ᒫᑯᓯᐅᑉ ᐊᒡᓚᖏᑦ 1
1
ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᖅᑐᐃᓂᖓ
ᒫᑎᐅᓯ 3:1-12; ᓘᑲᓯ 3:1-18; ᔪᐊᓇᓯ 1:19-28
1ᐅᖃᐅᓰᑦ ᑐᓴᕈᒥᓇᖅᑐᑦ ᐱᒋᐊᕐᖕᓂᖃᖅᐳᑦ ᔩᓱᓯ ᙭ᔅᑑᓯᒥᒃ, ᒎᑎᐅᑉ ᐃᕐᖕᓂᖓᓂᒃ. 2#ᒪᓚᑬ 3:1.ᓲᕐᓗ ᓇᓚᐅᑦᑍᔨ ᐂᓮᐊᓯ ᑎᑎᕋᖅᓯᒪᖕᒪᑦ:
“ᑕᑯᒋᑦ, ᐅᖃᕆᐊᖅᑐᖅᑎᑕᕋ ᓯᕗᓂᕐᖕᓂ ᑎᓕᕙᕋ,
ᐊᖅᑯᑎᒃᓴᕐᖕᓂᒃ ᐋᖅᑭᒃᓱᐃᖁᓪᓗᒍ.
3 #
ᐂᓮᐊᓯ 40:3. ᑖᓐᓇ ᓂᐱᖅᑯᖅᑐᓗᓂ ᐅᖃᓪᓚᒍᒫᖅᐳᖅ ᐃᓄᖃᖏᑦᑐᒥ;
ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᖅᓯᐅᒃ,
ᐃᖏᕐᕋᕕᒋᓂᐊᖅᑕᖓ ᐊᖅᑯᑦ ᑐᑭᓕᐊᖅᓯᑎᓪᓗᒍ.”
4ᔪᐊᓇᓯ ᐹᑉᑎᑎᕆᔨ ᓴᖅᑭᓚᐅᖅᐳᖅ ᐃᓄᖃᖏᑦᑐᒥ, ᐊᔪᕆᖅᑐᐃᓪᓗᓂ ᐹᑉᑎᑦᓯᕙᒡᓗᓂᓗ ᖃᕿᐊᓕᖁᓪᓗᒋᑦ ᐊᔪᕐᖕᓃᑦ ᐃᓱᒪᒋᔪᓐᓁᖅᑕᐅᖁᓪᓗᒋᑦ. 5ᐃᓄᐃᑦ ᐊᒥᓱᑦ ᓄᓇᒥᑦ ᔫᑎᐊᒥᑦ, ᔨᕉᓴᓕᒻᒥᓪᓗ ᑐᓵᔭᖅᑐᖅᐳᑦ ᔪᐊᓇᓯᒥᒃ; ᐊᔪᕐᖕᓂᕐᖕᒥᓂᒃ ᖃᕿᐊᓕᕐᖕᒪᑕ, ᔪᐊᓇᓯᐅᑉ ᐹᑉᑎᑉᐰᑦ ᑰᖕᒥ ᔪᐊᕐᑕᓂᒥ.
6 #
ᐊᑕᓃᑦ ᐂᑉᐸᖏᑦ 1:8. ᔪᐊᓇᓯ ᐊᓐᓄᕌᖃᓚᐅᖅᐳᖅ ᑳᒥᓕᐅᑉ ᒥᖅᑯᖓᓂᒃ ᐊᓐᓄᕌᓕᐊᕆᓯᒪᔪᒥᒃ, ᐊᒥᕐᖕᒥᒡᓗ ᕿᑎᕈᓯᖅᓯᒪᓪᓗᓂ, ᓂᕿᖃᕐᓗᓂᓗ ᐱᒡᓕᖅᑕᐅᔮᖅᑐᓂᒃ ᐃᒍᑦᓮᓪᓗ ᓰᕐᖕᓇᐅᑎᖏᓐᓂᒃ ᕼᐊᓂᒥᒃ.#1:6 ᐃᒍᑦᓮᑦ ᒪᒪᖅᑐᖏᓐᓂᒃ 7ᐃᓄᖕᓄᑦ ᐊᔪᕆᖅᑐᐃᕗᖅ, ᐅᖃᕐᓗᓂ: “ᐊᖑᑦ ᑭᖑᓂᓐᓂ ᑎᑭᓐᓂᐊᖅᑐᖅ ᐅᕙᓐᓂᑦ ᐊᔪᖏᓐᓂᖅᓴᕐᔪᐊᖑᕗᖅ, ᓇᓗᖅᑯᑎᕗᖓᓗ ᐅᑯᓗᖓ ᐃᑎᒐᒍᑎᖏᑦᑕ ᕿᓚᒃᓯᒪᐅᑎᖏᓐᓂᒃ ᐲᖅᓯᔭᕆᐊᒥᒃ.#1:7 ᐃᑎᒐᒍᑎᖏᓐᓂᒃ ᓯᖐᑦᔮᖅᓯᔭᕆᐊᒃᓴᖅ 8ᐃᒥᕐᖕᒧᑦ ᐹᑉᑎᑉᐸᑦᓯ; ᑖᑦᓱᒪᓕ ᐹᑉᑎᑦᓱᒫᖅᐹᓯ ᐊᓂᕐᖕᓂᕐᖕᒧᑦ ᐃᑦᔪᕐᖕᓁᑦᑐᒧᑦ.”
ᔩᓱᓯᐅᑉ ᐹᑉᑎᑕᐅᓂᖓ ᐆᒃᑐᕐᓗᒃᑕᐅᓂᖓᓗ
ᒫᑎᐅᓯ 3:13—4:11; ᓘᑲᓯ 3:21-22; 4:1-13
9ᑕᒪᑐᒪ ᑭᖑᓂᖓᒍᑦ ᔩᓱᓯ ᓈᓴᕇᑎᒥᓐᖔᖅᐳᖅ ᒐᓕᓕᐊᒥᑦ, ᔪᐊᓇᓯᒧᓪᓗ ᐹᑉᑎᑕᐅᕗᖅ ᑰᖕᒥ ᔪᐊᕐᑕᓂᒥ. 10ᔩᓱᓯ ᐃᒫᓂᑦ ᖃᑭᖕᒪᑦ, ᕿᓚᖕᒥ ᐊᖕᒪᖅᑐᒥᒃ#1:10 ᐅᒃᑯᐃᖅᑐᒥᒃ ᑕᑯᕗᖅ ᒎᑎᐅᑉ ᐊᓂᕐᖕᓂᖓ ᐊᖅᑲᖅᑐᖅ ᑎᖕᒥᐊᑎᑐᑦ ᑑᕕᑎᑐᑦ ᑖᑦᓱᒧᓐᖓᕐᓗᓂ. 11#ᒨᓯᓯ ᓯᕗᓪᓖᑦ 22:2; ᐃᓐᖏᕈᑦ 2:7; ᐂᓮᐊᓯ 42:1; ᒫᑎᐅᓯ 3:17; 12:18; ᒫᑯᓯ 9:7; ᓘᑲᓯ 3:22.ᓂᐱᒥᒃ ᕿᓚᖕᒥᑦ ᑐᓴᖅᓴᐅᔪᖃᖅᐳᖅ, “ᐃᕐᖕᓂᕆᕙᒋᑦ ᓇᒡᓕᒋᔭᕋ; ᖁᕕᐊᓲᑎᒋᑦᓯᐊᖅᐸᒋᑦ.”
12ᐊᓂᕐᖕᓂᐅᑉ ᑕᕝᕔᓐᓇᖅ ᐊᐅᓪᓚᕈᑎᕚ ᐃᓄᖃᖏᑦᑐᒧᑦ. 13ᐃᓄᖃᖏᑦᑐᒦᓚᐅᖅᐳᖅ ᐅᓪᓗᓂᒃ 40ᓂᒃ, ᓵᑖᓇᓯᒧᑦ ᐱᐅᓐᖏᑐᒧᑦ ᐱᔪᒥᓵᖅᑕᐅᓪᓗᓂ; ᓂᕐᔪᑏᓪᓗ ᓄᔪᐊᖅᑐᑦ ᑕᒫᓃᓚᐅᕆᕗᑦ; ᐂᖏᓖᓪᓕ ᐅᐸᒃᐹᑦ ᐃᑲᔪᕐᓗᒍ.
ᔩᓱᓯᐅᑉ ᕾᖁᔨᓂᖓ ᐃᖃᓗᒐᓱᒃᑎᓂᒃ ᓯᑕᒪᓂᒃ
ᒫᑎᐅᓯ 4:12-22; ᓘᑲᓯ 4:14-15; 5:1-11
14ᔪᐊᓇᓯᐅᑉ ᑎᒍᔭᐅᓂᖓᑕ ᑭᖑᕐᖓᓂ, ᔩᓱᓯ ᒐᓕᓕᐊᒧᐊᖅᐳᖅ, ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᒃ ᒎᑎᒥᒃ ᐊᔪᕆᖅᑐᐃᔪᑎᖃᕐᓗᓂ. 15#ᒫᑎᐅᓯ 3:2.ᐅᖃᕐᓗᓂ, “ᒫᓐᓇ ᓇᓪᓕᐅᑎᕗᖅ, ᒎᑎᐅᑉ ᐊᑕᓂᐅᕕᖓ ᖃᒡᓕᕗᖅ; ᖃᕿᐊᓕᕆᑦᓯ, ᐅᖃᐅᓰᑦ ᑐᓴᕈᒥᓇᖅᑐᑦ ᐅᒃᐱᕆᓯᒋᑦ.”
16ᔩᓱᓯ ᐱᓱᒃᓗᓂ ᒐᓕᓕᐊᑉ ᑕᓯᖓᑕ ᓯᓈᒍᑦ, ᐃᖃᓗᒐᓱᒃᑏᖕᓂᒃ ᒪᕐᕉᖕᓂᒃ ᑕᑯᒐᒥ, ᓮᒨᓂᒥᒃ ᐋᓐᑐᕉᒥᒡᓗ ᓄᑲᕇᖕᓂᒃ ᐃᒫᓂ ᓄᓗᐊᕐᖕᓂᐊᖅᑑᖕᓂᒃ. 17ᔩᓱᓯ ᑖᒃᑯᖕᓄᖓ ᐅᖃᖅᐳᖅ, “ᒪᓕᒃᓯᓐᖓ ᐊᔪᕆᖅᑑᑎᓂᐊᕋᑦᓯᒃ ᖃᓄᖅ ᐃᖃᓗᒐᓱᒃᑐᒃᓴᐅᖕᒪᖔᑦᓯᒃ ᐃᓄᖕᓂᒃ.” 18ᑕᕝᕔᓐᓇᖅ ᓄᓗᐊᒥᖕᓂᒃ ᕿᒤᓪᓗᑎᒃ ᔩᓱᓯᒥᒃ ᒪᓕᒃᓴᖅᐳᒃ.
19ᑕᐅᕗᖓᒃᑲᓐᓂᖅ ᐱᓱᒃᑲᒥ, ᑕᑯᒋᕗᖅ ᓄᑲᕇᖕᓂᒃ, ᔧᒥᓯᒥᒃ ᔪᐊᓇᓯᒥᒡᓗ ᓯᐱᑎᐅᑉ ᐃᕐᖕᓂᖏᖕᓂᒃ, ᑖᒃᑯᐊᒃ ᐅᒥᐊᒥᓃᑉᐴᒃ ᓄᓗᐊᒥᖕᓂᒃ ᐊᓕᒃᓯᒪᓃᔧᓪᓗᑎᒃ. 20ᑕᑯᒐᒥᒋᒃ ᕾᖁᕚᒃ; ᐊᑖᑕᒥᖕᓂᒃ ᓯᐱᑎᒥᒃ ᕿᒤᓪᓗᑎᒃ ᐅᒥᐊᒧᑦ ᐃᓚᑐᐊᖃᓕᖅᑎᓪᓗᒍ ᐱᓇᓱᒃᑎᖁᑎᒥᓂᒃ, ᔩᓱᓯᒥᕐ ᒪᓕᓕᖅᐳᒃ.
ᐊᖑᑎᐅᑉ ᐊᓂᕐᖕᓂᕐᓗᖕᒥᒃ ᐃᓗᒻᒥᖅᑕᐅᓯᒪᔫᑉ ᐋᖅᑭᒃᑕᐅᓂᖓ
ᓘᑲᓯ 4:31-37
21ᑲᐲᕐᓂᐊᒧᑦ ᑎᑭᑉᐳᑦ; ᓴᐸᑎᐅᓕᕐᖕᒪᑦ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓄᐊᖅᐳᖅ ᐊᔪᕆᖅᑐᐃᓕᕐᓗᓂ. 22#ᒫᑎᐅᓯ 7:28,29.ᑐᓵᔪᑦ ᑲᒪᓂᐊᖅᐳᑦ ᐊᔪᕆᖅᑐᐃᓂᖓᓂᒃ, ᐱᖁᔭᓂᒃ ᐃᓕᓮᔨᑎᑐᑦ ᐊᔪᕆᖅᑐᐃᖏᒻᒪᑦ; ᐊᔪᕆᖅᑐᐃᖕᒪᓪᓕ ᐱᔪᓐᓇᖅᓯᑎᑕᐅᓯᒪᔪᑎᑐᑦ.
23ᐊᔪᕆᖅᑐᐃᑎᓪᓗᒍ ᐃᑎᖅᑐᖃᖅᐳᖅ ᑲᑎᒪᕕᒋᔭᖓᓐᓄᑦ ᐊᖑᒻᒥᒃ ᐊᓂᕐᖕᓂᕐᓗᖕᒧᑦ ᐃᓗᒻᒥᖅᑕᐅᓯᒪᔪᒥᒃ; 24ᕾᒐᓛᓕᖅᐳᖅ, “ᐅᕙᑦᑎᓐᓂᒃ ᖃᓄᐃᓕᐅᕆᐊᖅᑐᖅᐲᑦ ᔩᓱᓯ ᓈᓴᕇᑎᒥᐅᖅ? ᐅᕙᑦᑎᓐᓂᒃ ᐊᓯᕈᐃᔭᖅᑐᖅᐲᑦ? ᖃᐅᔨᒪᕗᖓ ᑭᓇᐅᖕᒪᖔᖅᐱᑦ; ᒎᑎᐅᑉ ᐃᑦᔪᕐᖕᓁᑦᑐᖁᑎᒋᕚᑎᑦ.”
25ᔩᓱᓯᐅᑉ ᐊᓂᕐᖕᓂᕐᓗᒃ ᐃᓂᖅᑎᖅᐹᒃ, ᐅᖃᕐᓗᓂ, “ᓂᐱᖃᓐᖏᓚᐅᕆᑦ, ᐃᓄᖕᒥᑦ ᑕᕝᕙᓐᖓᑦ ᐊᓂᒋᑦ!”
26ᐊᓂᕐᖕᓂᕐᓘᑉ, ᐃᓄᒃ ᐊᐅᓚᑎᒻᒪᕆᓕᖅᐹ ᓂᓪᓕᐊᔪᐊᓘᓪᓗᓂ, ᑖᑦᓱᒪᖓᑦ ᐊᓂᕗᖅ. 27ᐃᓄᓕᒫᑦ ᑲᒪᓂᐊᒻᒪᕆᒃᐳᑦ, ᐃᒻᒥᖕᓄᑦ ᐅᖃᖃᑎᒌᓕᕐᓗᑎᒃ, “ᖃᓄᐃᑦᑐᕐᖑᓈ? ᓄᑖᒥᒃ ᐊᔪᕆᖅᑐᓯᖅᑕᖃᓕᕆᕚ? ᐱᔪᓐᓇᕐᖕᓂᒃᑯᑦ ᐊᓂᖁᔨᕗᖅ ᐊᓂᕐᖕᓂᕐᓗᖕᒥᒃ, ᓈᓚᒃᑕᐅᓪᓗᓂᓗ.”
28ᑕᕝᕔᓐᓇᖅ ᔩᓱᓯᐅᑉ ᐱᓂᐊᕐᖕᓂᖓ ᐊᑯᓂᐅᖏᑦᑐᖅ ᑐᓴᐅᒪᔭᐅᓕᖅᐳᖅ ᒐᓕᓕᐊᑉ ᖃᓂᒋᔭᓕᒫᖓᓂ.
ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ
ᒫᑎᐅᓯ 8:14-17; ᓘᑲᓯ 4:38-41
29ᔧᒥᓯ ᔪᐊᓇᓯᓗ ᐃᓚᒋᓪᓗᒋᒃ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓂᑦ ᐊᓂᕗᑦ, ᓮᒨᓂᐅᑉ ᐋᓐᑐᕉᓪᓗ ᐊᖏᕐᕋᖓᓄᑦ ᐂᓪᓗᑎᒃ. 30ᑕᕝᕗᖓᕐᒪᑕ ᐅᖃᐅᑦᔭᐅᕗᖅ ᓮᒨᓂᐅᑉ ᓴᑭᖓ ᐊᕐᖕᓇᖅ ᖃᓂᒪᖕᒪᑦ ᐃᒡᓕᕐᖕᒥ ᓇᓚᓪᓗᓂ, ᐆᑎᕐᖕᓇᖅᑐᒥᒃ ᖃᓂᒪᓪᓗᓂ. 31ᔩᓱᓯᐅᑉ ᐅᐸᒃᓗᒍ ᐊᒡᒐᖏᑎᒍᑦ ᑎᒍᓪᓗᒍ ᐃᖏᑎᑉᐹ, ᐆᑎᕐᖕᓇᖅᑐᒧᑦ ᕿᒪᒃᑕᐅᕗᖅ; ᑖᑦᓱᒪ ᓂᕆᑎᓕᖅᐰᑦ.
32ᓯᕿᓂᖅ ᓂᐱᖕᒪᑦ, ᐅᓐᓄᒃᑎᓪᓗᒍ, ᖃᓂᒪᔪ ᑕᒪᕐᖕᒥᒃ, ᐊᓂᕐᖕᓂᕐᓗᖕᓄᓪᓗ ᐃᓗᒻᒥᑦᑕᐅᓯᒪᔪᑦ ᔩᓱᓯᒧᐊᕈᑎᕔᑦ. 33ᐃᒡᓗᒐᓴᖕᒥᐅᑦ ᐃᓄᓕᒫᖏᑦ ᐃᒡᓘᑉ ᓯᓚᑖᓂ ᑲᑎᓐᖓᓕᖅᐳᑦ. 34ᖃᓄᑐᐃᓐᓇᖅ ᖃᓂᒻᒪᓯᓖᑦ ᐊᒥᓱᑦ ᐋᖅᑭᒃᐰᑦ, ᐊᓂᕐᖕᓂᕐᓗᖕᓄᓪᓗ ᐃᑎᕐᕕᐅᓯᒪᔪᑦ ᐊᒥᓱᑦ ᐊᓂᑎᑦᓯᕕᒋᕔᑦ; ᐊᓂᕐᖕᓂᕐᓗᐃᑦ ᐅᖃᕐᕕᖃᖅᑎᓐᖏᓔᑦ, ᖃᐅᔨᒪᖕᒪᑕ ᑭᓇᐅᖕᒪᖔᑦ.
ᔩᓱᓯᐅᑉ ᐊᔪᕆᖅᑐᐃᓂᖓ ᒐᓕᓕᐊᒥ
ᓘᑲᓯ 4:42-44
35ᐅᓪᓛᒻᒪᕆᒃᑯᑦ ᖃᐅᒻᒪᓚᐅᖅᑎᓐᓇᒍ ᓱᓕ, ᔩᓱᓯ ᒪᑭᑉᐳᖅ ᐊᓂᓪᓗᓂ ᐃᒡᓗᒥᑦ ᐃᓄᖃᖏᑦᑐᒧᐊᖅᐳᖅ ᐃᓄᑑᓪᓗᓂ, ᑕᕝᕙᓂ ᑐᒃᓯᐊᖅᐳᖅ. 36ᓮᒨᓂ ᐃᓚᒋᔭᖏᓪᓗ ᐃᒡᓗᒥᑦ ᐊᓂᒋᕗᑦ ᕿᓂᓕᕐᓗᑎᒃ ᔩᓱᓯᒥᒃ, 37ᓇᓂᒐᒥᑦᔪᒃ ᐅᖃᐅᑎᕚᑦ, “ᐃᓄᓕᒫᓄᑦ ᕿᓂᖅᑕᐅᓕᖅᐳᑎᑦ.”
38ᔩᓱᓯᐅᑉ ᐅᖃᐅᑎᕔᑦ, “ᓄᓇᓕᖕᓄᑦ ᐊᓯᖏᓐᓄᐊᖅᑐᒃᓴᐅᓕᕆᕗᒍᑦ, ᐊᔪᕆᖅᑐᕆᐊᖃᕐᖕᒥᒐᒃᑭᑦ; ᑕᒪᓐᓇ ᐱᑦᔪᑎᒋᓪᓗᒍ ᑕᒪᐅᓐᖓᖅᓯᒪᒐᒪ.”
39 #
ᒫᑎᐅᓯ 4:23; 9:35. ᑍᒤᒻᒪᑦ ᐃᖏᕐᕋᓚᐅᖅᐳᖅ ᒐᓕᓕᐊᒦᑦᑐᓕᒫᓄᑦ ᓄᓇᓕᖕᓄᑦ, ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ ᐊᔪᕆᖅᑐᐃᕙᒡᓗᓂ, ᐊᓂᕐᖕᓂᕐᓗᖕᒥᑦ ᐃᑎᖅᑕᐅᓯᒪᔪᑦ ᐃᓄᐃᑦ ᐊᓂᑎᑦᓯᕕᒋᕔᑦ.
ᔩᓱᓯᐅᑉ ᐊᖑᒻᒥᒃ ᐋᖅᑭᒃᓯᓂᖓ
ᒫᑎᐅᓯ 8:1-4; ᓘᑲᓯ 5:12-16
40ᐊᖑᑦ ᓯᕘᕋᒋᔭᐅᔪᒥᒃ ᐸᖅᑎᖅᑐᖅ ᔩᓱᓯᒧᐊᖅᐳᖅ, ᓵᖓᓄᑦ ᓰᖅᑯᕐᓗᓂ ᔩᓱᓯᒧᑦ ᐃᑲᔪᖅᑕᐅᔪᒪᓪᓗᓂ ᐅᖃᖅᐳᖅ, “ᐱᔪᒪᒍᕕᑦ, ᐸᖅᑎᕈᓐᓃᖅᑎᑦᓱᓐᓇᖅᐸᕐᖕᒪ.”
41ᔩᓱᓯᐅᑉ ᓇᓪᓕᒋᓕᖅᐹ, ᐃᓴᒃᓗᒍ ᐊᒃᑐᕐᓗᓂᐅᒃ, ᐅᖃᐅᑎᕚ, “ᐱᔪᒪᕗᖓ, ᐸᖅᑎᕈᓐᓃᕆᑦ.” 42ᑕᕝᕔᓐᓇᖅ ᐊᖑᑦ ᓯᕘᕋᒋᔭᐅᔪᒥᒃ ᐸᖅᑎᕈᓐᓃᖅᐳᖅ. 43ᔩᓱᓯᐅᑉ ᕿᒪᕉᑎᖁᓚᐅᕋᓂᐅᒃ ᐃᓂᖅᑎᓪᓚᕆᒃᓗᒍ ᐅᖃᐅᑎᕚ, 44#ᒨᓯᓯ ᐱᖓᔪᖏᑦ 14:1-32.“ᑕᒪᓐᓇ ᑭᓇᑐᐃᓐᓇᕐᖕᒧᑦ ᐅᖃᐅᓯᕆᑦᑍᓕᒍᒃ; ᑐᒃᓯᐊᕐᕕᒡᔪᐊᒥᓕ ᑐᓂᕐᕈᓯᖅᑎᑦᓯᔨᒧᑦ ᐂᓕᕆᑦ, ᑖᑦᓱᒧᖓ ᖃᐅᔨᓴᖅᑕᐅᓂᐊᕋᕕᑦ; ᐃᓄᓕᒫᓄᑦ ᖃᐅᔨᔭᐅᖁᓪᓗᑎᑦ ᐋᖅᑭᒃᑕᐅᑦᓯᐊᕐᖕᓂᕐᖕᓂᒃ, ᒨᓯᓯᐅᑉ ᑐᓂᔭᐅᖁᔭᖓᓂᒃ ᑐᓂᕐᕈᓯᕐᖕᓂᐊᖅᐳᑎ.”
45ᐊᖑᑦ ᕿᒪᕉᑎᒐᒥ ᐅᖃᖅᑍᓕᒪᖏᑦᓯᐊᕐᓗᓂ ᐅᖃᖃᑦᑕᖅᐳᖅ, ᐅᖃᓗᐊᕐᖕᓂᖓᓄᑦ ᔩᓱᓯ ᓴᖅᑭᔮᑦᓯᐊᕐᓗᓂ ᓄᓇᓕᖕᓄᐊᕈᓐᓁᓪᓕᕗᖅ, ᐃᓄᖃᖏᑦᑐᒥ ᑭᓯᐊᓂ ᐃᓂᖃᕈᓐᓇᓕᖅᐳᖅ; ᐃᓄᐃᑦ ᔩᓱᓯᒧᐊᖅᐳᑦ ᓇᑭᑐᐃᓐᓈᖅᓯᒪᔪᑦ.
Currently Selected:
ᒫᑯᓯᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.