ᐃᓗᐊᖅᓮᔩᑦ ᐊᒡᓚᖏᑦ 21
21
ᐱᓐᔭᒥᓂᐅᑉ ᑭᖑᕚᖏᑕ ᓄᓕᐊᖅᑖᖏᑦ
1ᐃᓴᕆᐊᓕᒥᐅᑦ ᑲᑎᒐᒥᒃ ᒥᔅᐸᒥ, ᐊᖏᕈᑎᖃᒻᒪᕆᓚᐅᖅᐳᑦ ᐊᑕᓂᕐᖕᒧᑦ ᐃᒫᒃ, “ᓇᓕᖅᐳᓪᓘᓐᓃᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᓄᓕᐊᓂᒃᑎᑦᓯᓂᐊᕈᓐᓃᖅᐳᒍᑦ ᐸᓂᑎᓂᒃ.” 2ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐱᑎᓕᒧᐊᓚᐅᖅᐳᑦ ᑍᑲᓂᓗ ᐃᒃᓯᕙᓪᓗᑎᒃ ᒎᑎᐅᑉ ᓵᖓᓂ ᐅᓐᓄᒧᑦ ᑎᑭᓪᓗᒍ. ᓂᐱᖅᑯᖅᑐᒻᒪᕆᒃᓗᑎᒃ ᕿᐊᓚᐅᖅᐳᑦ: 3ᐃᒫᒃ ᐅᖃᖅᓗᑎᒃ, “ᐊᑕᓃᖅ ᐃᓴᕆᐊᓕᐅᑉ ᒎᑎᖓ, ᓱᖕᒪᑦ ᑍᒤᑉᐹ? ᐃᓴᕆᐊᓕᒥ? ᓱᖕᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐊᑕᐅᓰᓂᒃ ᐃᓚᑰᓂᐊᓕᖅᐸᑦ?” 4ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᐃᓄᒋᐊᒃᑐᕐᔪᐊᑦ ᒪᑭᑉᐳᑦ, ᑐᓂᕐᕈᓯᕐᕕᓕᐅᖅᓗᑎᒃ, ᑐᓂᕐᕈᓯᖅᓗᑎᒡᓗ ᐃᑯᐊᓚᑎᑦᓯᓂᒃᑯᑦ ᐃᓚᒌᑦᓯᐊᕐᖕᓂᕐᖕᒧᓪᓗ ᑐᓂᕐᕈᑎᓂᒃ. 5ᐃᓄᒋᐊᒃᑐᕐᔪᐊᓪᓗ ᐊᐱᕆᕗᑦ, “ᓇᓪᓕᖐᑦ ᐃᓚᒌᑦ ᐃᓴᕆᐊᓕᒥᐅᑦ ᑭᖑᕚᖏᓐᓂ ᑲᑎᖃᑕᐅᔭᖅᑐᓛᓐᖏᓛᑦ ᐊᑕᓂᐅᑉ ᓵᖓᓂ ᒥᔅᐸᒥ?” ᐊᖏᕈᑎᖃᒻᒪᕆᓚᐅᕋᒥᒃ ᒥᔅᐸᒧᑦ, ᑲᑎᒋᐊᖅᑐᖏᑦᑐᑦ ᐱᓪᓗᒋᑦ, ᑐᖁᑕᒃᓴᐅᓂᖏᓐᓂᒃ. ᐅᖃᖅᓗᑎᒃ, “ᑲᑎᖃᑕᐅᖏᑦᑐᑦ ᑐᖁᑕᒃᓴᐅᕗᑦ.” 6ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐅᒡᒍᐊᓕᓚᐅᖅᐳᑦ ᖃᑕᓐᖑᑎᑎᒃ ᐱᓐᔭᒥᓂᐅᑉ ᑭᖑᕚᖏᑦ ᐱᓪᓗᒋᑦ ᐅᖃᖅᓗᑎᒡᓗ, “ᐅᓪᓗᒥ ᐃᓴᕆᐊᓕᐅᑉ ᑭᖑᕚᖏᑕ ᐃᓚᖓᓐᓂᒃ ᐊᑕᐅᓰᓂᒃ ᐊᓯᐅᔨᕗᒍᑦ, 7ᖃᓄᕐᓕ ᐱᓂᐊᓕᖅᐱᑕ ᐊᖑᑎᑦ ᓄᓕᐊᖅᑖᖁᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᓐᓂ ᐊᒥᐊᑰᔪᑦ? ᐊᖏᒻᒪᕆᓚᐅᕋᑦᑕ ᐊᑕᓂᕐᖕᒧᑦ ᐸᓂᑦᑎᓐᓂᒃ ᑐᓂᓯᔪᒪᓇᑕ ᑖᒃᑯᓄᖓ.”
8ᐊᐱᖅᓱᕋᒥᒡᓗ ᐅᖃᖅᓗᑎᒃ, “ᑭᖑᕚᕇᑦ ᓇᓪᓕᖏᑦ ᐃᓴᕆᐊᓕᒥᐅᑦ ᑲᑎᒋᐊᖅᑐᓚᐅᓐᖏᓚᑦ ᒥᔅᐸᒧᑦ?” ᖃᐅᔨᕗᓪᓗ ᔭᐲᓯ ᒋᓕᐊᑎᒥᐅᓂᒃ ᐃᓚᐅᔪᖃᖏᓐᓂᖓᓂᒃ, 9ᐃᓄᒋᐊᒃᑐᕐᔪᐊᓪᓗ ᖃᐅᔨᓴᖅᑎᑕᐅᖕᒪᑕ, ᔭᐲᓯ ᒋᓕᐊᑎᒥᐅᑦ ᑕᒫᓃᑦᑐᖃᓐᖏᓚᑦ. 10ᐃᓄᒋᐊᒃᑐᕐᔪᐊᑦ ᑎᓕᓯᓚᐅᖅᐳᑦ 12,000ᓂᒃ ᐊᖑᑎᓂᒃ, ᓯᕘᕋᖏᓐᓂᖅᐹᓂᒃ ᐃᒫᒃ ᐱᖁᓪᓗᒋᑦ, “ᔭᐲᓯ-ᒋᓖᑎᒥᐅᑦ ᑐᖁᕋᕆᐊᖅᑐᓕᖅᓯᐅᒃ ᐊᕐᖕᓁᓪᓗ ᕿᑐᕐᖓᖏᓪᓗ ᒥᑭᔪᑦ ᐱᖃᓯᐅᑎᓗᒋᑦ. 11ᐃᒫᒃ ᐱᓂᐊᖅᐳᓯ, ᐊᖑᑎᓕᒫᑦ ᐊᕐᖕᓇᓕᒫᓪᓗ ᐊᖑᑎᓂᒃ ᐃᓐᓇᖓᖃᑎᖃᖅᓯᒪᔪᑦ ᓄᖑᓪᓗᒋᑦ ᑐᖁᕋᕐᖕᓂᐊᖅᐸᓯ.” 12ᓇᓂᓯᓚᐅᖅᐳᓪᓗ ᐅᐃᒐᓱᖕᓂᒃ 400ᓂᒃ ᐊᖑᒻᒧᑦ ᐊᒃᑐᖅᑕᐅᓚᐅᖅᓯᒪᖏᑦᑐᓂᒃ ᔭᐲᓯ-ᒋᓖᑎᒥᐅᑦ ᐃᓄᖏᓐᓂᑦ; ᑖᒃᑯᐊᓗ ᐋᑉᐰᑦ ᑕᖕᒫᖅᓯᒪᕕᖕᒥᓄᑦ ᓮᓗᐊᒧᑦ, ᑬᓇᓂᐅᑉ ᓄᓇᖓᓃᑦᑐᒧᑦ.
13ᑕᕝᕙ ᐃᓄᒋᐊᒃᑐᕐᔪᐊᑦ ᑎᓕᓯᕗᑦ ᑐᓴᖅᑎᑦᓯᖁᔨᓪᓗᑎᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ ᕆᒪᓐᒥ ᕾᖅᑐᒦᑦᑐᓂᒃ, ᐅᓇᑕᕈᒪᔪᓐᓃᕐᖕᓂᕐᖕᒥᒃ ᐅᖃᐅᑎᓪᓗᒋᑦ. 14ᐱᓐᔭᒥᓂᐅᑉ ᑭᖑᕚᖏᑦ ᑍᑦᓱᒪᓂ ᐅᑎᓚᐅᖅᐳᑦ; ᑐᓂᓯᕕᐅᓪᓗᑎᒡᓗ ᐊᕐᖕᓇᓂᒃ ᔭᐲᓯ-ᒋᓖᑎᒥᑦ ᐱᔭᐅᔪᕕᓂᕐᖕᓂᒃ ᑐᖁᓚᐅᓐᖏᑕᒥᖕᓂᑦ; ᑖᒃᑯᐊ ᑭᓯᐊᓂ ᐊᒥᒐᓚᐅᖅᐳᑦ.
15ᐃᓄᐃᑦ ᐅᒡᒍᐊᕈᑎᖃᓕᓚᐅᖅᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐊᑕᓂᐅᑉ ᐃᓚᑯᓐᖑᖅᑎᓚᐅᕐᖕᒪᒋᑦ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᖕᓂᖏᑦ. 16ᐃᓄᖕᓄᑦ ᐊᖓᔪᖅᑳᖑᔪᑦ ᐅᖃᖅᐳᑦ, “ᖃᓄᕐᓕ ᐱᓂᐊᓕᖅᐱᑕ ᐊᒥᐊᒃᑯᑦ ᓄᓕᐊᒃᓴᖏᓐᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂ ᐊᕐᖕᓁᑦ ᓄᖑᑕᐅᓚᐅᕐᖕᒪᑕ?” 17ᐅᖃᖅᓗᑎᒡᓗ, “ᐱᓐᔭᒥᓂᐅᑉ ᑭᖑᕚᖏᑕ ᐊᒥᐊᒃᑯᖏᑦ ᓄᓇᒥᒃ ᑭᖑᕐᖑᑦᔨᔭᕆᐊᖃᖅᐳᑦ, ᑭᖑᕚᖑᖃᑎᒌᑦ ᐃᓴᕆᐊᓕᒥᐅᓂᑦ ᐱᑕᖃᕈᓐᓃᕆᐊᖃᖏᒻᒪᑕ, 18ᑭᓯᐊᓂ ᓄᓕᐊᖅᑖᖅᑎᑦᓱᓐᓇᖏᓐᓇᑦᑎᒍ ᐸᓂᑦᑎᓐᓂᒃ.” ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᖏᖃᑎᒌᒍᑎᓕᐅᓚᐅᕐᖕᒪᑕ, “ᓇᕐᕈᓇᖅᓯᑎᑕᐅᓕ ᓇᓪᓕᐊᑦ ᐸᓂᒥᓂᑦ ᓄᓕᐊᖅᑖᖅᑎᑦᓯᔪᖅ ᐱᓐᔭᒥᓂᐅᑉ ᑭᖑᕚᖏᓐᓂᒃ.”
19ᐅᖃᓚᐅᖅᐳᑦ, “ᑕᑯᒋᑦ, ᐊᕐᕌᒍᑕᒫᑦ ᓇᓪᓕᐅᓐᓂᖅᓯᐅᕐᖕᓂᖃᖅᐳᖅ ᐊᑕᓂᕐᖕᒧᑦ ᓮᓗᐊᒥ, ᓮᓗᐊ ᐱᑎᓕᐅᑉ ᐅᓪᓗᓪᓗᐊᑉ ᑕᕐᕋᓕᓂᖓᓃᓚᐅᖅᐳᖅ, ᓕᐳᓇᐅᑉ ᓯᕿᓂᖓᓃᑦᑐᖅ, ᐊᖅᑯᑎᐅᓪᓗ ᐱᑎᓕᐅᓪᓗ ᓯᑭᒻᒥᐅᓪᓗ ᐊᑯᓐᓂᖓᓃᑦᑐᖅ, ᓕᐳᓇᐅᑉ ᑭᑖᓂ.” 20ᐱᖁᔨᓚᐅᖅᐳᓪᓗ ᐱᓐᔭᒥᓂᐅᑉ ᑭᖑᕚᖏᓐᓂᒃ, “ᐂᓕᕆᑦᓯ ᐃᔨᖅᓗᓯᓗ ᐱᕈᖅᓰᕕᖏᓐᓂ ᕔᓂᓕᐅᕐᕕᖕᓂ. 21ᖃᐅᔨᓴᖅᓗᓯᓗ ᐊᕐᖕᓁᑦ ᓮᓗᐊᒥᑦ ᐊᓂᒃᐸᑕ ᑖᓂᓯᖅᓗᑎᒃ ᓇᓪᓕᐅᓐᓂᖅᓯᐅᕐᕕᖕᒥ, ᑕᕝᕙᓐᖓᑦ ᐊᓂᓗᓯ ᐱᕈᖅᓰᕕᖕᓂᑦ ᕔᓂᓕᐅᕐᕕᖕᓂᑦ, ᐃᓘᓐᓇᓯ ᑎᒍᓯᓗᓯ ᐊᕐᖕᓇᓂᒃ ᓄᓕᐊᒃᓴᑦᓯᓐᓂᒃ ᐅᑎᖃᑎᒋᓗᒋᓪᓗ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᓐᓄᑦ. 22ᐊᑖᑕᒃᑯᖏᑦ, ᐊᓂᖏᓪᓘᓐᓃᑦ ᖁᕕᐊᓱᖏᓪᓗᑎᒃ ᕾᒃᐸᑕ ᐅᕙᑦᑎᓐᓄᑦ, ᐅᖃᐅᑎᓂᐊᖅᐸᕗᑦ, ‘ᐱᑦᓯᐊᕐᕕᒋᓗᑕ ᐃᑲᔪᓚᐅᖅᑎᒍᑦ, ᐅᓇᑕᕐᖕᓂᒃᑯᑦ ᓄᓕᐊᒃᓴᖏᓐᓂᒃ ᐱᓚᐅᖏᓐᓇᑦᑕ, ᐸᓯᔭᒃᓴᐅᓐᖏᓚᓯ, ᐸᓂᓯ ᑐᓂᓚᐅᖏᓐᓇᑦᓯᐅᒃ ᑖᒃᑯᓄᖓ.’”
23ᐱᓐᔭᒥᓂᐅᑉ ᑭᖑᕚᖏᑦ ᑍᒫᒃ ᐱᓇᓱᐊᓚᐅᖅᐳᑦ; ᐃᓘᓐᓇᑎᒃ ᓄᓕᐊᒃᓴᖅᑖᓚᐅᖅᐳᑦ ᐊᕐᖕᓇᓂᑦ ᑕᓂᓯᓚᐅᖅᑐᓂᒃ ᓮᓘᒥ ᐊᐅᓪᓚᐅᑎᓪᓗᒋᓪᓗ. ᐅᑎᓚᐅᖅᐳᓪᓗ ᓄᓇᒥᖕᓄᑦ, ᓄᓇᓕᒥᖕᓂᓗ ᐃᒡᓗᒐᓴᒡᔪᐊᓕᐅᓚᐅᖅᐳᑦ, ᓄᓇᖃᓕᖅᓗᑎᒡᓗ. 24ᑍᑦᓱᒪᓂᑦᓮᓐᓇᖅ ᐃᓴᕆᐊᓕᒥᐅᑦ ᑕᕝᕙᓐᖓᑦ ᐊᐅᓪᓚᓚᐅᖅᐳᑦ, ᐃᓘᓐᓇᑎᒡᓗ ᐃᓚᒥᖕᓄᑦ ᑭᖑᕚᖑᖃᑎᒥᖕᓄᑦ ᐅᑎᖅᐳᑦ ᓇᖕᒥᓂᖁᑎᒥᖕᓄᑦ.
25 #
ᐃᓗᐊᖅᓮᔩᑦ 17:6. ᐅᓪᓗᓂ ᑍᒃᑯᓇᓂ ᐊᖓᔪᖅᑳᕐᔪᐊᖃᓚᐅᖏᒪ ᐃᓴᕆᐊᓕᒥᐅᓂ; ᐃᓘᓐᓇᑎᒡᓗ ᐊᑐᕈᒪᔭᒥᖕᓂᒃ ᓈᒻᒪᒐᓱᒋᔭᒥᖕᓂᒡᓗ ᐊᑐᓚᐅᖅᐳᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 21: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.