᒃ ᓂᐱᖃᖅᓗᑎᒃ ᕿᐊᓯᒃᑲᓐᓂᕆᕘᒃ; ᑕᕝᕙ ᐆᕐᐸᐅᑉ ᓴᑭᓂ ᐃᕿᓪᓗᒍ ᑕᕝᕙᐅᕗᑏᖅᐹ ᕿᒪᕉᑎᓕᖅᓗᓂᓗ, ᕉᑎᐅᓪᓕ ᓴᑭᓂ ᓴᒃᑯᑦᓱᓐᓁᓪᓕᕚ. 15ᑕᕝᕙ ᓁᐅᒥᐅᑉ ᐅᖃᐅᑎᕚ, “ᑕᑯᒋᑦ ᐆᐸ ᐃᓅᖃᑎᒥᓄᑦ ᒎᑎᒋᔭᒥᓄᓪᓗ ᐅᑎᓯᕗᖅ; ᐅᑎᖃᑎᒋᓕᕈᒃ.”
16ᕉᑎᐅᓪᓕ ᑭᐅᕚ, “ᐃᓕᖕᓂᒃ ᕿᒤᖁᓐᖏᓚᐅᓐᖓ, ᐅᑎᖁᖏᓪᓗᖓᓗ ᒪᓕᒍᒪᒐᒃᑭᑦ; ᓇᒧᑐᐃᓐᓇᖅ ᐂᒐᓗᐊᕈᕕᑦ ᒪᓕᖕᓂᐊᖅᐳᖓ, ᓄᓇᖃᕐᕕᒋᔭᕐᖕᓂᓗ ᓄᓇᖃᕐᖕᓂᐊᖅᐳᖓ, ᐃᓅᖃᑎᑎᑦ ᐃᓅᖃᑎᒋᓂᐊᖅᐸᒃᑲ, ᒎᑏᓪᓗ ᒎᑎᒋᓂᐊᖅᐸᕋ. 17ᑐᖁᕕᒋᔭᕐᖕᓂ ᑐᖁᓂᐊᖅᐳᖓ, ᑕᕝᕙᓂᓗ ᐃᓗᕕᖅᑕᐅᓗᖓ, ᓱᓕᖏᒃᑯᒪ ᐊᑕᓂᐅᑉ ᓱᒋᐊᓛᖅᐹᖓ ᑐᖁᒨᖏᑦᑐᖅ ᓇᔪᕈᓐᓃᕐᖕᓂᕈᒃᑭᑦ.”
18ᑍᒫᒃ ᓁᐅᒥ ᖃᐅᔨᒐᒥ ᕉᑎᐅᑉ ᐃᓚᐅᔪᒪᓪᓚᕆᖕᓂᖓᓂᒃ, ᓂᓪᓕᐅᑎᒃᑲᓐᓂᕈᓐᓃᖅᐹ ᑕᒪᑐᒥᖓ.
19ᐱᓱᖃᑎᒌᓕᖅᐴᒃ ᑕᕝᕙ ᐱᑦᓕᐊᒧᑦ. ᑎᑭᒻᒪᑎᒡᓗ ᐱᑦᓕᐊᒥᐅᓕᒪᑦ ᖁᕕᐊᓱᖃᑎᒌᒃᐳᑦ ᑖᒃᑯᐊᒃ ᐱᑦᔪᑎᒋᓪᓗᒋᒃ; ᑕᕝᕙ ᐊᕐᖕᓇᓂᒃ ᐅᖃᖅᑐᖃᖃᑦᑕᓕᖅᐳᖅ, “ᓁᐅᒥᐅᕖ?”
20ᓁᐅᒥᐅᓪᓕ ᐅᖃᐅᑎᕔᑦ, “ᓁᐅᒥᒥᒃ#1:20 ᓁᐅᒥ ᑐᑭᖃᕐᖕᒪᑦ ᖁᕕᐊᓱᒃᑐᒥᒃ ᑍᔭᐅᔪᒪᔪᓐᓃᖅᑐᖓ; ᐃᒫᖔᕐᓕ ᒫᕋᒥᒃ,#1:20 ᒫᕋ ᑐᑭᖃᕐᖕᒪᑦ ᕿᒃᓵᒃᑐᒥᒃ ᒎᑎᐅᑉ ᐊᔪᒐᖃᖏᑦᑑᑉ ᕿᒃᓵᖕᓇᖅᑐᐊᓗᖕᒥᒃ ᐱᑎᓚᐅᕐᖕᒪᖓ. 21ᑕᕝᕙᓐᖓᑦ ᐊᐅᓪᓚᖅᑎᓪᓗᑕ ᐊᑕᖏᐅᒪᑦᓯᐊᓚᐅᖅᐳᒍᑦ ᐃᓚᒌᑎᒍᑦ, ᐊᑕᓂᐅᓪᓕ ᐅᑎᖅᑎᓕᖅᐸᖓ ᐃᓕᐊᕐᔫᓕᖅᓗᖓ. ᓱᖕᒪᑦ ᓱᓕ ᓁᐅᒥᒥᒃ ᑍᔪᒪᕕᓯᓐᖔ? ᐊᑕᓂᐅᑉ ᐊᔪᒐᖃᖏᑦᑑᑉ ᐅᕙᓐᓂᒃ ᓈᒻᒪᒃᓴᖏᓐᓂᕐᖕᒥᓂᒃ ᖃᐅᔨᑎᓯᒪᓕᕐᖕᒪᖓ, ᕿᒃᓵᖕᓇᖅᑐᒦᑎᓪᓗᖓᓗ.”
22ᑍᒫᒃ ᑕᕝᕙ ᓁᐅᒥ ᐅᑎᓚᐅᖅᐳᖅ, ᐅᑯᐊᓂ ᕉᑎ ᒧᐊᐱᒥᐅᑕᖅ ᐂᑉᐸᕆᓪᓗᒍ, ᓄᓇᒥᑦ ᒧᐊᐱᒥᓐᖔᖅᓗᑎᒃ. ᐱᑦᓕᐊᒧᓪᓕ ᑎᑭᓚᐅᖅᐴᒃ ᐱᕈᖅᑐᓂᒃ ᓂᐊᖂᔭᒃᓴᓂᒃ ᑲᑎᖅᓱᐃᓇᖅᓯᓕᖅᑎᓪᓗᒍ.
Currently Selected:
ᕉᑎᐅᑉ ᐅᓂᒃᑲᐅᓯᓂᖓ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.